Ripot Long Wok Blong Kingdom
“God i Stap Mekem i Sem Mak Nomo Long Olgeta Man”
NAENTIN handred yia bifo, tabu speret i pusum aposol Pita blong talem se: “God i stap mekem i sem mak nomo long olgeta man . . . Sipos wan man i ona long God, mo i mekem ol samting we i stret long fes blong hem, bambae God i glad long hem.” (Ol Wok 10:34, 35) Long medel blong ol Wetnes blong Jeova, yumi save faenem ol man we oli kamaot long ol defren kantri mo ol fasin blong wosip. Oli wantem stret fasin, mo oli fraetgud long God. Jeova i glad blong tekem olgeta oli kam insaed long nyufala wol sosaeti. Wan eksampel, hem i mekem olsem long wan woman long Jad.
Skul blong woman ya i no stret wetem tingting blong hem. Plante yia bifo, hem i bin kasem buk ya Your Youth—Getting the Best Out Of It, we ol Wetnes blong Jeova oli prentem, mo hem i glad long ol nambawan advaes we oli stap insaed long buk ya. Hem i stat blong stadi Baebol, mo oltaem hem i stap long taem blong stadi. Be, taem oli leftemap tingting blong hem blong go long ol miting long Haos Kingdom, hem i no toktok. ?From wanem? Nating se hasban blong hem i no agensem stadi blong hem, be hem i no agri blong letem waef blong hem blong go long ol miting long Haos Kingdom.
Taem waef blong man ya i wantem go long wan seket asembli, Wetnes ya we i stap mekem stadi i soem program blong asembli long hasban ya, mo i makem ol gudgudfala advaes we bambae i kamaot. Hem i agri blong letem waef blong hem i go “long wan miting nomo.” Waef ya i go mo i haremgud tumas long program ya. Afta we hem i eksplenem long hasban blong hem ol samting we hem i lanem, hasban ya i no moa blokem hem blong no go long ol narafala miting. Woman ya i haremgud tumas blong luk se olgeta long kongregesen oli kamaot long ol defren grup blong man mo oli keagud long wanwan long olgeta. Biaen, hem i go long wan distrik asembli, mo hem i haremgud bitim mak taem i luk we ol pikinini blong hem oli stap sidaon long leg blong ol Wetnes we oli kam long ol narafala kantri. Ol Wetnes oli serem kakae wetem ol pikinini ya mo oli mekem olsem we oli prapa famle blong olgeta nomo. Samting ya i jenisim tingting blong hem olgeta.
Be fasin agens i kam biaen. Nating se hem i gat fasin fraet, hem i stat blong givim ansa long ol miting mo i stanap strong agensem ol tok blong agens we ol famle mo ol man raonabaot long hem oli stap talem. Plante yia finis, hem i bin stap wetem hasban blong hem, be tufala i mared nomo long saed blong kastom. ?Olsem wanem hem i save mekem mared blong hem i folem loa? Afta we hem i prea long Jeova wetem ful hat blong hem, hem i tokbaot samting ya long hasban blong hem, we i talem se bambae hem i traem blong stretem samting ya. Biaen hem i mekem, mo tufala i mared folem loa.
Wan sista blong hasban ya we i stap wetem olgeta i mekem plante problem, be hasban ya i tekem saed blong waef blong hem. Ale papa blong hasban i kam visitim olgeta. Hem i talem long boe blong hem se hem i mas mekem divos long waef blong hem, from waef ya i jenisim skul blong hem. Papa ya i talem long boe blong hem se hem i save pem wan waef long boe blong hem, wan “waef we i moa gud.” Boe ya i ansa se: “No gat, bambae mi no mekem samting ya. Hem i wan gudfala waef ya. Sipos hem i wantem go, hemia i defren, be bambae mi no talem se hem i mas go.” Waef ya i kaengud tumas long papa blong hasban blong hem, mo papa blong hasban blong hem i sem tumas from fasin we i mekem. Be, taem hem i gobak long velej blong hem, hem i raetem leta i go long boe blong hem, naioa hem i talem se boe blong hem i mas mekem wan disisen. Hem i talem se sipos boe blong hem i no agri blong ronemaot waef blong hem, bambae hem i no moa stap olsem pikinini blong hem. Bakegen, boe ya i tekem saed blong waef blong hem. Tingbaot glad blong waef ya taem i luk hasban blong hem i mekem wan strong disisen olsem.
Naoia tufala smol boe blong tufala, tufala i laekem blong folem mama blong tufala i go long Haos Kingdom. Tufala i askem nektae tu long papa blong tufala, from tufala i luk we olgeta brata we oli givim tok, oli putum nektae. Tede woman ya i baptaes finis olsem wan sista.
Hem i wan long ol 345 hapi Wetnes long Jad, we oli stap talemaot gud nyus blong Kingdom blong Jeova, mo hem i luksave se, i tru, “God i stap mekem i sem mak nomo long olgeta man.”