Wetaem Oli Ridim Mo Ol Blesing We Oli Kasem

Eli Moning:

Wan hasban mo waef blong hem, we tufala i wok afsaed long haos blong tufala, tufala i mekem disisen blong girap ten menet eli long evri moning mo ridim Baebol, bifo we oli aot long haos kwiktaem. Samting we tufala i ridim, i mekem se tufala i gat gudfala samting blong tokbaot, afta we tufala i livim haos.

Wan elda long Naejeria i folem program blong Tiokratik Skul blong ridim Baebol wetem famle blong hem long haos. Oli ridim wan haf evri dei. Plante taem oli mekem long moning, afta we oli tokbaot vas blong dei. Elda ya i askem ol pikinini wanwan, blong ridim sam haf we oli stap long program blong wik. Biaen, hem i talem long olgeta blong askem sam kwestin long ol vas we oli ridim.

Wan waef long Japan i ridim fulwan Baebol evri yia, stat long 1985. Hem i mekem program blong ridim Baebol 20 kasem 30 menet evri dei, stat long 5 klok long moning. Hem i tokbaot ol frut we hem i kasem, i se: “Fasin blong ridim Baebol i mekem bilif blong mi i kam strong. Mo i halpem mi blong fogetem sik blong mi, mo blong putum tingting blong mi i stap strong long hop blong Paradaes.”

Wan sista we i bin mekem wok blong paenia blong 30 yia, be hasban blong hem i no wan Wetnes, i girap long bed long faef klok evri moning blong ridim Baebol. Long program blong hem, hem i mas ridim fo pej long Hibru haf blong Baebol, wan japta long Kristin Grik haf blong Baebol, mo wan vas long buk blong Proveb. Evri yia, stat long 1959, hem i ridim fulwan Baebol. Hem i talem se: “Frut we mi kasem from fasin blong ridim Baebol, se mi harem se Jeova i laekem mi tumas . . . Mi kasem ol tok blong leftemap tingting, ol tok we i mekem mi haremgud, mo i stretem mi.” Hem i gohed blong talem se: “Taem mi ridim Baebol, i olsem we Jeova i stap taetem ol spring long laef blong mi evri dei.”

Wan sista i lanem trutok long wan kantri we oli putum tabu long wok blong ol Wetnes blong Jeova. Hasban blong hem tu i agensem bilif blong hem. Be hem i save ridim Baebol stat long Mande kasem Fraede, bitwin 6 mo 7 klok long moning. Samting ya i givim paoa long hem. Taem hem i stap tingbaot olsem wanem fasin blong ridim Baebol i gat paoa long hem, hem i talem se: “Yumi lanem blong laekem Jeova mo Jisas mo blong gat wan hapi laef. Nating se yumi gat sam problem mo hadtaem, yumi save se ol promes blong Jeova oli no save gyaman.”

Wan sista we i bin joen long Skul blong Paenia, i gat strong tingting blong folem advaes we hem i kasem long skul ya, blong ridim Baebol evri dei. Fastaem, hem i save ridim Baebol bitwin 5 mo 6 klok long moning. Be wok blong hem i jenis, ale samting ya i blokem hem. Nao hem i jenisim taem blong ridim Baebol, i go long 9 kasem 10 klok naet. Taem ol narafala traem oli kamaot, hem i talem se, “Mi gohed blong jenisim program blong mi folem ol samting we oli hapen long laef blong mi.”

Samtaem Long Dei:

Evri dei, tufala memba blong famle blong Betel long Brasil, we tufala i stret sista, tufala i gat fasin blong ridim Baebol tugeta, blong samwe long 20 menet evri dei, afta we tufala i kakae long medel dei. Tufala i ridim fulwan Baebol samwe long 25 taem finis. Tufala i raetem se: “Oltaem, mitufala i faenem nyufala samting. Taswe, mitufala i neva kam les blong ridim Baebol.”

Long Japan, wan sista we i no mared, i luksave se, nating se hem i gruap olsem wan Wetnes, hem i no savegud long Baebol. Taem hem i kam wan paenia, hem i tingting strong blong ridim Baebol oltaem. Naoia, hem i stap ridim Baebol folem program blong Tiokratik Skul. Mo hem i ridim, taem hem i stap go long hospital wan dei evri wik, blong pas from sik blong hem. Biaen, taem hem i gobak long haos, hem i mekem sam dip stadi. Long en blong wik, hem i gohed moa blong ridim Baebol. Hem i jusum ol buk blong Baebol, folem oda we oli yusum blong raetem olgeta.

