Stret Ples Blong Wosip Blong Jeova Long Laef Blong Yumi
“Evri dei, bambae mi talem tangkyu long yu, bambae mi stap presem yu oltaem, gogo i no save finis.”—OL SAM 145:2.
1. ?Long saed blong wosip, Jeova i wantem wanem?
“MI MI Jeova, mi mi wan God we mi askem strong blong ol man oli wosip long mi nomo.” (Eksodas 20:5, NW) Moses i harem tok ya long Jeova, mo biaen hem i talem bakegen taem hem i stap toktok long nesen blong Isrel. (Dutronome 5:9) Moses i bilif fulwan se Jeova God i wantem ol man blong Hem oli wosip long Hem nomo.
2, 3. (a) ?Wanem HS-0.3,i HS-0.3,soemaot long ol man Isrel se samting we i hapen kolosap long Hil Sinae i bitim paoa blong man? (b) ?Wanem ol kwestin long saed blong wosip blong ol man Isrel mo wosip blong ol man blong God tede we bambae yumi stadi long olgeta?
2 Taem ol man Isrel mo ‘plante narafala man’ we oli aot wetem olgeta long Ijip, oli mekem kamp kolosap long Hil Sinae, oli luk wan samting we oli neva luk bifo. (Eksodas 12:38) Hemia i no sem mak long wosip blong ol god blong Ijip, we long taem ya Jeova i daonem olgeta long ten trabol. Taem Jeova i soemaot hem long Moses, ol bigfala samting we oli kamaot oli save mekem man i fraet: tanda, laetning, mo bigfala noes blong pupu we i mekem fulwan kamp i seksek. Biaen, i gat faea mo smok taem fulwan hil ya i seksek. (Eksodas 19:16-20; Hibrus 12:18-21) Sipos wan man Isrel i nidim blong luk sam samting bakegen blong pruvum se ol samting we i stap hapen oli bitim paoa blong man, hem i save luk long ol samting we bambae oli hapen i no longtaem. Smoltaem biaen, Moses i kamdaon long hil, afta we i kasem namba tu kopi blong ol loa blong God. Baebol i talem se, “fes blong [Moses] i saen, nao oli fraet blong go kolosap long hem.” !Tru ya, hemia wan ekspiryens we God i soemaot bigfala paoa blong hem we oli no save fogetem!—Eksodas 34:30.
3 Long saed blong nesen ya blong God, oli savegud se wosip blong Jeova i mas tekem wanem ples long laef blong olgeta. Jeova i Man we i Tekemaot olgeta long trabol. Hem i sevem laef blong olgeta. Hem i Man we i Givim Loa long olgeta tu. ?Be oli putum wosip blong Jeova long fasples? ?Mo olsem wanem long ol man blong God tede? ?Wosip blong Jeova i stap long wanem ples long laef blong olgeta?—Rom 15:4.
Fasin Blong Ol Man Isrel Blong Wosip Long Jeova
4. ?Taem ol man Isrel oli stap wokbaot long drae ples, wanem lukluk blong kamp blong olgeta, mo wanem i stap long medel blong kamp blong olgeta?
4 Sipos yu save flae antap long kamp blong ol man Isrel taem oli stap long drae ples, ?bambae yu luk wanem samting? Wan bigfala hif blong haos tapolen we oli stap long oda, we i gat samwe long tri milyan man no moa, mo ol haos tapolen ya oli stap long ol defren grup we i gat tri laen long wan grup, long not, saot, is, mo wes. Sipos yu luklukgud, bambae yu luk wan narafala grup blong haos tapolen we oli stap kolosap moa long medel blong kamp. Ol fo smol grup blong haos tapolen ya oli blong ol famle blong laen blong Livae. Stret long medel blong kamp, long wan ples we oli pulum kaliko blong blokem, i gat wan spesel bilding. Hemia “haos blong miting” no haos tapolen, we ol man Isrel we “oli waes long hat blong olgeta,” oli wokem folem plan blong Jeova.—Namba 1:52, 53; 2:3, 10, 17, 18, 25; Eksodas 35:10.
