Lav i Save Winim Fasin Jelas We i No Stret

‘Man we i gat lav i no save jelas.’​—1 KORIN 13:4.

1, 2 (a) ?Jisas i talem wanem long ol disaepol blong hem long saed blong lav? (b) ?Yumi save gat lav mo fasin jelas tugeta, mo from wanem yu ansa olsemia?

LAV i wan samting we i makemaot trufala skul. Jisas Kraes i talem se: “From we yufala i stap laeklaekem yufala, bambae olgeta man oli luksave se yufala i man blong mi.” (Jon 13:35) Aposol Pol i kasem tabu speret blong God blong eksplenem olsem wanem lav i mas gat paoa long fasin joengud blong ol Kristin man. Antap long ol narafala samting, hem i raetem se: ‘Man we i gat lav i no save jelas.’​—1 Korin 13:4.

² Taem Pol i raetem ol tok ya, hem i stap tokbaot fasin jelas we i no stret. Sipos no, hem i no save talem long semfala kongregesen se: ‘Mi mi jelas long yufala wetem fasin jelas we i kamaot long God.’ (2 Korin 11:2) Fasin ‘jelas ya we i kamaot long God’ i kam strong long hem from sam man insaed long kongregesen we nogud fasin blong olgeta i stap spolem kongregesen. Samting ya i pusum Pol blong raetem namba tu leta blong hem, long paoa blong tabu speret, mo sanem i go long ol Kristin long Korin. Long leta ya, hem i givim plante advaes wetem fasin lav.​—2 Korin 11:​3-5.

Fasin Jelas Long Medel Blong Ol Kristin

3. ?Wanem problem long saed blong fasin jelas i kamaot long ol Kristin blong Korin?

³ Long faswan leta blong Pol long ol man Korin, hem i stretem wan trabol we i stap blokem ol nyufala Kristin ya blong joengud tugeta. Oli stap leftemap sam man i hae moa long ol narafala. Oli ‘stap tok flas from man we oli biaen long hem, be oli stap luk ol narafala man olsem nating nomo.’ Samting ya i mekem fasin seraot i kamaot insaed long kongregesen. Samfala oli stap talem se: “Mi blong Pol,” mo sam i stap talem se: “Mi blong Apolos,” mo sam narafala bakegen i stap talem se: “Mi blong Pita.” (1 Korin 1:12; 4:6) Tabu speret blong God i lidim aposol Pol blong faenemaot stampa blong trabol ya. Ol Kristin ya long Korin oli stap mekem fasin olsem ol man blong wol we oli tingting long saed blong bodi nomo, i no olsem ‘ol man blong speret blong God.’ Taswe, Pol i raetem se: “Yufala i stap holem fasin blong ol man blong wol. Taem we yufala i stap jelas, mo yufala nomo i stap rao wetem yufala, i klia we yufala i man blong wol nomo. Yufala i olsem ol narafala man nomo.”​—1 Korin 3:​1-3.

4. ?Pol i yusum wanem pijatok blong halpem ol brata blong hem blong gat stret tingting long ol narafala, mo yumi lanem wanem samting from?

⁴ Pol i halpem ol man Korin blong kasem stret tingting long saed blong save mo gudhan blong wok we samfala insaed long kongregesen oli gat. Hem i askem se: “?Weswe? ?Yufala i hae moa long ol narafala man? ?Yufala i gat sam samting blong yufala we God i no givim long yufala? !No gat! ?Be weswe yufala i stap tok flas from ol samting ya we God i givim long yufala olsem we oli blong yufala fastaem?” (1 Korin 4:7) Long 1 Korin japta 12, Pol i eksplenem se olgeta we oli insaed long kongregesen, oli olsem ol defren haf blong bodi blong man, olsem han, ae, mo sora. Hem i talem se God i mekem ol haf blong bodi long wan fasin we olgeta wanwan oli lukaotgud long ol nara haf. Pol i raetem tu se: “Sipos man i presem wan haf blong bodi blong mi, be bambae olgeta bodi blong mi i mas harem gud.” (1 Korin 12:26) Olgeta man blong God tede oli mas folem advaes ya long fasin blong olgeta blong joengud. Bitim we yumi jelas from wan spesel wok we narafala i kasem, no from ol samting we hem i mekem long wok blong God, yumi mas glad wetem hem.

