?Yu Save Gat Longfala Tingting?

JEOVA i talem long Ebram, i se: “Yu mas aot long ples ya blong yu . . . nao bambae yu mas go long wan narafala kantri, we mi bambae mi soemaot long yu. Bambae mi mi mekem we yu yu gat plante pikinini we bambae oli kamaot biaen long yu, nao bambae olgeta ya oli kam plante we i plante. Mi bambae mi blesem yu, mo bambae mi mekem we plante man oli savegud nem blong yu.” (Jenesis 12:​1, 2) Long taem ya Ebram i gat 75 yia. Hem i obei mo wetem waes fasin hem i gat longfala tingting long ful laef blong hem biaen, blong wet long Jeova.

Biaen, God i mekem promes ya long Ebraham (Ebram) we i gat longfala tingting: “Mi bambae mi mekem i gud tumas long yu, mo bambae mi mekem laen blong yu i gat plante man tumas long hem.” Aposol Pol i ademap se: “Nao Ebraham i mekem tingting blong hem i longfala, mo long fasin ya, i kasem ol samting ya we God i promes.”​—⁠Hibrus 6:​13-15.

?Wanem ya longfala tingting? Ol diksonari oli talem mining blong hem olsem fasin ya “blong stap kwaet blong wet long wan samting” no blong “kontrolem fasin mo tingting blong yumi taem wan man i traem blong mekem yumi kros no taem yumi stap wari.” Taswe taem yu mas wet long wan man no wan samting, no taem wan man i wantem mekem yu yu kros no yu wari tumas, samting ya i save traem longfala tingting blong yu. Long ol taem olsem man we i gat longfala tingting i stap kwaet nomo; man we i no gat longfala tingting i hareap oltaem mo i kros kwik.

Wol Blong Yumi We i No Gat Longfala Tingting

I tru moa long plante ples long taon, ol man oli no moa gat longfala tingting be oli tingting moa blong hareap oltaem. Blong plante milyan man we oli laef long ol taon we oli fasfas tumas, evri dei i stat taem klok i ring long moning. Hemia i statem wan krangke resis​—⁠blong kasem wan ples, blong luk wan man, blong mekem wan samting. Yumi no sapraes we plante man oli kros mo oli no gat longfala tingting.

?Yu yu kam kros taem ol man oli mekem ol samting we yu yu harem nogud from? Albert i talem se, “Mi no laekem fasin ya blong no stap kam long stret taem oltaem.” Plante man bambae oli agri se fasin ya blong stap wet long wan man we i let i mekem man i harem nogud tumas, i tru moa sipos i gat wan stret taem blong oli mas mekem wan samting. Long saed blong Dyuk blong Nyukasel, wan man blong politik long Engglan long ol yia 17 handred, wan ripot i talem se: ‘Hem i lusum haf haoa long moning, we i stap traehad blong kasem bakegen long fuldei biaen be hem i neva save kasem.’ ?Sipos yu mas dipen long wan man olsem evri dei, bambae yu stap gat longfala tingting yet?

?Taem yu stap draev long wan trak, yu stap kam kros kwiktaem, yu no wantem blong wet, no yu wantem blong spid? Long ples olsem, plante taem fasin ya blong no gat longfala tingting i mekem akseden i kamaot. Long 1989, long ples we oli kolem Wes Jemani long taem ya, bitim 400,000 akseden long ol rod oli mekem man i kasem kil no i ded. Long ol akseden ya, 1 long 3 i kamaot from ol man oli spid tumas no draev kolosap tumas long wan trak we i stap long fored blong olgeta. Taswe, wan risen from wanem 137,000 man oli kasem kil no oli ded hemia from we man i no gat longfala tingting. !Wan rabis frut blong kasem from fasin blong no gat longfala tingting!

Ann i komplen i se, “Mi faenem i had tumas blong gat longfala tingting taem wan man i blokem toktok blong mi oltaem, no taem wan man i toktok blong leftemap hem wan tumas.” Karl-Hermann i talem se i hadwok long hem blong soem longfala tingting taem “ol yangfala oli no gat respek long ol olfala.”

Ol samting ya mo ol narafala samting oli save mekem se yu no gat longfala tingting. ?Oraet, olsem wanem, yu save wokem moa fasin ya blong gat longfala tingting?

