Jeova, God Blong Mekem Ol Stampa Tingting Blong Hem Oli Kamtru
“Tru ya, bambae i kamaot olsem mi talem finis. Advaes we mi givim finis, bambae i kamtru.”—AESEA 14:24.
1, 2. ?Plante man oli talem wanem long saed blong stampa risen blong laef?
OL MAN long olgeta ples oli askem se: “?Wanem i stampa risen blong laef?” Wan lida long saed blong politik long Wes i talem se: “I gat moa man bitim bifo we oli stap askem se, ‘?Yumi hu ya? ?From wanem risen yumi stap laef?’ ” Taem wan nyuspepa i askem kwestin long ol yangfala se wanem stampa risen blong laef, ansa blong olgeta se: “Blong mekem wanem we hat blong yu i wantem mekem.” “Fulumap evri menet long laef.” “Haremgud mo no blokem yu long wan samting.” “Blong gat ol pikinini, stap glad mo biaen yumi ded.” Plante oli ting se i gat laef ya nomo we yumi stap long hem naoia. I no gat man i tokbaot wan stampa risen blong laef long wol, we i givim hop long fyuja.
2 Wan man we i stadi long tijing blong Konfusyus i talem se: “Bigfala mining blong laef yumi faenem long evridei laef blong yumi, olsem ol man blong wol ya nomo.” Folem tingting ya, bambae i gohed olsem we, ol man oli bon, oli hadwok blong 70 no 80 yia, biaen oli ded mo oli no moa laef blong olwe. Wan sayentis we i bilif long evolusena i talem se: “Yumi save wantem tumas wan ansa we i ‘moagud’—be i no gat.” Long tingting blong ol man ya long saed blong evolusen, man i mas hadwok blong stap laef, mo ded i en blong hem. Ol tingting olsem oli no givim hop long yumi nating, long saed blong laef.
3, 4. ?Olsem wanem trabol we i stap long wol naoia i spolem tingting blong plante man long saed blong laef?
3 Plante oli ting se laef i no gat stampa risen blong hem taem oli luk se laef blong ol man i nogud tumas. Long taem blong yumi, oli stap talem se ol man oli kasem wan hae mak long saed blong ol samting we ol faktri oli save mekem, mo long saed blong sayens, be, kolosap wan bilyan man long olgeta ples long wol oli harem nogud tumas long sik no kakae i sot. Plante milyan pikinini oli ded evri yia long ol trabol olsem. Antap long samting ya, long ol yia biaen long 1900, namba blong ol man we oli ded long faet i kam antap fo taem moa bitim ol fo handred yia bifo. Fasin blong brekem loa, raf fasin, fasin blong tekem drag, famle i seraot, AIDS mo ol narafala sik long saed blong seks—lis blong ol nogud samting ya i gohed nomo. Ol lida blong wol oli no save rod blong stretem ol trabol ya.
4 From ol nogud samting olsem we oli stap kamaot, wan woman i talemaot tingting blong plante man se: “I no gat wan gudfala risen blong laef. Sipos ol nogud samting ya oli stap kamaot, laef i no gat tumas mining.” Mo wan olfala man i talem se: “Long ful laef blong mi, mi bin askem from wanem mi stap laef. Sipos i gat wan risen, mi mi no moa kea.” Plante long ol man oli no save from wanem God i letem fasin nogud i stap, from samting ya, ol trabol long wol i mekem olgeta oli no gat trufala hop long fyuja.
5. ?Olsem wanem ol skul blong wol oli mekem tingting blong ol man i fasfas long saed blong stampa risen blong laef?