5. ?Jemes 4:​5 i tokbaot wanem, mo olsem wanem Baebol i soemaot se ol tok ya i tru?

⁵ Tru tumas, i moa isi blong talem samting ya bitim we yumi mekem. Jemes, we i raetem wan haf blong Baebol, i talem bakegen long yumi se, ‘fasin blong jelas long narafala we i gat moa jans bitim yumi,’ i stap long olgeta sinman. (Jemes 4:5) Ken we i faswan blong kilim narafala man i ded, i mekem olsem from we hem i letem fasin jelas we i no stret i lidim hem. Ol man Filistaen oli mekem trabol long Aesak from we oli jelas nogud long hem from plante samting we hem i gat. Rejel i jelas long sista blong hem we i stap karem plante pikinini. Ol pikinini boe blong Jekob oli jelas from we hem i laekem tumas smol brata blong olgeta, Josef. I klia se Miriam i jelas long woman blong brata blong hem we i no blong Isrel. From nogud fasin jelas, Kora, Detan, mo Abiram oli joen blong mekem wan plan agensem Moses mo Eron. King Sol i kam jelas long Deved taem hem i lidim ami blong hem blong winim plante faet. Mo tu, i sua se fasin jelas i pulum ol disaepol blong Jisas blong raorao oltaem se weswan long olgeta i hae moa. Trutok, hemia se, i no gat wan sinman we hem i fri fulwan long ‘fasin jelas’ we i olsem wan sin.​—Jenesis 4:​4-8; 26:14; 30:1; 37:11; Namba 12:​1, 2; 16:​1-3; Ol Sam 106:16; 1 Samuel 18:​7-9; Matyu 20:​21, 24; Mak 9:​33, 34; Luk 22:24.

Insaed Long Kongregesen

6. ?Olsem wanem ol elda oli save blokem fasin jelas ya we i nogud?

⁶ Olgeta Kristin oli nidim blong lukaotgud se oli no kasem nogud fasin jelas no jelas we i no stret. Samting ya i minim bodi blong ol elda tu, we oli gat wok ya blong lukaot long ol kongregesen blong ol man blong God. Sipos wan elda i gat tingting daon, bambae hem i no save gat fasin blong traem winim ol narafala oltaem. Mo long saed blong ol narafala tu: Sipos wan elda i gat nambawan fasin blong pulum ol man blong folem gudfala plan no hem i stap givim ol nambawan tok, ol narafala oli save glad tumas long samting ya, mo oli save luk hem olsem wan blesing long kongregesen. (Rom 12:​15, 16) Maet wan brata i gohed gud, mo hem i soemaot pruf se hem i gat ol frut blong tabu speret blong God long laef blong hem. Taem ol elda oli joen wanples blong luk sipos hem i naf blong karem wok insaed long kongregesen, oli mas lukaotgud blong no mekem wan smosmol slak fasin blong hem i kam wan bigfala samting. Mo oli no mas yusum smol samting ya olsem wan eskyus blong blokem hem i no save kam wan man blong givhan no wan elda. Sipos oli mekem olsem, oli stap soem se oli no gat lav, mo oli stap mekem i strong tumas long ol narafala.

7. ?Wanem problem i save kamaot taem wan Kristin i kasem wan tiokratik wok?

⁷ Sipos wan man i kasem wan tiokratik wok no wan blesing long saed blong speret, ol narafala insaed long kongregesen oli mas lukaotgud blong no gat nogud fasin jelas. Wan eksampel, wan sista we i gat gudhan long wok blong prij, maet ol brata oli yusum hem moa bitim ol narafala sista, blong mekem ol pleplei long ol Kristin miting. Samtaem samting ya i save mekem sam narafala sista oli jelas. Maet semfala problem ya i bin kamaot long Yuodia mo Sintike long kongregesen blong Filipae. Ol woman tede we oli gat fasin jelas olsem, maet oli nidim we ol elda oli halpem olgeta blong gat tingting daon, mo blong kasem ‘wan tingting nomo we i joen long Masta blong yumi.’​—Filipae 2:​2, 3; 4:​2, 3.

