Oli Faenem Pis Long Wan Wol We i Fulap Long Trabol

PIJA long fored blong buk ya i soem rabis faet we i kamaot long Bosnia mo Hersegovina. ?Pis i save stap long wan ples olsem? Yumi sapraes, be ansa blong kwestin ya se yes. Taem ol man blong skul Katolik, Isten Otodoks, mo Muslim oli stap mekem nogud faet ya from graon, plante man oli wantem pis tumas. Mo sam long olgeta ya oli faenem pis.

Famle Djorem oli stap long kantri ya Sarajevo, mo oli Wetnes blong Jeova. Nating se i gat plante trabol long taon ya, oli folem fasin blong stap go visitim ol man raonabaot long olgeta, blong talemaot gud nyus blong Kingdom blong God. (Matyu 24:14) ?From wanem? From we famle Djorem ya i save se Kingdom ya i tru, se hem i stanap finis long heven, mo se tru long hem nomo, ol man oli gat hop blong kasem pis. Ol Wetnes blong Jeova oli trastem fulwan samting we aposol Pol i kolem “gud nyus ya blong pis.” (Efesas 2:17) From ol man olsem Bozo mo Hena Djorem, plante man tede oli stap faenem pis long Bosnia mo Hersegovina.

Wan Trufala Pis We Bambae i Kam

I gat plante moa samting blong talem long saed blong famle Djorem. Be, fastaem, bambae yumi tokbaot wan narafala hasban mo waef we tufala i wokem fasin blong trastem Kingdom blong God. Nem blong tufala se Artur mo Arina. Tufala ya wetem ol smol pikinini boe blong tufala, oli bin stap long wan ripablik long Soviet Yunion bifo. Taem faet i kamaot long kantri ya, Artur i tekem saed blong wan grup mo i faet agensem ol narafala man. Be, i no longtaem, hem i askem long hem wan se: ‘?From wanem mi stap faet agensem ol man ya we mi savegud olgeta?’ Nao hem i lego kantri blong hem. Afta we hem i winim plante trabol, hem i kasem Estonia wetem ol smol pikinini blong hem.

Taem Artur i visitim Sen Pitasbeg, hem i mitim ol Wetnes blong Jeova. Mo hem i sapraes blong lanem plante samting long saed blong Kingdom blong God. Stampa tingting blong Jeova hemia se, i no longtaem, Kingdom blong God bambae i stap olsem wan gavman nomo blong olgeta man. (Daniel 2:44) Ale, wol ya i save kam wan ples blong pis, we i no moa gat ol faet insaed long ol wanwan kantri, mo ol bigfala faet we plante kantri oli joen long hem. Profet tok blong Aesea i tokbaot taem ya se: “Bambae oli no mekem nogud nating, mo oli no mekem trabol nating long olgeta ples long tabu hil ya blong mi, from we bambae wol ya i fulap tru long save blong Jeova olsem we ol wora oli kavremap solwora.”​—⁠Aesea 11:⁠9.

Artur i luk wan pija long wan buk we i tokbaot Baebol, we wan Wetnes i bin soem long hem. Pija ya i soemaot wol long fyuja, taem i gat pis long hem. Artur i talem se bifo, hem i laef long wan ples we i olsem pija ya. Be, ples ya i go nogud from faet insaed long kantri. Naoia, Artur mo famle blong hem oli stap bakegen long Estonia. Oli stap lanem moa long saed blong Kingdom blong God, tru long Baebol stadi we oli mekem wetem ol Wetnes blong Jeova.

Pis Long Taem Blong Trabol

Ol Sam 37:37 i talem se: “Luklukgud man ya we i no gat poen mo makemgud fasin blong man we laef blong hem i stret, from we man olsem bambae i gat pis long fyuja.” Be, pis blong man ya we i no gat poen mo we i stret, i no stap long fyuja nomo. Hem i save haremgud long pis ya naoia. ?Olsem wanem samting ya i save kamaot? Tingbaot store blong man ya Paul.

Paul i laef long wan kamp blong ol refujia long saot wes blong Itiopia. Be hem i kam long wan narafala kantri we i stap kolosap. Long ples blong hem, hem i bin mitim wan Wetnes blong Jeova. Wetnes ya i wok long wan kampani blong mekem bensin. Hem i givim wan buk long Paul, blong halpem hem blong stadi Baebol, nem blong buk ya Trutok Blong Soemaot Rod Blong Itenel Laef.b Paul i no moa mitim ol Wetnes bakegen, be hem i stadigud long buk ya. Faet we i kamaot long kantri blong hem i fosem hem blong ronwe i go long refuji kamp ya long Itiopia. Long ples ya, hem i toktok wetem sam narafala man long saed blong ol samting we hem i bin lanem. Biaen, wan smol grup i stat blong agri se hemia i trutok. Wetem olgeta samting we oli lanem, i no longtaem, oli stat blong prij long ol narafala man insaed long kamp ya.