5 Ol lida blong ol skul tu oli gat ol defren tingting, mo oli no save gud, long stampa risen blong laef. Wan man we bifo i pris blong Katolik long Sen Pol Jyos long London i talem se: “Long ful laef blong mi, mi mi traehad blong faenem stampa risen blong laef. . . . Mi no winim.” Tru ya, plante lida blong skul oli tijim se ol gudfala man oli go long heven taem oli ded, mo ol nogud man oli go long helfaea blong olwe. Be tingting ya i lego ol man blong wol yet blong oli gohed nomo long rod blong harem nogud. Mo sipos hemia stampa tingting blong God blong gat ol man long heven, ?from wanem hem i no jes mekem olgeta oli olsem speret man fastaem, olsem we i bin mekem ol enjel, olsemia nao bambae ol man oli no stap harem nogud tumas? Taswe tingting blong fulap man i fasfas long stampa risen blong laef long wol, no oli no wantem bilif se i gat risen i stap.
God Blong Mekem Ol Stampa Tingting Blong Hem Oli Kamtru
6, 7. ?Baebol i talem wanem long yumi long saed blong Hemia We i Hae Moa long olgeta wol?
6 Be, Tabu Baebol, buk ya we oli givimaot plante bitim ol narafala buk long ol yia we oli pas, i talem long yumi se Jeova, Man ya we i Hae long olgeta wol, hem i God blong mekem ol stampa tingting blong hem oli kamtru. I soemaot long yumi se hem i gat wan stampa tingting long saed blong fyuja, yes, long saed blong laef we i no save finis, blong olgeta man long wol ya. Mo taem Jeova i gat wan stampa tingting, bambae i mas kamaot. Olsem we ren i mekem sid i gru, God i talem se, “bambae i mas hapen olsem long tok we i kamaot long maot blong mi. I no save kambak long mi sipos i no gat frut blong hem, be bambae i kamaot olsem we mi haremgud long hem, mo bambae i mekem samting we mi mi sanem hem from.” (Aesea 55:10, 11) Wanem samting we Jeova i talem se bambae hem i mekem, hemia nao samting we “bambae i kamtru.”—Aesea 14:24.
7 Yumi ol man yumi save trastem fulwan se Hemia we i hae olgeta bambae i mekem ol promes blong hem i kamtru, from we God “i no save gyaman.” (Taetas 1:2; Hibrus 6:18) Taem hem i talem long yumi se bambae hem i mekem wan samting, tok blong hem i olsem wan strong promes se bambae samting ya i kamtru. Yumi save sua long samting ya, olsem we i kamtru finis. Hem i talemaot se: “Mi mi God mo i no gat narafala God, no wan we i olsem mi; mi ya mi stap talemaot en blong wan bisnes long stat blong hem, mo mi talemaot longtaem finis ol samting we oli no kamaot yet; mi ya mi stap talem se, ‘Advaes blong mi bambae i stanap, mo evri samting we mi glad long hem bambae mi mas mekem’. . . Mi mi talemaot finis; bambae mi mekem i kamtru. Mi mi mekemrere finis, bambae mi wokem tu.”—Aesea 46:9-11.
8. ?Olgeta we oli rili wantem blong save God oli save faenem hem?
8 Mo tu, Jeova “i no wantem blong ol man oli lus. Hem i wantem blong olgeta man bambae oli tanem tingting blong olgeta from ol sin blong olgeta.” (2 Pita 3:9) From risen ya, hem i no wantem we wan man i no save long hem. Wan profet we nem blong hem Asaraea i talem se: “Sipos yu lukaotem [God], hem bambae i letem blong yu faenem hem, be sipos yu lego hem, hem bambae i lego yu.” (2 Kronikel 15:1, 2) Taswe, olgeta we oli wantem tumas blong save God mo ol stampa tingting blong hem long saed blong fyuja, oli save mekem olsem sipos oli traehad blong lukaotem hem.
9, 10. (a) ?Wanem samting i stap blong givhan long olgeta we oli wantem blong save God? (b) ?Luklukgud long Tok blong God i save givhan long yumi blong mekem wanem?
