?Olsem Wanem Long Kasem Glad Long Wok Blong Mekem Disaepol?

WAN bigfala glad we man i save kasem, i blong stap olsem wan man blong wok wetem God. Tede, wok blong God i joen wetem wok blong hivimap ol man we oli laekem stret fasin, blong oli kam insaed long Kristin kongregesen,a mo blong trenem olgeta blong oli gat trufala Kristin fasin blong laef naoia, mo blong oli save kasem laef long nyufala wol.​—⁠Maeka 4:​1-4; Matyu 28:​19, 20; 2 Pita 3:⁠13.

Stat long 1980 kasem naoia, ol Wetnes blong Jeova long Latin Amerika, oli glad tumas blong luk we wan milyan man oli kam disaepol blong Jisas Kraes. Long ples ya we wok blong prij i karem fulap frut, mo we plante man oli respektem mo bilif long Baebol, samfala we oli talemaot gud nyus fultaem oli bin givhan long plante man blong oli givim laef blong olgeta i go long Jeova. From we oli halpem plante man finis, maet oli save tokbaot glad we oli kasem long wok ya blong mekem disaepol. Maet sam long ol advaes blong olgeta, oli givhan long yu blong kasem glad long wok blong mekem disaepol, long ples blong yu.

Luksave Olgeta We Oli Save Kam Ol “Sipsip”

Taem Jisas i sanemaot ol aposol blong hem blong go prij, hem i talem se: “Taem yufala i go long wan taon no wan velej, yufala i mas faenem wan gudfala man we i stret blong yufala i go stap wetem hem.” (Matyu 10:11) Taem yu storeyan wetem ol man, ?olsem wanem yu save luksave olgeta we oli wantem yumi blong halpem olgeta long saed blong speret? Edward, we i prij fultaem blong bitim 50 yia finis, i talem se: “Ol man oli soem se oli wantem help, taem oli rili wantem save plante samting, mo taem oli haremgud long ansa we Baebol i givim.” Carol i ademap se: “Sipos wan man i talem long mi wan prapa trabol no wari blong hem, i minim se hem i stap askem help. Mi traem blong faenem ol save blong givhan long hem, long ol buk blong Watch Tower Sosaeti. Taem mi soem intres olsem long ol man wanwan, plante taem mi save statem wan Baebol stadi wetem olgeta.” Be, samtaem i no isi blong luksave ol man we oli rili intres. Luis i talem se: “Samfala we i luk olsem se oli intres, biaen, oli no moa intres. Be sam narafala we fastaem i luk olsem se oli agens, oli jenis taem oli harem stret tok blong Baebol.” Plante man long Latin Amerika oli respektem Baebol. Taswe, hem i gohed i se: “Mi luksave olgeta ya we oli wantem help long saed blong speret, taem oli agri long tok blong Baebol we mi soem long olgeta.” Taem yu givhan long ol man we oli “stret” blong kasem trutok, blong oli gru kwik long saed blong speret, yu kasem trufala glad mo haremgud. ?Olsem wanem blong mekem samting ya?

Statem Ol Baebol Stadi

Nambawan rod blong givhan long ol man blong kasem save long trutok blong Baebol, i blong yusum ol buk we “slef we i stret mo waes” i wokem, blong stadi Baebol wetem olgeta. (Matyu 24:​45, NW) ?Olsem wanem yu save halpem ol man blong gat fasin tangkyu from ol buk ya blong stadi long Baebol? Edward i talem se: “Ol man oli gat ol defren kaen laef, prapa fasin mo tingting. Taswe mi traem blong yusum ol defren fasin blong statem ol stadi.” Yu no save yusum sem fasin wetem evriwan.

Long saed blong samfala, bifo we yumi statem wan Baebol stadi long buk, yumi nidim blong storeyan plante taem wetem olgeta long saed blong Baebol. Nating se i olsem, wan hasban mo waef we tufala i misinari, oli talem se: “Oltaem mitufala i askem man long faswan visit sipos hem i wantem stadi.” Sem mak bakegen, wan Wetnes we i givhan long 55 man blong kasem mak we oli givim laef blong olgeta long Jeova, i talem se: “Bigfala fasin blong mi blong statem ol Baebol stadi i blong go stret insaed long buk ya, Yu Save Laef Foreva Long Paradaes Long Wol.” Samfala oli no wantem stadi long wan samting nating, be sam narafala oli glad blong stadi samting we oli ting se bambae i givhan long laef blong olgeta. Oli laekem plan ya blong mekem Baebol stadi long haos, we oli no pem. Sam misinari oli eksplenem plan ya long ol man, nao biaen, oli talem se: “Mi laekem blong soem long yu olsem wanem mifala i stadi Baebol. Sipos yu laekem, yu save gohed. Sipos no, hemia i stap long yu blong jusum.” Taem yumi folem rod ya, ol man oli no fraet blong akseptem wan Baebol stadi.

