Tingbaot “Haos Blong God” Wetem Fasin Tangkyu
“MI MI askem wan samting long God, wan samting nomo we mi mi wantem. Mi wantem tumas blong mi save stap long haos blong Hae God oltaem long laef blong mi, blong mi stap lukluk ol gudgudfala fasin blong Hae God, mi stap tingtinggud long olgeta.”—Ol Sam 27:4.
Wetem fasin tangkyu, King Deved i glad, no i haremgud tumas long haos blong Jeova. ?Yu yu gat sem filing long saed blong ol stampa ples blong trufala wosip tede? Wetem ol narafala samting we oli joen long wosip blong Jeova long taem blong yumi, i gat bitim 95 haos blong Betel long ol branj blong Watch Tower Society.
Helga, we i stat wok long Betel long Jemani long 1948 i eksplenem se, “Taem mi mi stap tingtingbak long plante yia we mi stap wok long Betel, mi fulap wetem bigfala tangkyu mo bigfala fasin glad, mo ol fasin ya oli kam bigwan moa evri yia.” Helga i wan long ol 13,828 man we oli glad fulwan blong wok long ol Betel raon long wol, mo we long 1993 sevis yia, oli ‘bin luk ol gudgudfala fasin blong Jeova.’ ?Nem ya Betel i minim wanem? ?Olsem wanem olgeta Wetnes blong Jeova, nating se oli mekem wok blong God insaed no afsaed long Betel, oli save tingbaot plan ya wetem fasin tangkyu?
Wan Nem We i Stret Long Fasin Blong Onagud Long God
Nem ya “Betel” i stretgud, from we Hibru tok ya Behth-ʼElʹ i minim “Haos blong God.” (Jenesis 28:19, futnot) Yes, Betel i olsem wan haos we ol wok blong hem i folem gudfala plan no ‘wan haos we fasin waes i mekem hem i strong,’ ale God mo wil blong hem i stampa samting blong ples ya. (Proveb 24:3) Herta i talem wetem fasin tangkyu se, “I olsem wan famle nomo. Mifala i gat gudfala plan evri dei long ol wok blong mifala.” Herta i bin wok bitim 45 yia long sem Betel olsem Helga. Evri memba blong bigfala famle ya oli gat prapa wok mo ples blong olgeta, nao from samting ya oli haremgud mo sef. Stret long mining blong nem ya Betel, gudfala oda mo plan i stap long ol defren dipatmen. Samting ya i givim pis, i mekem se wok blong talemaot gud nyus i save gohedgud, mo i givim gudfala risen long ol kongregesen blong oli tinghae long “Haos blong God.”—1 Korin 14:33, 40.
?From wanem i gat nid blong ol haos Betel ya? Eksampel, magasin ya, oli prentem long wan Betel. Wok blong talemaot mesej blong Kingdom mo seraotem kakae long saed blong speret, we Jisas Kraes i bin talemaot, i mekem se ogenaesesen i mas gat ol plan olsem Betel—wetem sapot blong ol man we oli glad blong mekem wok long Betel, mo wetem fasin blong ol man blong wosip long Jeova blong tinghae tumas long haos ya.—Matyu 24:14, 45.
?Yu yu wantem save moa long saed blong program blong evri dei blong wok long ples ya? Long ples we Helga mo Herta oli stap long hem, i gat wan myusek bel we i ring long olgeta haos we ol man oli slip long olgeta long 6:30 long moning, nating se plante long bitim 800 man we oli wok oltaem oli girap bifo long taem ya blong rere long dei ya. Long 7 klok long moning, Mande kasem Sarede, ol famle oli joen long rum blong kakae blong tokbaot vas blong dei, no wosip blong moning. Biaen oli brekfas long gudfala kakae. Evri dei, wok i stat long 8 klok long moning mo gohed blong eit haoa, wok i stop nomo long taem blong kakae long medel dei. (Oltaem famle ya i wok haf dei long Sarede.) I gat plante wok blong mekem, nating se long kijin, ples blong prentem ol buk, ples blong wasem klos, ol ofis, ol woksap, ples blong wokem ol buk, no ol narafala dipatmen.