9 ?Lukaotem wea? God i givim Tok blong hem, Baebol, long olgeta we oli rili lukaotem hem. Tru long tabu speret blong hem, semfala paoa ya we hem i bin yusum blong wokem heven mo wol, God i lidim ol trufala man blong bilif blong raetemdaon ol samting we yumi nidim blong save long ol stampa tingting blong hem long saed blong fyuja. Eksampel, long saed blong profet tok blong Baebol, aposol Pita i talem se: “I no gat tok blong profet we i kamaot from we man nomo i wantem olsem. Taem tok blong profet i kamaot, ol profet oli talem, be Tabu Speret i stap givim tok long olgeta, nao oli talemaot tok we i kamaot long God.” (2 Pita 1:21) Long sem fasin, aposol Pol i talemaot se: “Olgeta tok ya blong Baebol oli kamaot long God fastaem. Hem i putum long tingting blong ol man ya bifo blong oli raetem long buk. Nao ol tok ya i stret gud blong tijim ol man long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim ol man long ol stret fasin. Ol tok ya, God i givim blong bambae ol man blong hem oli save kam waes long olgeta samting, bambae oli gat evri samting blong mekem ol gudfala wok we i stap.”—2 Timote 3:16, 17; 1 Tesalonaeka 2:13.
10 Tingbaot se Tok blong God i save mekem se yumi kam waes, i no smol nomo no long sam samting nomo, be “long olgeta samting, yumi gat evri samting blong mekem ol gudfala wok.” I save mekem man i sua se God hem i hu, wanem ol stampa tingting blong hem long saed blong fyuja, mo wanem hem i wantem se ol man blong hem oli mas mekem. Hemia nao wanem we yumi save se i mas stap insaed long wan buk we i kamaot long God. Mo hemia nomo i stampa samting we yumi save luklukgud insaed long hem blong kasem stret save long God. (Proveb 2:1-5; Jon 17:3) Sipos yumi mekem olsem, bambae yumi “no moa stap olsem pikinini. Ol tok blong ol man ya we oli gyaman, we oli save wokem ol trik, mo oli save lidim ol man oli go krangke, bambae oli no save tantanem yumi. Bambae yumi no olsem kenu we solwora i save sakem i go olbaot, win i save tekem i go, no gat.” (Efesas 4:13, 14) Man blong raetem Ol Sam i soemaot tingting we i stret se: “Hae God, tok blong yu hem i laet we i stap lidim mi, hem i laet blong rod blong mi.”—Ol Sam 119:105.
Sloslou i Talemaot
11. ?Olsem wanem Jeova i bin talemaot ol stampa tingting blong hem long ol man, long saed blong fyuja?
11 Long stat blong famle blong man, Jeova i talemaot ol stampa tingting blong hem long saed blong wol ya mo ol man we oli stap long hem. (Jenesis 1:26-30) Be taem faswan papa mo mama blong yumi oli no wantem stap aninit long rul blong God, ol man long wol oli foldaon long tudak long saed blong speret mo long ded. (Rom 5:12) Nating se i olsem, Jeova i save se bambae i gat sam man we oli wantem wosip long hem. From samting ya, tru long ol handred yia we i pas, sloslou hem i talemaot ol stampa tingting blong hem long saed blong fyuja, long ol man blong hem we oli bilif. Sam long ol man ya we hem i toktok wetem olgeta, hemia Inok (Jenesis 5:24; Jud 14, 15), Noa (Jenesis 6:9, 13), Ebraham (Jenesis 12:1-3), mo Moses (Eksodas 31:18; 34:27, 28). Profet blong God, Emos i raetem se: “Haefala Masta Jeova bambae i no mekem wan samting sipos i no bin talemaot ol tok haed blong hem fastaem long ol man blong hem, ol profet.”—Emos 3:7; Daniel 2:27, 28.
12. ?Olsem wanem Jisas i givim moa save long saed blong ol stampa tingting blong God?