Wan narafala Wetnes we i bin givhan long plante we oli pua mo oli no skulgud, i talem se: “Mi faenem se i gud blong yusum ol traket blong statem ol Baebol stadi.” Olgeta we oli wok fultaem blong tijim Baebol, oli yusum Baebol moa bitim ol buk, nomata wanem buk oli yusum. Carola i talem se: “Long faswan stadi, mi yusum ol pija nomo mo samwe long faef vas blong Baebol. Olsem nao, ol bigfala poen oli klia, mo i mekem ol man oli luksave se i no hadwok tumas blong kasem save long Baebol.”

Mekem Intres Blong Ol Man i Stap Strong

Ol man oli glad taem oli harem se oli stap gohed gud, taswe Jennifer i givim advaes ya, se: “Mekem se stadi i gat laef, mo i gohed.” Mekem stadi oltaem, we yu no mestem wan wik. Mo tu, givhan long ol Baebol studen blong harem se oli stap gohed long saed blong speret. Wan spesel paenia we i gruap long bus, i talem se i impoten blong eksplenem trutok long fasin we i isi blong ol man oli kasem save long hem, mo blong mekem ol bigfala poen oli klia. Olsem nao, olgeta we oli no skulgud tu oli save gohed. Hem i talem se: “Long velej blong mi, mifala i putum wora long garen afta we mifala i planem sid. Sipos mifala i putum tumas wora, bambae graon i kam strong, mo ol gru oli no save kamtru, oli ded. Sem mak nao, sipos yu tokbaot plante tumas poen wetem man we i jes stat blong soem intres, maet hem i ting se i hadwok tumas, nao i no moa wantem gohed.” Mo tu, ol man we oli askem plante kwestin, oli mas luksave se sipos oli wantem gohed gud, oli mas stadi long wan poen nomo, bitim we oli traem stadi long evriwan wantaem. Jisas i talem long ol aposol blong hem se: “Mi mi gat plante narafala samting yet blong talem long yufala. Be naoia, yufala i no save kasem olgeta, oli strong tumas yet long yufala.”​—⁠Jon 16:⁠12.

Narafala rod blong mekem intres blong ol man i stap strong, i blong leftemap tingting blong olgeta we yu visitim olgeta, blong oli gohed blong tingbaot Tok blong God afta we yu aot long haos blong olgeta. Yolanda i talem se: “Stanemap wan kwestin. Givim sam wok long olgeta blong mekem, olsem ridim wan haf blong Baebol, no stadi long wan poen we oli intres long hem.”

Gat Lav Long Jeova

Bambae yu glad moa taem yu givhan long ol studen blong yu blong ‘mekem ol samting we tok ya i talem, i no blong lesin long tok ya nomo.’ (Jemes 1:22) ?Olsem wanem yu save mekem olsemia? Samting we i pusum ol trufala Kristin, hemia se oli laekem Jeova tumas. Pedro, blong Meksiko, i eksplenem se: “Ol man oli no save laekem wan man we oli no save hem. Taswe, taem oli stat blong stadi, mi tijim nem blong God long olgeta, mo mi tekem evri jans blong tokbaot ol fasin blong Jeova.” Long ol storeyan blong yu wetem studen blong yu, yu save mekem se hem i laekem Jeova moa, taem yu tokbaot ol filing blong yu long saed blong Jeova. Elizabeth i talem se: “Oltaem mi traem blong tokbaot gudfala fasin blong Jeova. Taem mi stap mekem wan stadi, sipos mi luk wan naesfala flaoa no pijin, no wan smol puskat we i stap pleplei, oltaem mi talem se hemia wok blong Jeova.” Jennifer i talem se: “Taem yu tokbaot promes blong God long saed blong nyufala wol, soemaot bilif blong yu se hem i wan trufala samting. Askem long studen wanem samting hem i wantem mekem long nyufala wol.”

