Hem i Gud Blong Tingtinggud Long Ol Prea Long Baebol

WAN woman we i harem nogud long tingting blong hem, wan king, mo stret Pikinini blong God, oli mekem ol prea we bambae yumi luklukgud long olgeta naoia. Oli mekem ol prea ya long ol defren ples mo from ol defren samting we i kamaot long laef blong olgeta. Be, ol samting we i kamaot long laef blong olgeta, oli save kamaot long yumi tu. ?Olgeta eksampel ya oli lanem yumi long wanem samting?

“Luklukgud Long Trabol Blong Slef Gel Blong Yu”

?Yu yu stap traehad blong winim wan trabol we i stap longtaem? no ?Yu yu kam slak from ol trabol we yu stap tingting tumas long olgeta? Sipos yes, long wan rod yu yu sem mak long Hana, bifo we hem i bonem fas pikinini boe blong hem, Samuel. Hem i no gat pikinini mo wan narafala woman i jikim hem from. Hana i wari mo i harem nogud tumas long samting ya we i hapen long laef blong hem, mekem se hem i no kakae. (1 Samuel 1:​2-8, 15, 16) Hem i askem help blong Jeova long prea ya:

“O Jeova blong ol ami, sipos bambae yu luklukgud long trabol blong slef gel blong yu mo yu tingbaot mi, mo sipos bambae yu no fogetem slef gel blong yu, mo yu givim wan pikinini boe long slef gel blong yu, bambae mi givim hem long Jeova long ful laef blong hem, mo bambae hem i no pulum resa long hed blong hem.”​—1 Samuel 1:11.

Makemgud we Hana i no yusum ol tok we oli no klia. Hem i askem wan spesel samting long Jeova (wan pikinini boe), mo hem i joenem samting ya wetem wan strong disisen (God i save yusum pikinini ya olsem wanem hem i wantem). ?Prea ya i tijim yumi long wanem samting?

Taem yu gat ol trabol, talemaot olgeta, i klia nomo, long prea. Wanem trabol we yu yu gat, yu save tokbaot long Jeova taem yu prea, nating se hem i long saed blong famle, yu harem nogud blong stap yu wan nomo, no trabol from sik. Talem long hem wanem trabol stret we yu yu gat, mo yu yu harem olsem wanem. Louise we hem i wan wido, i talem se: “Evri aftenun mi putum ol trabol blong mi long han blong Jeova. Samtaem mi gat plante trabol, be long prea, mi talemaot olgeta wanwan, i klia nomo.”

Fasin blong toktok wetem Jeova long ol klia tok, i save karem blesing. Samting ya i givhan long yumi blong kasem save long ol prapa trabol blong yumi. Biaen, maet trabol ya i no bigwan tumas long tingting blong yumi. Fasin blong talem ol klia prea i mekem se yumi no moa tingting tumas long trabol blong yumi. God i no ansa long prea blong Hana yet, be tingting blong hem i kam strong bakegen, mo “fes blong hem i soem se hem i no moa wari.” (1 Samuel 1:18) Antap moa, taem yumi tok klia long ol prea blong yumi, samting ya i mekem se yumi traehad blong luksave ansa blong ol prea ya. Bernhard, we hem i wan Kristin man long Jemani, i talem se: “Taem mi talem ol prea long ol tok we i moa klia, ol ansa blong olgeta oli moa klia tu.”

“Mi Mi Wan Smol Boe Nomo”

Wan man i save wari long narafala rod, sipos hem i kasem wan wok we hem i harem se hem i no naf blong mekem. ?Samtaem yu yu harem se responsabiliti we Jeova i givim long yu i bigwan tumas? no ?Maet sam man oli ting se yu no stret blong mekem wok ya we yu kasem? Sem samting i kamaot long laef blong yangfala Solomon, taem God i jusum hem blong kam king blong ol man Isrel. Sam impoten man oli wantem wan narafala man blong rul olsem king. (1 King 1:​5-7, 41-46; 2:​13-22) I no longtaem afta we Solomon i kam king, hem i mekem wan prea blong askem wan samting long God:

“God blong mi, Jeova, yu yu mekem finis we man blong wok blong yu i kam king . . . be mi mi wan smol boe nomo. Mi no save olsem wanem blong goaot mo olsem wanem blong kam insaed. . . . Yu mas givim long man blong yu wan hat we i save mekem hem i obei, blong hem i save jajem ol man blong yu, mo blong hem i save luksave samting we i gud mo samting we i nogud.”​—1 King 3:​7-9.

