Mekem Singsing Blong Presem Jeova

‘Bambae mi mi sing blong presem Jeova from we hem i win gud long faet ya, nao nem blong hem i go antap.’​—⁠EKSODAS 15:⁠1.

1. ?Wanem ol fasin blong Jeova we oli mekem se yumi mas presem hem?

TATIN taem, Ol Sam 150 i givim oda blong presem Jeova no Ja. Laswan vas i talem se: ‘Yumi olgeta samting we yumi gat laef, yumi olgeta evriwan, yumi presem Ja. !Oltaem yumi mas presem Ja!’ Yumi olsem ol Wetnes blong Jeova, yumi save se i stret nomo blong yumi presem Jeova. Hem i Hae Rula blong heven mo wol, Hemia we i Hae Olgeta, King blong olwe, Man we i Wokem yumi, Man blong Givim ol gudfala presen long yumi. Long plante rod, i no gat man we i sem mak long hem, hem i spesel, mo yumi no save skelem hem wetem wan narafala man. Hem i save evri samting, hem i gat olgeta paoa, hem i stret olgeta long fasin blong hem blong jajem man mo hem i stampa blong fasin lav. Hem i moa gud bitim ol narafala man; hem i holemstrong long olgeta promes mo tok blong hem oltaem. (Luk 18:19; Revelesen 15:⁠3, 4) ?I stret blong yumi presem hem? !Yes, yumi mas presem hem!

2. ?Yumi gat wanem risen blong talem tangkyu long Jeova?

² I stret blong yumi presem mo wosip long Jeova, be i no hemia nomo, i stret blong yumi soemaot fasin tangkyu long hem tu, from olgeta samting we hem i bin mekem long yumi. Hem i Man ya we i stap Givim “evri samting we oli gud mo evri presen we oli nambawan.” (Jemes 1:17) Hem i Stampa blong laef blong olgeta samting. (Ol Sam 36:⁠9) Ol samting we yumi, olsem ol memba blong wan bigfala famle blong man, yumi stap haremgud long olgeta, oli kamaot long hem, from we hem i Bigfala Man we i Wokem yumi. (Aesea 42:⁠5) Mo tu, Hem nao i stap givim olgeta blesing long yumi long saed blong speret tru long tabu speret blong hem, ogenaesesen blong hem, mo Tok blong hem. Hem i save fogivim ol sin blong yumi from we hem i givim Pikinini blong hem olsem ransom blong pemaot yumi. (Jon 3:16) Yumi gat hop blong Kingdom long saed blong ‘nyufala heven mo nyufala wol we stret fasin nomo bambae i stap long hem.’ (2 Pita 3:13) Yumi save frengud wetem ol Kristin brata mo sista blong yumi. (Rom 1:​11, 12) Hem i wan bigfala ona mo blesing long yumi blong stap olsem ol Wetnes blong hem. (Aesea 43:​10-12) Mo yumi gat nambawan blesing blong prea. (Matyu 6:​9-13) !Tru ya, yumi gat plante risen blong talem tangkyu long Jeova!

Ol Rod Blong Presem Jeova

3. ?Wanem ol defren rod we yumi save presem Jeova long olgeta mo soemaot fasin tangkyu blong yumi long hem?

³ ?Olsem wanem yumi, olsem ol man we oli givim laef long Jeova, yumi save presem hem mo soemaot fasin tangkyu blong yumi? Yumi save mekem olsem taem yumi joen long Kristin minista wok​—⁠prij long ol haos wanwan, mekem visit bakegen, mekem ol Baebol stadi, mo joen long wok blong prij long rod. Yumi save presem hem tu taem yumi prij long evri jans we yumi gat. Mo bakegen, yumi save presem Jeova long ol gudgudfala fasin blong yumi, olsem klin mo stret fasin blong putum klos mo blong mekem hea blong yumi. Plante taem ol man oli bin presem ol Wetnes blong Jeova from we oli soem gudfala eksampel long ol fasin ya. Antap long ol samting ya, yumi save presem Jeova mo talem tangkyu long hem tru long prea.​—⁠Lukluk 1 Kronikel 29:​10-13.

