Yumi Harem Nogud Taem Man i Ded, Be Yumi Gat Hop

‘Mifala i wantem we bambae yufala i savegud ol trutok blong weswe long olgeta ya we oli ded finis. Mifala i no wantem we bambae yufala i stap harem nogud from olgeta ya, olsem ol narafala man ya we oli no gat hop, oli stap harem nogud from ol dedman blong olgeta.’​—1 TESALONAEKA 4:13.

1. ?Wanem samting i stap kamaot oltaem, we i mekem plante man oli harem nogud?

?YU BIN lusum wan long ded, we yu yu laekem hem tumas? Nating se yumi gat hamas yia, bighaf blong yumi i bin harem nogud from wan famle no wan fren blong yumi we i ded. Maet hem i wan bubu blong yumi, papa no mama, hasban no waef, no wan pikinini. Oltaem, plante man oli ded from we oli kam olfala, oli sik, no oli kasem akseden. Plante man oli ded tu from fasin blong brekem loa, kilim man, mo ol bigfala faet, ale samting ya i mekem moa man oli krae mo harem nogud. Raon long wol, i gat bitim 50 milyan man oli ded evri yia. Long 1993, evri dei i gat 140,250 man oli ded. Ded i mekem se ol fren mo famle oli harem nogud tumas, mo filing ya we oli lusum wan bigfala samting, i dip.

2. ?From wanem i no stret we pikinini i ded?

² Yumi sore long wan papa mo mama long Kalifonia, Yunaeted Stet, we gel blong tufala we i gat bel, i ded long wan narakaen akseden long trak. Wantaem nomo, tufala i lusum gel blong tufala, wan nomo we tufala i gat, mo bebi blong hem we i faswan bubu blong tufala. Hasban blong woman ya we i ded, i lusum waef mo faswan boe no gel blong hem. I no stret we wan papa mama, i safa from ded blong wan pikinini, nating sipos hem i smol yet no i bigwan finis. I no stret blong pikinini i ded fastaem long papa mama. Yumi evriwan i laekem laef. From samting ya, i tru se ded i wan enemi.​—1 Korin 15:26.

Ded i Kam Insaed Long Famle Blong Man

3. ?Maet ded blong Ebel i mekem wanem long Adam mo Iv?

³ Stat long taem we faswan papa mama blong yumi, Adam mo Iv, tufala i rebel, i gat sikis taosen yia finis we sin mo ded i stap rul olsem king long ol man. (Rom 5:14; 6:​12, 23) Baebol i no talemaot samting we tufala i mekem taem boe blong tufala, Ken, i kilim i ded brata blong hem Ebel. I gat plante risen from wanem samting ya i mas mekem tufala i harem nogud tumas. Hemia i fastaem we tufala i luk wan man i ded, mo prapa pikinini blong tufala nao i ded. Tufala i luk frut blong fasin rebel we tufala i mekem, mo frut we i kamaot taem pikinini blong tufala i gohed blong yusum fasin fri blong hem long rod we i no stret. Ken i jusum blong kam faswan man blong kilim wan prapa famle blong hem i ded, nating se God i givim ol woning long hem finis. Yumi save se ded blong Ebel i mekem Iv i harem nogud tumas. From we, taem hem i bonem Set, hem i talem se: “God i glad blong givim wan pikinini boe long mi bakegen, blong tekem ples blong Ebel ya we Ken i kilim i ded.”​—Jenesis 4:​3-8, 25.

4. ?Afta we Ebel i ded, from wanem gyaman bilif long saed blong sol we i no save ded, i no save mekem se Adam mo Iv tufala i haremgud?

⁴ Mo tu, faswan papa mama blong yumi, tufala i luk se tok panis we God i talem long tufala i rili kamtru​—se sipos tufala i rebel mo no obei long Hem, bambae tufala i “ded from.” Setan i gyaman long taem ya. Be gyaman bilif long saed blong sol we i no save ded, i no stat yet. Taswe tufala i no save kasem gyaman fasin blong haremgud from bilif ya. God i talem finis long Adam, se: “Bodi blong yu bambae i gobak bakegen long graon ya we mi mi wokem yu long hem fastaem. Mi mi wokem yu long graon fastaem, mo bambae yu yu kam graon bakegen.” God i no talem se, long fyuja bambae hem i laef olsem wan sol we i no save ded, long heven, long hel, long Limbo, long pegatri, no long sam narafala ples olsem, no gat. (Jenesis 2:17; 3:4, 5, 19) Adam mo Iv, we tufala i olsem ol laef sol we oli mekem sin, bambae oli ded, oli no moa stap. Tabu speret i pusum King Solomon blong raetem se: “Ol man we oli laef oli save se bambae oli mas ded. Be ol dedman oli no save wan samting nating. Mo oli no moa save kasem pei, from we ol man oli fogetem olgeta finis. Mo tu, fasin blong olgeta blong laekem wan samting no blong no laekem nating wan samting, mo fasin jelas blong olgeta, oli finis finis. Mo olgeta oli no moa save joen long olgeta samting we i mas kamaot aninit long san, gogo ol taem we man i no save.”​—Eklesiastis 9:​5, 6.