Jeova i Save Mekem Longfala Tingting Blong Yu i Kam Strong

Plante man oli ting se fasin blong gat longfala tingting i soemaot se man i no save mekem wan disisen no i no gat paoa. Be, long tingting blong Jeova, fasin ya i soemaot paoa. Hem wan “i stap mekem tingting blong hem i longfala . . . from we hem i no wantem ol man oli lus. Hem i wantem blong olgeta man bambae oli tanem tingting blong olgeta from ol sin blong olgeta.” (2 Pita 3:⁠9) Taswe blong mekem longfala tingting blong yu i kam strong, yu mas stap kolosap long Jeova oltaem mo dipen long hem wetem ful hat blong yu. Sipos yu stap mekem fasin fren blong yu wetem God i kam strong moa, hemia nao impoten samting blong givhan long yu blong wokem fasin blong gat longfala tingting.

Antap moa long samting ya, yu mas save ol stampa tingting blong Jeova long saed blong wol ya mo ol man. Ebraham “i stap wet blong go long wan taon we God i mekem ol plan blong hem [Kingdom blong God], mo i stanemap. Taon ya, fandesen blong hem i save stap oltaem.” (Hibrus 11:10) Sem mak, bambae i gud blong gat wan tingting we i klia long ol promes blong God mo blong glad blong wet long Jeova. Biaen bambae yu luksave se fasin blong gat longfala tingting, i longwe long fasin blong fraet blong mekem wan disisen, defren olgeta, hem i rili save pulum ol man i go long trufala wosip. From samting ya, “Masta blong yumi i gat longfala tingting blong wet long yufala. Nao yufala i mas luk fasin ya blong hem olsem jans blong yufala blong kasem sef ples.”​—⁠2 Pita 3:⁠15.

?Olsem wanem sipos ol samting long laef blong yu wan oli traem longfala tingting blong yu bitim mak? ?Olgeta we oli no bilif oli mekem yu yu harem nogud oltaem from oli stap mekem i strong tumas long yu? ?Yu yu bin sik longtaem tumas? Sipos i olsem, folem wanem disaepol Jemes i raetem. Afta we hem i tokbaot eksampel blong ol profet blong gat longfala tingting, hem i talemaot bigfala samting we i save mekem se yumi stap kwaet taem yumi gat bigfala trabol. Jemes i talem se: “?I gat wan long yufala we i trabol long sam samting? I gud hem i prea.”​—⁠Jemes 5:​10, 13.

Wetem ful hat blong yu, askem God long prea blong mekem longfala tingting blong yu i kam strong mo blong halpem yu blong kontrolem tingting mo fasin blong yu taem yu kasem traem. Prea long Jeova oltaem, mo hem bambae i halpem yu blong luksave ol samting we oli stap kamaot no ol fasin blong ol narafala we oli traem longfala tingting blong yu. Sipos yu prea taem yu luk we wan samting i save kamaot we bambae i traem longfala tingting blong yu, samting ya i save halpem yu blong stap kwaet.

Stret Tingting Long Yu Wan Mo Long Ol Narafala

Blong stap gat tingting we i kwaet, yu mas tingbaot yu wan mo ol narafala long wan fasin we i stret. Samting ya i save kamaot tru long stadi blong Baebol, from we hem i soemaot se evriwan oli no stretgud olgeta taem oli bon mo from samting ya oli gat ol slak fasin. Antap moa, save blong Baebol bambae i halpem yu blong gat moa lav. I nidim lav blong gat longfala tingting long ol narafala.​—⁠Jon 13:34, 35; Rom 5:12; Filipae 1:⁠9.

Lav mo filing blong wantem fogif i save kwaetem yu taem yu harem se tingting i no stap kwaet. Sipos wan man i gat ol fasin we i mekem se yu kros kwiktaem, lav bambae i mekem yu yu tingbaot se ol fasin blong hem nomo yu no laekem, i no man ya. Tingbaot hamas taem ol slak fasin blong yu oli mas traem longfala tingting blong God mo mekem ol narafala oli kros.

Stret tingting long saed blong yu wan bambae i halpem yu tu blong wet longtaem. Eksampel, ?yu yu harem nogud from we yu bin traehad blong kasem ol spesel wok long wok blong Jeova, be evritaem i no kamtru olsem yu wantem? ?Yu harem se longfala tingting blong yu i stap kasem en blong hem kwiktaem? Sipos i olsem, ale tingbaot se plante taem fasin flas i stampa blong fasin blong no gat longfala tingting. Solomon i talem se, “Man we tingting blong hem i longfala i moa gud, i bitim man we tingting blong hem i antap tumas.” (Eklesiastis 7:⁠8) Yes, fasin flas i blokem bigwan fasin ya blong wokem longfala tingting. ?I tru se man we i gat tingting daon i faenem i isi moa blong wet wetem fasin kwaet, no? From samting ya, wokem fasin daon, mo bambae yu save kamgud moa blong akseptem fasin blong wet wetem pis long tingting.​—⁠Proveb 15⁠:33.

