?Yu Yu Laekem Blong Stadi Yu Wan?

ENI trufala man blong God bambae i glad tumas blong yusum plante taem blong mekem prapa Baebol stadi blong hem wan. (Ol Sam 1:​1, 2) Be, plante oli faenem i had blong spenem bigfala taem mo paoa, olsem we oli laekem blong mekem, long prapa stadi blong olgeta wanwan, from we plante narafala samting oli stap kakae bigfala taem mo paoa blong olgeta.

Be, blong stap gohed olsem ol strongfala man blong God, evriwan oli nidim we glad mo paoa blong olgeta i kam nyuwan bakegen evri dei, mo blong mekem olsem, oli mas faenem ol nyufala poen we oli dip moa long saed blong trutok long Tok blong God. Trutok blong Baebol we i bin pusum yu bigwan plante yia bifo, ating i no moa pusum yu tumas naoia. Taswe, i gud, mo i nidim we yumi gat wan strong tingting blong traehad oltaem blong kasem ol nyufala trutok ya we oli mekem se yumi stap gohed strong long saed blong speret.

?Olsem wanem ol man blong bilif bifo oli kam strong long saed blong speret taem oli mekem prapa stadi blong olgeta wanwan long Tok blong God? ?Olsem wanem sam man blong Jeova long taem blong yumi oli mekem se oli haremgud moa long stadi blong olgeta mo oli kasem gudfala frut long hem? ?Olsem wanem oli kasem blesing from fasin traehad blong olgeta?

Oli Kasem Paoa Bakegen Tru Long Stadi Wanwan

King Josia blong Juda i strong moa blong agensem ol man we oli wosip long aedol afta we oli ridim ‘buk blong loa blong Jeova we Moses i raetem’ long hem. Yu no mas ting se hemia fastaem we hem i harem haf ya long Tok blong God; be taem hem i harem mesej ya stret long ol faswan hanraet, samting ya i pusum hem blong faet strong moa long saed blong tru wosip.​—⁠2 Kronikel 34:​14-19.

Profet Daniel i kasem save long ‘namba blong ol yia we Jerusalem i stap nogud afta we oli spolem,’ mo i tru, i no kamaot long buk blong Jeremaea nomo be long ol narafala “buk” tu. Ating hemia ol buk olsem Levitikas (26:​34, 35), Aesea (44:​26-28), Hosea (14:​4-7), mo Emos (9:​13-15). Wanem we hem i pruvum tru long fasin traehad blong hem blong stadi long ol buk blong Baebol, i lidim man ya we i tinghevi long wosip blong hem, blong kam kolosap long God long prea we i kamaot long dip filing blong hem. Hem i kasem ansa blong prea ya we i askem wetem ful hat blong hem, taem hem i kasem moa save mo ol promes long saed blong taon blong Jerusalem mo ol man ples blong hem tu.​—⁠Daniel, japta 9.

Josia, we i mekem “wanem we i stret long ae blong Jeova,” mo Daniel, we i “wan man we i gud tumas” long lukluk blong God, tufala i sem mak long yumi tede. (2 King 22:2; Daniel 9:23) Fasin traehad blong tufala wanwan long saed blong fasin blong wantem tumas blong stadi Baebol, i lidim tufala blong gru moa long saed blong speret mo i halpem tufala blong fasgud moa wetem God. Sem mak long plante narafala man blong Jeova bifo, olsem Jepta, mo wan man blong raetem Ol Sam we i kamaot long famle blong Asaf, mo Nehemaea, mo Steven. Olgeta ya oli soemaot se oli lukaotgud blong mekem prapa stadi blong olgeta wanwan long haf blong Baebol we oli kasem finis long taem blong olgeta.​—⁠Jajes 11:​14-27; Ol Sam 79, 80; Nehemaea 1:​8-10; 8:​9-12; 13:​29-31; Ol Wok 6:15 kasem 7:⁠53.

Mekem Minista Wok i Risen Blong Stadi

Plante man blong Jeova tede we oli mekem wok blong hem long plante yia finis, oli folem wan program blong mekem prapa Baebol stadi blong olgeta wanwan. Oli faenem se samting ya i impoten, blong mekem se oli stap wekapgud long saed blong speret mo blong mekem ol Kristin responsabiliti blong olgeta fulwan. Nating se i olsem, plante long olgeta oli agri se i no isi oltaem blong skelem taem mo paoa we oli mas yusum blong stadi, wetem taem mo paoa we oli nidim blong mekem ol narafala samting we oli no mas fogetem.

Be, fasin blong stap wekap long saed blong speret tru long fasin traehad blong mekem prapa Baebol stadi blong yu wan, i impoten blong fulumap ol nid long saed blong Kristin minista wok, long taem ya we i kolosap long en blong wok ya blong talemaot gud nyus blong Kingdom long olgeta ples long wol. Olgeta we oli laekem tumas blong kasem ol nyu mo dip save long Tok blong God, oli naf blong mekem trutok i kasem hat blong olgeta we oli hanggri long saed blong speret, hemia wan hadwok ya. Samting ya i tru, nating se wan man i stap pulum fis long saed blong speret long wora we i gat plante fis, no i stap gohed strong long ol teritori we oli wok long hem plante taem, mo we ol man oli no intres tumas long gud nyus.

