?Olsem Wanem Yu Save Laef Long Wan Eria We i Denja Tumas?

MARIA i talem se: “Oltaem, mi mi stap seksek. Mi fraet taem mi stap long eleveta.a Mi fraet taem mi stap long trak blong mi. Mi fraet taem mi stap long ren haos blong mi. Long evri ples, i gat fasin blong brekem loa. Oltaem, ol stilman oli stilim olting blong narafala man.” ?Yu gat filing olsem woman Brasil ya? ?Yu fraet taem yu stap long eria blong yu, antap moa long naet?

Maet man i haremgud taem hem i ridim ol store olsem wanem ol polis oli faenemaot mo kasem ol man nogud. Be plante taem, samting we i tru se, i no gat wan hapi risal i kamaot. Maet polis i no save faenemaot hu i bin mekem wan rabis fasin blong brekem loa. Sipos hem i bin kilim wan man i ded, ol famle blong man ya oli mas gohed blong laef we oli no gat hasban, papa, no pikinini boe, no oli no gat waef, mama, no pikinini gel. ?Olsem wanem long ples blong yu? ?Fasin blong kilim man i stap kam antap? ?Yu yu wantem stap long wan kwaet ples we yu mo famle blong yu, yufala i sef? Sipos yu mas stap long wan ples we i fulap long fasin blong brekem loa, mo lukaot long ol pikinini blong yu long ples ya, ?yu save mekem wanem blong stap laef?

I tru, i gat sam taon yet we ol ripot oli soem se, smol namba blong man nomo oli stap mekem fasin blong brekem loa. Long plante kantri, ol man oli stap laef long ol ples afsaed long taon we oli kwaet yet, no long ol velej we oli no gat trabol. Be ol samting oli stap jenis kwiktaem nomo. Ol jenis ya oli kamaot tu, long ol ples we bifo, ol man oli tingbaot olsem ples we i no gat fasin blong brekem loa. Eksampel, long Brasil, 50 yia bifo, 70 pesen blong olgeta man, oli laef afsaed long taon. Be naoia, 70 pesen oli laef insaed long ol taon. Samting ya i givim jans long olgeta blong kasem wok, be tu i mekem se ol trabol oli kam antap moa long ol taon ya, olsem fasin blong brekem loa mo kilim man. Nating sipos eria blong yu i denja no i no denja, yu mas go long wok mo long skul, mo yu mas mekem plante samting afsaed long haos.

Wan jif blong ol polis long Rio de Janero we naoia i luksave “ol saen blong soem fasin fraet” long plante man, i talem se stampa blong samting ya, hemia fasin blong plante man we oli mekem i no stret long narafala, mo tu, ol grup we oli mekem fasin blong brekem loa olsem we i prapa wok blong olgeta. Hem i ting se ol nyuspepa mo televisin tu, oli mekem fasin fraet ya i kam bigwan moa, taem oli “fulumap tingting blong ol man wetem ol nogud nyus we oli mekem man i fraet.” Fasin blong yusum drag, famle i seraot, mo fasin blong ol skul blong givim nogud tijing long ol man, oli mekem se fasin blong brekem loa i stap kam antap. ?Mo wanem bambae i kamaot long fyuja? ?Ol fasin blong faet, we ol buk mo sinema oli mekem i luk olsem nating nomo taem oli soem olsem pleplei, bambae oli mekem se ol man oli no moa gat filing long ol narafala? ?Olsem wanem long ol ples we i no gat fasin blong brekem loa? ?Bambae oli kam denja tu?

Fasin blong kilim man i mekem hemia we i kasem i harem nogud, taswe yumi wantem tumas blong stap sef. Yumi no sapraes se ol man oli wantem we moa polis oli wok long ol taon, mo oli wantem se ol nogud man ya oli stap moa yia long kalabus, no oli wantem we oli kilim olgeta i ded blong panisim olgeta. Samfala oli pem wan masket blong yusum sipos oli nidim, nating se samting ya i save mekem denja long olgeta bakegen. Sam narafala, oli wantem se gavman i blokem fasin blong salem masket. Be yumi no nidim blong harem nogud tumas long ol nogud nyus ya se fasin blong brekem loa i kam antap. Plante man we oli laef long ol bigfala taon olsem Joanesbeg, Meksiko Siti, Nyu Yok, Rio de Janero, mo Sao Polo, neva ol stilman oli stilim olting blong olgeta. I gud yumi luk wanem we ol man oli mekem taem oli stap long ol eria we oli denja.

Holemtaet Wan Gudfala Tingting

Long saed blong wan ples we i fulap long fasin blong brekem loa, wan man blong raetem buk i tokbaot “nambawan waes mo strong tingting blong gohed nomo, we plante taosen man Brasil oli gat. Oli faenem rod blong laef long fasin we i gat ona mo wetem respek, nating se ples blong olgeta i had yet.” Afta we Jorge i stap 38 yia long Rio de Janero, hem i talem se: “I gat sam rod long taon mo sam eria we mi no go long olgeta mo mi no wantem go luk blong faenemaot wanem i stap kamaot long ol ples ya. Mo tu, mi no wokbaot long taon let long naet, mo mi no soem se mi fraet tumas. Mi stap lukaotgud, be mi traem tingbaot ol man olsem we oli gat stret fasin. Mi soem ona mo respek long olgeta.”

Yes, blokem ol trabol we yu no nid blong kasem. Yu no mas pusum nus blong yu long bisnes blong narafala. Yu no mas ting nating long trutok ya se fasin blong fraet bitim mak i save mekem i nogud long bodi blong yu. Mo i save pusum man blong mekem wan krangke samting, nating se hem i wan gudfala man. Odair i tokbaot wok blong hem long ol ples we oli denja, i se: “Mi traem blong gat gudfala tingting. Mi no tingting wetem fraet long ol nogud samting we maet oli save hapen, from we sipos mi mekem olsem, bambae mi wari mo mi seksek blong nating. Mi traem blong soem respek long evri man.” Man ya i lukaotgud mo i stap longwe long olgeta we hem i luk se oli no gat gudfala fasin. Be hem i talem wan narafala samting bakegen we i save halpem wan man blong bos long ol filing blong hem. Hem i se: “Antap long ol samting ya, mi wokem fasin blong trastem Jeova God. Mi rimemba se i no gat wan samting we hem i no luk. Mo evri samting we i hapen, hem i letem.”

Be, i no gat wan man we i laekem blong laef oltaem wetem fraet. Mo tu, ?hu i save talem se fasin blong fraet mo wari bitim mak, i no save spolem filing mo helt? Taswe, ?wanem hop blong olgeta we oli fraet oltaem se man i save kam kilim olgeta? From we plante man oli fraet se fasin blong brekem loa bambae i kam moa nogud yet long fyuja, ?yu ting se bambae yumi luk wan taem we fasin blong brekem loa i finis? Mifala i askem yu blong ridim haf we i kam biaen: “?Bambae Fasin Fraet i Finis Wetaem?”

[Futnot]