!Lukluk i Go Bitim Ol Samting We Yu Save Luk Naoia!

I WAN blesing taem yumi save luklukgud. Yes, bighaf blong ol man oli talem se i no gat plante samting we oli moa sas bitim we oli save luklukgud. Be, i gat wan fasin blong lukluk we aposol Pol i tokbaot, we i moa sas long ol Kristin bitim fasin blong luklukgud wetem prapa ae blong olgeta. Pol i raetem se: “Mifala i no moa tingbaot ol samting ya we yumi save luk long ae blong yumi. Mifala i stap tingbaot ol samting ya we yumi no save luk.” (2 Korin 4:⁠18) !Tru ya, i wan spesel kaen fasin blong lukluk taem man i save lukluk ol samting we i no save luk wetem prapa ae blong hem! Maet yumi kolem samting ya se nambawan fasin blong lukluk long saed blong speret.

?From Wanem Oli Nidim Fasin Ya?

Ol Kristin long faswan handred yia oli rili nidim nambawan fasin ya blong luklukgud long saed blong speret. Oli stap mekem Kristin minista wok blong olgeta long bigfala hadtaem. Pol i talem olsem se: “Plante taem, mifala i gat trabol, be neva se tingting blong mifala i foldaon. Samtaem, mifala i no save rod, be neva se mifala i lus olgeta. Ol man oli stap ronem mifala, be neva se mifala i no gat fren blong mifala. Ol man oli stap kilim mifala, be neva se mifala i ded olgeta.”​—⁠2 Korin 4:​8, 9.

Nating se ol disaepol we oli gat strong bilif oli kasem ol trabol olsem, oli stanap strong. Wetem strong bilif long God, oli save talem olsem Pol i bin talem: “Neva tingting blong mifala i kam nogud long ol trabol we i kasem mifala. Maet bodi blong mifala i stap kam nogud moa oltaem, be nating. Evri dei, God i stap mekem tingting blong mifala i nyuwan bakegen.” ?Be, wanem samting i mekem tingting blong olgeta i nyuwan bakegen evri dei? Pol i gohed se: “Ol trabol ya we i kasem mifala oli smol nomo, mo oli no save stap longtaem. Be frut blong olgeta i narafala olgeta, i gud tumas long mifala, mo i stap mekem mifala i rere blong go joen long gudfala laef ya blong God long heven, we i no save finis samtaem. Nao mifala i no moa tingbaot ol samting ya we yumi save luk long ae blong yumi. Mifala i stap tingbaot ol samting ya we yumi no save luk. From we ol samting ya we yumi save luk long ae blong yumi, oli blong stap smoltaem nomo. Be ol samting ya we yumi no save luk, oli blong stap oltaem, gogo i no save finis.”​—⁠2 Korin 4:​16-18.

Pol i leftemap tingting blong ol brata blong hem long saed blong speret blong no letem ol trabol, hadtaem, fasin agens blong ol man​—⁠enikaen trabol​—⁠oli mekem se oli no moa lukluk klia nambawan pei we bambae oli kasem long fyuja. Oli mas lukluk i go bitim ol trabol we oli stap kasem. Oli mas lukluk i go nomo long gudfala blesing we bambae oli kasem from we oli folem Kristin rod. Samting ya nao i halpem olgeta blong mekem tingting blong olgeta i strong bakegen evri dei, blong oli gohed long faet we oli stap mekem. Ol Kristin tede tu oli nidim gudfala fasin ya blong luklukgud long saed blong speret.

!Luk Ol Trabol Naoia Olsem We i Blong Smoltaem Nomo!

Evri dei, yumi mas luk ol samting we yumi no laekem blong luk. Taem yumi lukluk long glas, yumi luk klia ol mak mo ol poen long prapa bodi blong yumi, we oli soemaot se yumi no stretgud olgeta. Taem yumi yusum Tok blong God olsem wan glas blong lukluk, yumi luk ol mastik mo ol trabol long saed blong speret long yumi mo long ol narafala man. (Jemes 1:​22-25) Mo taem yumi luk long nyuspepa mo televisin evri dei, ol store blong kruked fasin, raf fasin, mo ol bigfala trabol we oli stap kasem ol man, oli stikim hat blong yumi mo mekem yumi harem nogud.

