?Yu Yu Mas Prea i Go Long Jisas?

SAM man oli ting se i stret blong prea i go long Jisas. Long Jemani oli bin tijim plante man taem oli pikinini nomo se bifo we oli kakae oli mas joenem han blong olgeta mo talem tangkyu long Jisas.

Long Baebol, i tru we Jisas i tekem wan haenem long heven. ?Be, samting ya i min se yumi mas prea i go long hem? Maet yu yu wan long olgeta ya we oli laekem Jisas, oli prea i go stret long hem, ?be Jisas hem wan i tingting wanem long ol prea ya?

Faswan, ?from wanem ol kwestin ya oli kamaot? From we Baebol i talem se Jeova God i man blong “harem prea.” I no wan sapraes, se ol man blong God long taem bifo, olsem ol man Isrel, oli prea i go long Jeova God nomo, we i gat Olgeta Paoa.​—⁠Ol Sam 5:​1, 2; 65:⁠2.

?Ol samting i jenis, taem Jisas Pikinini blong God i kam long wol blong karemaot sin mo ded long ol man? No gat, ol prea oli stap go stret long Jeova yet. Taem Jisas i stap long wol, oltaem hem i prea i go long Papa blong hem long heven, mo i tijim ol narafala blong mekem i sem mak. Jes tingbaot eksampel ya blong prea, we samtaem oli kolem Lodsprea, we plante man long wol oli savegud moa. Jisas i no tijim yumi blong yumi prea i go long hem; hem i givim eksampel ya long yumi se: “Papa blong mifala we yu stap long heven, nem blong yu i tabu.”​—⁠Matyu 6:​6, 9; 26:​39, 42.

Naoia yumi save luklukgud moa blong faenemaot wanem ya prea.

?Prea i Wanem?

Evri prea i wan fasin blong wosip. The World Book Encyclopedia i talem samting ya, i se: “Prea i fasin blong wosip we wan man i mekem, talem tangkyu, talemaot sin, no askem God from fasin fogif.”

Wan taem Jisas i bin talem se: “Baebol i talem se, Bambae yu mekem wosip long Hae God ya we i God blong yu. Bambae yu mekem ol wok blong hem nomo.’ ” Jisas i sapotem strong impoten trutok ya long saed blong wosip​—⁠ale ol prea tu⁠—​i mas go long Papa blong hem nomo, Jeova God.​—⁠Luk 4:8; 6:⁠12.

Stap Luksave Jisas Long Ol Prea Blong Yumi

Ded blong Jisas i olsem ransom sakrifaes blong olgeta man, God i mekem hem i laef bakegen, mo i leftemap hem long wan hae ples. Maet taem yu tingbaot, olgeta samting ya oli jenisim fasin blong akseptem ol prea. ?Long wanem rod?

Aposol Pol i tokbaot bigfala paoa ya we haenem blong Jisas i gat long prea se: “From samting ya, God i leftemap nem blong hem i go antap olgeta, mo hem i glad blong givim nem long hem we i hae moa long ol narafala nem, blong olgeta we oli stap long heven mo olgeta we oli stap long wol mo olgeta we oli stap aninit long graon, oli nildaon long nem ya blong Jisas. Mo evri tang i mas talemaot klia we Jisas Kraes i Masta, blong leftemap nem blong God, we i Papa blong yumi.”​—⁠Filipae 2:​9-11, NW.

?Tok ya, oli nildaon long nem blong Jisas, i minim se yumi mas prea i go long hem? No gat. Grik tok long ples ya i “minim olgeta we oli nildaon oli joen wanples long nem ya, mekem evriwan oli joen long (πᾶν γόνυ) wosip. Nem ya we Jisas i kasem i pusum evriwan blong joen tugeta long wosip.” (A Grammar of the Idiom of the New Testament, G. B. Winer i raetem.) Yes, blong God i harem prea, prea ya i mas pas “long nem blong Jisas,” be, oli mas talemaot long Jeova God mo leftemap nem blong hem. From samting ya, Pol i talem se: “Yufala i no mas letem tingting blong yufala i trabol from sam samting, be yufala i mas talemaot long God olgeta samting we yufala i wantem. Yufala i mas prea long hem, yufala i mas askem strong long hem mo yufala i mas talem tangkyu long hem.”​—⁠Filipae 4:⁠6, NW.

Olsem wan rod we i blong go long wan ples, Jisas i “rod” we i lidim man i go long God we i Hae Olgeta. Jisas i tijim ol aposol se, “Rod ya, mi ya. Trutok ya, mi ya. Laef ya, mi ya. I no gat man i save kam long Papa blong mi, sipos mi mi no tekem hem.” (Jon 14:⁠6) Taswe yumi mas sanem prea blong yumi i go long God tru long Jisas be i no go stret long Jisas hem wan.a

‘Be,’ sam oli save askem se, ‘?Baebol i no talem se disaepol Steven mo aposol Jon tufala i toktok long Jisas long heven?’ Hemia i tru. Be, samting ya i no joen wetem ol prea, from we Steven mo Jon, evriwan tufala i luk Jisas long drim mo tufala i toktok stret i go long hem. (Ol Wok 7:​56, 59; Revelesen 1:​17-19; 22:20) Tingbaot se klia toktok i go long God i no wan prea oltaem. Adam mo Iv tufala i toktok long God, tufala i stap talem ol eskyus from bigfala sin blong tufala, taem Hem i jajem tufala from sin blong tufala long Iden. Rod ya we tufala i toktok long hem i no wan prea. (Jenesis 3:​8-19) From samting ya, bambae i no stret blong talem se Steven no Jon i toktok long Jisas olsem pruf se yumi mas prea i go long hem.

