Obei Long God Insaed Long Famle We Samfala i Gat Defren Bilif

“I SOA moa i bitim we wan man i kilim bodi blong mi. . . . Mi harem olsem se mi soa long ful bodi blong mi, be i no gat man we i save luksave.” “Samtaem mi harem nogud tumas long laef blong mi we mi no moa wantem laef . . . no mi wantem ronwe long haos mo neva kambak.” “Samtaem i hadwok blong tingting stret.”

Ol toktok ya oli soemaot filing blong sam man we oli lusum hop mo oli harem se oli stap olgeta nomo. Oli kasem trabol from hasban no waef blong olgeta no sam narafala memba blong famle we oli sakem ol nogud tok long olgeta​—ol tok agens, ol tok blong mekem olgeta oli fraet mo blong daonem olgeta, mo fasin we oli no moa wantem toktok wetem olgeta—​mo tu, samtaem oli save kilim olgeta. ?From wanem ol man ya oli kasem ol trabol olsem? Jes from we bilif blong olgeta long saed blong skul i defren. Taem i gat ol trabol olsem insaed wan famle we sam memba blong hem oli gat defren bilif, i hadwok blong mekem wosip long Jeova. Be nating, plante Kristin we oli fesem ol trabol olsem, oli gohed blong soemaot gudfala fasin blong obei long God.

Yumi glad blong save se, ol trabol mo fasin blong harem nogud olsem, oli no kamaot long evri famle we sam memba blong hem i gat defren bilif. Be, i kamaot long sam famle. ?I gat trabol olsem insaed long famle blong yu? Sipos yes, maet yu faenem i had blong respektem hasban no waef blong yu no papa mama blong yu. Sipos yu yu wan waef no pikinini we i kasem trabol olsem, ?olsem wanem yu save obei long God long wan famle we sam memba blong hem oli gat defren bilif? ?Olsem wanem ol narafala oli save givhan? ?Mo wanem tingting blong God long saed ya?

?From Wanem i Hadwok Blong Obei?

Fasin blong ol man blong wol ya i blong tingbaot olgeta nomo mo blong no gat tangkyu long narafala. Fasin ya i save gat paoa long yumi, mo taem i joen wetem ol slak fasin blong yumi we oli kamaot from sin, fasin blong obei long God i save kam olsem wan strong traem oltaem. Setan i save samting ya, mo hem i wantem brekem strong tingting blong yu. Blong mekem olsem, plante taem hem i yusum sam memba blong famle, we oli gat smol intres no we oli no laekem nating mo oli no gat respek long ol loa blong God. Ol stret loa long saed blong speret mo fasin we yu stap folem, plante taem oli defren tumas long hemia we famle blong yu, we i no bilif, i stap folem. Samting ya i minim se oli gat defren kaen tingting long saed blong fasin mo wok blong yu. (1 Pita 4:4) Oli save mekem i strong tumas long yu, blong traem fosem yu blong lego ol Kristin loa. Hemia from we yu yu obei long oda ya se: “Bambae yufala i no go joen long ol man we oli stap mekem ol rabis fasin ya, we oli blong tudak nomo.” (Efesas 5:11) Long tingting blong olgeta, evri samting we yu yu stap mekem naoia i no moa stret. Hemia i from we yu jenisim skul blong yu. Wan mama, we i hadwok blong lukaot long ol sik pikinini blong hem, i askem man blong hem blong halpem hem. Man blong hem i ansa wetem fasin blong jikim hem se, “Sipos yu yu gat taem blong go long skul blong yu, yu gat taem blong lukaot long pikinini. Yu no nidim mi.” Ol tok olsem oli mekem i hadwok moa blong gat fasin obei.