Setan i wantem se tingting blong yumi i foldaon from ol samting we yumi luk, no yumi tingting tumas long olgeta ya mekem se bilif blong yumi i kam slak. ?Olsem wanem yumi save blokem samting ya? Yumi mas folem eksampel blong Jisas Kraes, olsem aposol Pita i talem se: “Hemia wan fasin we God i singaot yufala blong karem, from we Kraes, hem i harem nogud long bodi blong hem, blong sevem yufala, mo hem i soemaot fasin ya long yufala, blong bambae yufala i biaen long hem.” (1 Pita 2:21) Jisas i givim eksampel we i stretgud, long olgeta fasin blong Kristin laef.

Taem Pita i tokbaot Jisas olsem eksampel blong yumi, hem i talem se Jisas i harem nogud long bodi blong hem. Yes, Jisas i safa bigwan taem hem i stap long wol ya. Olsem “nambawan man blong wok” blong Jeova taem God i wokem man, hem i save stret ol samting we God i wantem long saed blong ol man. (Proveb 8:​30, 31) Be taem hem i stap long wol, hem i luk wetem prapa ae blong hem, ol samting we i kamaot long ol man from sin mo from we oli no obei long God. Evri dei hem i luk mo i fesem ol sin mo ol slak fasin blong ol man. Samting ya i mas traem hem bigwan.​—⁠Matyu 9:36; Mak 6:⁠34.

Antap long ol trabol blong ol narafala, Jisas i kasem ol prapa trabol blong hem. (Hibrus 5:​7, 8) Be from we hem i save lukluk long fasin we i stretgud olgeta long saed blong speret, hem i lukluk i go bitim ol trabol ya. Hem i lukluk long pei we bambae hem i kasem from fasin blong holemstrong long God, taem bambae hem i kasem gudfala laef ya long heven we i no save finis samtaem. Long taem ya we hem i stap olsem Mesaea King, bambae hem i gat jans blong karemaot ol trabol we oli mekem laef blong ol man i kam nogud, mo bambae hem i mekem evri samting i stretgud olgeta, olsem Jeova i wantem fastaem. Hem i stap lukluk i go nomo long ol blesing ya long fyuja we hem i no save luk wetem prapa ae blong hem. Samting ya i givhan long hem blong stap glad long wok blong God, nating se hem i luk plante trabol evri dei. Biaen, Pol i raetem se: ‘Hem i luksave we bambae i save haremgud, nao from samting ya, hem i no moa tingbaot se pos ya bambae i mekem bigfala sem long hem, hem i gohed nomo. Mo naoia, hem i stap sidaon long raet saed blong God we hem i king.’​—⁠Hibrus 12⁠:⁠2.

Jisas i no letem ol hadtaem mo traem oli mekem tingting blong hem i foldaon, oli pulum hem i go long narafala rod, no oli mekem bilif blong hem i slak. Yumi ol disaepol blong hem, yumi mas folemgud nambawan eksampel ya blong hem.​—⁠Matyu 16:24.

!Lukluk Ol Samting We Yumi No Save Luk We Bambae Oli Stap Blong Olwe!

Taem Pol i stap tokbaot samting we i mekem Jisas i naf blong stanap strong oltaem, hem i soemaot rod long yumi tu, i se: “Yumi mas mekem tingting blong yumi i strong, blong yumi resis long rod ya we i stap long fes blong yumi. Mo oltaem yumi mas stap luk long Jisas we fasin ya blong bilif blong yumi i stap kamaot long hem nomo.” (Hibrus 12:​1, 2) Yes, blong gohed long Kristin resis ya wetem glad, yumi mas lukluk i go bitim ol samting we oli stap stret fored long yumi naoia. ?Be olsem wanem yumi ‘stap luk oltaem’ long Jisas, mo olsem wanem fasin ya bambae i givhan long yumi?

