?Yu Yu Tingbaot?

?Yu glad blong ridim ol Wajtaoa we oli kamaot i no longtaem? Oraet, traem luk sipos yu save ansa long ol kwestin ya:

▫ ?From wanem ol faswan Kristin oli no mekem lafet long dei we Jisas i bon long hem?

The World Book Encyclopedia i talem se, “ol Kristin blong bifo oli no mekem lafet blong tingbaot taem we [Jisas] i bon long hem, from we oli tingbaot fasin ya blong mekem lafet blong betde blong eni man, olsem wan kastom blong ol hiten man.”​—12/15, pej 4.

▫ ?Yumi mas prea i go long Jisas?

No gat, from we ol prea oli olsem fasin blong wosip, we i mas go long Hae God nomo. Taem yumi prea long Jeova God nomo, yumi soemaot se yumi folem advaes blong Jisas blong prea olsem: “Papa blong mifala long heven.” (Matyu 6:9)​—12/15, pej 25.

▫ ?From wanem jajmen we King Deved i kasem from bigfala sin blong hem, i defren long jajmen we Ananaeas mo Safaera i kasem from sin blong tufala? (2 Samuel 11:​2-24; 12:​1-14; Ol Wok 5:​1-11)

King Deved i foldaon long sin from slak fasin blong hem. Taem wan man i mekem hem i luksave rabis samting we hem i mekem, hem i tanem tingting blong hem, mo Jeova i fogivim hem​—be biaen, hem i mas laef wetem frut blong sin blong hem. Ananaeas mo Safaera, tufala i mekem sin we tufala i gyaman wetem fasin blong gat tu fes. Ale, tufala i traem blong trikim Kristin kongregesen, mo tufala i ‘gyaman long tabu speret mo long God.’ (Ol Wok 5:​3, 4) Samting ya i pruvum se hat blong tufala i nogud. Taswe, tufala i kasem jajmen we i strong moa.​—1/1, pej 27, 28.

▫ ?Wanem i save halpem yumi blong mekem wok blong Jeova wetem wan hat we i glad?

Yumi mas wokem gudfala tingting mo fasin tangkyu long ol blesing mo ol nambawan wok we God i givim long yumi. Mo yumi neva mas foget se taem yumi folem Tok blong God, yumi mekem hem i glad.​—1/15, pej 16, 17.

▫ ?Wanem tufala samting we yumi mas tingbaot, sipos yumi wantem leftemap tingting blong wan man?

Faswan, tingbaot wanem blong talem, blong mekem se ol tok blong leftemap tingting i talemaot sam stret poen. Sekenwan, lukaot jans blong talem gudfala toktok long wan man from gud wok blong hem, no lukaot wan we i nidim ol tok blong mekem hem i kam strong long bilif bakegen.​—1/15, pej 23.

▫ ?From wanem “bigfala hif blong man” oli stap holem “lif kokonas long han blong olgeta”?

(Revelesen 7:9) Fasin ya we wan “bigfala hif blong man” oli stap saksakem han blong olgeta we oli holem lif kokonas, i soem se oli glad blong leftemap Kingdom blong Jeova mo King we Hem i makemaot, Jisas Kraes. (Lukluk Levitikas 23:​39, 40.)​—2/1, pej 17.

▫ ?Yumi lanem wanem gudfala lesen long buk blong Job?

Buk blong Job i soem, wanem we yumi mas mekem taem yumi kasem ol problem. Hem i givim eksampel blong rod we i stret​—mo rod we i no stret​—blong givim advaes long wan man we i fesem ol trabol. Antap moa, prapa ekspiryens blong Job i save halpem yumi blong skelemgud ol samting, taem ol defren trabol oli kasem yumi.​—2/15, pej 27.

▫ ?Ol merikel blong Jisas oli tijim yumi long wanem samting?

Ol merikel blong Jisas oli leftemap nem blong God. Hem i soem wan eksampel long ol Kristin blong leftemap nem blong God. (Rom 15:6) Oli pulum yumi blong mekem i gud long ol narafala man, blong soem gladhat blong givim, mo blong soem fasin sore.​—3/1, pej 8.

▫ ?From wanem ol elda oli askem ol kwestin we oli rere finis, long hemia we i jes givim laef blong hem long Jeova?

Hemia i blong mekem sua se evri man oli kasem save fulwan long ol stampa tijing blong Baebol, mo ol samting we wan Wetnes blong Jeova i mas mekem.​—3/1, pej 13.

▫ ?Olsem wanem ol prea blong Baebol oli save halpem yumi?

Taem yumi luklukgud long ol prea long Baebol, yumi save faenem olgeta ya we oli laenap stret wetem ol samting we i kamaot long laef blong yumi. Taem yumi faenem, ridim, mo tingting dip long ol prea olsem, bambae samting ya i halpem yumi blong mekem fasin blong yumi blong toktok wetem Jeova i kam gud moa.​—3/15, pej 3, 4.

▫ ?Wanem ya fasin fraetgud long God?

I minim bigfala respek long Jeova, mo dip ona long hem, we i joen wetem fasin blong no wantem nating blong mekem wan samting we i save mekem Hem i no glad long yumi. (Ol Sam 89:7)​—3/15, pej 10.

▫ ?Wanem trifala rod we Baebol i soem se yumi sas long ae blong God?

Baebol i tijim se evriwan long yumi i sas long ae blong God (Luk 12:​6, 7); hem i eksplenem ol sas samting we Jeova i luk long yumi (Malakae 3:16); mo hem i tokbaot ol samting we Jeova i mekem blong soemaot lav we hem i gat long yumi. (Jon 3:16)​—4/1, pej 11, 12, 14.

▫ ?From wanem Hibrus 10:​24, 25 i no jes wan oda se ol Kristin oli mas mekem ol miting tugeta?

Ol tok ya blong Pol oli soem wan mak we God i putum, we ol Kristin oli mas traem kasem long ol miting blong olgeta​—rili, hem i blong eni taem we ol Kristin oli joen tugeta.​—4/1, pej 16.