5. ?Wanem trufala hop blong ol dedman?

⁵ !Ol tok ya oli tru nomo! Yes, ?hu i save tingbaot ol bubu we oli laef tu handred no tri handred yia bifo? Plante blong olgeta, yumi no save tu se oli berem olgeta weples. Mo ol man oli fogetem olgeta longtaem finis. ?Samting ya i minim wanem? ?I minim se olgeta we yumi laekem olgeta tumas, we oli ded, oli no gat hop? Si, oli gat hop. Taem Mata i stap toktok long Jisas, long saed blong Lasros, brata blong hem we i ded, hem i talem se: “Mi mi save we bambae long lasdei, hem i save laef bakegen long ded, long taem ya we olgeta man bambae oli laef bakegen long ded.” (Jon 11:24) Ol man Jyu oli bilif se long fyuja, bambae God i mekem ol dedman oli laef bakegen. Be, samting ya i no blokem olgeta blong harem nogud taem oli lusum wan we oli laekem tumas.​—Job 14:13.

Ol Man Blong Bilif We Oli Harem Nogud Taem Wan i Ded

6, 7. ?Ebraham mo Jekob, tufala i mekem wanem taem wan we tufala i laekem tumas i ded?

⁶ Kolosap fo taosen yia bifo, taem waef blong Ebraham, Sera, i ded, “Ebraham i stap krae bigwan long woman blong hem.” Yes, Ebraham, we i fasgud long God, i soem ol dip filing blong hem, taem gudfala waef blong hem we hem i laekem tumas, i ded. Nating se tingting blong hem i strong, hem i no sem blong krae, blong soem se hem i sore.​—Jenesis 14:​11-16; 23:​1, 2.

⁷ Eksampel blong Jekob i sem mak. ?Hem i mekem wanem, taem ol boe blong hem oli gyaman, blong mekem hem i bilif se wan wael anamol i kilim i ded narafala boe blong hem, Josef? Long Jenesis 37:​34, 35, yumi ridim se: “Nao hem i harem nogud tumas, i terem ol klos blong hem from. Nao i putum ol rabis klos nomo, mo i stap krae longtaem from pikinini ya blong hem. Ol narafala pikinini blong hem, wetem olgeta dota blong hem oli kam blong traem mekem hem i haremgud bakegen, be hem i no save haremgud, i stap talem se ‘Sipos mi ded, mi go long Seol, be bambae mi stap krae yet from pikinini ya blong mi.’ Nao hem i gohed, i stap krae from pikinini ya blong hem.” Yes, hem i fasin blong yumi man, mo i stret we yumi harem nogud taem wan we yumi laekem tumas i ded.

8. ?Plante taem, ol man Hibru oli mekem wanem blong soem se oli harem nogud?

⁸ Maet sam man oli ting se folem kastom mo taem blong yumi tede, samting we Jekob i mekem i bitim mak mo i mekem filing blong sore i kam moa. Be Jekob i gruap long wan defren taem mo kastom. Fasin blong hem blong soemaot se hem i harem nogud​—i putum ol rabis klos​—hemia faswan taem we Baebol i tokbaot fasin ya. Be, olsem Hibru haf blong Baebol i talem, man i save soem se hem i harem nogud taem hem i krae bigwan, i wokem singsing blong ded, mo i sidaon long ases. Ol pruf oli soem se ol man Hibru oli no blokem trufala fasin blong soemaot we oli harem nogud, taem wan man i ded.a​—Esikel 27:​30-32; Emos 8:10.

Fasin Blong Harem Nogud Long Taem Blong Jisas

9, 10. (a) ?Jisas i mekem wanem taem Lasros i ded? (b) ?Samting ya we Jisas i mekem i soemaot long yumi se hem i wanem kaen man?

