Ol Wetnes Blong Jeova Raonabaot Long Wol—Brasil
BRASIL i wan bigbigfala kantri, long plante defren fasin. Long saed blong saes blong hem mo namba blong ol man we oli stap long hem, hem i namba faef kantri long wol. Hem i kavremap kolosap stret haf blong graon blong Saot Amerika. Mo hem i gat moa man i stap long hem, i bitim ol narafala kantri blong Saot Amerika tugeta. Mo tu, Brasil i gat wan dak bus we i bigwan moa i bitim ol narafala ples long wol. Tru long dak bus ya, i gat wan bigfala reva i ron. Hem i bigwan moa i bitim ol narafala reva blong wol—hemia Reva blong Amason.
Mo Brasil i bigfala kantri long wan narafala fasin tu. Naoia, namba blong ol man we oli talemaot gud nyus blong Kingdom blong God, kolosap i kasem 400,000. Las yia, i gat bitim wan milyan man oli kam long Memoriol blong ded blong Kraes. Taswe, kantri ya i bigwan we i bigwan long saed blong wok blong talemaot Kingdom. Sam ekspiryens we oli kamaot i no longtaem i pas, oli soemaot samting ya.
Wok Long Ples We i Gat Moa Nid
Antonio mo woman blong hem, tufala i mekem wan strong disisen blong livim ol famle blong tufala, mo wan wok we oli kasem gudfala pei long hem, long taon blong Sao Polo. Mo tufala i go wok long ples we i nidim moa man blong talemaot Kingdom, long eria blong Mina Gerai. Long ples we tufala i wok long hem, i gat wan grup blong man we oli wok long faktri blong sugaken. Long faswan dei we tufala i prij long ples ya, tufala i statem naen Baebol stadi. !Long 18 manis nomo, tufala i stap mekem bitim 40 stadi!
Fastaem, oli stap mekem ol miting insaed long faktri blong sugaken. Be, ol nyufala pablisa oli wantem luk wan trufala Haos Kingdom. Taswe, oli rentem wan bas blong karem 75 man i go long wan kongregesen we i stap kolosap. Biaen, oli gat wan asembli. I gat 45 long ol nyufala Baebol studen oli kam. Long wan haf blong program, wan brata i singaot olgeta blong go antap long platfom, nao hem i askem ol kwestin long olgeta. Feftin blong olgeta oli baptaes long asembli ya. !I no nid blong talem, we i gat plante wora blong ae i ron from glad!
Oli yusum semfala kampani blong bas ya blong mekem sam narafala trep olsem, mo ol bos blong kampani ya oli mekem spesel praes blong olgeta. Blong soemaot fasin tangkyu, Antonio i givim wan buk we i tokbaot Baebol, olsem wan presen, long bos blong kampani ya. Hem i agri blong stat blong stadi Baebol long sem naet ya, mo hem i baptaes sam manis biaen, afta we hem i gohed gud long stadi blong hem. Fastaem, waef blong hem i agensem stadi ya, be biaen, tingting blong hem i jenis. Naoia, hem tu i wan Wetnes blong Jeova we i baptaes finis.
Long Febuwari 1992, wan kongregesen blong 22 pablisa we oli wok strong, i stat. Long 1994, namba ya i kam antap kasem 42, wetem 4 fultaem paenia, hemia ol man we oli talemaot gud nyus fultaem. From samting ya, Antonio i talem se: “Mi mo waef blong mi, mitufala i luksave se sipos yumi ‘testem Jeova’ olsem Malakae 3:10 i talem, bambae hem i givim ‘ol blesing long yumi gogo yumi no moa sot long wan samting.’ ”
Seremaot Ol Buk We Oli Tokbaot Baebol
Ating wan narafala samting we i mekem wok blong prij i gohed bigwan long Brasil, hemia fasin blong ol Wetnes blong givimaot ol buk we oli stanap long Baebol, long evri jans we oli kasem. Eksampel, wan kongregesen i raet i go long branj ofis blong Watch Tower Sosaeti, blong askem 250 kopi blong buk ya, Questions Young People Ask—Answers That Work. ?From wanem oli askem plante olsem?
Leta ya i eksplenem se: ‘Wan long olgeta skul blong pikinini long taon ya, i mekem disisen blong yusum buk ya blong tijim ol pikinini long ol klas. Disisen ya i kamaot from we sam papa mama blong ol studen we oli Wetnes blong Jeova, oli tekem evri jans blong givim wetnes, mo wan bos blong skul tu. Jeova bambae i gohed blong blesem ol man blong hem, taem oli stap givimaot ol buk ya we oli fulap long ol gudfala advaes.’ Yes, mo Jeova bambae i gohed blong blesem wok blong talemaot Kingdom we i stap gru bigwan long bigfala kantri ya Brasil.
[Bokis blong pija long pej 8]
LUKLUK LONG OL NAMBA BLONG KANTRI YA
1994 Sevis Yia
BIGFALA NAMBA BLONG OLGETA WE OLI STAP PRIJ: 385,099
SKELEM: 1 Wetnes long 404 man
NAMBA BLONG OL MAN WE OLI KAM LONG MEMORIOL: 1,018,210
MEDEL NAMBA BLONG OL PAENIA: 38,348
MEDEL NAMBA BLONG OL BAEBOL STADI: 461,343
NAMBA BLONG OL MAN WE OLI TEKEM BAPTAES: 24,634
NAMBA BLONG OL KONGREGESEN: 5,928
BRANJ OFIS: SESÁRIO LANJ
[Tok blong pija long pej 9]
Wan trak we i gat ol laodspika long hem we oli yusum blong talemaot gud nyus long Sao Polo long yia 1940
[Tok blong pija long pej 9]
Wok blong prij long Bigfala Garen long Rio de Janero
[Tok blong pija long pej 9]
Branj ofis long Sesario Lanj