Samtaem maet wan samting i kamaot we Baebol i no talem wan stret loa long hem, ale yufala i no save agri. Be, yu luksave se from we yu wan memba blong famle ya, yu mas mekem prapa wok blong yu. Wan gel nem blong hem Connie, i talem se, “Filing blong mi i trabol taem mi tingbaot olsem wanem papa blong mi i mekem nogud long mifala. Mi luksave se hem i harem nogud from we hem i ting se hem i stap hem wan nomo. Oltaem mi mas talem bakegen long mi wan se mi no mas kros long papa blong mi from fasin agens blong hem. Mi nidim blong talem bakegen long mi wan se i gat wan strongfala risen from wanem hem i agensem mifala, mo hem i no agri long disisen blong mifala. Setan hem i masta blong wol ya.” Susan, we i mared long wan man we i no gat sem skul, i talemaot se: “Fastaem mi harem se mi wantem seraot nomo long man blong mi​—be naoia i no moa olsem. Mi save se Setan i yusum hem nomo blong traem mi.”

Maet i luk olsem se fasin traehad blong Setan blong mekem yu yu harem se yu olsem nating nomo, bambae i neva stop. Plante dei oli save pas we hasban no waef blong yu i no toktok wetem yu. Yu save harem se yu no moa gat wan fren nating. Samting ya i save mekem yu yu harem se yu nating nomo, i spolem respek we yu gat long yu wan, mo i save traem fasin blong yu blong obei long God. Ol pikinini tu oli save harem nogud long filing blong olgeta, mo paoa blong olgeta i save godaon. I gat eksampel blong tri yangfala man blong God we oli strong blong go long ol Kristin miting, nating se papa mama blong olgeta oli no wantem. Wan long olgeta, we naoia hem i wan fultaem paenia, i talem se: “Mifala i bin harem se mifala i no moa gat filing, mifala i taed tumas. Mifala i no save slip. Mifala i harem nogud tumas.”

?God i Wantem Se Yu Mekem Wanem?

Oltaem, yumi mas obei long God fastaem. Mo afta, yumi mas obei long hasban olsem hed blong famle, long fasin we oltaem i stret long tingting blong Jeova. (Ol Wok 5:29) Maet samting ya i hadwok, be i gat rod blong mekem. Gohed blong askem help blong God. Hem i wantem se yu yu mekem wosip long hem wetem “speret mo trutok,” mo yu lesin mo letem hem i lidim yu. (Jon 4:​24, NW) Taem save long Tok blong God i kam fulap long hat blong wan gudfala man, samting ya i pusum hem blong wantem obei. Nating se ol samting we i kamaot long laef blong yu i save jenis, be Jeova mo Tok blong hem oli no save jenis. (Malakae 3:6; Jemes 1:17) Jeova i putumap hasban olsem hed. Hemia i tru oltaem, nating se hem i agri we Jisas i olsem hed blong hem, no no gat. (1 Korin 11:3) Maet i hadwok blong stanap strong oltaem tru long ol fasin blong spolem mo daonem yu, be disaepol Jemes i talem se: ‘Man we i kasem waes blong heven, hem i . . . rere blong obei.’ (Jemes 3:17) Blong luksave klia, stret wok blong hed blong famle mo blong agri blong mekem wok ya, i nidim speret blong God, antap moa, frut ya blong hem, lav.​—Galesia 5:​22, 23.

Taem yu laekem tumas wan man, i isi blong obei long hem olsem hed, folem rul we God i putumap. Efesas 5:33 i givim advaes ya se: “Man i mas laekem woman blong hem, i mas lukaotgud long hem olsem we i stap lukaotgud long bodi blong hem nomo. Mo woman i mas onagud long man blong hem.”

Tingbaot Jisas. Ol man oli tok nogud long hem mo kilim hem, be neva hem i tok agensem olgeta. Hem i soem fasin we i stretgud olgeta. (1 Pita 2:​22, 23) Blong Jisas i safa tru long ol bigfala trabol ya we oli daonem hem, hem i nidim strongfala fasin no fraet mo lav we i mekem se hem i no save lego Papa blong hem, Jeova. Man we i gat lav, “tingting blong hem i longfala long olgeta trabol.”​—1 Korin 13:​4-8, NW.

Pol i talem bakegen long Timote, we i stap wok wetem hem, mo i mekem yumi rimemba tede tu, se: ‘Speret ya we God i givim long yumi, hem i no blong mekem yumi fraet, no gat. Speret ya i blong mekem yumi gat paoa, i blong mekem yumi laekem tumas ol man, mo i blong mekem yumi naf blong holem klia tingting.’ (2 Timote 1:7) Wan lav we i dip long saed blong Jeova mo Jisas Kraes i save givim paoa long yu blong gohed blong obei long God, taem yu harem se yu no moa naf blong stanap strong. Klia tingting bambae i halpem yu blong skelemgud ol samting, mo blong tingting oltaem long fasin fren blong yu wetem Jeova mo Jisas Kraes.​—Skelem Filipae 3:​8-11.

Sam Hasban Mo Waef We Oli Soemaot Fasin Blong Obei Long God

Maet yu mas wet longtaem bifo yu luk olsem wanem bambae Jeova i stretem ol problem blong yu. Be, han blong hem i neva sot. Wan woman we i soemaot fasin blong obei long God, i givim advaes ya se, “Oltaem yu mas mekem ol samting we Jeova i givim raet mo jans long yu blong mekem​—wosipim hem long ol miting mo asembli, stadi, go long wok blong prij, mo prea.” Jeova i save blesem fasin traehad blong yu, i no jes ol wok we yu mekem nomo. Long 2 Korin 4:​17, aposol Pol i talem se ‘ol trabol ya oli no save stap longtaem. Be oli mekem yumi rere blong go joen long gudfala laef ya we i no save finis samtaem.’ Tingting dip long samting ya. Hem i wan samting we i save mekem yu yu strong. Wan waef i talem se: “Laef blong famle blong mi i no stap kamgud moa. Samtaem mi stap tingbaot se maet Jeova i no glad long mi. Be, wan samting we mi luk olsem wan blesing, hemia se mi stap pastru long ol trabol ya wetem wan tingting we i moagud i winim hasban blong mi. Taem yumi save se fasin blong yumi i mekem Jeova i glad, samting ya i mekem se ol trabol ya oli no blong nating nomo.”

Jeova i promes se bambae hem i no save letem wan samting i traem yu, we i strong tumas long yu. Trastem hem. Hem i waes moa long yu, mo hem i save yu moa bitim we yu save yu wan. (Rom 8:​35-39; 11:33; 1 Korin 10:13) Fasin blong prea long Jeova long taem blong trabol i save halpem yu. Prea blong askem hem blong givim speret blong hem blong lidim yu, antap moa, taem yu no save wanem rod blong folem no olsem wanem blong winim wan problem. (Proveb 3:5; 1 Pita 3:12) Gohed blong askem hem blong givim longfala tingting, fasin blong no kros kwik, mo tingting daon, blong yu save obei long man we i bos long laef blong yu. Man blong raetem Ol Sam i talem se: ‘Jeova i stap lukaotgud long mi oltaem, hem i wan gudfala ples blong haed blong mi.’ (Ol Sam 18:2) Sipos olgeta we oli stap insaed long wan famle we sam memba blong hem oli no gat sem bilif, oli tingbaot samting ya oltaem, oli save kasem paoa from.

Antap long ol samting ya, yu mas traehad oltaem blong mekem mared blong yu i hapi. Yes, Jisas i talem finis se gud nyus bambae i mekem man i seraot. Be, yu mas prea se seraot i no kamaot from fasin no wok blong yu. (Matyu 10:​35, 36) Wetem mak ya long tingting blong yu, fasin blong wokgud tugeta i save mekem ol problem insaed long mared oli godaon. Nating sipos yu nomo yu stap mekem stret fasin, be samting ya i save givhan bigwan blong blokem ol problem. Bambae i mekem se i no gat bigfala rao mo fasin agens i kamaot. Longfala tingting mo lav oli impoten tumas. Yu “mas mekem i gud” long narafala, mo ‘tingting blong yu i mas longfala.’​—2 Timote 2:24.

‘Long fes blong olgeta defrenkaen man,’ aposol Pol i ‘mekem olsem we hem tu i gat sem fasin we olgeta oli gat.’ (1 Korin 9:22) I tru se yu mas mekemgud ol Kristin wok blong yu. Be long semtaem, maet yu nidim blong jenisim program blong yu blong spenem moa taem wetem hasban no waef blong yu mo famle blong yu. Spenem olgeta taem we yu naf blong spenem wetem hemia we yu bin jusum blong serem laef blong yu wetem hem. Soemaot Kristin fasin blong tingbaot narafala. Hemia i wan fasin blong soemaot we yumi obei long God.

Waef we i fraetgud long God mo we i stap ona long man blong hem, bambae i faenem se i moa isi blong soemaot fasin obei long God, sipos hem i no strong tumas long fasin blong hem, mo sipos hem i gat sore. (Efesas 5:​22, 23) Ol gudfala tok, ‘we i gat smol sol long hem,’ i save givhan blong mekem se i no gat tumas rao i kamaot.​—Kolosi 4:6; Proveb 15:1.

Waes blong God i givim advaes long yu se i moagud blong stretem kwiktaem wan trabol mo putumbak pis wetem ol gudfala tok we i save leftemap man, bitim we yu “stap kros” gogo kasem taem we yu go slip long naet. (Efesas 4:​26, 29, 31) Samting ya i nidim tingting daon. Yu mas dipen bigwan long Jeova blong kasem paoa. Wan Kristin waef we i gat tingting daon i talem se: “Mi bin haremsave afta we mi prea dip, se speret blong Jeova i givim paoa long mi blong soemaot lav long hasban blong mi.” Tok blong God i givim advaes ya se: “Sipos i gat man we i mekem i no stret long yufala, bambae yufala i no mekem i no stret long hem bakegen. . . . Yufala i mas holemstrong ol stret fasin blong yufala, blong winim ol fasin nogud.” (Rom 12:​17-21) Advaes ya i waes mo hem i rod blong obei long God.

Ol Pikinini We Oli Soemaot Fasin Obei Long God

Advaes blong Jeova we i go long ol pikinini we oli stap long wan famle we sam memba blong hem oli gat defren bilif, hemia se: “Oltaem yufala i mas obei long ol papa mo mama blong yufala, from we fasin ya i save mekem Masta blong yumi i glad long yufala.” (Kolosi 3:20) Makem se vas ya i tokbaot Masta Jisas Kraes. Taswe, i no papa mama blong yu nomo we yu mas obei long olgeta. Long wan fasin, tok blong Ol Wok 5:​29, blong ‘obei long God, i no long man nomo,’ i go long ol Kristin yangfala tu. Samtaem bambae yu mas mekem wan disisen we i stanap long wanem we yu save se i stret folem Baebol. Maet yu kasem panis from disisen blong yu blong no joen long wan kaen gyaman wosip. Nating se samting ya i mekem yu yu harem nogud, yu save haremgud mo glad se yu stap safa from we yu mekem samting we i stret long ae blong God.​—1 Pita 2:​19, 20.

From we ol rul blong Baebol oli stap lidim tingting blong yu, maet yu gat defren tingting long papa mama blong yu long sam samting. Samting ya i no mekem se tufala i olsem enemi blong yu. Nating se oli no bin givim laef blong olgeta long Jeova blong mekem wil blong hem, be i stret blong ona long olgeta. (Efesas 6:2) Solomon i talem se: “Yu mas lesin long ol tok blong stret papa blong yu, mo yu no mas daonem mama blong yu.” (Proveb 23:22) Traem kasem save long filing blong olgeta. Oli harem nogud, from we yu folem wan bilif we, long tingting blong olgeta, i narakaen. Toktok wetem olgeta, mo ‘soemaot se yu yu kwaet man.’ (Filipae 4:5) Serem ol filing mo wari blong yu. Yu mas strong blong folem ol loa blong God, be tu, ‘long saed blong yu, yu mas traehad tumas blong yu gat pis wetem olgeta man.’ (Rom 12:18) From we yu obei long papa mama blong yu, samting ya i soemaot long Jeova se yu wantem gohed blong obei, olsem wan man blong stap aninit long rul blong Kingdom.

?Ol Narafala Oli Save Mekem Wanem?

Ol Kristin we oli stap long wan famle we sam memba blong hem oli no Kristin man, oli nidim we ol narafala Kristin oli sapotem mo kasem save long olgeta. Yumi luk pruf blong samting ya long tok blong wan man we i talem se: “Mi filim se mi no naf long wan samting mo mi no gat sapot, from we i no gat wan samting we ol narafala man oli save mekem, mo i no gat wan samting we mi save mekem blong jenisim bisnes ya. Mi mi stap trastem Jeova blong mekem wil blong hem i kamtru long famle blong mifala, wanem samting we hem i wantem.”

Fasin blong joen tugeta wetem ol brata mo sista long saed blong speret long ol Kristin miting, hem i olsem wan ples blong haed. Semfala woman we i toktok antap, i tokbaot laef blong hem olsem “tu defren wol. Mi stap long wan long tufala wol ya, from we mi mas stap long hem, be mi laekem moa taem mi stap long narawan.” Lav blong ol brata i givhan long olgeta we oli kasem trabol olsem, blong stanap strong mo gohed blong wok tru long enikaen trabol. Tingbaot olgeta long ol prea blong yu. (Efesas 1:16) Evritaem, long evri jans we yu gat, talem ol tok we oli leftemap tingting, tokbaot ol gudfala samting, mo mekem olgeta oli haremgud. (1 Tesalonaeka 5:14) Long stret taem mo taem i nidim blong mekem olsem, tekem olgeta wetem yu long ol defren tiokratik wok blong yu mo taem yu joen wanples wetem ol narafala.

Ol Blesing Mo Frut We i Kamaot From Fasin Obei Long God

Tingting dip evri dei long ol blesing mo frut we i kamaot from fasin blong obei long God insaed long wan famle we sam memba blong hem oli gat defren bilif. Wok had long fasin blong obei. ‘Yu no mas lego.’ (Galesia 6:9) Fasin blong stanap strong tru long ol nogud taem mo fasin agens we yu kasem, ‘be i no from samting we yu mekem . . . hemia God bambae i blesem yu from.’ (1 Pita 2:​19, 20) Folem fasin obei insaed long famle, be no bitim mak we yu daonem ol stret loa mo rul blong Jeova. Olsem nao, yu soemaot se yu stap holemstrong long plan we Jeova i stanemap. Ol fasin blong yu we oli laenap wetem tingting blong God, maet oli sevem laef blong hasban no waef blong yu, pikinini no papa mama blong yu.​—1 Korin 7:16; 1 Pita 3:1.

Taem yu stap traehad blong winim ol traem mo mekem ol samting we oli stret insaed wan famle we sam memba blong hem oli gat defren bilif, rimemba se hem i impoten tumas blong stap tru oltaem long Jeova God mo Jisas Kraes. Yu save lego prapa tingting blong yu long plante samting. Be sipos yu lego fasin blong stap tru long God, nao yu lego evri samting, wetem laef tu. Aposol Pol i talem se: “Kolosap taem blong wol i finis, [God] i yusum Pikinini blong hem blong tok long yumi. Pikinini ya, hem i wok blong God fastaem, taem God i mekem olgeta samting we i stap long wol. Mo God i jusumaot hem finis, blong bambae, taem wol ya i finis, be olgeta samting ya blong wol oli blong hem nomo.” Sipos yu luksave “rod ya we God i yusum blong sevem yumi, we i gud tumas,” samting ya bambae i mekem yu yu strong blong obei.​—Hibrus 1:​1, 2; 2:3.

Strong tingting blong yu blong folem oltaem ol stret fasin mo rul long laef, bambae i lukaotgud long yu mo hasban no waef blong yu we i no bilif. Fasin blong stap tru insaed long famle, hem i save mekem famle i joengud tugeta. Proveb 31:11 i talem, long saed blong wan gudfala waef we i stap tru oltaem, i se: “Hat blong man blong hem i trastem hem.” Ol klin fasin mo bigfala respek blong yu oli save wekemap tingting blong hasban blong yu we i no bilif. Maet samting ya i save lidim hem blong bilivim trutok blong God.

Fasin obei long God, hem i wan gudfala samting tumas mo i save sevem laef blong yu. Prea blong askem se fasin ya i stap insaed long famle blong yu. Frut blong hem se, bambae yu gat pis long tingting blong yu mo yu givim ona long Jeova.