Wan boe blong 13 yia we i ridim fulwan Baebol tri taem finis, naoia, hem i ridim wan japta evri dei taem hem i kambak long skul. Hem i talem se, samting ya i halpem hem “blong gat moa lav long Jeova.”

Wan Wetnes we i bisi tumas​—hem i wan wokman, wan elda, wan hasban, mo wan papa​—i lesin long ol kaset blong Baebol taem hem i stap ron long tren, blong go long ples blong wok. Biaen, taem hem i kambak long haos, hem i ridim sem haf we hem i bin lesin long hem.

Antap long prapa Baebol riding blong hem, wan paenia long Franis i lesin long ol kaset blong Baebol taem hem i stap mekemrere kakae, taem hem i draev, taem hem i stap fesem ol hadtaem, no jes blong haremgud.

Wan paenia brata long Japan, we hem i gat 21 yia, i tingbaot se oltaem mama blong hem i talem strong se, hem i mas kasem sam samting long saed blong speret evri dei. Ale, paenia ya i ridim Baebol evri dei, nating se hem i no putum wan stret taem blong rid. Hem i bin stat blong mekem olsem taem hem i gat 3 yia nomo. Afta we hem i ridim wan haf we hem i jusum blong ridim long dei ya, hem i ridim bakegen ol stampa vas. Mo biaen, hem i tekem sam menet blong tingtingbak long ol samting we hem i ridim.

Wan narafala Wetnes, wan paenia, hem i ridim fulwan Baebol samwe long ten taem finis long ol 12 yia we oli pas. Hasban blong hem i no wan Wetnes, taswe hem i mekem program blong ridim Baebol long aftenun.

Naet:

Long Japan, wan elda we i wan fultaem paenia tu, i ridim Baebol blong hem evri naet, bifo we hem i go slip. Mo hem i bin mekem olsem long ol eit yia we oli pas. Hem i talem se: “Mi rili laekem tumas ol vas we oli soem tingting blong Jeova, filing blong hem, mo olsem wanem hem i stretem ol samting. Taem mi tingting dip long ol vas ya, samting ya i halpem mi blong gat sem tingting olsem Jeova. Mo i mekem se mi givhan long ol Kristin brata mo sista blong mi, mo long ol memba blong famle blong mi.”

Wan elda long Franis i ridim Baebol wan haoa long evri naet. Hem i mekem olsem stat long 1979. Plante taem, hem i putum faef no sikis defren kaen Baebol long fored blong hem. Hemia blong skelem ol vas. Hem i talem se, taem hem i ridimgud Baebol, samting ya i halpem hem blong luksave “olsem wanem blong mekem ol save blong Baebol oli wok, taem hem i fesem ol defren samting we oli hapen long evri dei laef.” Samting ya i halpem hem tu, blong kam moagud long fasin blong givim advaes we i kamaot long Baebol.

Long ol 28 yia we oli pas, evri naet, wan brata long Naejeria i ridim vas blong nekis dei long buklet ya, Ridimgud Ol Tok Blong Baebol Evri Dei. Hem i ridim blong oli save tokbaot long nekis moning. Mo tu, hem i ridim fulwan japta blong Baebol we vas ya i kamaot long hem. Afta we hem i mared, hem i gohed long fasin ya. Hem i ridim ol vas mo i tokbaot wetem waef blong hem.

Wan yangfala we papa mo mama blong hem, oli no Wetnes, oltaem i tekem faef kasem ten menet evri naet blong ridim Baebol, bifo we hem i go slip. Smol taem ya i rili nambawan long hem. Hem i mekem prea bifo mo afta we hem i ridim Baebol. Hem i wantem tumas blong kasem save long ol mesej we Jeova i lidim ol wanwan man blong raetemdaon long Baebol.

Wan brata we i mared, we i stap wok blong Betel, i talem se evri yia, hem i ridim fulwan Baebol. Mo hem i mekem olsem blong eit yia finis. Hem i tekem 20 no 30 menet blong rid, bifo we hem i go slip long naet. Nating se samtaem hem i taed tumas, hem i no save slip sipos hem i go long bed we i no ridim Baebol fastaem. Hem i mas girap mo lukaot long samting ya we hem i nidim long saed blong speret.