Prea blong Solomon i tokbaot fasin fren blong hem wetem Jeova, jans we God i givim long hem, mo olsem wanem hem i save kam naf blong mekem wok ya. Sem mak nao, taem yumi kasem wan responsabiliti we yumi harem se yumi no naf blong mekem, yumi mas askem long God blong givim ol save mo ol fasin we yumi nidim blong mekem wok ya. Tingbaot ol ekspiryens ya:

Eugene i eksplenem se, “Taem oli askem mi blong karem wan responsabiliti we i bigwan moa long ofis blong Watch Tower Sosaeti, mi harem se mi no naf nating. I gat ol narafala we oli naf gud, mo oli gat plante moa ekspiryens. Long tufala naet ya we i kam biaen, mi slip smol nomo. Kolosap ful naet mi prea. Samting ya i givim paoa long mi, mo strong tingting we mi nidim.”

Oli askem Roy blong givim tok blong berem wan yangfala fren blong hem we i ded kwiktaem long wan nogud akseden. Plante man oli laekem fren blong hem tumas. Plante handred man bambae oli kam. ?Roy i mekem wanem? “Long laef blong mi, wanwan taem nomo mi bin prea strong olsem, blong askem paoa mo blong mi naf blong faenem ol tok we oli stret blong leftemap tingting blong ol man, mo blong mekem olgeta oli haremgud.”

Naoia, Man ya we i Wokem yumi ‘i stap spidimap olgeta samting,’ mo ogenaesesen blong hem i stap kam bigwan. Samting ya i mekem se plante moa man blong hem oli mas kasem responsabiliti. (Aesea 60:22) Sipos oli askem long yu blong karem moa responsabiliti, yu save sua se Jeova bambae i mekem se yu naf, nating we yu no gat ekspiryens, trening, mo gudhan blong mekem wok ya. Toktok wetem God long sem fasin olsem Solomon i mekem, mo Hem bambae i givim olgeta samting we yu nidim blong mekem wok ya.

“Blong Olgeta Oli Save Stap Wan Nomo”

Namba tri samting we i save hapen, maet oli askem yu blong mekem wan prea blong wan grup. Taem yumi mekem wan prea long fored blong ol narafala man, ?wanem samting yumi save prea from? Ridim prea blong Jisas we i stap long Jon japta 17. Hem i mekem prea ya long fored blong ol disaepol blong hem long laswan naet blong hem olsem wan man. ?Wanem kaen samting we Jisas i askem long Papa blong hem we i stap long heven?

Jisas i tokbaot ol mak mo hop blong grup ya we i stap lesin. Hem i tokbaot fasin blong leftemap nem blong Jeova God, mo blong talemaot Kingdom blong God. Jisas i makemgud impoten fasin fren we yumi mas gat wetem Papa long heven mo Pikinini blong hem, mo fasin fren ya i mas stanap long save blong Baebol. Hem i tokbaot fasin blong no joen long wol. Samting ya bambae i mekemrere ol man blong hem from fasin blong ol man blong agensem olgeta. Mo tu, Kraes i askem Papa blong hem blong lukaotgud long ol disaepol blong hem, mo blong givhan long olgeta blong oli joengud blong mekem trufala wosip.

Yes, Jisas i makemgud fasin joengud. (Jon 17:​20, 21) Long sem naet ya, ol disaepol blong Jisas oli bin rao olsem ol pikinini. (Luk 22:​24-27) Long prea ya, Kraes i no tok agens long olgeta from, be hem i traem blong pulum olgeta blong oli joengud. Ol prea long famle mo long kongregesen tu, oli mas leftemap fasin lav mo pulum ol man blong winim ol rao bitwin long olgeta. Prea blong yumi i mas pulum ol man we oli stap lesin long hem blong joengud tugeta.​—Ol Sam 133:​1-3.

Olgeta we oli lesin long wan prea, oli soem fasin joengud taem oli talem “Amen,” no “Yes i olsem” long en blong prea. Be blong oli save talem Amen, oli mas kasem save mo agri wetem evri samting we oli harem long prea ya. From samting ya, taem yumi prea, i no stret blong tokbaot wan samting we ol man we oli stap lesin oli no save long hem. Olsem nao, maet wan elda we i mekem prea long fored blong kongregesen, i askem long Jeova blong blesem wan brata no wan sista long saed blong speret, we i sik tumas. Be i gud sipos hem i mekem wan prea olsem long taem ya nomo, we bighaf blong ol man we hem i prea long fored blong olgeta, oli save man ya mo oli save se hem i sik.