Long ol naet mo long ol wiken, ol memba blong famle oli joen wetem ol lokol kongregesen long ol miting mo wok blong prij. Plante brata long Betel oli ol elda no ol man blong givhan long ol kongregesen ya. Ol lokol Wetnes oli rili glad long fasin blong ol brata ya blong wokgud wetem olgeta, tufala grup ya oli wok wanples olsem wan bodi nomo, we evriwan oli soemaot semfala fasin respek mo fasin blong kasem save long narafala. (Kolosi 2:19) Ol man we oli wok long Betel oli save se wok blong olgeta long “Haos blong God” i impoten moa long ol narafala wok. Be, strong filing blong wantem prij mo fasin blong joen long kongregesen, we tufala i joen wetem fasin blong skelemgud ol samting, i givim paoa long saed blong speret long man we i wok long Betel, i mekem glad blong hem i kam antap, mo i mekem hem i karem moa frut long wok blong hem olsem wan memba blong famle ya. !Ol fasin ya oli impoten tumas taem oli stap wok long “haos” we nem blong hem i joen long fasin blong ona long God wetem ful laef blong olgeta!
Gohedgud Long Wok Long Betel
?Wanem i halpem plante Wetnes blong Jeova blong gohedgud long wok long Betel? Sam memba blong famle blong Betel long Franis we oli wok plante yia finis, oli talem ol tok olsem ya se: “Lav we mifala i gat long Jeova. Strong tingting blong wantem gohed blong wok long eni ples we hem i putum yumi long hem; fasin ya blong gat tingting daon, fasin ya blong stap daon long narafala, mo fasin obei long ol rod we Sosaeti i lidim mifala long hem.” (Denise) “Mi luksave se i impoten tumas blong respektem stampa rul we Pol i talem long Rom 12:10: ‘Oltaem yufala i mas rere blong ona long yufala.’ Vas ya i soemaot long yumi se i impoten blong no ting se ol man oli mas agri oltaem long prapa tingting blong yumi be, yumi mas lesin moa long tingting blong ol narafala. I min se, yumi no mas stap lukaot rod blong kam hae moa long ol narafala.” (Jean-Jacques) Barbara i talem se, “Respek blong mifala long wok blong Betel i save lus sipos mifala i tingbaot ol samting olsem ol man nomo oli tingbaot, samting ya bambae i save lidim mifala blong fogetem trutok ya se Jeova i stap lidim ogenaesesen blong hem. Respek olsem i save lus sipos mifala i foldaon from fasin blong ol narafala we oli no stretgud olgeta.”
Evriwan long Betel oli no stretgud olgeta, taswe i nidim we oli tingtinggud long ol man we oli jusum blong joen oltaem wetem olgeta. Ol yangfala no olgeta we oli jes kam, i gud we oli no joen nomo wetem olgeta we oli gat sem yia olsem olgeta. Olgeta we oli soemaot fasin blong komplen no blong gat tingting we i stap daonem ol man mo ol samting, oli no mekem gudfala kampani long Betel no long kongregesen. Be defren nao, fasin blong man we i kasem “waes long heven” we Jemes 3:17 i tokbaot, i givim ol blesing. “Nambawan samting blong hem, laef blong hem i klingud. Hem i man blong pis, i kwaet man, i man blong joen gud long narafala man, mo i man we i gat sore. Waes blong man ya i gat plante gudfala frut long laef blong hem. Man ya i no save jajem man long fasin we i no stret, mo hem i no gat tu tingting.” Ol gudfala fasin olsem, wetem fasin ya blong gat longfala tingting, mo kaengud fasin, man i save luk long “Haos blong God,” mo samting ya i save mekem se oltaem we hem i stap long ples ya i haremgud mo i wantem wok moa. Olgeta we oli no Wetnes we oli kam visitim ples ya, plante taem oli talemaot filing blong olgeta we oli laekem ol gudfala fasin, fasin fren, mo fasin glad blong ol man we oli wok long ples ya.
Anny, we i gat bitim 70 yia blong hem mo i bin stap olsem wan memba blong famle blong Betel long Jemani stat long 1956, i eksplenem olsem wanem hem i holemtaet fasin blong wantem blong mekem wok: “Blong mi stap strong long saed blong speret, mi mi traehad bigwan blong ridim olgeta buk blong Sosaeti, blong go long ol miting oltaem, mo blong go prij oltaem. Mo tu mi traem blong stap gud long saed blong bodi taswe mi stap mekem eksasaes evri moning, plante taem mi stap klaem lada nomo mi no yusum eleveta, mo mi wokbaot plante speseli long wok blong prij.”