4. ?Wanem wan naesfala rod we yumi save folem blong presem Papa blong yumi long heven we i gat lav?

⁴ Mo tu, wan long ol nambawan rod we yumi save folem blong presem Papa blong yumi long heven we i gat bigfala lav, hemia taem yumi stap leftemap hem mo ol gudfala fasin blong hem long ol naesfala sing blong Kingdom. Plante man blong plei myusek mo blong wokem ol nyufala sing, oli agri se voes blong man i mekem myusek we i moa naes bitim ol narafala samting blong mekem myusek. Ol nambawan man blong mekem ol klasik myusek,a oli wantem raetem ol operab from ol man oli laekem tumas blong harem man i singsing.

5. ?From wanem yumi mas tinghae long ol sing blong Kingdom taem yumi stap singsing?

⁵ !Jeova i mas haremgud tumas blong lesin taem ol man oli singsing, antap moa, taem oli stap singsing blong presem hem mo talem tangkyu long hem! Ale, from samting ya, yumi mas tinghae long ol sing blong Kingdom we yumi stap singsing long ol defren taem we yumi joen wanples​—⁠long ol miting blong kongregesen, ol seket asembli, ol spesel dei asembli, ol distrik asembli, mo ol intenasnal asembli. Singbuk blong yumi i fulap long ol sing we oli rili mekem man i glad, we plante taem ol man we oli no stap long trutok oli bin tokbaot ol naesfala fasin blong ol sing ya. Taem yumi glad moa blong singsing ol sing blong Kingdom, bambae yumi mekem ol narafala oli glad mo yumi tu, yumi haremgud.

Singsing Blong Presem Jeova Long Taem Blong Baebol

6. ?Olsem wanem ol man Isrel oli soemaot fasin tangkyu blong olgeta taem God i sevem olgeta long Red Si?

⁶ Tok blong God i talem long yumi se Moses mo ol narafala man Isrel oli sing olsem ol ami we oli win long faet, taem Jeova i sevem olgeta long ol ami blong Fero long Red Si. Sing blong olgeta i stat wetem ol tok ya se: ‘Bambae mi mi sing blong presem Jeova from we hem i win gud long faet ya, nao nem blong hem i go antap. Hem i sakem finis ol hos wetem ol man blong olgeta i go long Red Si. Jeova, hem i strong blong blokem mi, mo hem nao i sevem mi. Hem i God blong mi mo mi bambae mi presem hem oltaem.’ (Eksodas 15:​1, 2) !Yumi save tingbaot strong filing mo glad blong ol man Isrel taem oli sing long ol tok ya afta we Jeova i mekem wan merikel blong sevem olgeta!

7. ?Hibru haf blong Baebol i tokbaot wanem narafala taem we ol man Isrel oli stap singsing blong presem Jeova?

⁷ Long 1 Kronikel 16:​1, 4-36, yumi ridim se i gat plante myusek mo singsing blong presem Jeova taem Deved i karem Bokis blong Kontrak i kam long Jerusalem. Hemia i rili wan hapi taem. Mo tu, ol man oli singsing blong presem Jeova mo plei myusek taem King Solomon i dediketem haos prea long Jerusalem. Yumi ridim long 2 Kronikel 5:​13, 14 se: “I bin hapen olsemia se taem ol man blong blou long pupu mo ol man blong singsing oli joengud blong mekem se ol man oli harem saon blong presem mo talem tangkyu long Jeova, mo taem oli leftemap saon ya wetem ol pupu mo wetem ol dram mo wetem ol samting blong mekem singsing mo oli presem Jeova, ‘from we hem i gud, kaengud fasin blong hem i no save finis,’ haos i kam fulap wetem klaod, yes, prapa haos ya blong Jeova mo ol pris oli no save stanap blong mekem wok blong olgeta from klaod; from we paoa blong Jeova i fulumap haos blong trufala God.” ?Samting ya i soem wanem? I soem se Jeova i stap lesingud long myusek ya blong presem hem, mo i glad long hem, olsem bigfala klaod we i kamaot long hem i soemaot. Biaen, ol man Isrel oli mekem tufala grup blong singsing taem oli mekem lafet blong dediketem stonwol blong Jerusalem long taem blong Nehemaea.​—⁠Nehemaea 12:​27-42.