Paul i raetem wan leta i go long hedkwota blong Watch Tower Sosaeti blong askem olgeta blong halpem hem. Ale, oli sanem wan Kristin brata blong Adis Ababa i go blong luk hem. Hem i sapraes, taem hem i faenem se 35 man oli stap wet long hem, blong lanem moa long saed blong Kingdom blong God. Hem i mekem wan plan blong samfala oli save gohed blong givhan long olgeta ya.

?Olsem wanem yumi save talem se ol man olsem Paul oli gat pis? Laef blong olgeta i no isi, be oli bilif strong long God. Taem oli harem nogud from ol trabol raonabaot long olgeta long wol ya, oli folem advaes blong Baebol se: “I nogud yufala i stap tingting tumas from sam samting. Be sipos yufala i sot long wan samting, yufala i mas prea long God from. Yufala i mas askem long hem, mo yufala i mas talem tangkyu tu long hem.” From samting ya, oli gat wan glad we bighaf blong ol man tede oli no gat. Ol tok blong aposol Pol we i go long kongregesenc blong Filipae, i stret long ol man ya tede: “Pis we God i save putum, hem i bigfala moa, i bitim save blong yumi olgeta. Mo God bambae i putum pis ya long tingting blong yufala, blong lukaotgud long yufala ya we i joen long Jisas Kraes.” Yes, oli gat wan gudfala fasin fren wetem Jeova, “God ya we i stampa blong pis.”​—⁠Filipae 4:⁠6, 7, 9.

Pis We i Stap Naoia

King we i stap rul naoia long Kingdom blong God, hemia Jisas Kraes, mo Baebol i kolem hem se “Prins blong Pis.” (Aesea 9:⁠6) Profet blong bifo i tokbaot hem se: “Bambae hem i talemaot pis long ol nesen. Mo bambae hem i rul long ol ples stat long wan saed solwora go kasem narasaed, stat long Reva go kasem ol laswan ples blong wol.” (Sekaraea 9:10) Ol tok blong Baebol olsem hemia, oli mekem bigfala jenis i kamaot long laef blong wan man we nem blong hem José.

Bifo, José i stap long kalabus. Hem i wan man we i stap sakem bom from politik. Polis i bin holem hem taem hem i stap rerem wan bom blong sakem long haos blong ol polis. Hem i gat tingting ya se raf fasin olsem bambae i fosem gavman blong traem mekem laef blong ol man long kantri blong hem i kam moagud. Taem hem i stap long kalabus, ol Wetnes blong Jeova oli stat blong stadi Baebol wetem waef blong hem.

Afta we José i gofri, hem tu i stadi Baebol. Mo i no longtaem, ol tok blong Ol Sam 85:8 i kamtru long hem, se: “Mi mi stap lesin long ol samting ya we Hae God ya we i God blong yumi i stap talem. Hem i promes long yumi ol man blong hem, se bambae i mekem we yumi gat pis.” Be narafala haf blong vas ya i givim woning se: “Sipos yumi no gobak long ol krangke fasin blong yumi.” Taswe, man we i wantem pis wetem Jeova i no save gat independen tingting, no go agensem samting we God i wantem.

Tede, José mo waef blong hem tufala i Kristin man blong talemaot gud nyus. Oli pulum ol narafala man i go long Kingdom blong Jeova, olsem rod ya nomo blong winim ol problem we bifo José i traem blong stretem wetem ol bom we hem i mekem. Oli rere blong trastem Baebol, we i talem se: ‘Hae God bambae i mekem we yumi gat plante gudfala samting.’ (Ol Sam 85:12) Yes, i no longtaem i pas, José i go visitim ples ya we hem i bin wantem sakem bom long hem. ?Blong wanem? Blong toktok wetem ol famle we oli stap long ples ya, long saed blong Kingdom blong God.

Ol Man Blong Pis

Long Ol Sam 37:​10, 11, Baebol i talem se: “Bambae i no longtaem, ol man nogud oli lus. Bambae yu save lukaot olgeta, be bambae yu no save faenem olgeta. Ol man we tingting blong olgeta i stap daon, bambae oli tekem graon ya i blong olgeta. Bambae oli harem gud, from we oli stap long pis, mo oli gat plante samting.” !Hemia wan nambawan fyuja!

Be, makemgud se Jeova i givim pis nomo long ol “man we tingting blong olgeta i stap daon.” Olgeta we oli wantem pis, oli mas lanem blong gat pis wetem ol narafala. Hemia samting we i kamaot long Keith, wan man Nyusilan. Plante man oli save Keith from “strong bodi mo strong fasin blong hem, hem i save faetem man, mo hem i rao oltaem wetem ol narafala.” Hem i joen long wan grup blong ol raf man, mo hem i stap long wan haos we i olsem wan bigfala kalabus nomo. Long yad blong hem i gat tri bigfala dog we oli mekem gad mo ronem ol man we oli kam insaed. Waef blong hem, mama blong ol sikis pikinini blong hem, i mekem divos long hem finis.

