Kolosap Nao​—!Bambae Laef i Kam Moagud!

TINGBAOT wan man blong talemaot weta we oltaem ol tok blong hem oli stap kamtru. Sipos long nyus long naet hem i talem se bambae i gat ren tumora, yu yu karem ambrela blong yu taem yu aot long haos long nekis moning. Yu trastem hem from we olgeta tok we hem i talem bifo oli tru. Yu tekem aksin folem ol tok we hem i talem.

Nao, ?yumi save trastem promes blong Jeova se bambae laef i kam moagud long paradaes long wol? ?Olgeta tok we hem i bin talem bifo oli kamtru? Ol profet tok we oli kamtru oli soemaot klia se tok blong Jeova i tru oltaem. Hem i wan God we i no save mestem long ol tok blong hem, oltaem oli stret mo tru. (Josua 23:14; Aesea 55:11) Olgeta promes blong Jeova God oli tru oltaem. Taswe, samtaem hem i tokbaot wan promes blong fyuja olsem we i kamtru finis. Eksampel, afta we hem i mekem promes ya blong wan nyufala wol we i no moa gat man i ded mo i krae, yumi ridim se: “Naoia olgeta samting [olgeta blesing] oli kamtru finis.” Hemia i min se, “!Oli ol trufala samting!”​—Revelesen 21:​5, 6, futnot, NW.

Yes, olgeta promes blong Jeova we oli kamtru finis, oli soemaot se yumi save trastem promes blong hem se laef blong ol man bambae i kam moagud. Be, ?wetaem bambae laef i kam moagud?

Bambae Laef i Kam Moagud​—?Wetaem?

!Kolosap nao, bambae laef i kam moagud! Yumi save bilivim samting ya, from we Baebol i talem se plante nogud samting bambae oli kamaot long wol jes bifo we Paradaes i kamtru mo laef blong ol man i kam moagud. Olgeta nogud samting ya oli stap kamaot naoia.

Wan eksampel, Jisas Kraes i talem se bambae i gat plante bigfala faet. Hem i se: “Ol man bambae oli save mekem faet long ol narafala man. Mo ol kantri bambae oli save mekem faet long ol narafala kantri.” (Matyu 24:7) Profet tok ya i kamtru finis. Stat long ol yia 1914 kasem 1945, i gat tu bigfala faet i kamaot long wol. Afta long taem ya, plante kantri oli gohed blong mekem faet agensem narafala kantri. “Evri yia, long taem blong yumi [stat long Seken Bigfala Faet Blong Wol], namba blong ol man we oli ded long ol faet i tu taem antap long namba blong ol man we oli ded long faet long ol yia 1800, mo seven taem antap long namba blong olgeta we oli ded long ol yia 1700.”​—World Military and Social Expenditures 1993.

Ol sik we oli kasem olgeta ples, oli narafala samting we i pruvum se yumi stap kolosap nomo long taem we laef bambae i kam moagud long Paradaes. Jisas i talem se bambae i gat ‘ol strong sik oli kam spolem ol man.’ (Luk 21:11) ?Profet tok ya i kamtru? Yes. Afta long faswan bigfala faet long wol, sik ya kof blong Spen i kilim i ded bitim 20 milyan man. Afta long taem ya, kansa, sik long hat, malaria, AIDS, mo sam narafala sik bakegen, oli kilim i ded plante milyan man. Long ol pua kantri, ol sik (olsem sitsitwora mo ol wom long gat), we oli kamaot taem man i dring wora we i no klin, oli mekem se plante milyan man oli ded evri yia.

Jisas i talem tu se: “Ol man bambae oli gat hadtaem blong kasem kakae.” (Matyu 24:7) Olsem faswan haf blong buk ya i talem, ol puaman long wol oli no gat naf kakae. Hemia wan narafala samting we i pruvum se kolosap nao bambae laef i kam moagud long Paradaes.

Jisas i talem se: “Bambae graon i save seksek bigfala.” (Luk 21:11) Samting ya tu i kamtru long taem blong yumi. Stat long 1914, plante handred taosen man oli ded taem graon i seksek bigwan mo i spolem plante ples.