12 Taem Pikinini blong God, Jisas Kraes, i stap long wol ya samwe long 4,000 yia afta we fasin agens i kamaot long Iden, Jeova i talemaot plante moa samting long saed blong ol stampa tingting blong hem we bambae hem i mekem i kamtru long fyuja. Samting ya i tru moa long saed blong stampa tingting blong God blong putumap wan Kingdom long heven blong rulum wol ya. (Daniel 2:44) Jisas i mekem Kingdom ya i stampa tijing blong hem. (Matyu 4:17; 6:10) Hem mo ol disaepol blong hem oli tijim ol man se aninit long Kingdom ya, stampa tingting blong God long saed blong wol ya mo ol man bambae i kamtru. Wol ya bambae i kam wan paradaes we ol stret man nomo bambae oli stap long hem, we bambae oli laef blong olwe. (Ol Sam 37:29; Matyu 5:5; Luk 23:43; 2 Pita 3:13; Revelesen 21:4) Antap long samting ya, Jisas mo ol disaepol blong hem oli soemaot wanem we bambae i kamaot long nyufala wol ya, taem oli mekem ol merikel we God i givim paoa long olgeta blong mekem.—Matyu 10:1, 8; 15:30, 31; Jon 11:25-44.
13. Long saed blong ol samting we God i mekem long ol man, ?wanem jenis we i kamaot long Pentekos 33 K.T.?
13 Long Pentekos 33 K.T., 50 dei biaen long taem ya we Jisas i laef bakegen, God i kafsaedem tabu speret blong hem long kongregesen blong ol man blong Kraes. Kongregesen ya i tekem ples blong ol man Isrel we oli no holemstrong bilif long Jeova olsem wan nesen we Jeova i bin mekem kontrak wetem olgeta. (Matyu 21:43; 27:51; Ol Wok 2:1-4) Tabu speret ya we i kam fulap long olgeta long taem ya i soemaot se, stat long taem ya i go, God bambae i talemaot ol trutok long saed blong ol stampa tingting blong hem tru long nyufala tul ya. (Efesas 3:10) Long faswan handred yia K.T., oli stanemap plan we bambae oli folem blong mekem ol wok insaed long Kristin kongregesen.—1 Korin 12:27-31; Efesas 4:11, 12.
14. ?Olsem wanem ol man blong lukaot trutok oli save luksave trufala Kristin kongregesen?
14 Tede, ol man we oli lukaot trutok oli save luksave trufala Kristin kongregesen from fasin we hem i stap soemaot oltaem, hemia nambawan fasin blong God, lav. (1 Jon 4:8, 16) Tru ya, fasin ya we yumi laeklaekem yumi tumas i makemaot ol trufala Kristin. Jisas i talem se: “Nao from we yufala i stap laeklaekem yufala, bambae olgeta man oli luksave se yufala i man blong mi.” “Hemia loa blong mi, se ‘Yufala i mas laeklaekem yufala, olsem we mi mi laekem yufala.’ ” (Jon 13:35; 15:12) Mo long ol man we oli stap lesin long Jisas, hem i talem bakegen long olgeta se: “Sipos yufala i stap mekem ol samting we mi mi givim loa blong hem long yufala, yufala ya i fren blong mi, we mi laekem yufala tumas.” (Jon 15:14) Taswe ol trufala man blong God oli ol man we oli folem loa blong lav long laef blong olgeta. Oli no jes talem, from we ‘bilif we i no gat wok wetem i ded.’—Jemes 2:26.
Moa Save
15. ?Ol man blong God oli save sua long wanem samting?
15 Jisas i talem se long ol taem we i stap kam, trufala Kristin kongregesen bambae i kasem moa save long saed blong ol stampa tingting blong God. Hem i promes long ol man blong hem se: “Speret blong givhan ya, we hemia Tabu Speret ya we bambae Papa blong mi i save sanem i kam long nem blong mi, bambae hem i save tijim yufala long olgeta samting.” (Jon 14:26) Jisas i talem tu se: “Yufala i mas save, bambae mi mi stap wetem yufala oltaem, gogo wol ya i finis.” (Matyu 28:20) Olsem nao, save long saed blong trutok blong God mo ol stampa tingting blong hem i stap kam bigwan moa long medel blong ol man blong God. Yes, “rod blong ol stret man i olsem laet we i saen mo i saen moa gud gogo kasem we delaet i kamaot.”—Proveb 4:18.
