‘?Mi Mi Impoten Long Tingting Blong God?’

“?MI MI Impoten? ?God i Stap Tingbaot Mi?” Hemia stampa tok blong wan store long nyuspepa ya Christianity Today. Philip Yancey, man we i raetem store ya, i talem se: “Bighaf blong wok blong mi olsem wan man blong raetem buk, i joen wetem problem ya we man i harem nogud. Oltaem mi mi stap kambak long ol semfala kwestin nomo, olsem we mi stap tajem bakegen wan soa we i no kamgud yet. Ol man we oli ridim ol buk blong mi oli raet i kam, mo ol store blong ol trabol long laef blong olgeta, oli pruvum se i gat risen blong mi askem ol kwestin olsemia.”

Maet samtaem yu tu yu bin tingbaot sipos God i intres long laef blong yu, no no gat. Yes, maet yu yu save vas blong Jon 3:​16, we i talem se: “God i laekem tumas ol man long wol, nao hem i givim mi, mi stret Pikinini blong hem, mi wan nomo we hem i gat.” No maet yu bin ridim Matyu 20:28, we i talem se Jisas i kam ‘blong givim laef blong hem blong pem rod blong plante man oli gofri.’ Be, maet yu stap askem yet se: ‘?God i luksave mi? ?Hem i stap tingbaot mi?’ I gat gudfala risen blong bilif se yes, hem i tingbaot yumi wanwan. Bambae yumi luk from wanem yumi talem olsem.