⁹ ?Yumi save talem wanem long saed blong ol faswan disaepol blong Jisas? Eksampel, taem Lasros i ded, tufala sista blong hem, Mata mo Meri, tufala i sore long hem, ale tufala i krae we i krae. ?Jisas we i stretgud olgeta, i mekem wanem taem hem i kam long ples we dedman ya i stap? Gospel blong Jon i talem se: “Taem Meri i kamtru long ples ya we Jisas i stap, mo i luk hem, hem i nildaon long hem, i talem long hem, i se ‘Masta, sipos yu yu stap long ples ya, bambae brata blong mi i no ded, be yu yu no stap.’ Jisas i luk we woman ya i stap krae mo ol man Isrel tu we oli wetem hem oli stap krae. Nao long tingting blong hem, hem i harem nogud tumas, we i pulum win blong hem from. Nao hem i askem long olgeta, i se ‘?Yufala i berem hem wea?’ Olgeta oli askem long hem se ‘Masta, yu kam luk.’ Jisas, hem i krae.”​—Jon 11:​32-35.

¹⁰ “Jisas, hem i krae.” Sotfala tok ya i talem plante samting long saed blong fasin blong Jisas, fasin sore blong hem, mo ol filing blong hem. Nating se hem i savegud long hop blong laef bakegen long ded, “Jisas i krae bigwan.” (Jon 11:​35, King James Version) Store ya i gohed, i se, ol man we oli stap long taem ya, oli talem se: “!Ei, olgeta! Hem i laekem [Lasros] we i bitim mak.” Yes, sipos Jisas we i stretgud olgeta, i krae taem wan fren i ded, tede, wan man no woman i no mas sem blong krae mo soem se hem i harem nogud, taem wan we hem i laekem i ded.​—Jon 11:36.

?Wanem Hop Blong Ol Dedman?

11. (a) ?Yumi save lanem wanem long eksampel blong ol man long Baebol we oli stap harem nogud, oli krae? (b) ?From wanem yumi no harem nogud olsem ol man ya we oli no gat hop?

¹¹ ?Yumi save lanem wanem long ol eksampel ya blong Baebol? Yumi lanem se i stret nomo blong harem nogud taem wan man i ded, mo se yumi no mas sem blong soem se yumi harem nogud. Nating se hop blong laef bakegen i givhan long yumi, be dip filing blong yumi i trabol tumas, taem wan we yumi laekem tumas i ded. Long plante yia, yumi bin joengud mo serem ol samting. Be naoia, wantaem nomo, fasin ya i finis. I tru, yumi no harem nogud olsem ol man ya we oli no gat hop, no ol man ya we oli gat gyaman hop. (1 Tesalonaeka 4:13) Mo tu, yumi no folem gyaman bilif ya se man i gat wan sol we i no save ded, no i gohed blong laef olsem wan narafala samting, maet wan anamol no tri. Yumi save se Jeova i promes blong putum “nyufala skae mo wan nyufala wol, we stret fasin nomo bambae i stap long hem.” (2 Pita 3:13) God “bambae i ravemaot wora blong ae blong [yumi]. Nao bambae i no moa gat man i ded mo man we i krae from ded. Bambae i no moa gat man i krae, mo man we i harem nogud long bodi blong hem. Ol samting ya blong bifo oli lus olgeta.”​—Revelesen 21:4.

12. ?Olsem wanem Pol i soemaot bilif blong hem long saed blong laef bakegen?

¹² ?Wanem hop blong olgeta we oli ded finis?b Tabu speret i pusum Pol, wan Kristin man blong raetem leta, blong leftemap tingting blong yumi mo givim hop, taem hem i raetem se: “Laswan blong ol enemi ya we God bambae i winim olgeta, hemia samting ya ded.” (1 Korin 15:26) The New English Bible i talem se: “Laswan enemi we bambae i lus olgeta, hemia ded.” ?From wanem Pol i rili sua long samting ya? From Jisas Kraes ya, we i laef bakegen long ded, hem nao i tijim Pol mo i mekem se hem i kam wan Kristin. (Ol Wok 9:​3-19) Hemia nao risen from wanem Pol i save talem se: “Olsem we ded i wan samting we wan man nomo [Adam] i tekem i kamtru long wol, ale, laef bakegen long ded i olsem, hem tu i wan samting we wan man nomo [Jisas] i tekem i kamtru. Olsem we olgeta man we oli joen long Adam oli save ded, ale, long sem fasin, olgeta man we oli joen long Kraes oli save laef bakegen long ded.”​—1 Korin 15:​21, 22.

