Wan Promes Se Bambae Laef i Kam Moagud

?YU YU wantem kam fri long olgeta trabol we oli mekem laef i had tumas? ?Yu yu wantem stap long wan wol we laef blong yu i gud, olsem pija we i stap long fored mo biaen blong buk ya i soemaot? Luklukgud long pija ya. Ol man oli gat plante kakae. Oli stap haremgud long ol gudfala kakae ya. Evriwan oli glad. Ol man blong ol defren kala oli stap joengud. !Ol anamol tu oli stap long pis! I no gat faet. I no gat puaman. I no gat man i sik. Ples i naes tumas. I gat ol naesfala tri, mo wora i klingud. !Hemia i rili wan naesfala ples!

?Wol ya i save kam olsem samtaem? Yes, bambae hem i kam wan paradaes. (Luk 23:43) God, we i wokem wol ya, i gat wan stampa tingting se wol bambae i kam paradaes, ale ol man bambae oli haremgud from we laef i kam moagud. !Mo yu yu save stap long ples ya!

?Weswan Laef We Yu Yu Laekem Moa?

?Olsem wanem paradaes wol long fyuja bambae i defren long wol we yumi stap laef long hem naoia? Tede, bitim wan bilyan man oli hanggri evri dei. Be long Paradaes we God i wantem mekem long wol long fyuja, evriwan bambae oli gat plante kakae. Baebol i promes se: “Jeova blong ol ami bambae i wokem wan bigfala kakae blong olgeta man . . . Bambae i gat ol kakae we i gat oel, wetem ol olfala waen we i gud tumas.” (Aesea 25:6) Bambae ol man oli no sot long kakae, from we Baebol i talem se: “Bambae i gat plante kakae long ples ya, we ol hil oli fulapgud long ol kakae.”​—Ol Sam 72:16.

Tede, plante man oli stap laef long ol haos we oli nogud finis, no oli hadwok blong pem ren blong haos. Sam narafala oli no gat haos nating, oli slip long rod nomo. Wol Helt Ogenaesesen i talem se kolosap 100 milyan pikinini long wol oli no gat ples blong slip. Be long Paradaes long fyuja, evriwan bambae oli gat wan haos we oli save talem se i blong olgeta. Tok blong God i talem se: “Ol man bambae oli wokem ol haos, mo bambae oli save stap long olgeta. Mo bambae oli planem rop ya we oli mekem waen long frut blong hem mo bambae oli kakae frut blong hem.”​—Aesea 65:21.

Tede, plante man oli no laekem wok blong olgeta. Oli wok had long plante haoa, be oli kasem smol pei nomo. Samwe long 1 long evri 5 man long wol oli kasem pei we i daon moa long $500 (50,000 VT) long wan yia. Be, long Paradaes long fyuja, ol man bambae oli glad long wok blong olgeta. Bambae oli luk ol gudfala frut we i kamaot long wok ya. God i promes se: “Olgeta man ya we mi mi jusumaot, bambae oli yusumgud ol samting ya we han blong olgeta i wokem. Bambae oli no hadwok blong nating nomo.”​—Aesea 65:​22, 23.

Naoia, ol defren kaen sik oli stap kamaot long olgeta ples. Plante man oli blaen. Sora blong samfala i fas. Sam narafala oli no save wokbaot. Be long Paradaes, bambae ol man oli no moa gat olkaen sik olsem. Jeova i talem se: “Bambae i no gat wan man ples we i save talem se: ‘Mi mi sik.’ ” (Aesea 33:24) Long saed blong olgeta we haf bodi blong olgeta i nogud, gudfala promes hemia: “Long taem ya, ae blong ol blaenman bambae i open, mo sora blong ol man we oli no save harem bambae i no moa fas. Long taem ya, man we i wokbaot nogud bambae i save klaemap olsem wan man dia, mo tang blong man we i no save toktok bambae i singaot from glad.”​—Aesea 35:​5, 6.

Tede ol man oli safa mo harem nogud, oli sore mo oli ded. Be long Paradaes long wol, olgeta samting ya bambae oli no moa stap. !Yes, ded tu bambae i lus! Baebol i talem se: “God bambae i kampani wetem olgeta . . . Hem bambae i ravemaot wora blong ae blong olgeta. Nao bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem. Ol samting ya blong bifo oli lus olgeta.”​—Revelesen 21:​3, 4.

Taswe, i klia se promes blong Jeova blong mekem wol i kam wan Paradaes, hem i minim se laef blong olgeta man bambae i kam moagud. Be, ?olsem wanem yumi save sua se samting ya bambae i kamtru? ?Wetaem bambae hem i kam, mo olsem wanem? ?Yu yu mas mekem wanem blong stap long ples ya?