8. ?Fasin jelas i save lidim man blong mekem wanem sin?

⁸ Maet wan Kristin i save we wan narafala i bin mekem wan samting we i no stret bifo. Be, naoia man ya i kasem blesing blong mekem sam wok insaed long kongregesen. (Jemes 3:2) Fasin jelas i save pulum Kristin ya blong tokbaot rong blong man ya wetem ol narafala, mo blong traem mekem i luk olsem we hem i no gat raet blong karem wok insaed long kongregesen. Samting ya i defren olgeta long lav. Man we i gat lav i ‘kavremap plante sin blong narafala.’ (1 Pita 4:8) Ol tok jelas i save spolem pis insaed long kongregesen. Disaepol Jemes i givim woning ya se: “Sipos long tingting blong yufala, yufala i stap jelas tumas, mo oltaem yufala i wantem kam hae moa long narafala man, yufala i mas no tok flas from waes blong yufala, mo yufala i mas no gyaman blong haedem ol trutok. Fasin ya i no fasin blong waes we i kamaot long heven. Hemia fasin blong waes we i kamaot long wol ya, we i blong man nomo, mo we i kamaot long Setan.”​—Jemes 3:​14, 15.

Insaed Long Famle Blong Yu

9. ?Olsem wanem ol man mo woman we oli mared oli save winim ol filing blong jelas?

⁹ Plante mared oli brokdaon from fasin jelas we i no stret. Sipos yumi no trastem hasban no waef blong yumi, yumi no gat lav. (1 Korin 13:7) Be wan narafala samting se, samtaem, maet man no woman i no luksave ol filing blong jelas we i save kamaot long hasban no waef blong hem. Wan eksampel, maet wan waef i jelas taem hasban blong hem i stap storeyan long wan narafala woman. No maet hasban i kam jelas from we waef blong hem i stap spenem plante taem wetem wan famle blong hem we i sik, blong lukaot long hem. Maet sam hasban mo waef oli harem se oli sem taem oli kasem ol filing olsem. From samting ya, maet oli no tokbaot. Be maet oli soemaot kros blong olgeta long sam narafala rod, we i mekem problem ya i kam bigwan moa. Samting we i moagud se, hasban no waef we i gat filing blong jelas, i mas storeyan mo talemaot stret ol filing blong hem. Nao, hasban no waef blong hem i mas soem se hem i kasem save long ol filing ya blong hem, mo hem i mas talem mo soemaot oltaem long hem se hem i stap laekem hem tumas. (Efesas 5:​28, 29) Maet tufala tugeta i nidim blong traem stopem ol fasin we oli mekem filing blong jelas i kamaot long narawan. Samtaem, maet wan Kristin elda i mas halpem waef blong hem blong kasem save se, hem i stap soem intres long ol narafala woman long kongregesen go kasem wan mak nomo mo long fasin we i stret, blong mekem wok blong hem olsem wan man blong lukaot long ol sipsip blong God. (Aesea 32:2) I tru, wan elda i mas lukaot blong neva mekem samting we i givim wan trufala risen long woman blong hem blong jelas. Taswe, hem i nidim fasin blong skelemgud laef blong hem, blong mekem sua se hem i stap spenem taem blong mekem mared blong hem i stap strong.​—1 Timote 3:5; 5:​1, 2.

10. ?Olsem wanem ol papa mama oli save halpem ol pikinini blong olgeta blong winim ol filing blong jelas?

