?From Wanem Yumi Mas Gat Fasin Fogif?
MAN JYU YA Joseph Jacobs we i stadigud mo raetem ol buk, i tokbaot fasin fogif olsem wan “lesen we i hae moa mo i had moa blong lanem bitim ol narafala fasin blong laef.” Yes, plante man oli faenem i had tumas blong talem ol wod ya, “Mi fogivim yu.”
I luk olsem se fasin fogif i sem mak long mane. Yumi save yusum olsem yumi wantem mo blong soem fasin sore long narafala, no yumi save holem i stap blong yumi nomo we yumi no wantem serem. Be faswan fasin i rod blong God. Yumi mas wokem fasin blong wantem givim oltaem long saed blong fasin fogif. ?From wanem? From God i wantem se yumi mas mekem olsem, mo from we taem i no gat fasin fogif, fasin blong wantem givimbak i save mekem nomo se ol samting oli kam nogud moa.
Plante man oli talem se: “!Mi no kam kros; Mi givimbak!” Sore tumas, tok ya i olsem wan rul we i lidim laef blong plante man tede. Eksampel, wan woman i no toktok long woman blong brata blong hem blong seven yia from we, olsem woman ya i talem se, “hem i spolem mi bigwan mo mi harem se mi no save fogivim hem.” Be fasin ya blong stap kwaet, taem man i yusum olsem wan rod blong pulum narafala we i mekem rong blong talem sore no olsem wan tul blong panisim narafala, plante taem i no mekem tingting blong man we i wantem givimbak i haremgud. Be, hem i jes mekem kros i stap longtaem moa, i save wokem fasin agens i kam bigwan. Sipos man ya i no lego fasin ya blong harem nogud we i stap gohed, fasin givimbak we i gat bigfala paoa long hem i save spolem fasin fren mo antap moa helt blong man ya.
Trabol We i Save Kamaot Sipos Yumi No Gat Fasin Fogif
Taem wan man i no fogivim wan narafala, fasin agens we i kamaot from i save mekem tufala i wari bigwan. Biaen, wari i save mekem man i sik big wan. Dokta William S. Sadler i raetem se: “Bitim ol narafala man, dokta i save luk bigfala namba blong ol sik mo fasin blong harem nogud we i kamaot stret long wari, fraet, fasin agens, . . . ol nogud tingting mo laef we i no klin.” Be, ?hamas trabol we oli rili kamaot from filing we i olbaot? Wan buk blong dokta i ansa se: “Stadi . . . i soem se tu long evri tri man we oli go luk wan dokta oli gat sam problem long saed blong helt we oli kamaot from, no oli kam moa nogud from wari.”
Yes, fasin kros, fasin agens, mo fasin blong givimbak long narafala oli save spolem man. Ol rabis filing ya oli olsem rosta we sloslou i stap kakae bodi blong wan trak. Maet afsaed long trak ya i luk naes, be aninit long pen, wan fasin blong spolem i stap gohed.
Moa impoten, fasin blong yumi blong no wantem fogivim narafala taem i stret blong soem fasin sore, i save spolem yumi tu long saed blong speret. Long ae blong Jeova God, maet bambae yumi kam olsem slef ya long pija tok blong Jisas. Masta i fogivim slef ya from wan bigfala kaon we hem i gat long masta. Be, taem narafala slef i askem faswan slef blong fogivim smol kaon nomo we hem i gat long hem, hem i kros mo i no fogivim hem. Jisas i mekem i klia se sipos yumi mekem sem mak, yumi no wantem fogivim narafala, Jeova bambae i no wantem fogivim ol sin blong yumi. (Matyu 18:21-35) !Taswe, sipos yumi no gat fasin fogif, maet yumi save lusum klin voes blong hat mo tingting blong yumi fored long God mo maet yumi save lusum hop blong yumi long fyuja tu! (Skelem wetem 2 Timote 1:3.) Ale, ?wanem nao yumi save mekem?
Lanem Blong Fogivim Narafala
Trufala fasin fogif i kamaot long hat. Hem i joen long fasin blong fogetem se wan i mekem nogud long yumi mo sakemaot eni tingting blong wantem givimbak. Olsem nao, laswan jajmen mo panis sipos i nidim, i stap nomo long han blong Jeova.—Rom 12:19.
Be, yumi mas makem, se from we “hat i save trikim yumi bitim ol narafala samting, mo i wantem tumas blong win,” hem i no pulum yumi oltaem blong soem fasin fogif taem i stret blong yumi mekem olsem. (Jeremaea 17: 9) Jisas i talem se: “Long hat blong man i gat ol rabis tingting oli kamaot. Man i save kilim man. Man i save stilim woman blong narafala man, mo woman we i mared finis i save go slip wetem narafala man. Man i save mekem nogud wetem gel, i save stil, i save gyaman, mo i save tok nogud blong spolem nem blong narafala man.”—Matyu 15:19.