Baebol i gohed blong talem se long ol ‘las dei,’ bambae fasin blong ol man i jenis. Bambae oli “save tingbaot olgeta nomo” mo “bambae oli wantem mane tumas.” Bambae ol pikinini “oli no save ona long papa mo mama blong olgeta.” Yes, olgeta man bambae oli “wantem tumas ol samting we oli stap harem gud long hem, i winim we oli stap laekem God.” (2 Timote 3:​1-5) ?Yu yu agri se plante man oli gat ol fasin olsem tede?

From we plante moa man oli stap mekem ol rabis samting, fasin blong brekem loa i kam antap tu. Baebol i bin talemaot samting ya. Long Matyu 24:​12 (NW), Jisas i talem se “bambae ol fasin nogud oli kam bigfala moa.” Ating yu agri se fasin blong kilim man mo brekem loa naoia i kam antap moa bitim ol yia bifo. Ol man long olgeta ples oli fraet se bambae wan man i stilim sam samting blong olgeta, i gyaman long olgeta, no i givim kil long olgeta.

Baebol i talemaot finis ol faet, ol sik we oli kasem olgeta ples, kakae i sot, graon i seksek, fasin blong kilim man mo brekem loa we i kam antap, mo ol man oli mekem nogud long ol narafala. Olgeta samting ya oli stap kamtru tede. Be maet yu yu talem se: ‘Olgeta samting ya oli bin kamaot oltaem nomo long ol yia we oli pas, ?no? ?Wanem samting i defren long taem blong yumi?’

I gat sam poen we oli impoten tumas long saed blong olgeta samting we oli stap kamaot tede. Baebol i no talem wan samting nomo, olsem kakae i sot, blong pruvum se yumi stap long taem blong en, mo se i no longtaem bambae laef i kam moagud. Ol profet tok blong Baebol long saed blong taem blong en, oli mas kamtru long ol man we oli stap laef long wan stret taem, mo we oli no wantem obei long God.​—Matyu 24:​34-39; Luk 17:​26, 27.

Antap moa, i narakaen we sam samting long profet tok blong Jisas​—olsem kakae i sot mo ol sik we oli kasem olgeta ples​—oli stap kamtru tede. ?From wanem? From we, save blong ol man blong sayens i bigwan moa bitim ol narafala taem bifo. Save long saed blong ol sik mo ol meresin i bigwan moa naoia mo i kasem plante moa ples long wol i bitim bifo. God nomo i naf blong talemaot long Tok blong hem, Baebol, se bambae i gat wan taem olsem naoia we ol sik mo kakae i sot oli no godaon, be oli kam antap moa.

Olgeta profet tok blong Baebol long saed blong taem blong en, no ‘ol las dei,’ oli stap kamtru. ?Samting ya i soem wanem long yumi? !Yes, kolosap nao bambae laef i kam moagud! Be ?samting ya bambae i kamtru olsem wanem?

Bambae Laef i Kam Moagud​—?Olsem Wanem?

?Yu ting se ol man oli save mekem Paradaes ya i kamtru? Long ol yia we oli pas kam kasem tede, i gat plante defren kaen gavman blong man. Sam long olgeta oli bin traehad blong givim ol samting we ol man oli nidim. Be, plante trabol oli stap kam antap moa. Long ol kantri we oli rij mo long ol kantri we oli pua tu, ol gavman oli traehad blong stretem ol trabol olsem fasin blong yusum drag, plante man oli no gat gudfala haos, fasin pua, fasin blong kilim man mo brekem loa, plante man oli no gat wok, mo ol faet.

Nating se ol gavman oli save stretem sam long ol trabol ya, be oli no save mekem we man i no moa sik. Mo oli no save mekem se man i no moa kam olfala mo i no moa ded. I klia se, ol man oli no save mekem wol ya i kam wan Paradaes.

Wan waes tok long Baebol i talem se: “Yufala i no mas trastem ol lida blong wol ya. Ol man ya oli no save sevem yufala.” Taswe, ?yumi mas trastem hu nomo? Baebol i ansa se: “Man we i putum tingting blong hem i stap long [God blong hem, Jeova], mo i stap lukluk long hem blong i givhan long hem, man ya bambae i harem gud.” (Ol Sam 146:​3, 5) Sipos yumi putum tingting blong yumi i stap strong long Jeova God, bambae yumi no save harem nogud.

Yumi save se Hemia we i gat naf waes mo paoa blong wokem wol, san, mo ol sta, hem i naf blong mekem wol ya i kam wan paradaes tu. Hem i save mekem se laef blong ol man i kam moa gud. Wanem samting we Jeova God i wantem mekem, hem i naf blong mekem mo bambae hem i mas mekem i kamtru. Tok blong hem i talem se: “I no gat wan samting we i strong tumas, nao God i no save mekem.” (Luk 1:37) Be, ?olsem wanem God bambae i mekem laef i kam moa gud?

Jeova bambae i yusum Kingdom blong hem blong mekem laef blong ol man i kam moa gud. ?Mo wanem ya Kingdom blong God? Hem i wan trufala gavman wetem King we God i putumap, hemia Jisas Kraes. Kingdom blong God i stap long heven. Be, i no longtaem, bambae hem i mekem ol nambawan blesing oli kamaot, mo i mekem laef blong ol man i kam moagud long Paradaes long wol.​—Aesea 9:​6, 7.

Maet yu yu save finis, prea we Jisas i tijim long ol man blong hem, we i stap long Baebol long Matyu 6:​9-13. Wan haf blong prea ya i askem long God, se: “Yu mekem kingdom blong yu i kam. Yu mekem ol samting we yu yu wantem oli kamaot long wol, olsem we oli kamaot finis long heven.” (NW) Folem ol tok blong prea ya, Kingdom blong God bambae i “kam” blong mekem stampa tingting blong Jeova God long saed blong wol, i kamtru. Mo stampa tingting blong hem i blong mekem wol ya i kam paradaes.

Laswan kwestin i stanap: ?Yu yu mas mekem wanem blong haremgud long laef we i moagud long Paradaes ya long fyuja?

Samting We Yu Mas Mekem

Wetem lav, Jeova God i rere blong givim laef ya we i moagud long Paradaes, long olgeta man we oli mekem wok blong hem. Baebol i talem se: “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.” (Ol Sam 37:29) ?Be wanem samting nao i mekem wan man i stret long fes blong God?

Blong mekem Jeova i glad, yumi mas lanem moa long saed blong samting we hem i wantem se yumi mekem. Sipos yumi kasem save long God mo mekem save ya i wok long laef blong yumi, yumi save kasem laef we i no save finis. Wan taem, Jisas i prea long God se: “Hemia laef ya we i no save finis, we man i save yu, we yu nomo yu God tru, mo we man i save mi ya, Jisas Kraes, we yu yu sanem mi mi kam.”​—Jon 17:3.

Buk we i tokbaot Jeova God mo Jisas Kraes, hem i Tok blong God, Baebol. Hem i wan long ol nambawan presen we Jeova i givim. Baebol i olsem wan leta we wan papa i sanem i go long ol pikinini blong hem we hem i laekem olgeta tumas. Hem i talem long yumi promes blong God blong mekem laef blong ol man i kam moagud, mo hem i soemaot olsem wanem yumi save kasem laef ya. Baebol i talem long yumi wanem samting God i bin mekem bifo, mo wanem samting bambae hem i mekem long fyuja. Mo tu, hem i givim ol gudfala advaes we oli save wok blong stretem ol problem blong yumi. Yes, Tok blong God i tijim yumi olsem wanem blong faenem glad, nating se yumi stap laef long wan wol we i fulap long trabol.​—2 Timote 3:​16, 17.

Ol Wetnes blong Jeova oli glad blong stadi Baebol wetem yu, we yu no pem. Yu save lanem olsem wanem blong mekem laef blong yu i moa glad naoia, wetem tingting se bambae laef i kam moagud long fyuja we i kolosap nao.

[Tok blong pija long pej 5]

Ol profet tok blong Baebol oli soemaot se kolosap nao bambae laef i kam moagud

[Tok blong pija long pej 7]

Kingdom blong God bambae i mekem se laef blong ol man i kam moagud