Jeova i Stap Givim Fulap Pis Mo Trutok
“Bambae mi mekem olgeta oli haremgud bakegen mo bambae mi givim fulap pis mo trutok long olgeta.”—JEREMAEA 33:6.
1, 2. (a) ?Long ol yia we oli pas, ol nesen oli gat pis? (b) ?Long yia 607 B.K.T., Jeova i tijim wanem long ol man Isrel long saed blong pis?
!PIS! !Wan samting we yumi wantem tumas! !Be long histri blong man, i gat smol pis nomo! Long ol yia 1900, i no gat pis nating. Be i gat tu faet we oli bigwan moa bitim ol narafala faet long histri blong man. Afta long faswan bigfala faet blong wol, oli stanemap Ligofnesen blong putum pis long wol. Be ogenaesesen ya i no save putum pis. Ale, afta long namba tu bigfala faet blong wol, oli stanemap Yunaeted Nesen, from sem samting. Taem yumi ridim nyuspepa evri dei, yumi luk se ogenaesesen ya tu i no save putum pis.
2 ?Olsem wanem? ?Yumi sapraes se ol ogenaesesen blong man oli no save putum pis? No gat, hemia i no wan samting blong sapraes. Bitim 2,500 yia bifo, ol man we God i jusumaot, Isrel, oli lanem wan samting long saed ya. Long ol yia 600 B.K.T.,a i luk olsem se Babilon, we i stap kam antap olsem bigfala politik paoa blong wol long taem ya, bambae i spolem pis blong ol man Isrel. Isrel i lukluk i go long Ijip blong putum pis. Be Ijip i no putum pis. (Jeremaea 37:5-8; Esikel 17:11-15) Long yia 607 B.K.T., ol ami blong Babilon oli spolemgud stonwol blong Jerusalem, mo oli bonem haos prea blong Jeova long faea. Olsem nao, long wan strong fasin, Isrel i lanem se i blong nating nomo blong trastem ol ogenaesesen blong man. Oli no kasem pis, be ol man Babilon oli karem olgeta oli go kalabus long Babilon.—2 Kronikel 36:17-21.
3. Blong fulumap ol profet tok we Jeova i yusum Jeremaea blong talem, ?wanem samting long histri i tijim ol man Isrel long namba tu impoten lesen long saed blong pis?
3 Bifo we Jerusalem i foldaon, Jeova i talemaot klia se Hem, i no Ijip, we bambae i givim trufala pis long Isrel. Tru long Jeremaea, Hem i promes, se: “Bambae mi mi mekem olgeta oli haremgud bakegen mo bambae mi givim fulap pis mo trutok long olgeta. Mo ol man Juda mo Isrel we oli stap kalabus, bambae mi tekem olgeta oli kambak. Mo bambae mi bildim olgeta bakegen olsem fastaem.” (Jeremaea 33:6, 7) Promes blong Jeova i stat blong kamtru long yia 539 B.K.T., taem Babilon i lus long faet mo oli letem ol man Isrel oli gofri. (2 Kronikel 36:22, 23) Long en blong yia 537 B.K.T., wan grup blong ol man Isrel oli mekem Lafet blong ol Wansaed Haos long graon blong ol man Isrel. !Hemia i faswan taem we oli mekem Lafet ya afta long 70 yia! Afta long lafet ya, oli stat blong bildim bakegen haos prea blong Jeova. ?Oli harem olsem wanem long saed blong wok ya? Store i talem se: “Oli singsingaot bigwan blong presem Jeova, taem oli putum faondesen blong haos blong Jeova.”—Esra 3:11.
4. ?Olsem wanem Jeova i wekemap tingting blong ol man Isrel blong bildim haos prea, mo hem i mekem wanem promes long saed blong pis?