5. ?Haos tapolen blong ol man Isrel i blong mekem wanem?
5 Samwe long 40 ples we ol man Isrel oli mekem kamp long hem taem oli stap wokbaot long drae ples, oli bildim haos tapolen ya long ol wanwan ples ya, mo hem i wan samting we i impoten tumas long kamp blong olgeta. (Namba, japta 33) I stret nomo, Baebol i talem se Jeova i stap wetem ol man blong hem, stret long medel blong kamp blong olgeta. Bigfala paoa blong hem i fulap long haos tapolen ya. (Eksodas 29:43-46; 40:34; Namba 5:3; 11:20; 16:3) Buk ya Our Living Bible i talem se: “Tabu haos ya we oli save karem wetem olgeta, i impoten tumas, from we hem i wan stampa ples we ol laen oli save hivap long hem blong mekem wosip. Haos tapolen ya i mekem oli joengud long ol longfala yia we oli stap wokbaot long drae ples mo i mekem se oli save wok tugeta.” Antap long samting ya, haos tapolen ya i mekem ol man Isrel oli tingbaot oltaem se wosip long Man we i Wokem olgeta i impoten samting long laef blong olgeta.
6, 7. ?Wanem haos blong wosip i tekem ples blong haos tapolen, mo olsem wanem samting ya i givhan long nesen blong Isrel?
6 Afta we ol man Isrel oli kasem Promes Lan, haos tapolen i stap yet olsem stampa ples blong wosip blong ol man Isrel. (Josua 18:1; 1 Samuel 1:3) Biaen, King Deved i mekem plan blong bildim wan haos wosip we i save stap longtaem. Hemia tempel, we boe blong hem, Solomon i bildim biaen. (2 Samuel 7:1-10) Taem oli dediketem haos ya, wan klaod i kamdaon blong soem se Jeova i glad long haos ya. Solomon i prea se: “Mi mi wokem wan haos blong yu yu stap long hem, wan ples blong yu stap long hem gogo i no save finis.” (1 King 8:12, 13; 2 Kronikel 6:2) Long taem ya, nyufala tempel we Solomon i wokem, i kam olsem stampa ples blong wosip blong nesen ya.
7 Tri taem long wan yia, ol man Isrel oli go long Jerusalem blong joen long hapi lafet long tempel, blong talem tangkyu from blesing we God i givim long olgeta. I stret nomo, ol asembli ya, oli ol spesel “lafet blong Jeova evri yia,” we oli pulum tingting blong ol man i go long wosip blong God. (Levitikas 23:2, 4) Ol woman we oli onagud long God oli kam, mo ol narafala memba blong famle tu.—1 Samuel 1:3-7; Luk 2:41-44.
8. ?Olsem wanem Ol Sam 84:1-12 i soem se wosip blong Jeova i impoten tumas?