?Olsem Wanem Long Nem Ya Blong Jisas We Oli ‘Singaot Long Hem’?

?Yu yu sloslou blong bilivim, yu tingbaot yet se i stret blong prea long Jisas? Wan woman i raet i go long branj ofis blong Watch Tower Society i se: “Be, mi no agri se ol faswan Kristin oli no prea long Jisas.” Hem i stap tingbaot tok blong Pol long 1 Korin 1:​2, NW, we i talem se “long evri ples long wol, olgeta ya oli stap singaot long Masta ya blong yumi Jisas Kraes.” Be, man i mas save se long stret lanwis tok ya “singaot long,” i save minim ol narafala samting bitim prea.

?Olsem wanem oli singaot long nem blong Kraes long evri ples? Wan samting se ol man blong Jisas blong Nasaret oli luksave hem olsem Mesaea mo “Man blong Sevem wol,” oli mekem plante merikel long nem blong hem. (1 Jon 4:14; Ol Wok 3:6; 19:5) Taswe, The Interpreter’s Bible i talem se tok ya “singaot long nem blong Masta blong yumi . . . i minim blong luksave se hem i Masta blong yumi bitim blong prea i go long hem.”

Stap akseptem Kraes mo bilif long blad blong hem we i ron blong God i save fogivim ol sin. Tufala samting ya tu i wan fasin blong “singaot long nem blong Masta blong yumi, Jisas Kraes.” (Skelem Ol Wok 10:43 wetem 22:​16, NW.) Mo yumi talem stret nem blong Jisas eni taem we yumi prea long God tru long hem. Taswe, Baebol i stap soemaot se yumi save prea long nem blong Jisas, be i no talem se yumi mas prea i go long hem.​—⁠Efesas 5:20; Kolosi 3:⁠17.

Jisas i Save Mekem Wanem Blong Yumi

Jisas i promes long ol disaepol blong hem se: “Sipos yufala i askem samting long nem blong mi, wanem samting, be bambae mi mi mekem.” ?Hemia i minim blong prea i go long hem? No gat. Yumi stap askem long Jeova God​—⁠tru long nem blong Jisas. (Jon 14:​13, 14; 15:16) Yumi askem God se Pikinini blong Hem, Jisas, i wokem bigfala paoa blong hem long bighaf blong yumi.

?Olsem wanem Jisas i toktok wetem ol man blong hem tede? Kongregesen blong ol tabu Kristin we Pol i tokbaot i save kam olsem wan pijatok. Hem i skelem kongregesen ya olsem wan bodi mo Jisas Kraes i olsem hed. ‘Hed blong kongregesen’ i givimaot ol samting we ol memba blong bodi long saed blong speret oli nidim “tru long ol joen mo ol string”: ol samting we oli nidim mo ol rod blong givimaot ol kakae long saed blong speret mo lidim kongregesen blong hem. (Kolosi 2:19) Long sem fasin, tede Jisas i yusum “ol man olsem presen,” no ol man we oli bigman long saed blong speret, blong lidim kongregesen, mo tu taem i gat nid blong stretem. I no gat eni samting nating blong ol memba blong kongregesen oli save toktok stret wetem Jisas no blong prea long hem, be oli mas​—⁠yes, oli mas⁠—​prea long Papa blong Jisas, Jeova God.​—⁠Efesas 4:​8-12.

?Yu Ona Long Jisas Olsem Wanem?

!Long saed blong fasin ya blong sevem ol man, wok blong Jisas i impoten tumas! Aposol Pol i talemaot se: “Mo i no gat wan narafala man nating we i save sevem yumi, from we aninit long heven, long medel blong ol man, God i no givim wan narafala nem samtaem we hem i save sevem yumi from hem.” (Ol Wok 4:12) ?Yu yu save se nem ya blong Jisas i impoten tumas?

Taem yumi mekem ol prea blong yumi i no go stret long Jisas, yumi no daonem hae ples blong hem. Be, yumi ona long Jisas taem yumi prea long nem blong hem. Mo olsem we ol pikinini oli ona long papa mo mama blong olgeta, yumi ona long Jisas Kraes taem yumi obei long ol loa blong hem, speseli nyufala loa ya se yumi mas laeklaekem yumi.​—⁠Jon 5:23; 13:34.

Ol prea We God i Agri Long Hem

?Yu yu wantem mekem prea we God i agri long hem? Ale mekem i go stret long Jeova God, mo mekem olsem long nem blong Pikinini blong hem, Jisas. Yu mas kasem stret save long wil blong God, mo letem ol prea blong yu i soemaot save ya. (1 Jon 3:​21, 22; 5:14) Ol tok blong Ol Sam 66:20 we i save givim paoa long yu, i talem se: “Oltaem Mi mi stap presem God from we hem i no tanem baksaed blong hem long prea blong mi, hem i holemtaet fasin ya blong hem we oltaem hem i laekem mi tumas.”

Olsem we yumi bin luk, ol prea oli olsem fasin blong wosip we i blong Hae God nomo. Taem yumi talemaot olgeta prea blong yumi long Jeova God, yumi soemaot se yumi folem rod blong Jisas blong prea: “Papa blong mifala long heven.”​—⁠Matyu 6:⁠9.

[Futnot]