Taem wan man i tingting dip wetem fasin tangkyu long ol samting we hem i stap lanem long saed blong Jeova, ol save ya bambae i kasem hat blong hem mo i pusum hem blong mekem wok. Be hem i no save tingting dip sipos hem i no rimemba. Fasin blong tingtingbak long tri no fo bigfala poen long en blong ol wanwan stadi, i save givhan long hem blong rimemba. Plante tija blong Baebol oli askem long ol nyufala studen blong raetemdaon ol impoten vas mo wan smol tok blong eksplenem, long las pej blong Baebol blong olgeta. Wan misinari blong Engglan i eksplenem wan narafala gudfala samting we i kamaot from fasin blong tingtingbak long stadi, i se: “Mi askem long hem olsem wanem save ya i givhan long hem. Samting ya i pusum hem blong tingting dip wetem fasin tangkyu long ol rod mo loa blong Jeova.”

Wan Wetnes we i stap tru long God plante yia finis, we i kamaot long namba tri klas blong Gilead skul, i talem se: “Yumi mas hapi. Ol studen blong yumi oli mas luksave se yumi bilif strong long samting we yumi stap tijim long olgeta.” Bilif we i mekem se yu glad “blong mekem samting we tok ya i talem,” i save kasem narafala kwiktaem, sipos yu soemaot bilif ya.​—⁠Jemes 1:⁠25.

Wan Wetnes we i bin givhan long plante man blong oli mekem wosip long Jeova, i talem se: “Mi luk se ol man oli harem se oli kolosap moa long God sipos mi givhan long olgeta blong luksave ansa blong ol prea blong olgeta. Mi tokbaot sam samting we oli bin kamaot long laef blong mi, olsem hemia: Taem mi mo fren blong mi we mitufala i paenia tugeta, i kasem nyufala ples we mitufala i mas wok long hem, mitufala i gat sam smol ligim mo bata nomo i stap. Mitufala i no gat mane nating. Ale, mitufala i flatem evri kakae long naet ya, nao mitufala i talem se: ‘Naoia yumi no moa gat wan samting blong tumora.’ Mitufala i prea long saed ya, afta, mitufala i go slip. Eli long nekis moning, wan Wetnes blong ples ya i kam, i sekhan long mitufala, nao i talem se: ‘Mi prea se bambae Jeova i sanem sam paenia. Tede, mi save joen wetem yutufala kolosap ful dei ya. Be mi mi stap afsaed long taon mo bambae mi kakae wetem yutufala long dina, taswe mi karem kakae ya blong yumi evriwan.’ Hem i karem plante mit mo ligim. Oltaem mi talem long ol studen blong mi se Jeova i no save lego yumi samtaem, sipos yumi lukaot Kingdom blong hem fastaem.”​—⁠Matyu 6:⁠33.

Givhan Long Laef Blong Olgeta

Blong mekem ol disaepol blong Kraes, i minim moa bitim we yumi stadi Baebol wetem olgeta. Wan misinari we i wok plante yia olsem wan elda blong visitim ol kongregesen, i talem se: “Givim taem blong yu long olgeta. No hareap blong ronwe long olgeta afta we stadi i finis. Sipos oli nidim, stap smoltaem mo toktok wetem olgeta.” Elizabeth i talem se: “Mi intres long olgeta from we laef blong olgeta i stap long denja. Plante taem, mi wari long olgeta olsem se oli pikinini blong mi.” Sam narafala Wetnes oli givim advaes ya se: “Visitim olgeta taem oli sik.” “Taem yu pas long haos blong olgeta, maet long wok blong prij, visitim olgeta blong smoltaem blong oli save mitim ol narafala Wetnes tu.” Eva i talem se: “Lesingud blong kasem save long laef blong olgeta bifo, mo ol samting we oli bin kamaot long laef blong olgeta. Ol samting ya, oli save mekem se oli gat sam narakaen tingting long saed blong trutok, mo oli save blokem olgeta blong gohed. Kam wan trufala fren blong olgeta, blong oli save trastem yu mo tokbaot ol trabol blong olgeta wetem yu.” Carol i ademap se: “Trufala intres long man i impoten, from we ol jenis we trutok i mekem long laef blong hem, samtaem i save minim se bambae hem i lusum famle mo ol fren blong hem. Kolosap oltaem, i gud we studen i save haos blong yumi, mo i trastem yumi naf blong kam luk yumi eni taem.” Givhan long hem blong tingbaot kongregesen olsem nyufala famle blong hem.​—⁠Matyu 10:35; Mak 10:​29, 30.