8 Tabu speret i pusum man blong raetem Ol Sam blong talem ol naesfala tok blong soem olsem wanem wosip long Jeova i impoten tumas long laef blong ol man Isrel. Singsing blong ol pikinini boe blong Kora i olsem: ‘Jeova, yu yu gat olgeta paoa. Mi mi laekem haos blong yu tumas.’ Oli no stap givim ona long wan haos nomo. Be oli leftemap voes blong olgeta blong presem Jeova God, oli talem se: “Tingting blong mi i glad tumas long yu, nao mi stap sing blong presem yu.” Wok blong ol Livaet i givim bigfala glad long olgeta. Oli talem se: “Ol man we oli stap long haos blong yu oli hapi tumas, oltaem oli stap sing, oli stap presem yu.” Yes, olgeta man Isrel oli save singsing se: “Ol man we yu yu stap mekem olgeta oli strong oli hapi tumas, oli wantem tumas blong kam long hil ya. . . . Oltaem, taem ol man ya oli stap kam long Saeon, oli stap kam strong moa, nao bambae oli stap luk yu long ples ya blong yu.” Nating se trep we wan man Isrel i mas mekem i go long Jerusalem i longfala mo i mekem hem i taed, hem i kasem paoa bakegen taem hem i kasem bigfala taon ya. Hat blong hem i fulap long glad taem hem i leftemap nambawan blesing we hem i gat blong wosip long Jeova: ‘Sipos mi stap wan dei nomo long haos blong yu, be hemia i gud moa, i winim we mi stap wan taosen dei long ol narafala ples. God blong mi, i nomata sipos mi stap long doa nomo blong haos blong yu, be hemia i moa gud, i winim we mi stap insaed olgeta long haos blong ol man nogud. . . . Jeova blong ol ami, olgeta we oli stap trastem yu bambae oli save haremgud.’ Ol tok ya oli soem se ol man Isrel oli putum wosip blong Jeova long fasples long laef blong olgeta.—Ol Sam 84:1-12.
9. ?Wanem i hapen long ol man Isrel taem oli no moa putum wosip blong Jeova long fasples long laef blong olgeta?
9 Sore tumas, ol man Isrel oli no gohed blong putum trufala wosip long fasples long laef blong olgeta. Oli letem wosip blong ol gyaman god i spolem strong tingting blong olgeta blong wosip long Jeova. From samting ya, Jeova i lego olgeta i go long ol enemi blong olgeta, i letem ol man Babilon oli tekem olgeta oli go kalabus long Babilon. Taem oli kambak long kantri blong olgeta afta long 70 yia, Jeova i stanemap profet Hagae, Sekaraea, mo Malakae, we oli fasgud long hem, blong givim advaes long ol man Isrel. Pris Esra mo Jif Nehemaea, tufala i wekemap tingting blong ol man blong God blong wantem bildim tempel mo blong stanemap trufala wosip long kantri ya bakegen. Be afta long sam handred yia, bakegen, nesen ya i no moa putum trufala wosip long fasples long laef blong olgeta.
Strong Tingting Long Trufala Wosip Long Faswan Handred Yia
10, 11. ?Taem Jisas i stap long wol, wosip blong Jeova i stap long wanem ples long laef blong olgeta we oli fasgud long God?
10 Long stret taem we Jeova i makemaot, Mesaea i kamtru. Ol wanwan man we oli fasgud long God oli stap lukluk i go long Jeova blong hem i sevem olgeta. (Luk 2:25; 3:15) Gospel blong Luk i tokbaot Ana, wan olfala wido we i gat 84 yia, se “oltaem nomo, hem i stap long haos blong God, nao long moning mo long sapa, hem i stap joen long olgeta blong mekem wosip, we i stap prea, mo i stap livim kakae blong hem from.”—Luk 2:37.
11 Jisas i talem se: “Kakae ya blong mi hemia, we bambae mi mekem ol samting we hemia we i sanem mi i wantem, mo mi finisim ol wok we hem i givim.” (Jon 4:34) Tingbaot samting we Jisas i mekem taem hem i agensem ol man we oli stap jenisim mane long tempel. Hem i kafsaedem ol tebel blong olgeta, mo ol jea blong ol man we oli stap salem ol nawemba. Mak i talem se: “[Jisas] i blokem ol man we oli stap karem sam samting, oli pastru long yad blong haos blong God, blong oli no yusum yad ya olsem rod blong olgeta. Nao hem i tijim olgeta, i se ‘Yufala i luk. Oli raetem long Baebol we God i talem se “Haos blong mi, bambae ol man oli talem hem se Haos blong prea blong olgeta man.” Be yufala i tanem hem finis i kam ples blong haed blong ol man blong stil.’ ” (Mak 11:15-17) Yes, Jisas i no letem wan man blong tekem sotkat, i pastru long yad blong haos blong God, taem hem i stap karem wan samting i go long narafala ples blong taon. Fasin blong Jisas i givim paoa long advaes we hem i talem bifo, se: “Yufala i mas gohed blong lukaot kingdom mo stret fasin blong hem fastaem. Ale, biaen bambae hem i givim olgeta narafala samting ya tu long yufala.” (Matyu 6:33, NW) Jisas i livim wan nambawan eksampel long yumi blong mekem wosip long Jeova nomo. Hem i rili mekem samting we hem i talemaot.—1 Pita 2:21.
