Ripot Long Wok Blong Kingdom
Prij Long Ol Taem Blong Trabol
APOSOL Pol i talemaot se ‘long taem blong ol las dei blong wol, laef long wol ya bambae i kam strong tumas.’ (2 Timote 3:1) !Ol tok ya oli tru tumas! Ol man long kantri blong El Salvado long Sentrol Amerika, oli luk we ol tok ya oli rili kamaot long ples blong olgeta. I gat wan faet i kamaot bitwin ol man long sem kantri ya, we i gohed blong bitim ten yia. Faet ya i karem trabol mo ded long plante taosen man. Naoia faet ya i finis, be plante trabol oli stap yet. Fasin blong brekem loa i kam antap bigwan afta long faet ya. Wan man blong toktok long televisin i talem i no longtaem, se: “Fasin blong kilim man mo fasin blong stil, naoia oli kamaot evri dei.”
Ol Wetnes blong Jeova tu oli kasem trabol from fasin ya blong brekem loa. Ol man blong stil oli go insaed long plante Haos Kingdom mo oli stilim ol samting blong mekem myusek mo saon. Mo plante taem lelebet, sam grup blong ol yangfala we oli holem masket, oli kam insaed long ol Haos Kingdom long taem blong miting, ale oli stilim mane, ol hanwaj, mo plante narafala samting long olgeta we oli stap long miting. Ol man blong stil oli kilim i ded sam Wetnes, taem ol Wetnes oli stap mekem evri dei wok blong olgeta wanwan.
Nating se oli kasem ol trabol ya, Ol Wetnes blong Jeova long El Salvado oli gohed blong wokhad long wok blong talemaot gud nyus. Oli obei long tok we i stap long Baebol se: “Gud nyus ya i mas go long olgeta man long wol fastaem.” (Mak 13:10) I gat plante man yet long kantri ya we oli wantem kasem gudfala hop blong Kingdom we Baebol i tokbaot, mo ol Wetnes oli traehad blong faenem evri man. Fasin blong tekem evri jans blong prij i kam wan nambawan rod blong talemaot gud nyus.
Wan Wetnes we i stap slip long hospital from we hem i sik, i tekem evri jans we hem i gat blong storeyan wetem ol narafala sikman long ol promes blong God long saed blong fyuja, olsem we Baebol i talem. Wan man we i sik bigwan, i harem nogud tumas i se: “!I no longtaem bambae mi mi ded!” Be nating se sik man ya i tok olsem we hem i no gat hop, samting ya i no mekem tingting blong Wetnes ya i foldaon. Hem i gohed nomo blong talemaot gud nyus blong Kingdom blong God long hem. Hem i ridim olgeta haf blong buk ya Yu Save Laef Foreva Long Paradaes Long Wol, we ol Wetnes blong Jeova oli wokem, long sik man ya. Sam dei biaen, Wetnes ya i lego hospital, mo tingting blong hem i sore long man ya we bambae i ded.
Fo yia biaen, Wetnes ya i mas go slip long wan narafala hospital bakegen. Taem hem i stap long ples ya, wan man we i slip long sem hospital ya i kam long hem, mo i talem se: “?Yu rimemba mi?” !Hemia man ya we Wetnes i bin mitim fo yia bifo, man ya we hem i ting se bambae i mas ded! Hemia wan bigfala glad taem man ya i holem Wetnes ya mo i talem se: “!Naoia mi tu mi wan Wetnes blong Jeova!” Man ya i bin laekem tumas gudfala hop blong Baebol long saed blong fyuja, ale hem i stadi Baebol wetem sam Wetnes blong Jeova, mo i givim laef blong hem long Jeova. Naoia hem i wan Wetnes, be antap long samting ya, hem i joen long wok blong fultaem paenia long tu yia finis.
Long store ya, ol sid blong trutok we Wetnes i bin sakem taem hem i tekem jans blong prij i bin foldaon long wan gudfala hat. Jans ya blong halpem ol man blong save ol trutok i pusum ol tru Kristin blong gohed long wok blong prij, nating se “laef blong wol ya i kam strong tumas.”