Hem i Kasem Samting We Hat Blong Hem i Wantem

?HAT blong yu i wantem luk Kingdom blong Mesaea i rul long olgeta ples blong wol? Sipos i olsem, yu wantem tumas mo prea from promes ya long saed blong ol blesing long wol aninit long Kingdom ya blong heven. Ale, soem longfala tingting, from we, “samting we yu wantem, hem i olsem wan tri blong laef taem bambae yu kasem.”​—⁠Proveb 13:12; Jemes 5:​7, 8.

Kolosap 2,000 yia bifo, long Jerusalem, Simeon we i wan “stret man mo i wan man blong prea, i stap laef.” Hem i bilif fulwan long ol profet tok long saed blong Mesaea mo i gat longfala tingting blong “wet blong luk Mesaea i kam leftemap ol man Isrel.”​—⁠Luk 2:⁠25.

Ol Profet Tok Long Saed Blong Mesaea i Givim Hop

Jeova nao i talem faswan profet tok long saed blong Mesaea​—⁠profet tok ya i givim hop long ol man we oli gat sin mo oli stap ded. God i bin tokbaot Laen blong “woman” blong hem we bambae i kam, no ogenaesesen blong hem long heven.​—⁠Jenesis 3:⁠15.

Man ya bambae i olsem Laen blong Ebraham, mo Jekob i tokbaot we bambae i kam. (Jenesis 22:​17, 18; 49:10) Ol Sam i leftemap ol gudfala samting long saed blong Kingdom blong Mesaea. (Ol Sam 72:​1-20) Aesea i talem se wan vegin nao bambae i bonem Laen ya, mo Maeka i talemaot se bambae hem i bon long Betlehem. (Aesea 7:14; Maeka 5:⁠2) Hemia sam nomo blong plante profet tok long saed blong Mesaea.

!I No Gat Mesaea Yet!

Tingtingbak long ol yia bifo, mo tingbaot se faswan handred yia K. T. i stap kam kolosap. 4000 yia finis God i talem faswan profet tok long saed blong Mesaea. Ol man Jyu oli bin pastru long taem ya we ol man oli spolem haos prea blong Jeova, ples blong olgeta i kam nogud, oli kalabus 70-yia long Babilon, mo oli stap aninit long rul blong ol Hiten man go kasem 500 yia biaen. !Be i no gat Mesaea yet!

!Ol man Jyu we oli fraetgud long God oli wantem tumas blong Mesaea i kam! Hem nao bambae i givim fulap blesing long olgeta mo long olgeta nesen long wol.

Wan Man Blong Prea

Wan long ol man Jyu we oli stap ona long God longtaem mo we i wantem tumas mo i stap prea blong Mesaea i kam, hemia Simeon, olfala man blong God we i gat strong bilif mo i stap laef long bigfala taon blong Judia. Wan samting we i defren olgeta i kamaot long Simeon.

God i putum tabu speret blong hem long Simeon mo i bin givim wan presen long hem, i soemaot wan samting long hem. Simeon bambae i no ded kasem taem we bambae hem i luk Hemia we bambae i kam olsem Mesaea. Be ol dei mo ol manis oli stap pas. Simeon i stap kam moa olfala mo hem i no ting se bambae hem i save laef longtaem. ?Promes ya we God i mekem long hem bambae i kamtru?

Wan dei (long 2 B.K.T.), wan yangfala man mo woman, tufala i aot long Betlehem i karem wan bebi i kam long haos prea. Tabu speret i talem long Simeon se hemia nao dei ya we hem i wet longtaem finis from. Hem i go long haos prea, long ples ya nao bambae i luk Hemia we ol profet oli bin raetem ol profet tok long saed blong hem. Hem i go kwik olsem we olfala bodi blong hem i save mekem, nao hem i luk Josef, Meri, mo pikinini ya.

!Simeon i glad tumas taem i karem pikinini ya Jisas long han blong hem! Hemia nao bambae i Mesaea ya we God i promes long hem​—⁠“Kraes blong Jeova.” From we Simeon i olfala finis, hem i no save gat hop blong luk Jisas taem bambae i mekem ol wok we hem i kam long wol blong mekem. Be, i namba wan blong luk hem olsem wan bebi. Profet tok long saed blong Mesaea i stat kamtru. !Simeon i glad tumas! Naoia bambae hem i glad blong go slip long ded kasem taem we bambae i girap bakegen.​—⁠Luk 2:​25-28.

Ol Tok Profet Blong Simeon

Taem Simeon i leftemap voes blong hem blong presem Jeova, yumi harem we i talem se: “Hae God, mi mi man blong wok nomo blong yu, be naoia yu save letem mi mi finis, we tingting blong mi i stap kwaet, from we promes blong yu i kamtru finis. Long ae blong mi nomo, mi mi luk rod blong yu blong sevem man. Long fes blong ol man blong olgeta ples, yu yu mekem rod ya i rere finis. Hemia i wan laet blong givim laet long ol hiten man, mo hem bambae i leftemap nem blong mifala man Isrel, we mifala i man blong yu.” Josef, Papa we i adoptem Jisas, mo mama blong Hem, Meri, tufala i stap tingbaot mining blong ol tok ya.​—⁠Luk 2:​29-33.