12. ?Olsem wanem ol man blong Jisas oli soem se oli putum wosip blong Jeova long fasples long laef blong olgeta?
12 Jisas i soem wan narafala eksampel long ol disaepol blong hem blong oli folem, taem hem i mekem wok blong halpem ol man Jyu we oli stap harem nogud, be oli fasgud long God, blong tekemaot olgeta long ol kastom blong ol gyaman skul we i stap mekem ol hevi baden long olgeta. (Luk 4:18) Blong obei long oda blong Jisas blong mekem disaepol long olgeta man mo blong baptaesem olgeta, ol faswan Kristin oli wok strong blong talemaot wil blong Jeova taem oli stap prij se Masta blong olgeta i laef bakegen. Jeova i glad tumas long fasin blong olgeta blong putum wosip blong Hem long fasples long laef blong olgeta. Taswe, tru long wan merikel, prapa enjel blong God i tekemaot aposol Pita mo Jon long kalabus mo i talem long tufala se: “Yufala i go stanap insaed long haos blong God, yufala i talemaot ol tok blong nyufala laef ya, long ol man.” Wetem nyufala paoa, oli obei long tok ya. Evri dei, long tempel long Jerusalem mo long ol haos wanwan, “oli stap tijim ol man, mo oli stap talemaot gud nyus ya blong Jisas, se hem i Mesaea.”—Ol Wok 1:8; 4:29, 30; 5:20, 42; Matyu 28:19, 20.
13, 14. (a) ?Stat long taem blong ol faswan Kristin, Setan i traem blong mekem wanem long ol man blong God? (b) ?Ol man blong God we oli fasgud long Hem oli stap gohed blong mekem wanem?
13 Taem ol man oli gohed moa blong agensem olgeta from wok blong olgeta blong prij, God i lidim ol man blong hem we oli fasgud long hem blong oli raetem advaes long stret taem blong hem. Smoltaem afta long 60 K.T., Pita i raetem se: “Yufala we i stap tingting tumas, yufala i mas putum ol trabol blong yufala long han blong [Jeova], from we oltaem hem i stap tingbaot yufala. Yufala i mas lukaotgud. Yufala i mas rere. Enemi ya blong yufala Setan, hem i stap raon long yufala oltaem. Hem i olsem wan laeon we i stap singaot bigfala, i stap lukaot man blong i kakae. Yufala i mas stanap strong long bilif blong yufala, blong blokem hem. Yufala i save, long evri ples long wol, ol brata blong yumi oli stap kasem trabol from nem blong Jisas, stret olsem we yufala i stap kasem.” Ol tok ya oli rili givim strong tingting long ol faswan Kristin. Oli save se afta we oli harem nogud blong smoltaem, bambae God i finisim trening blong olgeta. (1 Pita 5:7-10) Long ol lasdei blong fasin blong laef blong ol man Jyu bifo, ol trufala Kristin oli leftemap fasin blong wosip blong Jeova wetem lav, i go hae moa.—Kolosi 1:23.
14 Olsem aposol Pol i bin talem, apostasi, fasin blong tanem baksaed long trufala wosip, i mas kam antap. (Ol Wok 20:29, 30; 2 Tesalonaeka 2:3) Ol samting we oli kamaot long en blong faswan handred yia oli pruvum samting ya. (1 Jon 2:18, 19) Setan i planem ol gyaman Kristin long medel blong ol trufala Kristin, mekem se i had blong seraotem “ol rabis gras ya” long ol Kristin we oli olsem wit. Nating se i olsem, taem ol yia oli stap pas, sam man oli putum wosip blong God fasples long laef blong olgeta, nating se laef blong olgeta i stap long bigfala denja. Be long ol yia long en blong ‘rul blong ol hiten man,’ God i jes hivimap bakegen ol man blong hem blong oli leftemap trufala wosip.—Matyu 13:24-30, 36-43; Luk 21:24.
Haeples We Wosip Blong Jeova i Stap Long Hem Tede
15. ?Stat long 1919, olsem wanem profet tok blong Aesea 2:2-4 mo Maeka 4:1-4 oli bin kamtru?
15 Long 1919, Jeova i givim paoa long ol Kristin we tabu speret i makemaot blong statem bigfala wok blong prij raonabaot long wol, wok ya we i bin leftemap trufala wosip blong God i go long haeples. Wetem olgeta we oli olsem “ol narafala sipsip” we oli stap kam, stat long 1935 kasem naoia, bigfala hif blong man we oli stap kam long “bigfala hil blong haos blong Jeova” long saed blong speret, namba blong olgeta i stap gru oltaem. Long 1993 sevis yia, 4,709,889 Wetnes blong Jeova oli presem hem taem oli singaot plante narafala man blong kam joen long wosip blong Jeova we i stap long haeples. !Samting ya i defren olgeta long fasin blong “ol hil” blong wol ogenaesesen blong ol gyaman skul, antap moa long Krisendom, we oli daon olgeta long saed blong speret!—Jon 10:16; Aesea 2:2-4; Maeka 4:1-4.
16. ?Olgeta man blong God oli mas mekem wanem blong folem samting we i stap long Aesea 2:10-22?
16 Ol man we oli strong blong folem ol gyaman skul, oli tingbaot ol jyos, ol katedral, mo ol lida blong olgeta, se oli “hae,” mo oli givim ol spesel nem mo ona long olgeta. Be makemgud samting we Aesea i talem: “Man we i flas bambae God i mekem hem i stap daon, mo ol man we oli stap antap bambae oli mas bodaon; mo Jeova hem wan bambae i mas stap antap olgeta long dei ya.” ?Wetaem bambae samting ya i hapen? Long taem blong bigfala trabol we i kolosap nomo, taem “ol god ya we oli no save givhan, bambae oli lus olgeta.” Taem yumi tingbaot se bigfala dei ya we i save mekem man i fraet i kolosap nomo, olgeta man blong Jeova oli mas luklukgud se oli stap putum wosip blong Jeova long wanem ples long laef blong olgeta.—Aesea 2:10-22.
17. ?Olsem wanem olgeta man blong Jeova tede oli soemaot se oli putum wosip blong Jeova long fasples long laef blong olgeta?
17 Ol man oli savegud ol Wetnes blong Jeova we oli olsem wan kampani blong ol brata sista raonabaot long wol, from fasin blong olgeta blong wok strong blong talemaot Kingdom. Wosip blong olgeta i no wan skul we i blong wan haoa nomo long wan wik. No gat, hem i fulwan fasin blong laef blong olgeta. (Ol Sam 145:2) Tru ya, las yia, i gat moa long 620,000 Wetnes oli stretem ol bisnes long laef blong olgeta blong joen long fultaem Kristin minista wok. Be ol narafala tu oli no slak long wosip blong Jeova. Long ol toktok blong olgeta evri dei mo wok blong olgeta blong prij, oli soemaot se oli putum wosip blong Jeova i stap fasples long laef blong olgeta oltaem, nating se ol samting we famle blong olgeta i nidim i mekem se oli mas wok had long wok blong olgeta blong winim mane.
18, 19. Talem sam eksampel long ol ekspiryens blong laef blong sam Wetnes we oli leftemap tingting blong yu.