13. ?Taem Lasros i laef bakegen long ded, ol man we oli stap lukluk oli mekem wanem?

¹³ Tijing blong Jisas i mekem se yumi haremgud tumas mo i givim wan hop long saed blong fyuja. Eksampel, ?Jisas i mekem wanem long saed blong Lasros? Hem i go long hol blong ston ya we ded bodi blong Lasros i bin slip long hem fo dei finis. Hem i mekem wan prea, “nao taem [hem] i talem tok ya finis, hem i singaot bigfala, i se ‘Lasros, yu kamaot.’ Nao man ya we bifo i ded finis, hem i kamaot. Mo ol kaliko ya we olgeta oli yusum blong kavremap bodi blong hem, oli stap yet long han mo leg blong hem, mo long fes blong hem tu. Nao Jisas i talem long olgeta, i se ‘Yufala i tekemaot ol kaliko ya, blong hem i save wokbaot.’ ” ?Yu save tingbaot olsem wanem fes blong Mata mo Meri i soemaot se tufala i sapraes mo tufala i glad tumas? !Ol man we oli stap kolosap oli mas sapraes tumas taem oli luk merikel ya! Yumi no sapraes se plante man we oli luk samting ya, oli bilif long Jisas. Be ol enemi blong Jisas, ‘oli mekem miting wetem kaonsel, mo oli agri blong kilim Jisas i ded.’​—Jon 11:​41-53.

14. ?Fasin ya we Lasros i laef bakegen, i saen blong wanem?

¹⁴ Jisas i mekem wan samting we man i no save fogetem, hem i mekem dedman ya i laef bakegen long fes blong plante man. Hemia i jes wan saen blong soemaot olsem wanem bambae ol man oli laef bakegen long ded long fyuja. Hem i bin tokbaot samting ya bifo, taem hem i talem se: ‘I nogud yufala i sapraes long samting ya, from we i gat taem i stap kam we ol dedman we oli stap long beregraon, bambae oli harem voes blong [Pikinini blong God], nao bambae oli aot long beregraon. Olgeta we oli mekem ol gudfala fasin, oli mas stanap bakegen blong kasem laef. Be olgeta we oli mekem ol rabis fasin, oli mas stanap bakegen blong pas long bigfala kot ya blong mi save jajem olgeta.’​—Jon 5:​28, 29.

15. ?Pol mo Ananaeas, tufala i gat wanem pruf se Jisas i laef bakegen?

¹⁵ Olsem yumi luk finis, aposol Pol i bilif se ol dedman bambae oli laef bakegen. ?From wanem hem i gat bilif ya? Bifo, oli kolem hem Sol, mo fasin blong hem i nogud olgeta. Hem i wan man blong ronem ol Kristin. Fasin mo nem blong hem i mekem ol Kristin man ol fraet tumas. Tingbaot, hem nao i mekem rod blong oli stonem i ded Kristin disaepol Steven. (Ol Wok 8:1; 9:​1, 2, 26) Be, long rod i go long Damaskas, Kraes ya we i laef bakegen long ded, i mekem Sol i luksave samting we hem i stap mekem, taem hem i mekem hem i blaen blong smoltaem. Sol i harem wan voes we i talem long hem, se: “ ‘!Sol! !Sol! ?Weswe yu stap ronem mi olsem?’ Hem i askem se ‘?Masta, yu hu?’ Nao tok ya i talem se ‘Mi Jisas ya we yu stap ronem mi.’ ” Sem Jisas ya we i laef bakegen long ded finis, hem nao i givim oda long Ananaeas, we i stap long Damaskas, blong go long haos we Sol i stap prea insaed long hem, blong mekem hem i lukluk bakegen. Taswe, prapa ekspiryens blong Sol mo Ananaeas, i mekem tufala i bilif long laef bakegen long ded.​—Ol Wok 9:​4, 5, 10-12.

