!Strong Tingting Blong Mekem Wok Blong Jeova!

“!YU NO go aot blong prij!” “!Yu no mas karem ol fren blong yu, ol Wetnes blong Jeova, oli kam visit long ples ya!” Plante Kristin woman oli harem semfala tok ya no ol tok we oli kolosap sem mak long ol hasban blong olgeta we oli agensem olgeta. Be taem ol hasban ya oli stap wok long ami, ol waef blong olgeta oli kasem hadtaem moa long bilif blong olgeta. (Aesea 2:4; Jon 17:16) ?Olsem wanem ol Kristin waef ya oli save stap strong long saed blong speret mo gohed blong wok strong long wok blong Kingdom?

Fasin blong holemstrong bilif long Jeova God we i joen wetem strong tingting blong olgeta wanwan, i halpem olgeta blong gohed strong. Yvonne we i waef blong wan soldia, i eksplenem se, “Mi ting se strong tingting blong mi nomo i mekem se mi save gohed. Mi save se i mas gat ol rod blong mekem se hasban blong mi i no blokem mi.” I tru, ol rod ya oli stap.

Wan narafala Kristin woman we i mared long wan haeman blong ol ami, i tokbaot olsem wanem strong tingting we hem i stap soemaot, i mekem laef blong hasban blong hem i moa isi tu. Woman ya i eksplenem se, “Hem i save program blong mi mo blong hem tu, mo ol man blong ami oli glad long samting ya.” Nating se i olsem, i no isi blong woman ya i gohed blong mekem wok blong Jeova.

Winim Fasin Blong Stap Olgeta Nomo

Ol waef we ol man blong olgeta oli wok long ami, oltaem oli kasem traem ya we bambae oli mas muf kwiktaem wetem ol famle blong olgeta, maet sam dei biaen nomo, blong go long narafala ples longwe long ples blong olgeta, blong oli save kampani wetem ol hasban blong olgeta taem oli go wok long ol ples olsem. Biaen, i isi blong harem olsem we oli stap olgeta nomo taem oli jes kam long wan ples we oli no savegud long hem. Be samting ya i no nidim blong kamaot. Olgeta we oli mekem wok blong Jeova oli gat wan samting we i save mekem olgeta oli haremgud moa. ?Wanem samting ya? Kristin aposol Pita i talem se hemia kampani blong “olgeta Kristin man.” Ol Wetnes blong Jeova long 231 kantri oli wok olsem wan bigfala Kristin famle, olsem “wan brata nomo,” we naoia namba blong olgeta i kasem sam milyan. Yu save faenem olgeta long evri ples.​—⁠1 Pita 2:​17, futnot.

Susan i mas aot kwiktaem nomo long ples blong hem, ale hem i go stap long ples blong ol plen blong ami we hasban blong hem i mas wok long hem. Hem i jes kasem bilif i no longtaem, mo i stap kasem hadtaem long hasban blong hem we i no gat bilif, blong no moa joen long minista wok blong ol Kristin, nao Susan i talem se: “Mi go kwiktaem long ol miting long nyufala ples ya, mo long miting mi save sidaon mo toktok long ol narafala sista. Mi save talem tru se fasin joen ya i mekem se mi stap gohed long trutok.”

Samtaem fasin ya blong stap olgeta nomo i save mekem tingting blong olgeta i foldaon. Nating se i olsem, wan gud nyus i save leftemap tingting blong olgeta olsem oli nidim. Glenys, wan sista blong Engglan, we hem i go wetem hasban blong hem taem hasban blong hem i mas go wok long wan narafala ples afsaed long kantri, i talem se: “Mi rili harem nogud tumas, ale taem mi no tingbaot, wan woman we mi bin save hem plante yia bifo, taem mi bin stap long ami, hem i raet mo i talem se hem i jes baptaes i no longtaem olsem wan Wetnes blong Jeova. Samting ya i leftemap tingting blong mi long stret taem.”

