!Holem Promes We Yu Mekem Taem Yu Mared!

DEI blong mared i wan dei blong glad. Be hem i wan taem blong tinghevi tu. Man mo woman we i mared, tufala i mekem wan strongfala promes we bambae i jenisim ful laef blong tufala biaen. Ol man we oli stap taem tufala i mared, oli ol wetnes blong strongfala promes ya. Be Jeova God nao i faswan Wetnes long taem ya.

Baebol i no talem ol spesel fasin blong folem long taem blong mared, mo hem i no talem olsem wanem blong mekem sevis blong mared. Be, from we God i stampa blong mared, oltaem ol man oli folem kastom ya blong mekem mared i strong, tru long wan promes we man mo woman tufala i mekem long sevis long jyos. Blong plante yia nao, ol Wetnes blong Jeova oli bin mekem promes long taem blong mared, olsem: “Mi⁠—⁠—mi tekem yu⁠—⁠—blong kam (waef/hasban) blong mi. Bambae mi laekem yu mo lukaotgud long yu (woman: mo soem dip respek long yu), folem loa blong God long Baebol we i stret long ol Kristin (waef/hasban), long olgeta yia we yumitu stap laef tugeta long wol ya, aninit long plan we God i putumap long saed blong mared.”a

Wan Samting Blong Tingbaot

Sipos yu stap tingbaot blong mared, i impoten tumas we yu tingbaot dip mining blong promes ya bifo we yu mared. Solomon i talem se: “Yu no mas kwik blong talem wan tok. Mo long saed blong hat blong yu, yu no mas letem hem i kwik blong talem wan tok long fored blong trufala God.” (Eklesiastis 5:2) Be, ?olsem wanem sipos yu yu mared finis? Ale, fasin blong tingting dip long impoten mining blong strongfala promes we yu bin mekem long fored blong Jeova, i save givhan long yu tu. ?Yu yu stap folem promes ya? Ol Kristin oli tinghevi long ol promes we oli mekem. Solomon i gohed i se: “Wanem we yu promes long hem, yu mekem. I moagud we yu no mekem wan promes, i bitim we yu promes nao yu no mekem. Yu no letem maot blong yu i mekem bodi blong yu i sin. Yu no talem long fored blong wan enjel se yu bin mekem wan mastik.”​—Eklesiastis 5:​4-6.

Sipos yumi lukluk long ol wanwan tok blong promes ya blong mared, bambae samting ya i mekem se yu kasem save klia moa long strongfala promes ya.

“Mi​—⁠​—⁠mi tekem yu”: Hemia ol faswan tok blong promes ya. Oli soemaot se yu rere blong mekem olgeta wok we oli joen wetem disisen blong yu blong mared.

Long Kristin plan, i no gat wan vas long Baebol we i fosem man blong mared. Jisas Kraes i neva mared. Mo hem i leftemap tingting blong olgeta we oli ‘save holem fasin ya,’ blong oli stap olsem nomo. (Matyu 19:10-​12) Be, bighaf blong ol aposol blong Jisas oli man we oli mared finis. (Luk 4:​38; 1 Korin 9:5) I klia se disisen ya blong mared i blong wanwan man nomo blong mekem. I no gat wan man we Baebol i givim raet long hem blong fosem wan narafala man blong mared.

Taswe, sipos yu jusum blong mared, hemia i bisnes blong yu. Ating yu wan yu jusum hemia we bambae yu maredem. Taem yu mekem promes blong mared, se, ‘Mi mi tekem yu​—​—,’ yu tekem no yu agri blong stap wetem man no woman ya, wetem olgeta gudfala fasin blong hem⁠—mo wetem olgeta slak fasin blong hem tu.

Sloslou, bambae yu faenemaot sam fasin blong hemia we yu mared wetem hem, we yu no bin luksave bifo. Sam samtaem bambae yu harem nogud from. Baebol i talem se, “olgeta evriwan oli mekem nogud finis, mo oli stap longwe long ol gudgudfala fasin blong God.” (Rom 3:​23) Taswe, maet yu nidim blong jenisim sam samting blong mekem se yu save joengud wetem hasban no waef blong yu. Maet samting ya i hadwok, mo ating samtaem yu wantem lego nomo. Be, rimemba se yu bin mekem promes blong mared long fored blong Jeova. Hem i save halpem yu blong winim ol trabol olsem.

“Blong kam (waef/hasban) blong mi”: Long faswan mared, taem Iv i mared long Adam, Jeova God i talem se ‘tufala i mas kam olsem wan bodi nomo.’ (Jenesis 2:​24; Matyu 19:​4-6) Taswe, fasin joen insaed long mared hem i fasin fren we i strong moa bitim ol narafala fasin fren bitwin ol man. Taem yu mared, yu joen long wan nyukaen fasin fren. