Wan Kwestin
Taem God i jusum ol memba blong faswan hed kampani, evriwan oli blong sem kala mo sem kantri nomo—oli man Jyu. ?Olsem wanem? ?Hem i tinghae moa long wan nesen bitim narafala nesen?
No gat. Olgeta we Jisas i singaot olgeta fastaem olsem ol disaepol blong hem, oli ol man Jyu. Biaen, long Pentekos long yia 33 K.T., ol man Jyu mo ol proselaet we oli joen wetem ol man Jyu blong wosip, oli ol faswan man we tabu speret i makemaot olgeta, nao oli blong grup ya we bambae oli rul wetem Kraes long heven. Biaen nomo, ol man Sameria mo ol Jentael we oli no sakomsaes be oli jenisim bilif blong olgeta, oli jes gat jans blong kam insaed long grup ya. Taswe, yumi kasem save from wanem ol memba blong hed kampani long taem ya, oli ol man Jyu, ‘ol aposol mo ol elda long Jerusalem,’ olsem Ol Wok 15:2 i talem. Hemia ol man we oli gat moa save long Baebol, mo oli gat ekspiryens blong plante yia finis long trufala wosip. Long ol yia ya, oli gat taem blong wokem ol fasin blong man we i bigman long saed blong speret, blong oli save kam ol Kristin elda.—Skelem wetem Rom 3:1, 2.
Long taem blong miting blong hed kampani we Ol Wok japta 15 i tokbaot, plante Jentael oli kam Kristin finis. Sam long ol man ya oli kamaot long Afrika, Yurop, mo ol narafala ples. Be, i no gat wan tok we i soem se wan long ol Jentael ya i kam memba blong hed kampani blong pulum ol man we oli no man Jyu oli kam long Kristin Skul. Nating se ol Jentael ya we oli jes kam Kristin oli sem mak long ol memba blong “Isrel blong God,” oli respektem ol Kristin we oli man Jyu, olsem ol aposol, we oli memba blong hed kampani long taem ya, from we oli bigman long saed blong speret mo oli gat moa ekspiryens. (Galesia 6:16) Long Ol Wok 1:21, 22, makemgud olsem wanem ol narafala oli tinghae long ekspiryens blong olgeta.—Hibrus 2:3; 2 Pita 1:18; 1 Jon 1:1-3.
Long plante handred yia, nesen blong Isrel i spesel long ae blong God. Mo Jisas i jusumaot ol disaepol blong hem long nesen ya. I no wan mastik mo i no rong, we i no gat sam aposol oli kam long ol ples we naoia oli kolem Saot Amerika no Afrika no ol ples farawe long Is. Biaen, ol man mo woman long ol ples ya oli gat jans blong mekem ol wok we oli bigfala moa, i bitim wok blong ol aposol long wol, ol memba blong hed kampani long faswan handred yia, mo ol narafala wok long medel blong ol man blong God tede.—Galesia 3:27-29.
Wan aposol i talem se: “God i stap mekem i sem mak nomo long olgeta man. Hemia wan trutok ya. Sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan man Isrel, no i kamaot long wan narafala laen olgeta.” (Ol Wok 10:34, 35) Yes, yumi evriwan i save kasem blesing from ransom blong Kraes, we i no gat fasin blong mekem i defren long wan no long narawan. Mo wanwan man we oli kamaot long evri laen mo long evri lanwis mo long evri kantri, bambae oli stap insaed long Kingdom blong heven mo insaed long bigfala hif blong man we bambae oli laef foreva long wol.
Plante man, oli harem nogud long kala, lanwis, mo nesen blong narafala. Yumi luk samting ya taem yumi ridim Ol Wok 6:1 long saed blong wan problem we i mekem wan rao i kamaot bitwin ol Kristin we oli toktok lanwis Gris mo olgeta we oli toktok lanwis Hibru. Maet yumi gruap long wan ples we ol man oli gat tingting agensem ol man blong narafala lanwis, kala, kantri, no maet agensem ol woman olsem wan grup no ol man olsem wan grup. No maet yumi kasem ol tingting ya from ol man raonabaot long yumi naoia. From we samting ya i save hapen isi nomo, i gud yumi rili traehad blong letem tingting blong God i lidim ol filing mo fasin blong yumi. Tingting blong Hem se, olgeta man oli sem mak nomo long fes blong hem, nomata yumi kam long wanem laen no kantri. Taem God i pusum ol man blong raetemdaon ol gudfala fasin we ol elda mo ol man blong givhan oli mas gat, hem i no tokbaot kala mo kantri blong olgeta. No gat. Hem i tokbaot ol gudfala fasin long saed blong speret, blong ol man we maet oli save mekem wok ya. Tede, samting ya i sem mak long saed blong ol elda long kongregesen, ol elda we oli goraon blong visitim ol kongregesen, mo ol brata we oli lukaot long branj, olsem we i sem mak long hed kampani blong faswan handred yia.