Plante we oli gat ekspiryens long laef blong Betel bambae oli agri wetem Anny. Oli neva stop blong lanem samting, oli neva stop long wok. Gudfala bodi i nidim se oli gat inaf slip mo sam eksasaes mo oli no bitim mak long fasin blong kakae mo dring. Samting we i moa impoten bitim ol samting ya, se oli no fogetem blong prea mo stadi long Baebol wanwan.
Bigfala Respek Long Tabu Wok Long Betel
“?Yu yu wok wea?” hemia kwestin we oltaem ol man oli askem long ol memba blong Betel. Ol wok we oli askem olgeta blong mekem oli defdefren, be i stret we yumi evriwan i tinghae long evri wok ya. ?From wanem? From we evri wok ya—nating se i blong wokem wan mesin blong prentem buk olsem kakae long saed blong speret, wasem ol klos, kuk mo klinim haos blong famle, no mekem wok long ofis—oli ol tabu wok ya. Olsem yumi tokbaot antap, ol Kristin oli no tinghae moa long wan wok bitim ol narawan. Tingbaot se ol wok we ol pris mo ol Livaet oli mas mekem long haos blong God, long yad blong haos blong God mo long ples blong kakae, oli tingbaot olgeta wok ya olsem wok blong Jeova we i tabu. Hemia ol wok blong kilim mo mekemrere ol anamol blong mekem sakrifaes, fulumap oel long ol laet, mo tu wok blong klinim ol ples mo wok blong ol wajman. Sem mak, evri wok long Betel i wan wok we man i save haremgud long hem mo i wan gudfala wok long “ol wok ya blong Masta blong yumi,” taswe i wan nambawan blesing blong mekem wok ya.—1 Korin 15:58.
Yumi tingting smoltaem long wan fasin we i save blokem yumi blong yumi no gat fasin tangkyu long “Haos blong God.” Ol Kristin insaed mo afsaed long Betel oli nidim blong agensem fasin blong traem winim narafala mo fasin jelas, we oli “ol rotin fasin long ol bun.” (Proveb 14:30) Man i no gat risen blong harem nogud long ol man we oli kasem spesel wok long Betel. Antap moa, i no gat ples blong fasin jelas long famle blong Betel, from we fasin jelas i wan long ol fasin we bodi nomo i wantem. Wet wetem tingting daon—hemia nao gudfala advaes blong wan we maet i luk olsem se i mestem ol spesel wok taem ol narafala oli kasem ol nambawan bigfala wok olsem. Wan narafala samting se, ol man we oli stap wanples long Betel, samfala oli kamaot long famle we i gat mane, samfala no gat. !I nogud sipos wan man i skelem ol samting we hem i gat wetem ‘ol samting blong sam narafala man’! Fasin blong stap haremgud long ‘kakae mo klos nomo’ i halpem plante blong gohed blong holemstrong plante yia long wok blong olgeta long “Haos blong God.”—Galesia 5:20, 26; 6:4; 1 Timote 6:8.
Ol Wetnes blong Jeova mo ol milyan narafala oli kasem bigfala help long ol wok we ol man ya oli mekem long Betel we oli no kasem pei from—wok we ol man we oli no tingbaot olgeta nomo oli mekem, i kamaot long lav we oli gat long God mo long ol narafala. Ol haos Betel mo ol ples blong prentem buk blong Watch Tower Society, olsem ol narafala tul blong mekem tiokratik wok, oli pem ol samting wetem ol presen mane nomo. (2 Korin 9:7) Olsem King Deved mo ol prins mo ol jif blong Isrel, yumi save soemaot se yumi tinghae mo yumi gat fasin tangkyu long “Haos blong God” taem yumi sapotem Sosaeti long fasin blong yumi mo yumi givim presen long saed blong mane. (1 Kronikel 29:3-7) Naoia yumi luk olsem wanem i gat rod “blong stap lukluk ol gudgudfala fasin blong Hae God” long Betel.