Stadi Oltaem Long Tok Blong God

Samting we ol narafala oli mekem i save givim tingting long yu olsem wanem yu save haremgud moa long program blong stadi blong yu mo olsem wanem yu mo famle blong yu, yufala i save yusum taem blong stadi long fasin we i karem moa frut. Wan samting we ol man blong God bambae oli no wantem blong mestem, hemia blong ridim Tok blong God oltaem. Plante oli putum mak blong ridim tri no fo japta blong Baebol evri wik. ?Yu yu wantem ridim ful Baebol long wan yia? Ale bambae yu glad blong spenem moa taem blong ridim, maet haf haoa evri dei.

?Yu yu ridim ful Baebol moa long wan taem? ?From wanem yu yu no putum wan nyufala mak nekis taem? Blong jenisim, wan Kristin woman i ridim ol buk blong Baebol folem oda we oli raetem ol buk ya long hem. Hem i kasem plante smosmol poen, we oli stanap long taem we ol samting ya oli bin hapen, we hem i mestem bifo. Wan narafala Kristin woman i ridim ful Baebol faef taem long ol faef yia we i pas, evritaem i gat wan defren mak we hem i wantem kasem. Fastaem, hem i stat long Jenesis i ridim nomo kasem Revelesen. Namba tu taem, hem i raetemdaon wan no tu laen long notbuk blong hem blong talem impoten poen long ol japta wanwan. Stat long namba tri yia i go, hem i yusum wan bigfala Baebol we i gat ol refrens long hem, fastaem hem i jusum sam refrens blong jekemap mo biaen i lukluk moa long ol futnot wetem ol tok we i stap long apendiks. Namba faef taem, hem i yusum ol map blong Baebol blong save moa long ol ples. Hem i talem se: “Long mi, fasin blong ridim Baebol i olsem wan kakae we mi glad long hem.”

Samfala we oli intres tumas blong stadi Baebol, oli faenem se i gud blong gat wan Baebol we oli yusum nomo blong mekem prapa Baebol stadi blong olgeta wanwan, ale oli raetem ol smosmol poen we oli intres long olgeta long ol spes long saed blong ol pej, ol pijatok we oli pulum tingting no ol namba blong pej blong ol narafala buk we oli save jekem biaen. Wan man blong talemaot gud nyus fultaem i haremgud tumas long en blong evri manis, taem hem i raetem long Baebol we i yusum blong stadi nomo, ol nyufala poen we hem i lanem long manis ya. Hem i talem se, “Mi stap lukluk i go long ol impoten haoa ya blong mi, nao samting ya i halpem mi blong kasem kwiktaem ol narafala mak blong manis.”

Sam Waes Tingting

?Yu yu harem se program blong yu i fulap wetem ol wok we yu mas mekem evri dei mo evri wik, mo se yu nidim sam advaes olsem wanem blong yusumgud smol taem we yu yu gat blong stadi? I gud blong karem wetem yu wanem we yu plan blong ridim, mo ridim long ol smosmol fri taem blong yu. Long haos no ples we yu stap stadi oltaem long hem, putum ol buk mo ol narafala tul we yu yusum blong stadi long wan stret ples, blong yu save faenem olgeta isi nomo. Mekem we yu yu haremgud long kona we yu stap stadi long hem be yu no mas haremgud tumas we yu wantem slip. ?Yu yu gat wan tok blong mekem? Ridim haf ya long faswan jans we yu gat, biaen tingting long hem taem yu stap spel no mekem ol defren wok.

Ol narafala oli save joen wetem yu blong yusum taem long wan fasin we evriwan i save haremgud moa from. Eksampel, maet wan man i stap rid long yu long ol samting we i isi blong yu kasem save long olgeta, taem yu stap mekem ol smol wok no mekem ti blong man ya we i gat kaen fasin blong rid long yu. ?Olsem wanem sipos evriwan long haos oli agri blong makemaot wan kwaet taem blong mekem prapa stadi blong olgeta wanwan? “?Wanem ol samting we yu yu glad blong ridim long ol dei we oli jes pas?” Maet oltaem yu save kasem sam gudfala samting from ol save we ol fren blong yu oli bin lanem, taem yu askem kwestin ya blong statem wan storeyan wetem olgeta.