4 Be, afta long glad taem ya, ol man oli agensem wok blong ol man Isrel, mekem se tingting blong olgeta i foldaon, nao oli no moa gohed blong bildim haos prea. Sam yia biaen, Jeova i stanemap profet Hagae mo Sekaraea, nao tufala i wekemap tingting blong ol man Isrel blong finisim wok ya. !Oli mas glad tumas taem oli harem we Hagae i stap tokbaot haos prea we oli mas bildim, se: “ ‘Ol gudgudfala samting blong haos ya bambae i bitim hemia blong fastaem,’ Jeova blong ol ami i talem. ‘Mo long ples ya, bambae mi putum pis’ ”!—Hagae 2:9.
Jeova i Mekem Ol Promes Blong Hem Oli Kamtru
5. ?Yumi makem wanem long Sekaraea japta 8?
5 Long buk blong Sekaraea long Baebol, yumi ridim plante vison mo profet tok we oli kamaot long God, we oli givim paoa long ol man blong God long ol yia 500 B.K.T. Ol profet tok ya oli gohed blong mekem yumi bilif se bambae Jeova i givhan long yumi. Oli givim plante risen long yumi blong bilivim se, long taem blong yumi tu, bambae Jeova i givim pis long ol man blong hem. Eksampel, long japta 8 blong buk we i karem nem blong profet Sekaraea, ten taem hem i talem ol tok ya: ‘Hemia samting we Jeova i talem.’ Afta long tok ya, God i talemaot ol mesej long saed blong pis blong ol man blong Hem. Sam long ol promes ya oli kamtru long taem blong Sekaraea. Olgeta evriwan oli kamtru finis no oli stap kamtru tede.
“Bambae Mi Mi Jelas From Saeon”
6, 7. ?Long wanem rod, Jeova i ‘jelas long Saeon wetem bigfala kros’?
6 Tok ya i kamaot fastaem long Sekaraea 8:2, we yumi ridim se: “Hemia samting we Jeova blong ol ami i talem, ‘Bambae mi mi jelas from Saeon wetem bigfala jelas. Mo wetem bigfala kros, bambae mi mi jelas from hem.’ ” Promes blong Jeova blong jelas, blong gat strong tingting, from ol man blong hem, i minim se bambae hem i sua blong givim pis long olgeta bakegen. Taem Jeova i mekem ol man Isrel oli gobak long kantri blong olgeta mo oli bildim haos prea bakegen, samting ya i soem strong tingting ya blong Jeova.
7 ?Be olsem wanem long olgeta we oli agensem ol man blong Jeova? “Bigfala kros” blong Jeova long ol enemi ya blong hem i bigwan tumas, olsem we strong tingting blong hem blong givhan long ol man blong hem i bigwan tumas. Taem ol man Jyu we oli stap tru long God oli mekem wosip long haos prea we oli bildim bakegen, oli save tingbaot ol nogud frut we i kasem strongfala Babilon, we i foldaon finis. Mo tu, oli save tingbaot we ol enemi oli no win nating taem oli traem blokem wok blong bildim haos prea bakegen. (Esra 4:1-6; 6:3) Mo oli save talem tangkyu long Jeova from i mekem promes blong hem i kamtru. !Strong tingting blong Hem i mekem se oli win!
“Taon Blong Trutok”
8. ?Long taem blong Sekaraea, olsem wanem Jerusalem i kam wan taon blong trutok we i defren long ol taem bifo?
8 Namba tu taem, Sekaraea i raetem se: “Hemia samting we Jeova i talem.” ?Ale, Jeova i talem wanem? “Bambae mi mi kambak long Saeon mo mi stap long medel blong Jerusalem. Mo bambae ol man oli kolem Jerusalem, se taon blong trutok. Mo bambae oli kolem hil blong Jeova blong ol ami se, tabu hil.” (Sekaraea 8:3) Bifo long yia 607 B.K.T., Jerusalem i no wan taon blong trutok nating. Ol pris mo ol profet blong hem oli gat kruked fasin, mo ol man blong hem oli no stap tru long God. (Jeremaea 6:13; 7:29-34; 13:23-27) Naoia ol man blong God oli stap bildim haos prea bakegen. Oli soem se oli stap stanap strong long saed blong klin wosip. Long speret, Jeova i stap bakegen long Jerusalem. Oli tokbaot bakegen ol trutok long saed blong klin wosip long taon ya. From samting ya, ol man oli save kolem Jerusalem se “taon blong trutok.” Ol man oli save kolem hil we Jerusalem i stap antap long hem se, “hil blong Jeova.”
