Ripot Long Wok Blong Kingdom
“Yufala i Mas Blokem Setan, Nao Hem Bambae i Ronwe Long Yufala”
LONG faswan handred yia, wan grup blong man long Efesas we oli strong blong “mekem ol bisnes blong posen mo kleva,” oli obei long Kristin mesej, taem oli bonem ol buk blong olgeta we oli tokbaot bisnes ya, long fes blong ol man. (Ol Wok 19:19) Taem oli kaontem praes blong ol buk ya, praes blong olgeta i kasem 50,000 pis selva. !Sipos store blong Baebol i stap tokbaot denarias, selva mane blong ol man Rom, praes blong ol buk ya i save go antap kasem 4,287,000 vatu!
Tede i gat plante man we bifo oli bin holem ol buk we oli tokbaot bisnes blong posen mo kleva be oli soem sem strong tingting olsem ol man Efesas bifo. Tingbaot ekspiryens ya long Kanada.
Samwe long faef yia bifo, wan Wetnes blong Jeova i stap prij long ol haos wanwan, nao long wan haos, wan woman we nem blong hem Nora i pulum hem wetem prapa han blong hem i go insaed long haos. Long plante yia we Nora i stap lukaot save long saed blong speret, hem i tekem plante handred buk long saed blong skul mo long saed blong rabis speret, be hem i wantem save se Baebol i talem wanem long saed blong hop blong man we i ded. Wetnes ya i givim traket ya Olsem Wanem Long Ol Fren Blong Yumi We Oli Ded? long hem. Hem i ansa long ol kwestin blong Nora, mo Nora i akseptem sabskripsen blong Wajtaoa mo Wekap! magasin.
Biaen Nora i muf i go long narafala ples mo i no moa toktok wetem ol Wetnes blong Jeova. Be hem i gohed blong kasem ol magasin long postofis long nyufala adres blong hem. Mo tu hem i odarem sam long ol buk we oli tokbaot Baebol we nem blong olgeta i stap long ol magasin. Afta we sam taem i pas, wan Wetnes blong Jeova i kam long haos blong hem. Nora i sapraes tumas taem Wetnes ya i stap go stret long Baebol blong givim ansa long ol kwestin, nao Nora i akseptem hem mo i askem hem blong kambak blong storeyan moa.
Be, Wetnes ya i faenem se i had blong mitim Nora bakegen. Hem i mekem visit bakegen mo bakegen long ol defren taem long dei mo long ol defren taem long wik, be hem i no mitim Nora. Be biaen, hem i kasem blesing from fasin blong hem blong mekem visit plante taem bakegen, mo hem i karem ol gudfala frut. Hem i statem wan Baebol stadi, mo from we Nora i wantem gohed moa, plante taem, tufala i mekem stadi tri taem long wan wik. Ol samting we Nora i stap lanem i pusum hem blong storeyan long ol fren mo ol memba blong famle blong hem, mo frut we i kamaot se tri long olgeta oli askem wan Baebol stadi wetem ol Wetnes blong Jeova.
Tru long stadi blong hem, Nora i luksave se i gat plante gyaman skul mo gyaman profet be i gat wan rod nomo we i go kasem laef. Long plante yia, hem i bin lukaot ansa blong ol kwestin blong hem long ol gyaman skul, be afta we hem i lanem samting we Baebol i talem long saed blong ol dimon, hem i mekem olsem ol man Efesas bifo we Ol Wok 19:19 i tokbaot. Hem i klinim ples blong putum buk long hem, mo long sam dei nomo, hem i spolem moa long wan taosen buk we oli tokbaot rabis speret mo ol tijing blong ol gyaman skul. !Long ol buk we hem i spolem, i gat fo buk, we praes blong olgeta i go antap bitim 92,000 vatu!
I klia nomo se ol dimon oli no glad long fasin blong Nora, oli mekem trabol long hem blong samwe long tu wik. Be ol rabis speret ya oli no save blokem hem blong gohed long Baebol stadi blong hem mo fasin blong hem blong joen wetem ogenaesesen blong Jeova long taem blong yumi.
Ekspiryens ya i soemaot trutok ya blong Baebol se: “From samting ya, yufala i mas putum yufala i stap daon, aninit long han blong God. Yufala i mas blokem Setan, nao hem bambae i ronwe long yufala.”—Jemes 4:7.