¹⁰ Ol papa mama tu oli mas traem halpem ol pikinini blong olgeta blong save wanem ya fasin jelas we i no stret. Plante taem, ol pikinini oli rao, mo biaen i kam wan faet. Plante taem, stampa blong samting ya hem i fasin jelas. From we ol wanwan pikinini oli gat defren nid, ol papa mama oli no save mekem i sem mak long olgeta pikinini blong olgeta. Mo tu, ol pikinini oli mas kasem save se wanwan long olgeta oli gat ol gudfala fasin mo ol slak fasin we oli defren long ol narawan. Sipos oltaem papa mama i pulum wan pikinini blong traem kasem mak blong wan narafala pikinini, maet tufala i mekem se wan pikinini i kam jelas mo narawan i kam flas. Taswe, ol papa mama oli mas trenem ol pikinini blong olgeta blong skelem fasin blong olgeta blong kamgud moa wetem ol man long Baebol, be i no long rod we oli traem winim narafala. Baebol i talem se: “I nogud yumi tinghae tumas long yumi, no yumi traem agensem ol narafala blong winim olgeta long sam samting, no yumi stap jelas long narafala man.” I moagud we, “evri man wanwan i mas traem ol wok we hem nomo i mekem. Nao oli save makem we oli kam man olsem wanem, from ol wok blong olgeta nomo, i no from wok blong sam narafala man.” (Galesia 5:​26, NW; 6:4) Samting we i moa impoten se, ol Kristin papa mama oli mas mekem Baebol stadi oltaem wetem ol pikinini blong olgeta, blong halpem olgeta, mo blong soem long olgeta ol gud mo ol nogud eksampel we oli stap long Tok blong God.​—2 Timote 3:15.

Sam Eksampel Blong Winim Fasin Jelas

11. ?Olsem wanem Moses i givim wan gudfala eksampel we i soem rod blong blokem fasin jelas?

¹¹ Defren long ol lida blong wol we oli hanggri tumas blong kasem paoa, “man ya Moses, tingting blong hem i stap daon moa i winim ol narafala man long wol long taem blong hem.” (Namba 12:3) Taem wok ya blong lidim ol man Isrel i kam hevi tumas blong Moses i mekem hem wan, Jeova i sanem speret blong Hem long 70 narafala man Isrel, blong givim paoa long olgeta blong halpem Moses. Taem tu long ol man ya oli stat blong mekem wok olsem ol profet, Josua i harem se samting ya i no stret from we Moses nao i lida blong olgeta. Josua i wantem blokem ol man ya, be Moses we i gat tingting daon, i talem se: “?Yu yu stap gat filing blong jelas from mi? No, lego nomo, mi mi glad sipos olgeta man blong Jeova oli mekem wok olsem ol profet. Olsemia nao, bambae Jeova i putum speret blong hem long olgeta evriwan.” (Namba 11:29) Yes, Moses i glad taem ol narafala oli kasem jans blong mekem moa wok. Hem i no jelas, we i wantem pulum olgeta ona i kam long hem nomo.

12. ?Wanem samting i givhan long Jonatan blong blokem ol filing blong jelas?

¹² Wan gudfala eksampel we i soemaot olsem wanem lav i save winim ol filing we oli save pulum yumi blong gat fasin jelas we i no stret, hemia Jonatan, pikinini boe blong King Sol blong Isrel. Jonatan i gat raet blong sidaon long jea blong king afta long papa blong hem. Be Jeova i jusum Deved, pikinini blong Jese, blong kam king biaen long Sol. Plante man, sipos oli stap long ples blong Jonatan, maet oli save jelas long Deved, maet oli luk hem olsem wan enemi. Be, lav we Jonatan i gat long Deved, i blokem hem blong no letem ol filing olsem oli bos long hem. Taem Deved i harem se Jonatan i ded, hem i talem se: “Mi mi harem nogud tumas, brata blong mi Jonatan, yu yu kaen tumas long mi. Lav blong yu long mi i nambawan tumas bitim lav blong woman.”​—2 Samuel 1:26.

Ol Eksampel We Oli Nambawan Olgeta

13. ?Hu ya i nambawan eksampel olgeta long saed blong fasin jelas, mo from wanem?

¹³ Jeova God i givim eksampel we i nambawan olgeta, olsem wanem blong bos long fasin jelas, nating se fasin jelas blong hem i stret nomo. Hem i save skelem ol filing ya long fasin we i stretgud olgeta. Taem fasin jelas i pusum God blong soemaot paoa blong hem, oltaem hem i mekem folem fasin lav, stret fasin, mo waes.​—Aesea 42:​13, 14.

14. ?Wanem eksampel we Jisas i soemaot we i defren olgeta long Setan?

¹⁴ Narafala nambawan eksampel long fasin blong bos long ol filing blong jelas, hemia Pikinini blong God we hem i laekem hem tumas, Jisas Kraes. ‘Nating se fastaem hem i stap long semkaen laef olsem God,’ Jisas ‘i no tingbaot blong traem kasem moa paoa, olsem we hem i wantem kam sem mak long God, no gat.’ (Filipae 2:6) !Samting ya i defren olgeta long rod we enjel ya, we biaen i kam Devel Setan, i folem blong traem kam hae moa long ol narafala! Olsem “king blong Babilon,” Setan i jelas, hem i wantem “kam olsem Hae God nomo.” Taswe, hem i putumap hem wan olsem wan narafala god we i agensem Jeova, mo i traem winim Hem. (Aesea 14:​4, 14; 2 Korin 4:4) Setan i traem blong mekem Jisas tu i ‘bodaon, i mekem wosip’ long hem. (Matyu 4:9) Be i no gat wan samting we i naf blong pulumaot Jisas long rod we hem i stap folem wetem tingting daon, we hem i glad blong obei long rul blong Jeova. Defren olgeta long Setan, Jisas “i lego laef ya long heven mo i kam olsem wan slef nomo, mo hem i tekem bodi olsem blong ol man long wol ya. Antap moa, taem hem i stap olsem wan man nomo, hem i putum tingting blong hem i stap daon mo hem i obei gogo hem i ded, yes, ded long wan pos.” Jisas i sapotem rul blong Papa blong hem, olsem wan rul nomo we i stret. Hem i no folem nating rod blong Setan we i flas mo i jelas. From we Jisas i stap tru long God, “God i leftemap nem blong hem i go antap olgeta, mo hem i glad blong givim nem long hem we i hae moa long ol narafala nem, blong olgeta we oli stap long heven mo olgeta we oli stap long wol mo olgeta we oli stap aninit long graon, oli nildaon long nem ya blong Jisas. Mo evri tang i mas talemaot klia we Jisas Kraes i Masta, blong leftemap nem blong God, we i Papa blong yumi.”​—Filipae 2:​7-11, NW.

Bos Long Fasin Jelas Blong Yu

15. ?From wanem yumi mas lukaotgud blong bos long ol filing blong jelas?

¹⁵ Defren long God mo Kraes, ol Kristin oli no stretgud olgeta. From we oli gat sin, samtaem oli mekem sam fasin we oli kamaot from fasin jelas ya we i wan sin. Bitim we yumi letem fasin jelas i pusum yumi blong tok agensem wan narafala man blong bilif, from wan smol rong nomo no from wan samting we yumi ting se hem i mekem rong, i impoten we yumi tingting dip long ol tok ya we i kamaot from tabu speret blong God: “I nogud yu kam stret tumas, we yu bitim mak blong stret fasin. Mo i nogud yu kam waes tumas, we yu bitim mak blong waes. ?Weswe yu yu spolem yu wan olsemia?”​—Eklesiastis 7:16.

16. ?Wanem gudfala advaes long saed blong fasin jelas i kamaot long wan haf blong magasin ya bifo finis?