Jane, we i go wetem hasban blong hem long Kenya, i faenem se ol Kristin miting oli olsem samting we i sevem laef blong hem, nating se oli mekem miting long ol lanwis we hem i no kasem save long olgeta. Hem i eksplenem se, “Mi save se hemia nao ples we Jeova i wantem mi blong stap long hem. Mi mi stap wetem ol brata blong mi long saed blong speret, mo oli givim paoa long mi long saed blong speret. Oli mekem welkam long mi, mo mi filim olsem we mifala i wan famle nomo.”

!Jane i wan nomo long plante woman we oli stap long ol ples olsem, we oli faenem se oli gat ol famle long saed blong speret we oli no save nating se oli gat!​—⁠Mak 10:​29, 30.

Stanap Strong Long Fored Blong Fasin Agens

Jisas i givim woning long ol man se, “I nogud yufala i ting se mi mi kam blong mekem olgeta man long wol oli stap kwaet. Mi mi no kam blong putum pis nomo, mi kam blong mekem ol man oli seraot tu, oli faet.” (Matyu 10:34) ?Hem i minim wanem? A. T. Robertson, long buk ya Word Pictures in the New Testament, i talem se, insaed long wan famle nomo, nating se pis i mas stap long hem, “wan taem nomo faet i save kamaot.” Jisas i talem klia se, “Bambae man i gat ol enemi blong hem, we olgeta oli blong haos blong hem nomo.” (Matyu 10:⁠36) !Ol tok ya oli tru tumas taem wan hasban no waef i agensem trutok!

Taem Diane i stat blong stadi long Baebol wetem ol Wetnes blong Jeova, hasban blong hem, we i wan haeman blong ol ami we oli stap yusum ol plen blong faet, i no glad nating. ?Wanem i kamaot long mared blong olgeta? Diane i eksplenem se, “I olsem wan aes i stap long medel blong mitufala. Bifo, mared blong mitufala i bin rongud. Kwiktaem nomo i kam olsem we mitufala i jes stap long semfala haos nomo.” ?Ale, olsem wanem hem i winim? “Bilif mo strong tingting blong mi wetem help we i kamaot long Jeova mo speret blong hem.” Diane i rili tingting dip long eksampel blong profet Daniel long Baebol.

Taem Daniel i stap long kalabus long Babilon, nao ol man long ples ya oli givim kakae long hem we i no stret blong wan man blong God blong kakae, ale Daniel “i mekem wan strong disisen long hat blong hem se hem bambae i no spolem hem wan wetem ol gudfala samting blong king.” Yes, Daniel i mekem wan disisen we hem i tingbaotgud fastaem. Hem i mekem promes long hat blong hem se neva bambae i spolem hem wan from ol kakae ya. !Biaen hem i soemaot se hem i gat bigfala paoa long tingting blong hem taem “hem i gohed blong talem long nambawan haeman ya blong king se hem i no save spolem hem wan”! ?Wanem frut blong samting ya? Jeova i blesem strong tingting we i mekem hem i stanap strong.​—⁠Daniel 1:​8, 9, 17.

Sem mak tede, ating wan hasban we i agensem waef blong hem i save talem strong se waef blong hem i no moa go long ol miting blong kongregesen. ?Waef i mas mekem wanem? Jane i faenem se hem i stap long hadtaem ya. Hem i eksplenem se: “Bambae mi neva save kam slak from hadtaem ya. Mi save se mi no save mekem samting we i agensem bilif blong mi. Mi mas soemaot klia se ol miting oli rili impoten long mi.” Jeova i blesem disisen blong hem taem hem i stap gohed blong go long ol miting.

Glenys i talem se, “Hasban blong mi i traem blokem mi blong no go long ol miting, be i blong smoltaem nomo. Mi mi gohed blong stap go long ol miting. Taem mi kam long haos, samtaem hem i kilim mi, mo samtaem hem i no toktok long mi.” Be, Glenys i gohed, hem i stap prea oltaem. Mo tu, evritaem tu elda long kongregesen tufala i prea wetem hem, mo samting ya i leftemap tingting blong hem bigwan blong gohed blong go long ol miting.​—⁠Jemes 5:​13-15; 1 Pita 2:23.

