Long Wol Ya We i No Gat Glad, Oli Stap Glad

MAN we i raetem nyuspepa ya The New York Times, i talem long wan haf blong hem long Janewari 26, 1995, se: “Ol nogud samting we oli hapen long laswan handred yia, oli soemaot se ol yia ya oli blong Setan nomo. Ol man oli soem moa naoia bitim olgeta yia bifo, se oli naf mo oli wantem tumas blong kilim i ded plante milyan man we oli gat defren kala, skul, no oli blong wan narafala grup blong man.”

Dei blong makem 50 yia blong olgeta ya we oli kamaot long ol rabis kalabus blong ol Nasi, i pusum ol man blong raetem ol tok long nyuspepa, olsem hemia antap. Be, rabis fasin ya blong kilim i ded ol man, i stap kamaot yet long sam ples blong Afrika mo Is Yurop.

Fasin blong kilim i ded plante man wantaem, kilimaot wan ful laen blong man, wan laen i kilim i ded plante man long narafala laen ​—⁠nomata wanem tok we oli yusum blong eksplenem ol trabol ya, olgeta fasin ya oli mekem fulap man oli harem nogud tumas. Be, long medel blong ol raf fasin ya long wol, i gat ol man we oli glad tumas. Olsem wan eksampel, bambae yumi tokbaot wanem i hapen long Jemani biaen long yia 1930.

Long Epril 1935, Hitler mo Nasi pati blong hem, oli blokem ol Wetnes blong Jeova blong mekem wok long ol gavman ofis. Oli holem ol Wetnes, oli putum olgeta long ol rabis kalabus, from we ol Wetnes oli no joen nating long ol faet blong wol. (Jon 17:16) Long en blong Ogis 1936, oli holemtaet plante Wetnes blong Jeova wantaem. Oli karem plante taosen blong olgeta ya long ol rabis kalabus. Bighaf blong olgeta oli stap long ol kalabus ya go kasem yia 1945, hemia sipos oli no ded fastaem. ?Be ol Wetnes ya oli mekem wanem taem oli kasem ol raf fasin we i bitim mak, long ol kalabus ya? Maet yumi sapraes blong save se, oli holem fasin glad blong olgeta nating se ol man raonabaot long olgeta oli no glad.

“Ol Bigfala Ston Long Sofmad”

Wan woman Engglan we i stadi long histri, nem blong hem Christine King, i toktok wetem wan woman Katolik we i bin stap long ol rabis kalabus ya. Dokta King i talem se: “Woman ya i talem wan tok we mi no save fogetem. Hem i tokbaot evri samting long saed blong trabol soa mo rabis laef we hem i gat long kalabus. Hem i save ol Wetnes tu, mo hem i talem se ol Wetnes ya oli olsem ol bigfala ston long sofmad, olsem wan strongfala graon long medel blong sofmad ya. Hem i talem se, long olgeta man we oli stap long kalabus, ol Wetnes nomo oli no spet taem ol gad oli pas. Olgeta ya nomo oli fesem ol traem ya we oli no gat fasin agens, be oli gat lav mo hop mo filing ya se i gat risen biaen long ol samting ya.”

?Wanem i mekem ol Wetnes blong Jeova oli naf blong stap olsem “ol bigfala ston long sofmad”? Strongfala bilif blong olgeta long Jeova God mo Pikinini blong hem, Jisas Kraes. From samting ya, Hitler i no win, taem hem i traehad blong spolem Kristin lav mo fasin glad blong olgeta.

Lesin long tok we tufala Wetnes oli talem fefte yia afta we tufala i winim bigfala traem ya long bilif blong tufala. Wan i talem se: “Mi glad tumas we mi bin kasem spesel jans ya blong pruvum se mi laekem Jeova tumas, mo se mi holem fasin tangkyu long Hem, tru long ol rabis mo raf fasin we mi kasem long kalabus. !I no gat wan man we i fosem mi blong mekem samting ya! Long defren fasin, olgeta we oli traem fosem mifala oli ol enemi blong mifala. Oli traem mekem mifala i fraet, blong mekem se mifala i obei moa long Hitler bitim God. !Be oli no winim mifala! Mi glad naoia, mo mi glad taem mi stap long kalabus tu, from we tingting blong mi i no stikim mi.”​—⁠Maria Hombach, we i gat 94 yia.

Narafala Wetnes i talem se: “Mi gat tangkyu mo glad taem mi tingtingbak long ol yia we mi spenem long kalabus. Mifala i kasem hadtaem mo fulap traem long ol yia we mifala i spenem long ol rabis kalabus, long taem blong Hitler. Be mi glad se mi no mestem ol traem ya, from we oli tijim mi blong trastem Jeova fulwan.”​—⁠Johannes Neubacher, we i gat 91 yia.

“Blong trastem Jeova fulwan”​—⁠hemia nao stampa blong glad we ol Wetnes blong Jeova oli kasem. Taswe, oli glad nating se oli stap long wol ya we i no gat glad. Oli soemaot klia se oli glad, long ol Distrik Asembli long ol manis we oli jes pas, we stampa tok blong olgeta se “Ol Hapi Man Blong Presem God.” I gud blong tingtingbak long ol asembli ya we oli bin givim bigfala glad.

[Tok blong pija long pej 4]

Maria Hombach