16. ?Save blong yumi long saed blong speret we i stap kam antap moa, i save talem wanem long saed blong ol stampa tingting blong God long fyuja?
16 Tede, laet ya long saed blong speret i saen moa bitim bifo, from we yumi stap long taem ya we plante profet tok blong Baebol oli stap kamtru no kolosap bambae oli kamtru fulwan. Ol profet tok ya oli soemaot long yumi we yumi stap laef long “ol las dei” blong ol rabis fasin blong wol ya. Hemia taem ya we oli kolem se ‘en blong ol fasin blong naoia’; bambae nyufala wol blong God i kamaot biaen. (2 Timote 3:1-5, 13; Matyu 24:3-13) Olsem we profet tok blong Daniel i talem, i no longtaem bambae Kingdom blong God long heven i “spolem mo finisim olgeta kingdom ya [we oli stap naoia], mo bambae hem i stanap blong olwe.”—Daniel 2:44.
17, 18. ?Wanem ol bigfala profet tok we oli stap kamtru naoia?
17 Wan long olgeta profet tok we i stap kamtru fulwan naoia, hemia wan we i stap long vas 14 blong Matyu japta 24. Long ples ya Jisas i talem se: “Nao bambae ol man oli stap talemaot gud nyus ya se God i king blong olgeta man. Bambae oli talemaot long olgeta ples long wol, blong oli wetnes blong hem long fes blong olgeta man. Nao biaen, bambae Lasdei i save kam.” Long olgeta ples long wol, plante milyan Wetnes blong Jeova oli stap mekem wok ya blong talemaot gud nyus blong Kingdom. Mo plante handred taosen man oli stap joenem olgeta evri yia. Samting ya i fulumap profet tok blong Aesea 2:2, 3, we i talem se, “long las haf blong ol dei” blong rabis wol ya, ol man blong plante nesen bambae oli joen long trufala wosip blong Jeova, mo ‘hem bambae i tijim olgeta long ol fasin blong hem, mo olgeta bambae oli wokbaot long ol rod blong hem.’
18 Olsem Aesea japta 60 vas 8 i talem, ol nyuwan ya oli stap kam olsem wan hif long wosip blong Jeova, “olsem wan klaod.” Vas 22 i ademap se: “Wan smolwan hem wan bambae i kam wan taosen, mo wan smolwan bambae i kam wan bigfala nesen. Mi Jeova, bambae mi mekem i spid long prapa taem blong hem.” Ol pruf oli soemaot klia se prapa taem ya, hemia naoia. Mo ol nyuwan oli save sua se taem oli joen wetem ol Wetnes blong Jeova, oli faenem trufala Kristin kongregesen.
19. ?From wanem yumi save talem se ol nyuwan we oli joen wetem ol Wetnes blong Jeova oli stap kam long trufala Kristin kongregesen?
19 ?From wanem yumi save talem samting ya wetem strong bilif? From we ol nyuwan ya, wetem plante milyan man we oli stap finis long ogenaesesen blong Jeova, oli bin givim laef blong olgeta i go long God mo oli stap mekem wil blong hem. Hemia se oli laef wetem mo folem loa ya long saed blong fasin lav we God i stampa blong hem. Wan pruf blong samting ya se, olgeta Kristin ya oli ‘kilim ol naef blong faet blong olgeta oli kam ol tul blong wokem garen mo ol spia blong olgeta oli kam sisis blong katem ol tri mo oli no moa lanem fasin blong faet.’ (Aesea 2:4) Olgeta Wetnes blong Jeova long olgeta ples blong wol oli bin mekem samting ya from we oli stap folem fasin blong lav. Hemia i min se neva bambae oli karem ol tul blong faet blong agensem ol brata blong olgeta no ol narafala man. Olgeta ya nomo oli mekem samting ya—ol skul blong wol ya oli no mekem. (Jon 13:34, 35; 1 Jon 3:10-12, 15) Oli no joen long fasin ya we i stap seraotem ol man, blong leftemap wanwan kantri blong olgeta, from we oli olsem wan brata nomo long olgeta ples long wol, we lav i joenem olgeta, “blong oli kam wan nomo stret.”—Kolosi 3:14; Matyu 23:8; 1 Jon 4:20, 21.