9. Long 1919, ?wanem nambawan jenis we i kamaot long “Isrel blong God”?
9 Tufala mesej ya i gat bigfala mining long ol man Isrel bifo. Be oli gat bigfala mining tu long yumi ya we yumi stap laef long en blong ol yia 1900. Kolosap 80 yia bifo, hemia long taem blong faswan bigfala faet blong wol, sam taosen tabu man we oli olsem “Isrel blong God” oli go kalabus long saed blong speret, olsem we Isrel blong bifo, i go kalabus long Babilon. (Galesia 6:16) Wan profet tok i talem se, oli olsem ol dedbodi we oli stap slip long rod. Nating se i olsem, wetem fulhat blong olgeta, oli wantem tumas blong wosip long Jeova “wetem speret mo trutok.” (Jon 4:24, NW) Taswe, long 1919, Jeova i mekem oli fri long kalabus. I olsem we hem i mekem oli laef bakegen long saed blong speret. (Revelesen 11:7-13) Olsem nao, Jeova i talem bigfala Yes, blong ansa long ol kwestin ya long profet tok blong Aesea, se: “?Bambae wan kantri i save kamaot long wan dei nomo olsem we woman i harem nogud blong bonem pikinini? ?Bambae wan nesen i save bon wantaem?” (Aesea 66:8) Long 1919, ol man blong Jeova oli stap bakegen olsem wan nesen long saed blong speret, long prapa “kantri” blong olgeta, no long ples blong olgeta long saed blong speret long wol ya.
10. ?Stat long 1919, wanem ol blesing we ol tabu Kristin oli haremgud long olgeta long “kantri” blong olgeta?
10 Ol tabu Kristin oli sef long kantri ya. Oli wok long bigfala haos prea blong Jeova long saed blong speret. Oli kam olsem “slef ya we i stret mo waes,” we oli glad blong mekem wok we Jisas i givim long olgeta, hemia blong lukaot long olting blong hem long wol ya. Hemia wan blesing we yumi stap haremgud long hem yet, long en blong ol yia 1900. (Matyu 24:45- 47, NW) Oli lanem se Jeova i “God ya we i stampa blong pis.”—1 Tesalonaeka 5:23.
11. ?Olsem wanem ol lida blong Krisendom oli soem se oli enemi blong ol man blong God?
11 ?Be, olsem wanem long ol enemi blong Isrel blong God? Jeova i kros tumas long olgeta. Kros we Jeova i gat long ol enemi ya i bigwan, olsem we strong tingting blong hem blong givhan long ol man blong hem i bigwan. Long faswan bigfala faet blong wol, ol lida blong ol skul blong Krisendom oli mekem strongfala hadtaem, blong traem kilim i ded smol grup ya blong ol Kristin we oli stap talemaot trutok. Be oli no win. Long namba tu bigfala faet blong wol, ol pris mo pasta blong Krisendom oli gat sem tingting long wan samting nomo: Long tufala saed blong faet, oli pusum ol gavman blong mekem i strong long ol Wetnes blong Jeova. Tede tu, long plante kantri, ol lida blong ol skul oli pusum ol gavman blong blokem no putum tabu long Kristin wok blong ol Wetnes blong Jeova blong talemaot gud nyus.
12, 13. ?Olsem wanem Jeova i soem kros blong hem agens long Krisendom?
