Wan Jyos We i Seraot—?I Save Gohed?

“OLGETA we oli talem se oli stap folem trutok blong Kraes we i save sevem olgeta, oli blong Jyos long wol ya. Fasin seraot blong Krisendom​—⁠bitwin ol kantri long Is mo ol kantri long Wes, mo bitwin Roman Katolik mo ol jyos blong Refomesena​—⁠hemia ol fasin seraot long wan Jyos.” (Christians in Communion) Hemia nao olsem wanem wan man blong raetem buk i tingbaot ol Kristin Skul​—⁠olsem wan bigfala famle blong ol skul, we evriwan i stap talem se oli bilif long Jisas Kraes.

Be, hem i wan famle we i seraot, ol bilif blong olgeta mo ol rul we oli stap folem long saed blong fasin blong olgeta, oli agensem olgeta bakegen. Wan man we i stap lukluk samting ya i talem se: “Ol rul we man i mas folem blong hem i naf blong joen long Kristin Skul tede . . . oli daon moa long ol rul we man i mas folem blong mekem trep long wan bas.” Oraet, ?olsem wanem yumi save eksplenem trabol blong jyos long saed blong speret? Wan Katolik bisop Basil Butler i talem se: “Wan Kristin Skul we ol man blong hem oli gat ol defren tingting i rili sik tumas.” (The Church and Unity) ?Olsem wanem sik ya i stat? ?I gat hop blong kamgud bakegen?

“Man Blong Brekem Loa”

Aposol Pol i givim woning se bambae fasin se­raot i kam antap. Hem i raet long ol Kristin long Tesalonaeka we oli ting se taem ya we bambae Kraes i stap bakegen, i kolosap, i se: ‘Bambae yufala i no letem ol man oli gyaman long yufala olsem. Dei ya [bigfala dei blong Jeova] i no save kam fastaem. Fastaem ol man bambae oli girap, oli agens long God olgeta, olsem we i lastaem blong oli mekem olsem. Mo man ya we oli kolem Man blong Brekem Loa, we i man blong lus, hem bambae i mas kamtru fastaem.’​—⁠2 Tesalonaeka 2:⁠3.

‘Man ya blong Brekem Loa,’ hem nao i statem fasin blong apostasib mo fasin agens insaed long Kristin kongregesen. ?Hu ya man ya? I no wan prapa man, be hemia grup blong ol lida blong Krisendom. Smoltaem afta long ded blong ol aposol blong Jisas, grup blong ol lida ya oli leftemap olgeta oli kam hae moa long olgeta long kongregesen we i mekem apostasi finis, mo biaen oli stat tijim ol waes blong ol hiten man, olsem Triniti mo sol blong man we i no save ded. (Ol Wok 20:​29, 30; 2 Pita 2:​1-3) Olsem wan sik we i stap givim ded, grup ya i mekem se ol tingting blong ol rabis speret we bambae oli mas mekem fasin seraot i kamaot, oli kam insaed long ol kongregesen we oli talem se oli Kristin.​—⁠Galesia 5:​7-10.

Sik ya i bin stat long taem blong aposol Pol finis. Hem i raetem se: “Fasin blong brekem loa, hem i stap gohed, i stap kam strong, be long haed. Be fasin ya i save haed blong taem ya nomo, gogo kasem taem we God bambae i tekemaot hemia we i stap blokem ol samting nogud ya.” (2 Tesalonaeka 2:⁠7) Ol aposol oli blokem rabis tingting blong apos­tasi we i olsem posen. Taem oli no moa stap blong pulum ol man blong joengud long wan tingting nomo, nogud fasin blong apostasi i kam antap olsem wan soa we i kakae olgeta haf blong bodi.​—⁠1 Timote 4:​1-3; 2 Timote 2:​16-18.

Ol wok blong ‘man ya blong brekem loa’ i stap gohed nomo, we i no stop. Long wan ripot we i kamaot i no longtaem, we i tokbaot “wan skul we i kasem trabol long saed blong seks mo long saed blong ol tijing blong hem,” wan ajdikon blong An­glikan Jyos i stap komplen se: “Ol lida blong skul oli sakemaot advaes ya se oli no mas joen long fasin blong seks afsaed long mared. Oli putumap ol man we oli stap slip wetem man bakegen olsem ol lida. Oli mekem samting we i gud i kam olsem i samting nogud mo samting we i nogud i kam olsem samting we i gud.”​—⁠The Sunday Times Magazine, London, Novemba 22, 1992.

