Raf Fasin i Stap Long Olgeta Ples

WAN man i stap sidaon long trak blong hem, i stap wet se laet long rod i givim saen long hem blong go. Wantaem nomo, man ya i luk wan bigfala man i stap wokbaot i kam, we i stap tok strong, i stap swea, mo i stap saksakem han blong hem olbaot. Kwiktaem nomo, man ya insaed long trak i lokem ol doa mo i satem ol windo blong trak. Be bigfala man ya i stap wokbaot i kam nomo. Hem i bendaon, i seksekem trak ya, mo i pulum doa blong trak. Nao taem hem i luk se samting ya i no wok, hem i faetem windo we i stap long fored blong trak, mo i smasem windo ya evriwan.

?Store ya i kamaot long wan sinema? !No gat! Hem i wan trabol we i kamaot long wan rod long aelan blong Oahu, long Hawai, wan aelan we ol man oli tingbaot olsem wan kwaet ples blong spel mo haremgud.

Yumi no sapraes se wan trabol olsem i kamaot. Olgeta samting olsem ol lok long doa, ol aean blong blokem windo, ol gad blong lukaot long ol store haos, mo ol saen long ol bas we oli talem se “Draeva i no holem wan mane wetem hem”​—⁠oli soemaot klia se: !Raf fasin i stap long olgeta ples!

Raf Fasin Insaed Long Famle

Longtaem bifo, ol man oli luk famle olsem wan ples we man i save harem sefgud insaed long hem. Be, tingting ya blong haremgud long famle, hem i stap jenis kwiktaem. Ol raf fasin insaed long famle, olsem kilim pikinini bitim mak, hasban mo waef tufala i kilkilim tufala, mo wan i kilim narafala i ded, oli stap olsem bigfala nyus long ol nyuspepa long olgeta ples blong wol.

Wan eksampel, Manchester Guardian Weekly i talem se: “Bitim 750,000 pikinini long Briten bambae oli kasem trabol long tingting blong olgeta we bambae i gohed blong longtaem, from raf fasin we oli luk mo kasem insaed long famle.” Ripot ya i risal blong wan stadi we i faenemaot se, long “evri fo woman we ol man blong stadi oli askem kwestin long olgeta, i gat tri we oli talem se pikinini blong olgeta i luk finis raf fasin insaed long famle. Mo kolosap tu long evri tri pikinini oli luk finis we papa i kilim mama blong olgeta.” U.S.News & World Report tu, i tokbaot wan grup long Yunaeted Stet we i givim advaes olsem wanem blong winim fasin blong kilim pikinini bitim mak, mo olsem wanem blong kea long pikinini. Grup ya i talem se: “Kolosap 2,000 pikinini, we bighaf blong olgeta oli no gat 4 yia yet, oli ded evri yia long han blong ol papa mama blong olgeta, no long han blong ol man we oli stap lukaot long olgeta.” Ripot ya i talem se namba ya i bitim namba blong ol pikinini we oli ded from ol akseden long trak, from oli draon long wora, mo from ol kil we oli kasem taem oli foldaon.

Raf fasin insaed long famle i minim raf fasin bitwin long hasban mo waef tu. I gat fasin blong pusum narafala, slavem, kikim, jokem, faetem, mekem narafala i fraet wetem wan naef no wan masket, mo kilim narafala i ded tu. Mo tede, plante hasban mo plante waef tugeta oli mekem raf fasin olsem. Wan ripot i faenem se, long olgeta raf fasin we oli kamaot insaed long mared, 25 pesen blong ol trabol ya man nao i statem, 25 pesen woman i statem, mo 50 pesen, hemia ol faet we tufala tugeta i stampa blong olgeta.

Raf Fasin Long Ples Blong Wok

Long saed blong ol ples afsaed long famle: Bifo, plante man oli tingbaot ples blong wok olsem wan ples we oli save faenem oda, respek, mo kaengud fasin. Be i luk olsem we tingting ya i jenis. Wan eksampel, stadi we Dipatmen blong Jastis long Yunaeted Stet i mekem, i soemaot se evri yia bitim 970,000 man oli kasem raf fasin from narafala long ples blong wok. Ripot we i stap long Professional Safety​—Journal of the American Society of Safety Engineers, i tokbaot trabol ya long wan narafala rod se “25 pesen blong olgeta man blong wok oli save kasem raf fasin long wok.”

Samting we i nogud moa se, raf fasin long ples blong wok, i no jes ol bigfala rao no fasin blong tok swea long narafala nomo. Semfala ripot ya i talem se: “Long Yunaeted Stet, raf fasin we ol man blong wok oli mekem agensem ol masta blong olgeta mo ol narafala man blong wok, i stap kam antap kwik moa bitim ol narafala fasin we ol man oli yusum blong kilim man i ded.” Long 1992, long evri 6 man we oli ded long wok, wan long olgeta ya narafala i kilim hem i ded. Long saed blong ol woman, namba i kolosap 1 long evri 2 woman. I klia se raf fasin i kasem olgeta ples blong wok we bifo oli ol gudfala ples we oli gat oda long olgeta.