Taem Keith i mitim ol Wetnes blong Jeova, gud nyus we hem i harem i jenisim laef blong hem bigwan. I no longtaem, hem mo ol pikinini blong hem, oli stap go long ol miting blong ol Wetnes. Hem i katem hea blong hem, we bifo i longwan i godaon long bak blong hem. Nao hem i stat blong tokbaot Kingdom blong God long ol fren blong hem bifo. Sam long olgeta ya tu oli stat blong stadi Baebol.

Olsem plante milyan narafala man raon long wol we oli laekem stret fasin, Keith i stat blong folem ol tok blong aposol Pita se: “Man we i wantem gudfala laef, we i wantem harem gud evri dei nomo, . . . hem i mas livim ol fasin nogud blong mekem ol gudfala fasin, mo oltaem i mas lukaot laef we i kwaet, mo i mas traehad blong kasem.” (1 Pita 3:​10, 11) Waef blong Keith we i seraot long hem finis i agri blong mared wetem hem bakegen. Mo naoia, hem i stap lanem olsem wanem blong ‘lukaot laef we i kwaet, mo traehad blong kasem.’

Pis we Jeova i givim i bin sevem laef blong plante man, wetem laef blong wan man blong resis we i bon long Soviet Yunion bifo. Man ya i bin winim ol medel long Olympik gem. Be samting ya i no mekem hem i haremgud. Nao hem i stat blong tekem drag mo dring alkol. Insaed long 19 yia, hem i stap tri yia long kalabus long Saebiria. Biaen, hem i haed long wan sip blong mekem trep i go long Kanada. Mo long tu taem, kolosap hem i ded from ol drag we hem i yusum. Afta long olgeta samting ya, hem i prea blong God i halpem hem blong faenem trufala mining blong laef. Wan Baebol stadi wetem sam Wetnes blong Jeova we oli toktok lanwis blong Rasia, i halpem hem blong faenem ansa long ol kwestin blong hem. Tede, man ya, olsem plante milyan narafala man tu, i faenem pis wetem God mo wetem hem wan.

Hop Blong Laef Bakegen

Nao, bambae yumi gobak long Bozo mo Hena Djorem long Sarajevo. Tufala ya oli gat wan smol gel we i gat faef yia, nem blong hem Magdalena. Long manis Julae blong yia ya, trifala i lego haos blong olgeta blong go long wok blong prij olsem oltaem, nao wan bom i faerap mo i kilim trifala ya i ded. ?Olsem wanem long pis we oli stap talemaot long ol narafala man? ?Taem bom i kilim trifala ya i ded, samting ya i soem se oli no gat trufala pis?

!No gat! Long taem blong yumi, ol trabol olsem oli kamaot oltaem. Plante man oli ded from ol bolet. Sam narafala oli ded from ol sik no ol akseden. Plante oli ded from oli kam olfala. Ol man we oli gat pis ya we God i stap givim, oli no fri long olgeta trabol olsem. Nating se i gat ol trabol olsem oli kamaot, samting ya i no mekem se oli no moa gat hop.

Jisas i promes long fren blong hem Mata, se: “Stampa blong laef bakegen long ded, mi ya. Stampa blong laef, mi ya. Man we i bilif long mi, nating we bambae i ded, hem bambae i mas laef.” (Jon 11:25) Famle Djorem ya i bilif long samting ya, olsem ol narafala Wetnes blong Jeova tu. Mo famle Djorem i bilif se sipos oli ded, bambae oli laef bakegen long wol ya taem i gat trufala pis long hem. Jeova God “bambae i ravemaot wora blong ae blong olgeta. Nao bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem. Ol samting ya blong bifo oli lus olgeta.”​—⁠Revelesen 21:⁠4.

Jes bifo we Jisas i ded, hem i talem long ol man blong hem se: “Mi putum pis ya i stap wetem yufala. . . . Yufala i no letem tingting blong yufala i trabol, yufala i no fraet.” (Jon 14:27) Yumi glad wetem famle Djorem ya we oli bin gat pis ya mo we bambae oli gat moa long hem, taem bambae oli laef bakegen long ded. Yumi glad wetem olgeta man we oli wosipim Jeova, God ya blong pis. Olgeta ya oli gat pis long tingting blong olgeta. Oli haremgud long pis we oli gat wetem God. Oli wokem pis wetem ol narafala man. Mo oli trastem tok ya se bambae i gat pis long fyuja. Yes, oli faenem pis finis, nating se oli mas stap long wol ya we i fulap long trabol. Tru tumas, olgeta man we oli wosipim God wetem speret mo trutok oli haremgud from we oli gat pis. I gud tumas sipos yu tu yu faenem pis ya.

[Ol futnot]

[Tok Blong Pija Long Pej 7]

Oli faenem pis nating se oli stap laef long wol ya we i fulap long trabol