12 Jeova i no fogetem samting ya. Afta long faswan bigfala faet blong wol, Krisendom, wetem ol narafala haf blong Bigfala Babilon, oli foldaon. (Revelesen 14:8) Stat long 1922, ol man oli luksave se Krisendom i foldaon. Long taem ya, Jeova i kafsaedem samting olsem ol trabol, taem ol man blong hem oli talemaot long klia ples se Krisendom i ded long saed blong speret, mo oli givim woning se i no longtaem, bambae God i spolem hem olgeta. (Revelesen 8:7 kasem 9:21) Mo wok blong kafsaedem ol trabol ya i stap gohed yet. Eksampel: Raonabaot long wol, long Epril 23, 1995, oli givim tok ya we stampa blong hem “En Blong Ol Gyaman Skul i Kolosap.” Mo stret afta long taem ya, oli seremaot plante handred milyan spesel pepa ya Kingdom News.
13 Tede, Krisendom i kam nogud olgeta. Long ol yia biaen long 1900, ol memba blong hem oli kilkilim olgeta long ol nogud faet we ol pris mo pasta blong hem oli blesem. Long sam kantri, kolosap se Krisendom i no moa gat paoa nating. Bambae hem i lus olgeta wetem ol narafala haf blong Bigfala Babilon.—Revelesen 18:21.
Pis Blong Ol Man Blong Jeova
14. ?Wanem profet tok i soem wan grup blong man we oli gat pis?
14 I defren nao, long yia ya 1996, ol man blong Jeova oli haremgud long fulap pis long kantri blong olgeta we i stanap bakegen. Namba tri mesej blong Jeova i soem samting ya: “Hemia samting we Jeova blong ol ami i talem, ‘Bambae i gat ol olfala man mo ol olfala woman oli sidaon yet long ol pablik ples blong Jerusalem, wanwan long olgeta i stap holem wokingstik blong hem from we oli stap longtaem finis. Mo ol pablik ples blong taon bambae oli fulap long ol boe mo ol gel we oli stap pleplei long ol pablik ples ya.’ ”—Sekaraea 8:4, 5.
15. ?Nating se ol nesen oli stap faet, ol man blong Jeova oli stap haremgud long wanem kaen pis?
15 Ol tok ya we i mekem wan naesfala pija long tingting blong yumi, i soem se bambae i gat wan samting blong sapraes i kamaot long wol ya, we oltaem i gat faet long hem. Sam man bambae oli stap long pis. Stat long 1919, ol profet tok ya blong Aesea oli kamtru: “Jeova i talem se, ‘Hemia we i stap farawe mo hemia we i stap kolosap, bambae i gat pis oltaem. Mo bambae mi mekem hem i haremgud bakegen. Be’ . . . , God blong mi i talem se, ‘Ol man nogud oli no save gat pis.’ ” (Aesea 57:19-21) I tru, ol man blong Jeova oli no sef fulwan long ol nogud frut blong ol trabol we ol nesen oli mekem, nating se oli no joen long ol fasin blong wol. (Jon 17:15, 16) Long sam kantri, oli mas stanap strong tru long ol bigfala hadtaem, mo tu, ol man oli bin kilim i ded sam long olgeta. Nating se i olsem, ol trufala Kristin oli gat pis long tu bigfala fasin. Faswan, oli gat ‘pis wetem God tru long Masta blong olgeta Jisas Kraes.’ (Rom 5:1) Namba tu samting se, oli gat pis wetem ol Kristin brata mo sista blong olgeta. Oli wokem ‘waes ya we i kamaot long heven,’ we ‘nambawan samting blong hem, hemia se laef blong olgeta i klin gud mo oli gat pis.’ (Jemes 3:17; Galesia 5:22-24) Antap long ol samting ya, oli stap wet blong haremgud long pis ya we i bigwan olgeta, taem “ol man we tingting blong olgeta i stap daon, bambae oli tekem graon ya i blong olgeta. Bambae oli harem gud from we oli stap long pis, mo oli gat plante samting.”—Ol Sam 37:11.