Wan eksampel: Long 1914, Jisas i kam King long Kingdom blong God, mo naoia i stap rul long heven. Yumi no save luk olgeta samting ya wetem prapa ae blong yumi. Be, sipos yumi ‘stap luk oltaem’ long Jisas, ae blong yumi long saed blong speret bambae i givhan long yumi blong luksave se naoia hem i rere blong finisim ol rabis fasin blong wol ya, mo satem Setan mo ol rabis enjel blong hem long kalabus, we oli no moa save mekem wok blong olgeta. Taem yumi lukluk i go moa yet, ae blong yumi long saed blong speret i soem nambawan nyufala wol we “bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem. Ol samting ya blong bifo oli lus olgeta.”​—⁠Revelesen 19:​11-16; 20:​1-3; 21:⁠4.

Taswe, bitim we ol trabol blong smoltaem we yumi kasem evri dei, oli kam hevi tumas long yumi, i gud we yumi lukluk i go nomo long ol samting we oli blong olwe. Wetem ae blong bilif, lukluk i go bitim ol sik mo fasin griri long doti wol ya. Lukluk i go long paradaes we i fulap long ol man we oli gat strong bodi, oli glad, mo oli tingbaot narafala. Lukluk i go bitim ol mak we oli spolem yumi long bodi mo long saed blong speret tu, mo lukluk taem we yumi fri long olgeta blong olwe from sas sakrifaes blong Kraes. Lukluk i go bitim ol dedbodi we oli stap from ol faet, fasin blong kilim man, mo raf fasin. Lukluk olgeta we oli laef bakegen we oli stap kasem tijing blong stap laef long pis mo folem ol stret fasin blong Jeova.

Antap long hemia, blong ‘luk Jisas oltaem,’ yumi mas putum ae blong yumi long saed blong speret i stap long ol samting we Kingdom, we yumi no save luk hem, i mekem finis long ol man blong God long wol: fasin joengud, pis, lav, filing olsem ol stret brata nomo, mo plante rij samting long saed blong speret. Wan Kristin woman long Jemani i lukluk video kaset ya United by Divine Teaching, nao hem i raetem se: “Video kaset ya i givhan long mi moa blong tingbaot se fulap Kristin brata mo sista raon long wol oli stap holemstrong long wok blong Jeova, stret long menet ya​—⁠nating se plante man oli agensem olgeta. !Fasin blong yumi blong joengud olsem wan brata nomo, i sas tumas long wol ya we i fulap long raf fasin mo fasin blong no laekem narafala man!”

?Yu tu yu “luk” se Jeova, Jisas, ol gudfala enjel, mo plante milyan narafala Kristin, oli stap stanap kolosap long yu? Sipos yes, bambae yu no tingting tumas long ‘ol wari blong laef long wol ya’ we i save mekem tingting blong yu i foldaon, mo mekem se yu “no karem frut” long Kristin wok blong yu. (Matyu 13:22) Taswe, blong ‘luk Jisas oltaem,’ putum ae blong yu long saed blong speret i stap long Kingdom blong God we i stanap finis mo ol blesing blong hem naoia mo long fyuja.

!Stap Laef Blong Luk Ol Samting We Yu No Save Luk Naoia!

Taem yumi luk olsem wanem nyufala wol blong God we bambae i stap blong olwe i defren long wol blong tede we i stap lus, samting ya i mas pusum yumi blong mekem ol fasin we oli soem se yumi naf blong stap laef mo luk wetem prapa ae blong yumi ol samting we yumi save luk nomo wetem ae blong bilif tede. Bambae i hadwok long bigfala hif blong man we oli laef bakegen, blong bilivim se ol samting we oli luk i rili tru. Taem oli girap bakegen, bambae oli luk wan paradaes wol we i gat stret fasin nomo long hem, mo i defren olgeta long wol we oli luk bifo we oli ded. !Traem tingbaot glad blong yumi blong stap laef mo mekem welkam long olgeta, mo blong eksplenem long olgeta ol samting we God i bin mekem!​—⁠Skelem wetem Joel 2:​21-27.

!Yes, i impoten tumas we ae blong yumi long saed blong speret i gud, mo we yumi stap lukluk klia nomo! Yumi save mekem olsem sipos yumi wanwan i stadi Baebol oltaem, go long ol Kristin miting, toktok wetem ol narafala long hop blong yumi we i stanap long Baebol, mo impoten moa long ol samting ya, prea long God blong i lidim yumi. !Ol samting ya bambae oli mekem se yumi gohed blong luklukgud mo klia long saed blong speret, mo yumi naf blong lukluk i go bitim ol samting we yumi luk naoia!