I gud tumas, yumi save trenem hat blong yumi blong mekem wanem we i stret. Be, yumi nidim trening we i kam long wan stampa we i hae moa. Yumi no save mekem, yumi wanwan nomo. (Jeremaea 10:23) Man blong raetem Ol Sam we God i givim ol toktok long hem, i luksave samting ya mo i prea long God blong soem rod long hem. Hem i askem strong long Jeova long prea se: “Plis yu tijim mi long ol loa blong yu. Plis yu halpem mi blong mi savegud ol loa we yu yu tijim mifala long hem.”—Ol Sam 119: 26, 27.
Wan narafala Sam i talem se, King Deved blong Isrel bifo i “kasem save long fasin” blong Jeova. Jeova i mekem ol gudfala fasin ya long Deved hem wan, mo Deved i lanem plante samting from. Taswe, hem i save talem se: ‘Jeova, hem i gat sore, mo oltaem hem i glad tumas blong mekem i gud long man. Hem i no save kros kwik, fasin blong hem blong laekem man i gudfala tumas, i bitim mak. Fasin blong Jeova, oltaem hem i stap mekem i gud tumas long olgeta we oli stap ona long hem, olsem we ol papa oli stap mekem long ol pikinini blong olgeta.’—Ol Sam 103:8, 13.
Yumi mas lanem samting ya olsem Deved i bin lanem. Prea mo stadi long eksampel blong God we i stretgud olgeta, long fasin blong fogivim man, mo hemia blong Pikinini blong hem tu. Olsem nao, yumi save lanem olsem wanem blong gat fasin fogif we i kamaot long hat.
Be, samfala oli save askem se: ?Olsem wanem long ol bigfala sin? ?Yumi mas fogivim evri sin?
Skelemgud
Wan man we narafala i mekem i nogud tumas long hem, i harem nogud bigwan from. Samting ya i tru moa sipos hem i no gat fol nating long bigfala sin ya we narafala i mekem long hem. Samfala oli wantem save se, ‘?Olsem wanem mi save fogivim wan man we nating se mi trastem hem, be hem i minim nomo blong spolem mi no mekem mi mi harem nogud?’ Long saed blong wan bigfala sin we maet oli save sakemaot man long kongregesen from, hemia we man ya i sin agensem hem i save folem rul blong Matyu 18:15-17.
Nating se i olsem wanem, long plante rod i dipen nomo long hemia we i mekem nogud. ?Afta we man ya i mekem nogud, hem i soem sam saen se hem i tanem tingting blong hem? ?Man ya we i mekem sin i jenis, olsem maet hem i rili traem blong stretem rong we hem i bin mekem? Long ae blong Jeova, fasin blong tanem tingting olsem i stampa blong fasin fogif, nating se man ya i mekem wan sin we i bigwan tumas mo i rili nogud. Eksampel, Jeova i fogivim Manase, wan long ol king we oli nogud tumas long Isrel bifo. ?From wanem risen? God i mekem olsem from we Manase i mekem tingting blong hem i stap daon mo i tanem tingting blong hem long ol rabis rod blong hem.—2 Kronikel 33:12, 13.
Long Baebol, trufala fasin blong tanem tingting i minim trufala fasin blong jenisim tingting, sore long hat long wanem nogud samting we man i mekem. Sipos i stret blong mekem mo man ya i naf blong mekem, fasin blong tanem tingting i joen long fasin traehad blong mekem evri samting i gud bakegen wetem wan we man ya i sin agensem hem. (Luk 19:7-10; 2 Korin 7:11) Taem i no gat fasin blong tanem tingting olsem, Jeova i no save fogivim.a Antap moa, God i no ting se ol Kristin oli mas fogivim olgeta we bifo oli strong long speret be naoia oli gohed nomo blong mekem sin, oli no tanem tingting blong olgeta from. (Hibrus 10:26-31) Long saed blong sam sin we oli bitim mak, maet i no stret blong fogif.—Ol Sam 139:21, 22; Esikel 18:30-32.
Nating se i gat fasin fogif no no gat, wan man we narafala i sin agensem hem bigwan i save skelem wan narafala samting se: ?Mi mas stap we tingting blong mi i olbaot tumas, harem nogud tumas long filing mo kros tumas, go kasem taem we bisnes ya i kamgud fulwan? Tingbaot wan eksampel. King Deved i harem nogud bigwan taem kapten blong ol soldia blong hem, Joab, i kilim i ded Abna mo Amasa, “tu man we oli stret moa mo gud moa long [Joab].” (1 King 2:32) Deved i talemaot kros mo fasin harem nogud blong hem long narafala mo yumi save se i mas talem long Jeova long prea. Be, afta we sam taem i pas, ating strong filing blong Deved we i harem nogud i stap godaon. Hem i no letem kros ya i stap kasem en blong laef blong hem. Deved i gohed blong wok wetem Joab tu, be hem i no fogivim nomo man ya we i kilim man i ded mo i no tanem tingting from. Biaen, Deved i mekem sua se stret jajmen i kamaot.—2 Samuel 3:28-39; 1 King 2:5, 6.