16, 17. (a) ?Olsem wanem ol “olfala man mo ol olfala woman” mo “ol boe mo ol gel” oli mekem ogenaesesen blong Jeova i kam strong? (b) ?Wanem i pruvum pis blong ol man blong Jeova?
16 Long medel blong ol man blong Jeova naoia, i gat ol “olfala man mo ol olfala woman” oli stap yet. Hemia ol tabu Kristin we oli save tingtingbak long taem bifo we ogenaesesen blong Jeova i winim plante trabol. Yumi glad tumas long fasin blong olgeta blong stap tru long God mo blong stanap strong longtaem. Ol yangfala tabu Kristin, oli lidim ogenaesesen tru long ol yia blong trabol afta long 1930 mo long Namba Tu Bigfala Faet blong Wol, mo tu tru long ol yia blong glad biaen, taem plante man oli stap kam insaed long ogenaesesen. Mo tu, stat long 1935, oli luksave moa hu nao ol man we oli olsem “bigfala hif blong” ol “narafala sipsip.” (Revelesen 7:9; Jon 10:16) Naoia, ol tabu Kristin oli stap kam olfala moa, mo namba blong olgeta i stap godaon. From samting ya, ol narafala sipsip oli mekem wok ya blong talemaot gud nyus, mo oli mekem i go kasem olgeta ples long wol. Long ol yia we oli jes pas, fulap narafala sipsip oli stap kam insaed long kantri blong ol man blong God. !Yes, las yia nomo, i gat 338,491 oli tekem baptaes blong soemaot se oli givim laef blong olgeta long Jeova! Ol nyuwan ya oli rili yang long saed blong speret. Yumi haremgud tumas long paoa mo glad we oli gat, taem oli leftemap namba blong ol man ya we oli stap singsing blong talem tangkyu mo presem ‘God ya we i stap sidaon long bigfala jea blong hem, wetem Smol Sipsip.’—Revelesen 7:10.
17 Tede, ‘ol pablik ples oli fulap wetem ol boe mo ol gel,’ ol Wetnes we oli gat paoa olsem long yangtaem blong olgeta. Long sevis yia blong 1995, i gat ripot i kam long 232 kantri mo aelan. Be long medel blong ol tabu Kristin mo ol narafala sipsip, i no gat fasin blong traem winim narafala, fasin blong no laekem nating narafala, mo fasin jelas we i no stret. Olgeta evriwan oli stap gru wanples long saed blong speret. Oli joengud tugeta long lav. Fasin blong ol Wetnes blong Jeova blong joen olsem wan brata long olgeta ples, i rili wan spesel samting long wol ya.—Kolosi 3:14; 1 Pita 2:17.
?I Hadwok Tumas Long Jeova?
18, 19. Long ol yia stat long 1919, ?olsem wanem Jeova i mekem samting we i hadwok tumas long tingting blong man?
18 Long 1918, ol tabu Kristin, we namba blong olgeta i kasem sam taosen nomo, oli kalabus long saed blong speret, mo tingting blong olgeta i foldaon. Long taem ya, i no gat wan man we i naf blong luksave samting we bambae i kamaot biaen. Be, Jeova i save—olsem namba fo profet tok ya blong hem i soem: “Hemia samting we Jeova blong ol ami i talem, ‘Nating se olgeta ya we oli stap yet long taem ya oli ting se i hadwok, ?bambae i hadwok tumas long tingting blong mi?’ ”—Sekaraea 8:6.