Ol Blesing Long “Haos Blong God”
Taem yu go long wan asembli, ?yu yu glad bigwan, blong stap long medel blong ol man blong Jeova we oli glad? !Tingbaot, wan man we i wok long Betel i glad blong mekem wok blong Jeova long medel blong grup blong ol brata evri dei! (Ol Sam 26:12) !I nambawan ples blong gru long saed blong speret! Wan brata i talem se hem i lanem moa blong givhan long hem wan blong mekem fasin blong hem i moa gud long wan yia nomo long Betel, bitim we i mekem long tri yia long narafala ples. ?From wanem? From we i no gat wan ples olsem we hem i save gat jans blong luksave mo folem fasin blong bilif blong plante Kristin we oli bigman long saed blong speret.—Proveb 13:20.
Long Betel wan man i stap long medel blong ol man we yumi save talem se oli gat plante ekspiryens blong givim advaes. Antap moa, i gud blong lesin long ol komen blong olgeta we oli reregud fastaem long wosip blong moning mo long Wajtaoa Stadi blong famle long Betel, mo tu taem yu lesin long ol tok we oli kamaot long evri Mande naet. Taem ol nyuwan oli kam, oli kasem advaes long Skul Blong Olgeta We Oli Jes Kam Long Betel mo oli mas ridim ful Baebol long 12 manis.
Ol ripot mo ol ekspiryens blong ol visita we oli kam long ol narafala kantri oli leftemap tingting moa. Antap moa, ol memba blong Hed Kampani no ol man we oli wok long nem blong olgeta, oli visitim ol branj ofis. “Nating se oli gat plante wok blong mekem,” olsem Helga i talem, “oltaem ol brata ya oli faenem taem blong toktok kaen no smael.” !I leftemap tingting bigwan taem yu wan yu save luk ol man olsem we oli stap holemstrong, mo we fasin blong olgeta i mekem tingting blong yu i kwaet mo oli no gat flas fasin nating!
Speseli long Betel wan i save luklukgud olsem wanem ogenaesesen blong God i wok mo olsem wanem tabu speret blong hem i save wekemap hat blong olgeta we oli wantem wok mo mufmuvum ol han blong oli mekem wok. Wan brata we i bin wok long Betel long Franis stat long 1949 kasem naoia i eksplenem se, “Long Betel yu harem se yu stap kolosap moa long ‘medel blong ol wok.’ ” Hem i gohed se: “Mi mi save talem tru se long mi, Betel i wan rod blong mekem wok blong God fultaem we i letem mi blong givim moa taem mo paoa blong mekem wok blong Jeova mo mekem wok we i givhan long moa brata.” ?Mo hemia i no trufala plan long laef blong yumi—blong mekem wil blong God? Long Betel wan i save ‘stap presem God olwe nomo.’ !Hemia i wan bigfala blesing!—Ol Sam 44:8.
Olsem we yumi bin faenemaot, wan we i stap wok long Betel i save lukluk ol gudgudfala fasin blong Jeova mo faenem plante blesing. (Hibrus 6:10) ?Yu yu save traem wok long “Haos blong God”? Olgeta Wetnes blong Jeova we oli gat 19 yia olsem, we oli strong long saed blong speret mo long saed blong bodi, mo we oli olsem Timote, ‘ol brata oli talem se olgeta oli ol gudfala man,’ oli save fulumap pepa blong askem wok long Betel. (Ol Wok 16:2) Plante oli mekem wok long Betel blong ful laef blong olgeta, olsem olgeta ya we oli talemaot tingting blong olgeta antap. Samting ya we man blong raetem Ol Sam i wantem tumas—hemia blong ‘stap long haos blong Hae God oltaem long laef blong hem’—samting ya i kamtru long laef blong olgeta ya.
Ol Wetnes blong Jeova oli gat bigfala respek long ol brata mo sista blong olgeta we oli soemaot fasin blong livim sam samting we olgeta nomo oli wantem blong mekem wok long Betel, mo oli soem fasin we oli wantem mekem ol wok ya mo oli glad fulwan long hem. Nating se yumi mekem wok blong Jeova long Betel no narafala ples, yumi evriwan i gat gudfala risen blong gat filing olsem King Deved—blong tingbaot “Haos blong God” wetem fasin tangkyu, no glad.
[Tok blong pija long pej 31]
Ol Kristin ya oli haremgud tumas long tabu wok ya long Betel long Jemani