¹⁶ Long saed blong fasin jelas, Wajtaoa (Engglis), blong Maj 15, 1911, i givim woning ya se: “I tru se yumi mas gat strong tingting, mo yumi mas jelas long saed blong ol wok blong Masta. Be yumi mas lukaotgud se samting we yumi luk olsem wan slak fasin long narafala, i no wan samting we i bisnes blong hem nomo; mo yumi mas tingbaot sipos yumi stap ‘pusum nus blong yumi’ long bisnes blong hem nomo. Mo tu, yumi mas tingbaot sipos bisnes ya i wan samting we ol elda oli mas stretem no no gat, mo sipos yumi gat nid blong go luk ol elda no no gat. Yumi evriwan i mas gat bigfala fasin jelas long saed blong Masta mo wok blong Masta, be lukaotgud se hem i no fasin jelas we i rabis . . . hemia i minim se, yumi mas suagud se yumi no jelas long narafala, be yumi jelas from narafala. Yumi mas wantem mekem i gud long hem mo halpem hem blong gat wan nambawan laef.”​—1 Pita 4:15.

17. ?Olsem wanem yumi save stap longwe long ol sin we fasin jelas i save lidim yumi blong mekem?

¹⁷ ?Olsem wanem yumi ol Kristin, yumi save ronwe long flas fasin, fasin jelas, mo fasin blong harem nogud long narafala from hem i gat moa jans bitim yumi? Ansa i stap long fasin ya blong letem tabu speret blong God i wok fulwan long laef blong yumi. Wan eksampel, yumi mas prea blong askem God blong givim tabu speret blong Hem mo blong halpem yumi blong soemaot ol gudfala frut blong speret ya. (Luk 11:13) Yumi mas kam long olgeta Kristin miting, we oli stat wetem prea mo we speret mo blesing blong God i stap long olgeta. Mo tu, yumi mas stadi Baebol, we ol tok blong hem oli kamaot long God fastaem. (2 Timote 3:16) Mo yumi mas joen long wok blong talemaot Kingdom we i stap gohed from paoa blong tabu speret blong Jeova. (Ol Wok 1:8) Wan narafala rod blong letem speret blong God i gat paoa long yumi, hemia blong halpem ol narafala Kristin we oli stap harem nogud from sam samting we i bin hapen long olgeta. (Aesea 57:15; 1 Jon 3:​15-17) Sipos yumi wok wetem strong tingting blong mekem olgeta Kristin wok ya, bambae yumi naf blong blokem ol sin we yumi save foldaon long olgeta from fasin jelas. Tok blong God i talem se: ‘Sipos tabu speret i stap lidim yufala, bambae yufala i no stap mekem ol samting ya we tingting blong yufala nomo i wantem.’​—Galesia 5:16.

18. ?From wanem faet we yumi gat agensem ol filing blong jelas we oli no stret bambae i no gohed blong olwe?

¹⁸ Lav, hem i faswan long olgeta frut blong tabu speret blong God. (Galesia 5:​22, 23) Sipos yumi mekem lav i wok long laef blong yumi, bambae samting ya i halpem yumi naoia blong blokem olgeta fasin we oli save pulum yumi blong mekem sin. ?Be olsem wanem long fyuja? Plante milyan man blong wok blong Jeova oli gat hop blong laef long Paradaes long wol long fyuja, we long ples ya, oli save kam stretgud olgeta. Long nyufala wol ya, lav bambae i stap long olgeta ples. Bambae ol man oli no moa save foldaon long sam filing blong jelas we oli no stret. ‘Ol samting we God i mekem, bambae oli fri oli no moa slef blong fasin rotin, mo bambae oli save kasem gudfala fasin fri, we i blong ol pikinini blong God.’​—Rom 8:21.

Ol Poen Blong Tingting Dip Long Olgeta

◻ ?Pol i yusum wanem pijatok blong halpem yumi blong agensem fasin jelas?

◻ ?Olsem wanem fasin jelas i save spolem pis insaed long kongregesen?

◻ ?Olsem wanem ol papa mama oli save trenem ol pikinini blong olgeta blong winim fasin jelas?

◻ ?Olsem wanem yumi save stap longwe long ol sin we fasin jelas i save pulum yumi blong mekem?

[Tok blong pija long pej 16]

Yumi no mas letem fasin jelas i spolem pis long kongregesen

[Tok blong pija long pej 17]

Ol papa mama oli save trenem ol pikinini blong olgeta blong winim ol filing blong jelas