Yolanda i talem se: “Lukaot ol jans blong givhan long studen long laef blong hem. Sidaon wetem hem long ol miting, mo givhan long hem blong lukaot long ol pikinini blong hem.” Taem yumi soem long ol nyuwan ya olsem wanem blong trenem ol pikinini blong olgeta, kam moa klin long saed blong bodi, mekemrere ol ansa blong ol miting, mo givim ol tok long Tiokratik Skul, olgeta samting ya oli haf blong wok blong mekem disaepol. Narafala sista i ademap se: “I impoten blong trenem ol nyuwan long wok blong prij. Taem yumi no mekem trening ya, samfala oli fraet blong prij, oli lusum glad blong olgeta long wok blong Jeova, mo oli no save stanap strong longtaem.” Taswe, trenemgud olgeta long wok blong prij long ol haos wanwan, blong visitim ol man bakegen, mo blong statem ol Baebol stadi. Bambae yu kasem bigfala glad blong luk we help mo fasin blong yu blong lidim studen, i givhan long hem blong gohedgud.

Halpem Olgeta Blong Kam Naf Blong Stanap Strong Longtaem

Wan sista we i givhan long plante narafala blong oli kam disaepol, i givim woning ya se: “I isi blong kam slak long fasin blong stadi, taem studen i baptaes finis. Tija mo studen tu i mas rimemba se wan nyufala Kristin we i jes tekem baptaes i no wan bigman yet long saed blong speret. Hem i mas gru plante yet long saed blong bilif, fasin tangkyu from ol loa blong God, mo lav we hem i gat long Jeova. I impoten blong leftemap tingting blong hem blong wokem gudfala fasin blong stadi hem wan. Olsem nao, bambae hem i gohed blong gru long saed blong speret.​—⁠1 Timote 4:15.

Maet nyuwan ya i nidim help blong gohed moa, mo blong kam wan memba blong kampani blong ol brata we i glad blong tekem ol narafala oli go long haos blong hem. Maet hem i nidim se yumi lidim hem blong gat stret tingting long saed blong ol mastik blong ol narafala brata, taem hem i stap kam kolosap moa long olgeta. (Matyu 18:​15-35) Maet hem i nidim help blong gat gudhan blong tijim ol narafala, mo blong mekem dip stadi hem wan. Wan misinari i talem se: “Afta we wan studen blong mi i baptaes, hem i wantem kam moa gud long fasin blong tij. Ale, hem i talem long mi se: ‘Mi mas lidim wan nyufala Baebol stadi nekis wik, be mi nidim blong tingtingbak long ol faswan japta we mi bin stadi long olgeta. ?Plis, yu save stadi ol wanwan japta ya wetem mi bakegen? Olsem nao, mi save makemgud fasin blong eksplenem ol vas blong Baebol mo ol pijatok. Nao biaen, mi save yusum olgeta long stadi blong mi.’ Hem i kam wan nambawan tija, mo fo blong ol studen blong hem oli tekem baptaes long wan asembli.”

?From Wanem Wok Blong Mekem Disaepol i No Blong Nating Nomo?

Pamela i talem se: “Taem yumi mekem moa disaepol, i gat moa man blong presem Jeova. Yumi halpem ol man we oli akseptem trutok blong kasem laef. Mi laekem tumas blong tijim ol narafala long saed blong trutok​—⁠!i gud tumas! Yu luk we ol studen blong yu oli stap gru sloslou, oli jenisim plante samting long laef blong olgeta, mo winim plante traem we i no gat rod blong winim sipos speret blong Jeova i no stap wetem olgeta. Plante blong olgeta ya we naoia oli laekem Jeova tumas, oli kam ol gudfala fren blong mi.”

Wan misinari blong Jemani i talem se: “Taem mi tingtingbak long olgeta we mi bin givhan long olgeta blong kam disaepol, sam long olgeta bifo oli man blong sem. Be biaen, oli jenis bigwan, we i hadwok long mi blong bilivim ol jenis we oli mekem blong kam ol man blong wok blong God. Mi luk ol man we oli winim ol bigfala trabol, mo i klia se Jeova i givhan long olgeta. Mi luk ol famle we bifo oli seraot, be naoia oli joengud​—⁠ol pikinini we oli hapi mo ol papa mama we oli mekemgud ol wok blong olgeta. Mi luk ol hapi man we laef blong olgeta i gat mining, mo oli stap presem Jeova. Hemia nao glad we i kamaot from wok blong mekem ol disaepol.”

Yes, i no gat wan glad we i bigwan moa bitim hemia we yumi kasem taem yumi kam wan man blong wok wetem Jeova God blong mekem ol disaepol. Ol store blong ol misinari mo ol paenia oli pruvum samting ya. Yu save kasem semfala glad mo haremgud olsem, sipos yu folem ol advaes ya mo wok wetem olgeta hat blong yu. Wetem blesing blong Jeova, bambae glad blong yu i fulwan.​—⁠Proveb 10:22; 1 Korin 15:⁠58.

[Futnot]