?Yu yu intres blong kasem sam nyufala tingting long saed blong program blong yu blong stadi? Yu yu save traehad blong kasem wan mak long saed blong taem we yu yusum blong stadi, long sem rod we plante oli traehad blong kasem wan mak long saed blong ol haoa we oli spenem blong tokbaot Baebol long ol narafala man. Wan fultaem pablisa (paenia) i traehad blong kasem wan mak long saed blong ol haoa blong stadi long wan manis, mo i glad taem hem i luk namba blong ol haoa ya oli stap kam antap we kolosap i kasem mak blong hem. Sam narafala oli katem taem blong lukluk televisin mo long rod ya oli gat taem blong stadi. Plante oli jusum blong stadi long wan stampa poen we oli gohed long hem longtaem lelebet, olsem ol frut blong speret, histri blong ol buk blong Baebol, no nambawan fasin blong tij. Sam oli glad blong raetemdaon taem we ol defren samting oli bin kamaot, maet i soemaot olsem wanem laef blong ol king blong Isrel mo ol profeta oli joen, no olsem wanem Ol Wok blong ol Aposol i laenap long saed blong taem wetem ol leta blong Pol.

?Ol yangfala, yu yu wantem kam strong moa long bilif? ?From wanem yu no jusum wan buk blong stadi dip long hem long nekis taem blong spel blong yu long skul? Wan studen blong hae skul we i baptaes finis i jusum Mankind’s Search for God, wan buk we Watch Tower Society i wokem. Long en blong evri japta, hem i raetemdaon ol impoten samting we hem i lanem long japta ya. Samting ya i hadwok lelebet mo i tekem moa taem bitim we hem i tingbaot. Be, taem hem i finisim buk ya fulwan, hem i sapraes bigwan olsem wanem mesej blong Baebol i tru we i tru.

Oltaem Yumi Mas Wantem Blong Lanem Moa

Plante long ol trufala man blong Jeova tede oli gat “plante wok blong mekem long wok blong Masta blong yumi.” (1 Korin 15:58) Nating se yu jenisim plan blong yu mo yu traehad moa, maet program we yu folem long evri wik i no save jenis bigwan. Be, sipos oltaem yu wantem blong kasem moa dip save blong trutok mo savegud mo folemgud olsem wanem ol stampa tingting blong Jeova oli stap kamtru, samting ya bambae i halpem yu blong kamgud moa long fasin ya blong stadi.

I gud tumas blong save ol gudfala frut we oli bin kamaot long olgeta we oli kam moa gud long fasin blong olgeta blong stadi. Wan Kristin man i luksave se hem i stap lusum gudfala tingting blong lukaot dip save blong trutok, nao hem i jenisim sam samting long laef blong hem blong i save gat moa fri haoa blong mekem prapa stadi blong hem. Hem i talem se, “I givim wan glad long mi we mi neva save bifo. From we bilif blong mi i stap kam strong moa se God i stampa blong Baebol, mi faenem se mi save tokbaot bilif blong mi wetem trufala filing blong glad. Mi filim olsem we mi fulap gud mo mi strong gud long saed blong speret, mo mi haremgud long en blong dei.”

Wan elda blong ol Wetnes blong Jeova we i stap visitim ol kongregesen, i stap go long plante kongregesen, ale hem i tokbaot ol narafala gudfala frut we oli save kamaot, i se: “Olgeta we oli strong long fasin ya blong stadi wanwan oltaem ol toktok mo fasin blong olgeta oli laef mo oli soemaot i klia nomo. Oli joengud wetem ol narafala, mo oli no save slak taem ol narafala oli talem ol samting we i daonem olgeta. Long wok blong prij, oli save jenisim ol toktok blong olgeta blong mekem i stret long ol man mo tu oli luksave kwiktaem ol nid blong ol man we oli mitim olgeta.”

Hem i ademap wan poen we maet samfala oli wantem tingbaot taem oli skelem prapa fasin blong olgeta blong stadi. “Long ol miting blong tokbaot Baebol, plante oli ridim nomo ol ansa blong olgeta long buk. Oli save haremgud moa sipos oli tingting dip olsem wanem ol save ya oli joen long wanem we oli lanem finis long prapa laef blong olgeta.” ?Yu yu ting se yu save kam moa gud long saed ya?

Profet Daniel, afta we hem i stap laef bitim 90 yia, i harem se i no kasem i naf save long ol rod blong Jeova. Long ol laswan yia blong hem, hem i askem wan kwestin long samting we hem i no save kasem fulwan: “O Masta blong mi, ?wanem bambae i kamaot laswan long olgeta samting ya?” (Daniel 12:⁠8) I klia se fasin ya we hem i gat oltaem blong wantem lanem moa long saed blong trutok blong God, samting ya nao i bigfala samting we i mekem se hem i holemstrong long God long nambawan fasin long ful laef blong hem, nating se plante samting i kamaot long hem.​—⁠Daniel 7:​8, 16, 19, 20.

Ol man blong Jeova wanwan oli gat semfala responsabiliti blong stanap strong olsem ol Wetnes blong Hem. Oltaem yu mas wantem blong lanem moa samting, blong yu save stap strong long saed blong speret. Traem ademap wan no tu nyufala samting long program blong yu evri wik, manis, no yia long saed blong prapa Baebol stadi blong yu wan. Bambae yu luk olsem wanem God i blesem yu long eni smol fasin traehad long rod ya. Yes, haremgud long prapa Baebol stadi blong yu wan mo frut we i kamaot from.​—⁠Ol Sam 107:⁠43.

[Futnot]