8. ?Wanem i soem se ol man Isrel oli tinghae tumas long fasin blong singsing?

⁸ Yes, fasin blong singsing i olsem wan impoten haf blong wosip long haos prea, mekem se oli jusumaot 4,000 man Livaet blong mekem myusek. (1 Kronikel 23:​4, 5) Ol man ya oli plei myusek blong joen wetem olgeta man blong singsing. Myusek, antap moa ol man blong singsing, oli gat wan impoten ples long wosip, oli no blong tijim ol dip save long saed blong Loa, be blong givim stret tingting mo filing long saed blong wosip. Myusek i halpem ol man Isrel blong mekem wosip long Jeova long fasin we i gat paoa mo laef. Makemgud fasin blong olgeta blong mekemrere mo blong luklukgud long ol smosmol samting long saed blong myusek blong olgeta: “Namba blong olgeta wetem ol brata blong olgeta we oli kasem trening blong mekem singsing i go long Jeova, olgeta evriwan we oli nambawan long wok ya, i kasem tu handred eite eit.” (1 Kronikel 25:⁠7) Makemgud olsem wanem oli tinghae long fasin blong singsing blong presem Jeova. !Oli kasem trening blong singsing mo oli nambawan long wok ya!

9. ?Grik haf blong Baebol i makem wanem poen long saed blong singsing?

⁹ Long faswan handred yia K.T., ?yumi faenem wanem? Nating se tingting blong Jisas i trabol long naet ya we oli givim hem long han blong ol enemi blong hem, hem i harem yet se, hem i mas singsing blong presem Jeova blong finisim lafet blong Pasova mo Memoriol blong ded blong hem we hem i jes stanemap. (Matyu 26:30) Mo tu, yumi ridim se samwe “long medel naet,” afta we oli wipim Pol mo Saelas mo putum tufala long kalabus, “tufala i stap prea, tufala i stap singsing long ol sing blong presem God. Mo ol narafala man long kalabus oli stap lesin long tufala.”​—⁠Ol Wok 16:⁠25.

Singsing Blong Presem Jeova​—⁠Wan Impoten Haf Long Wosip Blong Yumi

10. ?Tok blong God i givim wanem oda blong singsing blong presem God?

¹⁰ ?Yu yu ting se fasin blong singsing long ol sing blong Kingdom i no impoten tumas, ale yu no nid blong singsing wetem fulhat? Sipos i olsem, i gud yu tingtingbak long bisnes ya, from we Jeova God mo Jisas Kraes, tufala i ting se fasin blong singsing blong presem Jeova i rili impoten. !Yes, Baebol i fulap long ol oda blong presem Jeova mo blong singsing blong presem hem! Eksampel, long Aesea 42:​10, yumi ridim se: “Sing wan nyufala sing long Jeova, presem hem go kasem ol laswan ples blong wol, yufala olgeta man we yufala i stap godaon long solwora mo long samting we i stap fulumap solwora, yufala ol aelan mo yufala we i stap long olgeta.”​—⁠Lukluk tu Ol Sam 96:1; 98:⁠1.

11. ?Aposol Pol i givim wanem advaes long fasin blong singsing?