Ol Presen We Oli Rij Oli Kamaot Long Fasin Ya Blong Gat Longfala Tingting

Bigfala fasin we ol man oli savegud Ebraham from, hemia strong bilif blong hem. (Rom 4:11) Be, longfala tingting i mekem se bilif blong hem i stap longtaem. ?Wanem presen we hem i kasem from we hem i stap wet long Jeova?

Oltaem Jeova i gohed moa blong trastem Ebraham. Taswe nem blong Ebraham i kam hae mo ol pikinini blong hem oli kam wan bigfala nesen. Olgeta nesen blong wol oli save kasem blesing from laen blong hem. Ebraham i wok olsem man we i talemaot tok blong God mo tu i olsem wan man we i saen blong Man Ya We i Wokem Olgeta Samting. ?Ebraham i save kasem wan presen we i moa gud bitim hemia from bilif mo longfala tingting blong hem?

“Hae God i kaen tumas, mo hem i gat sore” long ol Kristin we oli gat longfala tingting blong stanap strong long ol traem we oli stap kasem. (Jemes 5:​10, 11) From we oli stap mekem wil blong hem, voes blong hat mo tingting blong olgeta wanwan i haremgud, i no stap stikim olgeta. Ale, long saed blong yu, sipos yu wet long Jeova mo wetem longfala tingting yu stanap strong long ol traem we yu stap kasem, fasin ya blong yu blong gat longfala tingting bambae i mekem se Jeova i glad long yu mo i blesem yu.

Longfala tingting i givhan bigwan long ol man blong God long olgeta haf long laef blong olgeta. Tu man blong wok blong Jeova, Christian mo Agnes, tufala i faenemaot samting ya taem tufala i wantem blong mekem promes blong mared. Be oli wet oli no mekem promes blong tufala long stret taem from we oli respektem tingting blong papa mo mama blong Christian, we oli nidim taem blong save Agnes. ?Wanem frut i kamaot long samting ya?

Christian i eksplenem se, “Biaen nomo mifala i luksave se longfala tingting blong mitufala i gat bigfala mining long papa mama blong mi. Longfala tingting blong mitufala blong stap wet i no finisim fasin fren blong mi mo waef blong mi. Be i faswan samting blong givhan long fasin fren blong mitufala wetem papa mo mama blong mi.” Yes, longfala tingting i karem ol frut we oli gudfala tumas.

Longfala tingting i mekem pis i kamaot tu. Famle mo ol fren bambae oli glad we yu no mekem wan bigfala rao evritaem oli mestem long wan samting. Kwaet fasin blong yu mo fasin blong soem se yu kasem save long ol narafala taem oli mekem mastik, bambae i blokem ol trabol we i save mekem evriwan i harem nogud no i sem. Wan proveb blong Jaena i talem se: “Longfala tingting long taem blong kros bambae i sevem yu long wan handred dei blong ­harem nogud.”

Longfala tingting i mekem prapa fasin blong yu i naes moa, i olsem we i halpem yu blong mekem ol narafala gudfala fasin oli stap oltaem. I mekem bilif blong yu i stap strong, pis blong yu i stap longtaem mo lav blong yu i no save kam slak. Longfala tingting bambae i halpem yu blong stap glad taem yu stap soemaot fasin kaen, gud fasin, mo fasin kwaet. Fasin ya blong gat longfala tingting i givim paoa ya we yu nidim blong wokem fasin ya blong stanap strong longtaem mo fasin blong blokem ol samting we yu nomo yu wantem.

Sipos yu wet wetem longfala tingting blong luk ol promes blong Jeova oli kamtru fulwan, ale bambae yu sua blong haremgud long wan nambawan fyuja. Olsem Ebraham, yu mas ‘bilif strong, mo tingting blong yu i mas longfala, blong yu save kasem ol samting we God i promes blong givim.’​—⁠Hibrus 6:⁠12.

[Tok blong pija long pej 23]

Fasin ya blong fren kolosap wetem Jeova bambae i halpem yu blong soemaot longfala tingting, olsem Ebraham i mekem