Samtaem ol haeman blong ami oli save fosem wan hasban blong traem blokem waef blong hem long wok blong talemaot gud nyus. Diane i faenem se hem i mas mekem i klia long hasban blong hem, wanem nao ol samting we oli impoten moa long hem. Hem i talem se, “Mi rere blong kasem trabol from we mi gohed long wok blong mi blong prij.” !Hemia i sem mak long disisen blong ol aposol! (Ol Wok 4:​29, 31) Nating se i olsem, hem i waes long fasin blong hem blong prij. Hem i talem se: “Mi stap askem ol smol grup blong ol man blong dring kofe wetem mi mo mi givim presen long Trutok buk long olgeta evriwan.”​—⁠Matyu 10:16; 24:14.

Fasin Blong Stap Obei Long Narafala We i No Joen Wetem Fasin Blong Agensem Bilif

Nating se ol Kristin waef oli harem nogud long trabol we i kamaot long mared blong olgeta, oli lukluk i go long fyuja mo dipen long Jeova. Samting ya i halpem olgeta blong holem stret tingting. Oli givim sapot long hasban blong olgeta olsem we oli save mekem, be oli no agensem bilif blong olgeta. Olsemia nao, oli folem advaes blong God we Pita i raetemdaon se: “Yufala woman we i mared, yufala i mas obei long ol man blong yufala.” (1 Pita 3:⁠1) Long The Amplified New Testament, oda blong aposol ya i olsem: “Mekem yu wan i stap daon olsem we yu namba tu mo yu dipen long olgeta, mo jenisim yu wan blong joengud long olgeta.” Tingbaot olsem wanem Jane i folem advaes ya. Hem i eksplenem se, “Hasban blong mi i talem long mi se wanem we mi wantem mekem i no mas spolem wok blong hem. Taswe mi traem blong faenem ol rod blong halpem hem.”

Olsem nao, sam Kristin waef oli agri blong go wetem hasban blong olgeta taem oli joen wanples wetem ol fren blong olgeta. Nating se i olsem, oli holem strong tingting blong no mekem wan samting we i agensem bilif blong olgeta. Jane i tekem taem blong toktok wetem hasban blong hem long samting ya. Hem i eksplenem gud long kaen fasin se hem i agri blong go, be hem i no wantem mekem man blong hem i harem nogud long fored blong ol narafala. “Mi save se samtaem olgeta we oli stap oli mas stanap mo oli mas dring blong ona long wan man no wan samting. Mi lanem finis se mi mas ona long Jeova nomo, mo mining blong fasin ya blong dring i go moa long fasin blong soemaot respek. Hasban blong mi i luksave se disisen blong mi i save mekem nogud filing i kamaot, taswe hem i talem nomo se: ‘!Yu no kam!’ Ale mi obei long hem.”

Long defren fasin, Glenys i stap go wetem hasban blong hem long ol taem olsem, be hem i stap wajemgud ol haeman blong ami long en blong tebel. !Taem hem i luk olgeta oli stap mekemrere dring blong givim ona, long kwaet fasin hem i aot i go long rum we ol toelet oli stap long hem! Yes, ol woman ya oli jenisim sam samting blong joengud wetem hasban blong olgeta, be oli neva agri long samting we i agensem bilif blong olgeta.

‘Fasin Nomo i Pulum Olgeta’

Yvonne i tingting olsem se, “Sipos mi kamgud moa olsem wan waef, hasban blong mi bambae i luk se trutok i stap jenisim mi.” Taswe hem i ridim mo i ridim bakegen japta ya long Famle buk we taetel blong hem se “Wan Waef We i Kasem Lav.”a “Mi tingting moa long samting we i stap aninit long smol stampa tok ya ‘!Sam Oli Krakrae, Sam Oli Toktok Tumas!’ Be mi faenem se moa mi traehad blong toktok wetem hasban blong mi, moa ol samting oli kam nogud.” Be biaen, hem i givhan long hasban blong hem blong mekem wok blong Jeova. ?Olsem wanem? Taem hem i mekem tingting ya we i stap long 1 Pita 3:​1 i wok, se “fasin nomo blong [ol waef] i save pulum [ol hasban] blong oli bilif.”