Bighaf Blong Ol Man Oli Jusum Blong No Save
20, 21. ?From wanem bighaf blong ol man oli stap long tudak long saed blong speret? (2 Korin 4:4; 1 Jon 5:19)
20 Taem laet long saed blong speret i stap saen moa long medel blong ol man blong God, ol narafala man long wol ya oli stap godaon moa long tudak long saed blong speret. Oli no save Jeova mo ol stampa tingting blong hem long saed blong fyuja. Profet blong God i tokbaot samting ya taem i talem se: “!Yu luk! tudak hem wan bambae i kavremap wol, mo olgeta nesen oli stap long bigfala blak klaod.” (Aesea 60:2) Samting ya i stap kamaot from we, ol man oli no soemaot se oli wantem tumas blong kasem save long saed blong God, mo oli no soemaot se oli wantem traem blong mekem samting we hem i glad long hem. Jisas i talem se: “God i save jajem man from poen ya, we delaet i kam long wol finis, be ol man oli no laekem delaet, oli laekem tudak, from we fasin blong olgeta i no stret. Man we i stap mekem ol fasin we i no stret, hem i no laekem delaet, i agens long hem, mo i no save kam long delaet, from we delaet ya bambae i soemaot ol fasin blong hem.”—Jon 3:19, 20.
21 Ol man olsem oli no rili wantem faenemaot wil blong God. Long defren fasin, oli yusum laef blong olgeta blong mekem prapa wil blong olgeta nomo. Taem oli no wantem wil blong God, oli putum olgeta long wan ples we i denja, from we Tok blong Hem i talemaot se: “Man we i blokem sora blong hem blong i no harem loa ya—prea blong hem tu i nogud.” (Proveb 28:9) Bambae oli kasem frut long rod we oli jusum. Aposol Pol i raetem se: “Yufala i no mastik long samting ya. I no gat man i save gyaman long God. Wanem sid we man i planem fastaem long garen blong hem, be frut blong hem nomo, man ya bambae i mas kakae.”—Galesia 6:7.
22. ?Plante man we oli wantem blong save God, oli stap mekem wanem naoia?
22 Be, i gat fulap man we oli wantem blong save wil blong God, olgeta we oli rili lukaotem hem, mo oli wantem kam kolosap long hem. Jemes 4:8 i talem se: “Yufala i mas kam kolosap long God, nao hem bambae i kam kolosap long yufala.” Long saed blong ol man olsem, Jisas i talem se: “Man we i stap mekem ol stret fasin nomo, hem i save kam long delaet, blong delaet ya i soemaot ol fasin ya we hem i stap mekem, be God i bin givhan long hem blong i mekem olsem.” (Jon 3:21) !Mo stampa tingting blong God i blong givim wan nambawan fyuja long ol man we oli kam long laet! Nekiswan haf bambae i tokbaot ol nambawan samting we bambae oli kamaot long fyuja.
[Futnot]
a Bilif ya se laef i stat long wan smol samting mo i stap jenis i go long narafala samting.
?Yu Yu Save Ansa Olsem Wanem?
◻ ?Plante man oli talem wanem long saed blong stampa risen blong laef?
◻ ?Olsem wanem Jeova i soemaot hem wan olsem wan God blong mekem ol stampa tingting blong hem oli kamtru?
◻ ?Wanem samting i kamaot long faswan handred yia K.T. we i mekem save blong olgeta i kam antap bigwan?
◻ ?Olsem wanem man i save luksave trufala Kristin kongregesen tede?