Fes blong Simeon i glad taem hem i blesem Josef mo Meri, i klia se hem i wantem we blesing blong Jeova i stap wetem tufala taem tufala i mekem ol wok blong tufala blong lukaot long pikinini ya. Biaen, fes blong olfala man ya i kam strong. Hem i toktok stret long Meri hem wan, hem i gohed i se: “!Yu luk! God i jusumaot pikinini ya blong hem i mekem plante man Isrel oli foldaon, mo blong i mekem plante oli kam antap. God i jusum hem blong hem i wan saen, we bambae plante man oli save tok agens long hem, blong bambae plante man oli save soemaot tingting blong olgeta we i stap haed. Be ol samting ya bambae i kasem tingting blong yu olsem wan naef blong faet we i stikim yu.”​—⁠Luk 2:​34, 35.

Tok Blong Simeon We i Go Long Meri

Tingbaot filing blong Meri. ?Simeon i minim wanem? Sam bambae oli akseptem Kraes mo kamaot long ol fasin we oli foldaon long olgeta. Be, sam narafala bambae oli no laekem hem, oli stambol long hem mo foldaon. Olsem we profet tok i talem, Jisas i pruvum se hem i ston ya we plante man Jyu oli stambol long hem. (Aesea 8:14; 28:16) Tok blong Simeon i no minim se wanwan man Isrel bambae oli foldaon fastaem from we oli no bilif mo biaen bambae oli girap from we oli akseptem Jisas nao oli bilif. Be, i minim se, wanwan man bambae oli soemaot ol defren tingting long saed blong Jisas, bambae ol tingting long hat blong olgeta oli kam long klia ples mo bambae i lidim olgeta oli go long jajmen blong God long olgeta, maet wan jajmen we i gud no wan jajmen we i nogud. Long ol man we oli no bilif, bambae hem i olsem wan saen, no wan samting we oli no laekem nating. Taem oli bilif long hem, ol narafala man we oli olsem ded from we oli mekem ol samting we i nogud mo sin, bambae oli girap, blong bambae oli save haremgud long fasin ya we oli stanap long fes blong God olsem ol stret man. Ol samting we ol man oli mekem long Mesaea bambae i soemaot wanem i stap long hat blong olgeta.

?Tok blong Simeon i minim wanem taem hem i talem se: “Ol samting ya bambae i kasem tingting blong yu olsem wan naef blong faet we i stikim yu”? I no gat wan vas long Baebol we i talem se wan naef blong faet i stikim Meri. Be, fasin blong bighaf blong ol man blong no laekem Jisas bambae i mekem tingting blong Meri i trabol. !Mo Meri i harem nogud tumas taem hem i luk we oli nilim Jisas long wan pos! Hemia i olsem wan naef blong faet we i stikim hem.

Simeon i Luksave Mining Blong Ol Profet Tok Long Saed Blong Mesaea

Speret blong God i pusum Simeon blong joenem ol profet tok ya long saed blong Mesaea wetem Jisas. Simeon i save ded long pis, no wetem tingting we i kwaet, ‘from we long ae blong hem nomo, hem i luk rod blong God blong sevem man. Long fes blong ol man blong olgeta ples hem i mekem rod i rere finis. Hemia i wan laet blong givim laet long ol hiten man, mo hem bambae i leftemap nem blong ol man Isrel.’ (Luk 2:​30-32) !Tok ya i joengud wetem ol profet tok blong Aesea!

Profet ya i talem se: “Laet blong Jeova bambae i saenaot bigwan, mo olgeta man evriwan oli mas luk long wan taem.” “Mi [Jeova] mi givim [Mesaea] tu long yufala olsem wan laet blong olgeta nesen, blong paoa blong mi blong sevem man i save go long olgeta ples long wol.” (Aesea 40:5; 42:6; 49:6; 52:10) Ol Kristin Grik haf blong Baebol mo ol samting we ol man oli save luk, i stat long taem ya, oli soemaot se Mesaea, Jisas Kraes, i trufala laet blong olgeta nesen, Hem nao bambae i karemaot ol samting we oli holemtaet ol man oli stap long tudak long saed blong speret mo i sevem ol man.

Tok blong God i no moa talem wan samting long saed blong olfala Simeon. I klia se hem i ded bifo we Kraes i openem rod blong laef long heven. Taswe i no longtaem, Simeon bambae i girap bakegen blong laef long wol. !Hem bambae i save glad tumas​—⁠mo yu tu​—⁠long nyufala wol aninit long Kingdom blong God long han blong Mesaea!