¹¹ Aposol Pol i save se fasin blong singsing i save leftemap tingting blong yumi, taswe, tu taem, hem i givim advaes long yumi long saed ya. Yumi ridim long Efesas 5:​18, 19 se: ‘Yufala i mas letem tabu speret i kam fulap long yufala. Taem yufala i stap toktok long yufala, i gud yufala i yusum ol tok blong Ol Sam, mo ol him, mo ol sing blong presem God. Yufala i mas sing long ol him mo sam, blong presem Masta blong yumi, long tingting blong yufala.’ Mo long Kolosi 3:​16, yumi ridim se: “Yufala i mas letem tok ya blong Kraes, we i fulapgud long ol gudgudfala samting, hem i kam, i stap oltaem long tingting blong yufala. Yufala i mas stap tijim yufala, mo yufala i mas yusum ol waes tok blong soemaot rod long yufala. I gud yufala i stap sing long God long Ol Sam mo ol him, mo ol sing blong presem God, we long tingting blong yufala, yufala i stap talem tangkyu long hem.”

12. ?Yumi gat wanem eksampel long saed blong singsing we i halpem yumi blong tijim mo givim advaes long narafala?

¹² Makemgud se long wanwan long tufala vas ya, Pol i tokbaot fasin blong singsing, taem hem i talem ‘ol Sam, ol him, ol sing blong presem God, singsing blong presem Masta blong yumi long tingting blong yufala.’ Mo tu, long ol tok we hem i talem fastaem long ol Kristin long Kolosi, hem i talem se yumi save yusum ol singsing blong ‘tijim yumi mo soemaot rod long yumi.’ Tru ya, hemia samting we yumi stap mekem, olsem yumi save luk long ol taetel ya blong ol singsing blong yumi​—⁠“!Olgeta Samting Oli Mas Leftemap Jeova!” (singsing namba 5), “!Yumi mas stanap strong!” (namba 10), “!Yufala i Mas Glad Long Kingdom!” (namba 16), “!No Fraet Long Olgeta!” (namba 27), “!Yumi Presem Jeova, God Blong Yumi!” (namba 100), blong givim sam eksampel nomo.

13. ?Olsem wanem “slef ya we i stret mo waes” i soem se singsing i wan impoten haf long wosip blong yumi?

¹³ Folem ol oda ya, “slef ya we i stret mo waes” (NW) i bin mekem plan se, long ol taem we yumi hivap wanples​—⁠blong mekem ol miting blong kongregesen, ol seket asembli, ol spesel dei asembli, ol distrik asembli, mo ol intenasnal asembli​—⁠yumi mas statem mo finisim wetem ol sing blong Kingdom. (Matyu 24:45) Antap long program blong ol miting ya, oli putum ol singsing long ol narafala taem. From we kolosap oltaem yumi statem ol miting blong yumi wetem wan sing blong Kingdom, ?yu ting se i gud blong meksua se yumi kam long stret taem, bifo we miting i stat, blong joen long haf ya blong wosip blong yumi? Mo from we yumi finisim miting blong yumi wetem singsing, ?yu ting se yumi mas stap long miting gogo kasem laswan singsing mo prea we i kam biaen long hem?

14. ?Wanem ol eksampel we yumi gat long fasin blong jusum ol singsing we oli stret long ol program blong yumi?

¹⁴ Ol singsing long ol miting blong yumi, oli jusumgud blong oli laenap wetem ol program. Eksampel, long “Tijing blong God” Distrik Asembli long yia 1993, singsing namba 191, “Yumi Soem Rod Blong Trutok Long Ol Man,” we i leftemap tingting blong ol Kristin blong faet agensem Setan, wol ya, mo bodi we i gat sin, i kamaot stret afta long trifala tok we oli tokbaot ol trabol ya. Long sem fasin, singsing namba 164, “Ol Pikinini​—⁠Gudfala Presen Blong God,” we i givim plante advaes long ol papa mo mama, i kamaot stret afta long wan tok long saed blong ol wok blong ol papa mo mama blong trenemgud ol pikinini blong olgeta. Sing namba 70, “Yumi Mekem Olsem Jeremaea,” i kamaot bifo long ol tok we oli stanap long ol profet tok blong Jeremaea. Mo biaen long ol tok long saed blong ol defren haf blong Kingdom minista wok blong yumi, i gat sing namba 156, “Mi Wantem,” wan singsing we i tokbaot wok ya blong talemaot Kingdom. Oli lukaotgud blong mekem sem samting taem oli jusum ol singsing blong Wajtaoa Stadi, Miting blong Kingdom Wok, mo Tiokratik Skul. Taswe, taem ol elda oli mekem pablik tok mo oli givim singsing we bambae i statem program, oli mas jusum singsing we i laenap wetem stampa tok blong olgeta.