Makemgud tu, we Jisas i no talem wan lis blong ol prapa nid blong ol wanwan memba blong grup ya we i stap lesin long prea blong hem. Sipos hem i bin mekem olsem, bambae hem i tokbaot ol prapa bisnes blong wanwan man we sam man nomo oli save long hem. Long ol prea blong yu wan, i stret blong tokbaot ol prapa wari blong yu, mo yu save mekem longfala prea olsem yu wantem mo tokbaot ol samting blong yu wan nomo.

?Olsem wanem wan man i save tingrere blong mekem prea long fored blong ol man blong wosip long wan bigfala miting? Wan Kristin man we i gat ekspiryens, i eksplenem se: “Bifo we mi mekem prea, mi tingbaot ol samting blong talem tangkyu from, ol samting we maet ol brata oli wantem askem long Jeova, mo wanem we mi save tokbaot long saed blong ol brata ya. Mi putum ol tingting blong mi wetem ol tok blong presem God, long stret oda long maen blong mi. Bifo we mi mekem prea long fored blong ol man, mi mekem wan kwaet prea, blong askem help blong God blong mekem prea we ol brata oli save joen long hem, long fasin we mi soem respek.”

Nomata wanem samting i stap kamaot long laef blong yu, ating yu save faenem wan prea long Baebol we wan man i mekem, taem samting olsem i bin hapen long laef blong hem. Ol prea long Baebol we oli tokbaot plante defren samting, oli soemaot klia we God i laekem yumi mo i kaen tumas long yumi. Fasin blong ridim ol prea ya, mo blong tingting dip long olgeta, bambae i givhan long yu blong mekem ol prea blong yu oli kamgud moa.

[Bokis blong pija long pej 5]

OL NAMBAWAN PREA INSAED LONG BAEBOL

I gat plante samting we ol man blong Jeova oli prea from. ?Yu save ansa long wan no moa blong ol samting ya we i kam biaen?

Olsem Eliasara, ?yu yu nidim we God i lidim yu?​—Jenesis 24:​12-14.

Olsem Jekob, ?yu yu stap kolosap long denja?​—Jenesis 32:​9-12.

?Yu yu wantem save God moa, olsem we Moses i wantem?​—Eksodas 33:​12-17.

?I gat sam man we oli stap agens long yu, olsem we oli mekem long Elaeja?​—1 King 18:​36, 37.

?Yu faenem se wok blong prij i strong, olsem i strong long Jeremaea?​—Jeremaea 20:​7-12.

?Yu yu nidim blong talemaot sam sin mo askem fasin fogif, olsem we Daniel i mekem? ​—Daniel 9:​3-19

?Ol man oli mekem nogud long yu mo ronem yu, olsem we oli mekem long ol disaepol blong Jisas?​—Ol Wok 4:​24-31.

Lukluk tu Matyu 6:9-13; Jon 17:1-26; Filipae 4:6, 7; Jemes 5:16.

[Bokis blong pija long pej 6]

SAMTING WE YU MAS PREA FROM TAEM YU STAP FAET AGENSEM NOGUD FASIN WE I STAP DIP INSAED LONG YU

?Yu yu stap faet agens long wan slak fasin we i stap kambak oltaem? ?Olsem wanem ol prea we oli raetemdaon long Baebol oli save givhan long yu? Eksampel blong Deved we i prea plante taem long saed blong ol slak fasin blong hem, i tijim yumi.

Deved i singsing: “God, plis yu luklukgud long mi, blong yu savegud ol tingting blong mi. Plis yu skelem laef blong mi, blong yu faenemaot ol samting we mi stap tingting long hem.” (Ol Sam 139:23) Deved i wantem we Jeova God i faenemaot ol nogud samting we hem i wantem, ol filing, no ol tingting we oli pulum hem. Long defren tok, Deved i askem help blong Jeova blong stap longwe long sin.

Be ol slak fasin blong Deved oli winim hem, mo hem i mekem wan bigfala sin. Long taem ya prea i givhan long hem bakegen​—i halpem hem blong karembak fasin fren blong hem wetem Jeova. Long Ol Sam 51:2, Deved i askem strong se: “Yu wasemaot ol samting nogud long laef blong mi, yu tekemaot olgeta samting nogud yu mekem mi mi klin.”

Yumi tu, yumi save prea wetem fasin daon, blong askem help long Jeova blong blokem ol nogud tingting. Bambae samting ya i mekem yumi strong moa, blong winim ol slak fasin we i stap dip insaed long yumi mo i save givhan long yumi blong stap longwe long sin. Sipos ol fasin ya i kamaot bakegen, yumi mas kam kolosap long Jeova mo askemgud se hem i givhan long yumi blong gohed long faet.

[Tok blong pija long pej 7]

Ol prea long fored blong ol man oli mas tokbaot ol hop we oli stanap long Baebol mo ol mak long saed blong speret blong grup ya