Fasin blong ol Kristin woman blong lukaotgud long famle blong olgeta i save givhan bigwan blong pulum ol narafala blong oli laekem Kristin fasin blong laef. Diane i talem se, “Mi traem blong soem se trutok i wan gudfala samting blong pulum hasban blong mi blong laekem. Taem mi go long ol miting, hem bambae i filim olsem we i stap hem wan nomo, taswe mi tijim ol pikinini blong oli soemaot spesel respek mo gudfala fasin taem mifala i kam long haos. Mi traehad tu blong soem spesel kaen fasin long hem taem mifala i gobak long haos.” Sloslou tingting blong hasban blong hem i jenis from kaen fasin ya we famle blong hem i soemaot long hem.

Ol man blong Jeova tu oli save givhan. Jane i talem se hasban blong hem i glad long kampani blong ol misinari blong ol Wetnes we i mitim olgeta long Kenya. “Oli frengud wetem hem mo tokbaot futbol, mo oli kaen tumas long hem. Plante taem oli askem mifala blong go long ol defren haos blong ol misinari blong kakae.” Biaen hasban blong hem i eksplenem se: “Mi stat blong luk bilif blong Jane long wan fasin we i defren olgeta. Ol fren blong hem oli ol man we oli waes tumas we oli save tokbaot plante defren samting.” Sem mak, hasban blong Diane i jenisim tingting blong hem long trutok. Taem trak we hem i stap draevem i brokdaon, wan yangfala Wetnes i kam blong halpem hem. Hem i talem se, “Samting ya i rili wok long tingting blong mi.”

I tru, i no evri hasban no waef we oli no bilif we bambae oli kam long trutok. ?Olsem wanem long taem ya? Jeova i givim help long olgeta we oli bilif blong oli save stanap strong longtaem. (1 Korin 10:13) Tingbaot toktok blong Glenys we i leftemap tingting blong olgeta we oli kasem semfala problem olsem hem, i se: “Yu neva, neva mas gat tu tingting long samting ya se, Jeova nomo i stampa blong mared mo se hem i wantem tufala we i mared blong gohed blong stap wanples oltaem. Taswe nomata wanem samting we maet hasban i mekem no wanem trabol we olgeta we oli stap raon long yu oli mekem long yu, Jeova i no save letem yu blong yu foldaon olgeta.” Nating se hasban blong hem i no wosip yet long Jeova, fasin we hasban blong hem i mekem long hem mo long trutok i kamgud moa.

‘Planem Wetem Krae; Karem Kakae Wetem Glad’

I tru, ol Kristin woman olsem oli gat strong tingting blong mekem wok blong Jeova. Sipos yu stap long semfala rod, yu mas mekem disisen ya tu. Tingbaot advaes ya: “Yu mas fraet long Jeova, God blong yu. Yu mas mekem wok blong hem, mo yu mas fasgud long hem.”​—⁠Dutronome 10:⁠20.

Man blong raetem Ol Sam i talemaot se, “Olgeta ya long yumi we oli stap harem nogud, oli krae taem oli karem ol sid, oli go blong planem, be taem oli kambak wetem kakae blong hem, bambae oli singsing from we oli glad long kakae ya.” (Ol Sam 126:⁠6) Wan Wetnes i agri se, “Plante wora i kamaot long ae blong yu taem yu traem blong soemaot trutok long hasban no waef blong yu, nating se long fasin kwaet no long toktok blong yu. Be long en yu krae fulwan wetem glad from we nating se hem i no akseptem trutok, Jeova i blesem yu long fasin traehad we yu mekem.”

Olgeta we oli holemstrong long wosip blong Jeova nating se i gat fasin ya blong agens long haos, i stret blong oli kasem trufala fasin ona. I stret we yumi givim sapot mo lav long olgeta. !I gud oli stap strong long fasin ya blong olgeta blong no mekem samting we i agensem bilif blong olgeta, mo holem strong tingting blong mekem wok blong Jeova!

[Futnot]

[Tok blong pija long pej 28]

Fasin blong stadi we i joen wetem prea i mekem tingting blong Kristin i kam strong moa