15. ?Olsem wanem jeaman blong miting i save bildimap moa fasin tangkyu long sing we bambae yumi singsing long hem?

¹⁵ Taem jeaman i talemaot singsing we bambae i kamaot, hem i save bildimap moa fasin tangkyu long singsing ya, taem hem i talemaot taetel no stampa blong hem. Yumi no singsing folem ol namba, be yumi singsing folem ol stampa tok we oli stanap long Baebol. Mo tu, sipos jeaman i talem vas we i stap aninit long taetel blong sing, samting ya i save halpem kongregesen blong gat moa fasin tangkyu long singsing. Ale, bakegen, maet hem i save givim sotfala tok, olsem, yumi save sing long sing ya wetem filing, glad, no strong tras, i dipen long filing we i stap insaed long singsing ya.

Singsing Blong Soem Fasin Tangkyu Long Ol Gudfala Fasin Blong Jeova

16. ?Olsem wanem yumi save kasem filing blong ol singsing blong yumi?

¹⁶ From we ol tok blong ol sing blong Kingdom oli gat plante mining, yumi mas tingting dip long ol tok ya taem yumi stap sing long olgeta. Yumi wantem kasem filing we i stap insaed long ol wanwan sing. Sam long ol sing, olsem olgeta we oli tokbaot lav, wan frut blong tabu speret, oli tajem hat. (Galesia 5:22) Yumi mas singsing ol sing ya wetem strong filing mo fulhat. Sam narafala singsing oli soemaot glad, mo yumi mas traem singsing olgeta wetem glad. I gat sam narafala bakegen oli ol strongfala singsing blong maj, mo olgeta ya, yumi mas singsing wetem laef mo strong bilif. Long Tiokratik Skul blong yumi, yumi kasem advaes blong soem intres, filing, mo glad taem yumi givim tok. I moa impoten yet blong soem intres, filing, mo glad taem yumi stap singsing long ol sing blong yumi.

17. (a) ?Wanem strongfala tok we Jisas i talem long ol man Isrel we oli no stap tru long God, we yumi no wantem se oli stret long singsing blong yumi? (b) ?Wanem frut i save kamaot sipos yumi tinghae long ol advaes we oli stap long ol singsing blong yumi?

¹⁷ Sipos yumi stap singsing long ol sing blong Kingdom be tingting blong yumi i stap long ol narafala samting, nao yumi no kasem fulwan mining blong ol toktok, yumi save kam olsem ol man Isrel we oli no stap tru long God, ale Jisas i tok strong long olgeta from we, nating se oli stap presem God wetem maot blong olgeta, be hat blong olgeta i stap longwe long Hem. (Matyu 15:⁠8) Yumi no wantem se ol strong tok ya oli stret long fasin blong yumi blong singsing long ol sing blong Kingdom. Taem yumi folem stret fasin blong singsing ol sing blong Kingdom, bambae fasin ya i pulum filing blong yumi mo tu blong olgeta we oli stap sidaon kolosap long yumi, mo ol pikinini tu. Yes, sipos evriwan we i stap long Haos Kingdom, oli tinghae long ol advaes we oli stap long ol sing ya, samting ya i save leftemap tingting bigwan blong gohed strong long Kristin minista wok mo blong stap longwe long ol trap we oli save pulum man blong mekem i nogud.

18. ?Ol sing blong Kingdom oli gat wanem paoa long wan woman?