Bambae i tekem sam taem mo fasin traehad bifo olgeta we oli harem nogud from wan bigfala sin blong narafala oli save winim fasin kros blong olgeta. I moa isi blong haremgud bakegen taem man we i mekem nogud i luksave rong blong hem mo i tanem tingting from. Be, wan we i no gat fol long sin we narafala i mekem long hem, i save haremgud bakegen mo gat pis long tingting from save blong hem long saed blong stret fasin mo waes blong Jeova mo Kristin kongregesen, nating se wan i mekem i no stret long hem.
Yu mas luksave tu, se taem yu fogivim wan man we i mekem sin, i no minim se yu agri long sin ya we hem i bin mekem. Long saed blong ol Kristin, fasin fogif i minim se yumi trastem Jeova mo livim bisnes ya long han blong Hem. Hem nao i stap jajem olgeta man long heven mo wol long stret fasin, mo bambae Hem i stretem olgeta samting long stret taem blong hem. Samting ya i minim tu jajmen blong ol rabis fasin olsem “boe mo gel we tufala i slip wanples, mo bambae i jajem man we i slip wetem woman we i no woman blong hem, mo woman we i slip wetem man we i no man blong hem.”—Hibrus 13:4.
Gudfala Frut From Fasin Blong Fogivim Narafala
Deved man blong raetem Ol Sam, i singsing se: “Yu yu gud tumas long mifala, mo yu stap fogivim mifala from ol sin blong mifala. Oltaem yu yu laekem tumas olgeta we oli stap mekem prea long yu.” (Ol Sam 86:5) ?Yu yu olsem Jeova, ‘yu rere blong fogivim narafala’? Plante gudfala samting i save kamaot from.
Fastaem, fasin blong fogivim narafala i mekem ol man oli frengud. Baebol i pulum ol Kristin blong mekem olsem: “Yufala i mas wokem i gud long yufala, yufala i mas gat gladhat long yufala. Mo yufala i mas fogivim yufala, olsem we God i fogivim yufala finis, we yufala i joen long Kraes.”—Efesas 4:32.
Seken samting, fasin blong fogivim narafala i mekem pis i stap. Hemia i no pis wetem narafala nomo be pis insaed long yumi.—Rom 14:19; Kolosi 3:13-15.
Namba tri samting, fasin blong fogivim narafala i halpem yumi blong tingbaot oltaem se yumi tu yumi nidim se ol narafala oli fogivim yumi. Yes, “evriwan oli mekem nogud finis, mo oli stap longwe long ol gudgudfala fasin blong God.”—Rom 3:23.
Laswan samting, fasin blong fogivim narafala i mekem rod blong God i fogivim ol sin blong yumi. Jisas i talem se: “Sipos yufala i stap fogivim ol man we oli stap mekem i nogud long yufala, Papa blong yufala long heven bambae i fogivim yufala tu.”—Matyu 6:14.
Tingbaot plante samting we oli stap long tingting blong Jisas long aftenun we hem i ded. Hem i tingbaot ol disaepol blong hem, wok blong prij, mo antap moa fasin blong hem blong holemstrong long Jeova. Be, nating se hem i stap harem nogud bigwan long pos, ?hem i talemaot wanem? Long ol lastok blong hem i gat hemia, “Papa plis yu fogivim olgeta ya.” (Luk 23:34) Yumi save folem nambawan eksampel blong Jisas taem yumi fogivim narafala long hat blong yumi.
[Futnot]
a Be, Jeova i lukluk long sam narafala samting tu, taem hem i skelem blong luk sipos bambae hem i fogif no no gat. Eksampel, sipos man we i mekem sin be i no save long ol rul blong God, samting ya i save mekem se hem i no gat bigfala fol from. Taem Jisas i askem long Papa blong hem blong fogivim ol man we oli kilim hem i ded, Jisas i stap tokbaot ol soldia blong Rom we oli kilim hem i ded. ‘Oli no save wanem oli stap mekem,’ oli no rili save hu ya Jisas. Be, ol lida blong skul we oli stap biaen long fasin ya blong kilim i ded Jisas, oli gat bigfala fol moa—mo plante blong olgeta, God i no save fogivim olgeta.—Jon 11:45-53; skelem wetem Ol Wok 17:30.
[Tok blong pija long pej 5]
?Yu yu kasem mining blong pija tok blong Jisas long saed blong slef ya we i no gat fasin fogif?
[Tok blong pija long pej 7]
Fasin blong fogivim narafala i mekem gudfala fasin fren i kamaot mo i karem glad