18 Ol store blong laef blong sam Wetnes we oli prentem long Wajtaoa, oli mekem yumi kasem save long ol rod we ol defren brata mo sista oli bin folem, blong putum wosip blong Jeova long fasples long laef blong olgeta oltaem. Wan yangfala sista we i givim laef blong hem long Jeova taem hem i gat sikis yia nomo i putum misinari wok olsem wan mak we hem i wantem kasem. ?Yufala, ol yangfala brata mo sista, wanem mak nao yufala i save jusum we bambae i halpem yufala blong putum wosip blong Jeova long fasples long laef blong yufala oltaem?—Lukluk haf ya “Hem i Traehad Blong Kasem Wan Mak We Hem i Putum Taem Hem i Gat Sikis Yia,” long Wajtaoa blong Maj 1, 1992, pej 26 kasem 30 (Engglis mo Franis).
19 Wan olfala sista we hem i wan wido i soem wan narafala nambawan eksampel long fasin blong putum wosip blong Jeova long stret ples. Olgeta we hem i bin halpem olgeta blong kam long trutok oli leftemap tingting blong hem bigwan blong stanap strong longtaem. Oli “famle” blong hem. (Mak 3:31-35) Sipos yu gat sem trabol olsem olfala sista ya, ?bambae yu akseptem sapot mo help we ol yangfala long kongregesen oli givim? (Plis makemgud olsem wanem Sista Winifred Remmie i talemaot filing blong hem wan long haf ya “Mi Mi Joen Long Wok Blong Tekem Kakae,” we oli prentem long Wajtaoa blong Julae 1, 1992, pej 21 kasem 23, Engglis no Franis) Yufala ol fultaem Kristin minista, holem tingting daon mo wok long ples we yufala i stap long hem, stap glad blong folem tiokratik plan blong soem se yufala i rili putum wosip blong Jeova long fasples long laef blong yufala. (Plis makemgud eksampel blong Brata Roy Ryan, olsem i stap long haf ya “Stap Kolosap Oltaem Long Ogenaesesen Blong God,” long Wajtaoa blong Desemba 1, 1991, pej 24 kasem 27, Engglis mo Franis.) Tingbaot se taem yumi putum wosip blong Jeova long fasples long laef blong yumi, yumi save trastem se bambae hem i lukaotgud long yumi. Yumi no mas tingting tumas se weples bambae yumi kasem ol samting we yumi nidim long laef. Ekspiryens blong Sista Olive mo Sista Sonia Springate i soemaot samting ya.—Lukluk haf ya “Mifala i Lukaot Kingdom Fastaem,” we i stap long Wajtaoa blong Febuwari 1, 1994, pej 20 kasem 25.
20. ?Wanem impoten kwestin we naoia yumi mas askem long yumi wanwan?
20 Ale, yumi evriwan i mas askem sam impoten kwestin long yumi wanwan. ?Wosip blong Jeova i stap long wanem ples long laef blong mi? ?Mi mi stap mekem samting we mi givim laef blong mi long God blong mekem, blong mekem wil blong God kasem fulwan mak blong mi? ?Mi mi save kam moa gud long wanem samting long laef blong mi? Taem yumi stadi long haf we i kam biaen, bambae yumi gat jans blong luk olsem wanem blong yusum ol gudfala samting we yumi gat blong mekem se yumi save holemtaet samting we yumi jusum blong putum fasples long laef blong yumi oltaem—wosip blong Haefala Masta Jeova, Papa blong yumi we i gat lav.—Eklesiastis 12:13; 2 Korin 13:5.
Tingtingbak
◻ ?Long saed blong wosip, Jeova i wantem wanem?
◻ ?Haos tapolen i blong mekem ol man Isrel oli tingbaot wanem?
◻ ?Long faswan handred yia K.T., hu ya olgeta we oli soem nambawan eksampel long fasin blong gohed strong long trufala wosip, mo olsem wanem?
◻ ?Stat long 1919, olsem wanem ol man oli bin leftemap wosip blong Jeova?