¹⁸ Plante taem bakegen, ol man we oli no stap long trutok oli sapraes tumas taem yumi singsing long ol sing blong Kingdom. Wan taem, oli prentem tok ya long Wajtaoa, se: “Ekspiryens blong wan woman we i tekem baptaes long 1973 Asembli ya ‘God i Win,’ long Yanki Stadium, Nyu Yok siti, i soem se ol sing [blong yumi] oli save mekem man i kasem save long Jeova God. Woman ya, hem wan i go fastaem long wan Haos Kingdom long ples blong hem mo i stap long tufala miting. Taem kongregesen i singsing long sing ya . . . ‘!Yumi Mas Tingbaot Praes Ya!,’ woman ya i sapraes tumas long ol tok mo fasin we oli singsing long hem, ale hem i mekem disisen se ples ya nao hem i wantem stap long hem. Afta, woman ya i kam kolosap long wan Wetnes mo i askem hem blong stadi long Baebol, mo [hem] i gohedgud gogo kasem we hem i kam wan Kristin Wetnes blong Jeova.”

19. ?Wanem laswan advaes we yumi kasem blong singsing ol sing blong Kingdom wetem fulhat?

¹⁹ Long ol miting blong yumi, kolosap i no gat tumas jans blong olgeta man we oli stap, oli soemaot filing mo fasin tangkyu blong olgeta. Be yumi evriwan i save soemaot filing blong yumi long ol gudgudfala fasin blong Jeova, taem yumi joen wetem fulhat blong yumi blong singsing long ol sing blong Kingdom. Antap long samting ya, taem yumi joen wanples, ?yumi haremgud, no? !Ale yumi mas harem se yumi wantem singsing! (Jemes 5:13) Tru ya, kasem mak we yumi soemaot fasin tangkyu long ol gudgudfala fasin mo kaengud fasin blong Jeova, bambae yumi singsing wetem fulhat blong presem hem.

[Ol futnot]

?Yu Yu Ansa Olsem Wanem?

◻ ?Wanem tu stampa risen blong presem Jeova?

◻ ?Wanem ol rod we yumi save folem blong presem Jeova?

◻ ?Wanem wan naesfala rod we yumi save folem blong presem Jeova?

◻ ?Yumi gat wanem eksampel long Baebol long saed blong fasin blong singsing blong presem Jeova?

◻ ?Olsem wanem yumi save singsing long ol sing blong Kingdom long fasin we i stret?

[Bokis blong pija long pej 11]

!Lanem Ol Sing Ya!

I luk olsem se samfala oli bin faenem se i hadwok lelebet blong lanem sam long ol nyufala sing. Be, mifala i mas talem se famle blong Bruklin Betel mo sam long ol kongregesen long Nyu Yok, oli no gat problem blong singsing long ol sing ya. Maet yu nidim nomo blong traehad smol moa blong lanem samting we i luk olsem se fastaem yu no savegud. Taem yu savegud ol sing olsem, plante taem, kongregesen i laekem moa olgeta bitim olgeta we oli no nidim fasin traehad blong lanem.

[Bokis blong pija long pej 12]

Singsing Long Ol Sing Blong Kingdom Taem Yumi Stap Hivap Tugeta

I no se yumi save singsing long ol sing blong Kingdom long Haos Kingdom nomo. Pol mo Saelas, tufala i sing blong presem Jeova taem tufala i stap long kalabus. (Ol Wok 16:25) Mo disaepol Jemes i talem se: “?I gat wan long yufala we i stap haremgud? I gud hem i sing blong presem God.” (Jemes 5:​13, futnot) Long taem we ol defren man oli hivap wanples, evriwan oli haremgud. ?Ale from wanem yu no wantem singsing long ol sing blong Kingdom? Samting ya i save mekem yu haremgud moa, sipos singsing i go wetem piano no gita. Sipos no, i gat ol kaset we insaed i gat ol sing blong Kingdom long piano; plante famle we oli Wetnes, oli gat ol kaset ya. Oli gud tumas blong sing wetem, mo tu oli olsem ol naesfala myusek blong lesin long olgeta.

[Tok blong pija long pej 8, 9]

Afta we God i sevem ol man Isrel long Red Si, oli singsing blong soemaot glad blong olgeta

[Tok blong pija long pej 10]

Singsing wetem fasin glad i wan haf blong Kristin wosip tede