19 Long 1919, speret blong Jeova i givim paoa bakegen long ol man blong hem, blong mekem wok we i stap long fored blong olgeta. Be, oli nidim strong bilif blong holemstrong long smol ogenaesesen blong ol man blong wosip long Jeova. Oli no plante, mo oli no klia long plante samting. Be sloslou, Jeova i mekem ogenaesesen ya i kam strong, mo i reremgud olgeta blong mekem Kristin wok blong talemaot gud nyus mo blong mekem disaepol. (Aesea 60:17, 19; Matyu 24:14; 28:19, 20) Sloslou, hem i givhan long olgeta blong luksave rod we oli mas folem long saed blong fasin blong no joen long faet, mo hae rul blong God long heven mo long wol. ?Olsem wanem? ?I hadwok tumas long Jeova blong mekem ol wok blong hem tru long smol grup blong ol Wetnes ya? !No gat, i no hadwok nating long Jeova! Yumi save luk samting ya long pej 12 kasem 15 blong buk ya, we i soem ripot blong wok blong ol Wetnes blong Jeova long sevis yia blong 1995.
“Mi Bambae Mi God Blong Olgeta”
20. ?Profet tok i soem se wok blong hivimap ol man blong God i mas kasem wanem mak?
20 Namba faef mesej i gohed blong soem glad blong ol Wetnes blong Jeova tede: “Hemia samting we Jeova blong ol ami i talem, ‘Mi stap sevem ol man blong mi long ol kantri we oli stap long saed ya we san i stap kam antap, mo long ol kantri we oli stap long saed ya we san i stap godaon. Mo bambae mi tekem olgeta oli kam, mo bambae oli stap long Jerusalem. Mo oli mas kam ol man blong mi, mo mi bambae mi kam God blong olgeta long trutok mo long stret fasin.’ ”—Sekaraea 8:7, 8.
21. ?Long wanem rod ol man blong Jeova oli holemtaet bigfala pis mo mekem i go moa?
21 Long 1996, yumi save talem stret se, gud nyus i kasem olgeta ples long wol finis, stat long “ol kantri we oli stap long saed ya we san i stap kam antap” go kasem “ol kantri we oli stap long saed ya we san i stap godaon.” Plante man blong olgeta nesen oli kam disaepol finis, mo oli luk we promes ya blong Jeova i kamtru: “Olgeta pikinini blong yu, bambae Jeova i tijim olgeta, mo pis blong ol pikinini blong yu bambae i fulap.” (Aesea 54:13) Yumi gat pis from we Jeova i stap tijim yumi. Blong givimaot tijing ya, oli wokem ol buk long bitim 300 lanwis. Las yia nomo, oli tanem ol buk i go long 21 nyufala lanwis bakegen. Long saed blong Wajtaoa, naoia i gat 111 lanwis we oli stap kamaot long semtaem, mo oli wokem Wekap! long 54 lanwis. Long ol bigbigfala asembli, ol man oli luk se ol man blong God oli gat pis. Ol miting evri wik oli mekem yumi joengud, mo oli givim ol tok blong leftemap tingting we yumi nidim blong stanap strong. (Hibrus 10:23-25) Yes, Jeova i stap tijim ol man blong hem “long trutok mo long stret fasin.” Hem i stap givim pis long ol man blong hem. !I wan bigfala blesing blong joen long fulap pis ya!
[Futnot]
a B.K.T. i minim Bifo Kristin Taem.
?Yu Yu Save Eksplenem?
◻ Long taem blong yumi, ?olsem wanem Jeova i ‘jelas wetem bigfala kros’ from ol man blong hem?
◻ ?Olsem wanem ol man blong Jeova oli haremgud long pis, nating se oli stap long ol kantri we faet i stap kamaot oltaem long olgeta?
◻ ?I minim wanem se ‘ol pablik ples oli fulap long ol boe mo ol gel’?
◻ ?Wanem samting i givhan blong mekem se Jeova i save tijim ol man blong hem?
[Ripot lon pej 12-15]
RIPOT BLONG OL WITNES BLONG JEOVA LONG FULWOL LONG SEVIS YIA 1995
(Lukluk niuspepa)
[Tok Blong Pija Long Pej 8, 9]
Long ol yia 500 B.K.T., ol man Jyu we oli stap tru long God mo we oli bildim bakegen haos prea, oli lanem se Jeova nomo i stampa blong pis we oli save dipen long hem