16, 17. (a) ?Olsem wanem yumi save se Pol i no bilif olsem ol man Gris, se sol i no save ded? (b) ?Baebol i givim wanem strong hop? (Hibrus 6:​17-20)

¹⁶ Makemgud olsem wanem Sol, we i kam aposol Pol, i ansa, taem ol man we oli ronem hem from hem i wan Kristin man, oli tekem hem i kam long fes blong Hedgavman ya Filiks. Long Ol Wok 24:​15, yumi ridim se: “Mi putum tingting blong mi long God blong luk . . . we God bambae i mekem olgeta man oli laef bakegen long ded, ol man we oli stret mo ol man we oli no stret.” I klia se Pol i no bilif long ol hiten bilif blong ol man Gris. Oli bilif se man i gat wan sol we i no save ded, we i aot long bodi taem man i ded, mo i gohed long wan narafala gyaman laef, no long wan narafala wol aninit long graon. Pol i gat bilif long laef bakegen mo i tijim ol man blong bilif long samting ya tu. Long samfala, samting ya i min se bambae oli kasem presen ya blong laef long heven, olsem ol speret man we oli no save ded samtaem. Be bighaf blong ol dedman, bambae oli laef bakegen blong stap long wol ya we i kam stret olgeta.​—Luk 23:43; 1 Korin 15:​20-22, 53, 54; Revelesen 7:​4, 9, 17; 14:​1, 3.

¹⁷ Olsem nao, Baebol i givim wan klia promes mo wan strongfala hop long yumi, tru long fasin blong laef bakegen long ded long wol ya, afta we hem i jenis bigwan. Bambae plante man oli save luk bakegen olgeta we oli laekem olgeta tumas.​—2 Pita 3:13; Revelesen 21:​1-4.

Nambawan Help Blong Olgeta We Oli Harem Nogud

18. (a) ?Wanem nambawan tul we i kamaot long “Fraetgud Long God” Distrik Asembli? (Lukluk bokis.) (b) ?Yumi mas ansa long wanem kwestin?

¹⁸ Naoia, yumi gat ol memori mo yumi harem nogud. ?Yumi save mekem wanem blong stanap tru long wan hadtaem we yumi harem nogud tumas from wan we i ded? ?Ol narafala oli save mekem wanem blong halpem olgeta we oli harem nogud? Mo tu, ?yumi save mekem wanem blong halpem ol gudfala man we yumi mitim long wok blong prij, we oli no gat trufala hop mo oli stap harem nogud tu? ?Mo olsem wanem Baebol i gohed blong leftemap tingting blong yumi long saed blong olgeta we yumi laekem tumas we oli ded? Haf we i kam biaen bambae i givim sam rod blong folem.

[Ol futnot]

?Yu Yu Save Ansa?

◻ ?From wanem yumi save talem se ded i wan enemi?

◻ ?Long taem blong Baebol, olsem wanem ol man blong God oli soemaot se oli harem nogud?

◻ ?Olgeta we yumi laekem olgeta tumas, we oli ded, oli gat wanem hop?

◻ ?From wanem Pol i bilif long fasin blong laef bakegen long ded?

[Bokis blong pija long pej 8, 9]

Nambawan Help Blong Olgeta We Oli Harem Nogud

Long “Fraetgud Long God” Distrik Asembli long 1994 kasem 1995, Watch Tower Society i talemaot se oli wokem wan nyufala buklet we nem blong hem, When Someone You Love Dies. Buklet ya we i leftemap tingting, oli wokem blong givhan long ol man blong olgeta kantri mo lanwis blong oli haremgud bakegen. Maet yu luk buklet ya finis. Hem i talem ol isi toktok blong Baebol blong eksplenem ded mo olsem wanem long man we i ded. Samting we i moa impoten, se hem i leftemap promes we God i mekem tru long Jisas Kraes, blong mekem ol dedman oli laef bakegen long wan paradaes wol we i klin. Hem i rili mekem ol man we oli sore, mo oli stap krae, oli haremgud bakegen. From samting ya, hem i wan gudfala tul blong yusum long Kristin minista wok mo hem i mas wekemap intres blong plante man, mo mekem se oli wantem stadi Baebol long haos blong olgeta. Oli putum ol kwestin blong stadi long ol bokis long en blong ol wanwan haf. Hemia i blong mekem wan isi rod blong askem sam kwestin blong tingtingbak long olgeta we oli rili intres, we oli harem nogud mo oli stap krae from wan we i ded.

[Tok blong pija long pej 8]

Taem Lasros i ded, Jisas i krae

[Tok blong pija long pej 9]

Jisas i mekem Lasros i girap, i laef bakegen long ded

[Foto Credit Line blong pija long pej 7]

First Mourning, by W. Bouguereau, from original glass plate in Photo-Drama of Creation, 1914