Raf Fasin Long Spot Mo Ol Pleplei

Plante man oli joen long wan spot no pleplei, olsem wan gudfala samting blong mekem olgeta oli haremgud, mo blong spel long ol bigfala wok we oli stap mekem long laef. Tede, ol man oli spenem plante bilyan, bilyan vatu long ol pleplei. Blong winim plante mane long olkaen pleplei olsem, ol bigfala kampani blong wokem ol pleplei ya, oli rere blong yusum enikaen trik blong pulum ol man blong pem ol pleplei blong olgeta. Mo wan long ol trik we oli yusum, hemia raf fasin.

Eksampel, Forbes, wan magasin long saed blong bisnes, i givim ripot long saed blong wan kampani we i wokem ol pleplei we oli kolem video-gem. Wan long ol video-gem ya we plante man oli pem, i soem wan man blong faet we i teremaot hed mo bun blong bak blong enemi blong hem, mo long semtaem i gat ol voes we oli singaot se, “!Kilim hem i ded! !Kilim hem i ded!” Be, wan narafala kampani we i wokem sem video-gem ya, i karemaot rabis pija ya blong tufala ya we i faet mo ol blad we i ron. ?Wanem i kamaot from? Taem faswan kampani we i wokem video-gem ya wetem bigfala raf fasin long hem i salem 3 video-gem, narafala kampani i salem 2 nomo. Samting ya i minim se kampani ya we i salem moa video-gem i winim plante moa mane. !Taem oli stat salem video-gem ya blong ol man oli yusum long haos blong olgeta, ol kampani we oli wokem ol gem ya oli winim US$65 milyan (kolosap 6,500,000,000 VT) long tu wik nomo! Taem ol bisnesman oli wantem winim moa mane, raf fasin i jes wan narafala trik blong pulum ol man.

Raf fasin long spot i wan bigfala problem tu. Plante taem, ol man blong spot oli flas from ol raf fasin we oli mekem long narafala. Long 1990, taem oli stap plei spot ya hoki, 86 taem oli mas stopem wan gem blong givim panis from raf fasin blong plei​—⁠neva bifo i gat bigfala namba olsem. Antap long samting ya, ol man oli spolem gem ya from wan bigfala faet we i kamaot mo we i gohed blong tri haoa haf. Wan long ol man we oli plei, i kasem kil we i brekem bun long fes blong hem, i skrasem insaed long ae blong hem, mo i katem skin blong hem. ?From wanem i gat raf fasin olsem? Wan man we i plei long spot ya i eksplenem se: “Taem yu winim wan gem we i gat strong filing i kamaot long hem mo we i fulap long ol faet, yu gobak long haos we yu haremgud from we yu fren moa wetem ol man long tim blong yu. Mi ting se ol faet olsem oli mekem mifala i gat strong filing taem mifala i plei.” I luk olsem se, long plante spot tede, raf fasin i no jes wan rod we man i yusum blong kasem samting we hem i wantem, be raf fasin nao, hemia samting we man i wantem.

Raf Fasin Long Skul

Bifo, skul i stap olsem wan sefples blong ol yangfala, wan ples we oli save fogetem ol wari blong olgeta mo traehad blong kasem moa save mo kam strong moa long bodi. Be, skul i no moa wan sefples. Wan stadi we oli mekem long 1994, i faenemaot se raf fasin mo ol stronghed grup blong yangfala, oli bigfala problem long ol pablik skul long Yunaeted Stet, i bitim trabol long saed blong mane, we i bigfala problem wan yia bifo. ?Trabol ya i nogud olsem wanem?

Taem sam man oli askem kwestin ya long sam yangfala se: “?Yu yu kasem raf fasin finis insaed no raonabaot long skul?” kolosap 25 pesen blong ol yangfala oli ansa se yes. Mo bitim 10 pesen blong ol tija tu, oli ansa yes long kwestin ya. Semfala ripot ya i faenemaot se 13 pesen blong ol studen, ol boe mo gel, oli talem stret se oli bin karem wan masket no wan naef i go long skul samtaem. Bighaf blong olgeta oli talem se oli mekem olsem blong soem olgeta nomo long fored blong ol narafala, no blong protektem olgeta agensem ol trabol. Be wan yangfala we i gat 17 yia i sutum tija blong hem long jes, taem tija i traem karemaot masket blong hem.

Laef i Fulap Long Raf Fasin

I klia se raf fasin i stap long olgeta ples tede. Insaed long famle, long wok, long skul, mo long ol pleplei, yumi stap long medel blong ol man we oli raf. From we yumi luk fasin olsem evri dei, plante man oli ting se raf fasin ya i wan haf blong laef we yumi mas akseptem. Be tingting blong olgeta i jenis taem raf fasin ya i kasem olgeta. Nao oli stat askem se: ?Bambae hem i finis samtaem? ?Yu tu yu wantem save ansa blong kwestin ya? Ale, plis ridim nekis haf.