Wit Mo Rabis Gras

Jisas Kraes hem wan i tijim se trufala Kristin Skul bambae i lus blong smoltaem. Hem i talem se fasin blong stanemap Kristin kongregesen i olsem fasin ya we wan man i stap planem ol gudfala sid long garen blong hem. Be Jisas i talem se, “wan enemi blong hem i kam, i planem ol sid blong wan rabis gras long garen ya.” Taem ol wokman blong masta, oli askem sipos masta i wantem we oli go pulumaot ol rabis gras, masta blong garen i talem se: “No, livim. Sipos yufala i go pulumaot ol rabis gras ya, maet yufala i save pulumaot ol wit ya tu, tufala wantaem.” ?Bambae wit mo rabis gras, tufala i gohed blong gru wanples gogo kasem wetaem? Masta blong garen i talem se: “Tufala i save gru wantaem gogo i kasem taem blong tekem kakae blong wit i kam.”​—⁠Matyu 13:​25, 29, 30.

Go kasem “taem blong tekem kakae blong wit,” no taem blong seraotem ol man long ol lasdei blong ‘fasin ya blong wol,’ ol gyaman Kristin oli gru wanples wetem ol trufala Kristin. (Matyu 28:20) Devel Setan i yusum ol man blong apostasi blong mekem wan gyaman Kristin kongregesen we i gat doti fasin mo fasin seraot long hem. (Matyu 13:​36-39) Blong traem kopi long trufala Kristin Skul, oli mekem wan gyaman skul we ol fasin blong hem oli blong sem nomo. (2 Korin 11:​3, 13-15; Kolosi 2:⁠8) Taem skul i stap seraot long ol handred yia we oli pas, i kam moa had blong makemaot ol trufala Kristin.

Nyufala Fasin Seraot

Buk ya The Testing of the Churches​—⁠1932-1982 i talem se, long taem blong yumi, “nyufala fasin seraot i bin kamaot, antap moa long karismatik jyos, we i tinghae moa long prapa bilif mo ekspiryens we wanwan man i kasem.” Maet yu intres blong save se sam man oli luk ol karismatik jyos, wetem bilif blong olgeta blong bon bakegen, olsem saen se ol jyos oli stap kamgud bakegen long saed blong speret, be i no saen blong ol nyufala fasin seraot. Eksampel, long ol yia biaen long 1850, ol man long Not Aelan oli luk fasin blong kamgud bakegen olsem. Oli tingting strong se jyos i gat wan gudfala fyuja. Wan ripot i talem se “ol lida blong Presbiterian, Metodis, mo ol Independen skul . . . oli joengud olsem wan brata” mo i talem se “evri dei i gat ol nyufala store blong ol man we wan narafala paoa i kontrolem tingting blong olgeta, oli slip, oli luk ol vison, oli drim, mo ol merikel oli kamaot long olgeta.”​—⁠Religious Revivals.

Plante man oli luk ol bigbigfala wok ya olsem pruf se tabu speret blong God i stap wok blong mekem jyos blong hem i kamgud bakegen. Wan man we i lukluk ol wok ya i talem se: “Jyos blong God long ol distrik ya i kamgud bakegen long wan bigfala fasin.” Be, nating we oli talem se taem ya we jyos i kamgud bakegen, i olsem “wan nambawan taem long histri blong skul blong Alsta we ol man oli neva luk bifo,” jyos ya mo ol narafala jyos we oli kamgud bakegen, oli no mekem olgeta we oli talem se oli bon bakegen long saed blong speret, oli joengud long saed blong skul.

Ol man olsem oli talem se oli stap joengud long ol samting we oli impoten. Be hemia sem tok ya we ol narafala skul blong Krisendom oli stap yusum tu, oli talem olsem wan eskyus se “ol samting we ol Kristin oli joengud finis long olgeta, oli impoten moa bitim ol samting we oli seraot from yet.” (The Church and Unity) Krisendom i talem se: “Stampa fasin joen bitwin mifala mo wetem ol narafala Kristin brata blong mifala, i stanap long fasin ya we mifala i baptaes long Kraes.” (Christians in Communion) Be tok ya se fasin seraot i no impoten from we yumi evriwan i bilif long Jisas, i olsem tok ya se, kansa i no save spolem yu sipos hat blong yu i strong.

Samting we i tru se ol skul we oli stap kamaot tede, wetem ol wanwan tija we oli pulum ol man blong oli folem olgeta, oli stap mekem tingting blong ol man i fasfas moa, mo oli mekem se i no gat gudfala fasin blong lidim ol man long saed blong speret. Wan eksampel we i kamaot i no longtaem, hemia Jim Jones mo David Koresh, tufala lida long saed blong speret we oli lidim plante taosen man oli go krangke. (Matyu 15:14) Wan pasta blong Baptis i wan long ol man we i lidim Ku Klux Klan.c Hem i joenem wok blong hem, blong leftemap ol waetman antap long ol narafala man, wetem fasin blong skul blong kam antap bakegen, mo i talem se olgeta we oli joen long wok ya bambae “oli kasem paoa blong God blong lidim olgeta, mo bambae oli kasem strong tingting blong Hem we i ded long Kalvari [Jisas Kraes].”

?Olsem wanem long fasin blong mekem ol merikel, ol bigbigfala wok, mo ol saen, we oli stap talem se oli mekem long nem blong Jisas? Tingbaot strong woning blong Jisas Kraes se i no olgeta man we oli stap talem se “Masta blong mi, Masta blong mi,” we hem i glad long olgeta, be hem i glad long olgeta ya nomo we ‘oli stap mekem wil blong Papa blong hem.’ Plante man tede oli no save nem blong Papa blong hem, Jeova. Jisas i givim woning long yumi long saed blong ol man we oli save ‘ronemaot devel long nem blong hem, mo mekem plante merikel long nem ya,’ be oli rili “man blong mekem i nogud.”​—⁠Matyu 7:​21-23.

‘Ol Man Blong Mi, Yufala i Kamaot Long Hem’

?Wanem fyuja blong Krisendom we i sik? I nogud we i nogud. Ale, ?i stret blong folem advaes blong Katolik bisop ya, Butler, blong “joen long [jyos] kwiktaem blong givhan long fasin blong hem blong stap kam ‘klin,’ taem yumi stap insaed long hem finis”? !No gat! Krisendom we i seraot mo we i stap mekem ol man oli seraot i no save gohed. (Mak 3:​24, 25) Hem i haf blong ogenaesesen blong olgeta gyaman skul long wol we Baebol i kolem Bigfala Babilon. (Revelesen 18:​2, 3) Kolosap nomo bambae God i spolem ol skul ya we oli gat bigfala fol long fes blong God from blad blong ol man.

Baebol i no talem se ol trufala Kristin oli mas stap insaed long rabis ogenaesesen ya blong skul mo traem blong mekem hem i kamgud bakegen. Be, hem i givim woning se: “Ol man blong mi, yufala i kam. Yufala i kamaot long hem. I nogud yufala i stap joen wetem hem long ol sin we hem i stap mekem, mo i nogud we bambae yufala i joen wetem hem blong panis wetem hem. Ol sin ya blong hem i stap hivap i go kasem heven, mo God i stap tingbaot ol rabis fasin blong hem.”​—⁠Revelesen 18:⁠4, 5.

?“Kamaot long hem” blong go weples? Tingbaot, Jisas i promes se long taem blong tekem kakae blong wit, long olgeta ples long wol, bambae ol trufala Kristin oli save joengud bakegen. Profet Maeka tu i tokbaot semfala fasin blong joen bakegen olsem, taem hem i talem se: “Bambae mi putum olgeta blong oli kam olsem wan nomo, olsem wan kampani blong sipsip insaed long fenis.” (Maeka 2:12) ?Samting ya i kamtru finis?

!Yes! Naoia ol trufala Kristin oli hivap wanples, oli joengud olsem wan brata nomo long olgeta ples long wol. ?Hu ya ol man ya? Hemia ol Kristin kongregesen blong ol Wetnes blong Jeova, we oli stap joengud blong talemaot gud nyus blong Kingdom blong God long 231 kantri. Oli sakemaot ol tijing blong Krisendom we oli stap mekem ol man oli seraot, mo oli mekem wosip long God folem ol trutok long Tok blong hem, Baebol.​—⁠Jon 8:​31, 32; 17:⁠17.

Mifala i glad blong askem yu blong toktok wetem olgeta. Sipos yu yu wantem kasem moa save long saed blong ol Wetnes blong Jeova, plis toktok wetem olgeta long ples blong yu, no raet long wan long ol adres we i stret long ples blong yu long pej 2 blong magasin ya.

[Ol futnot]

[Tok blong pija long pej 7]

“God i stap tingbaot ol rabis fasin blong hem”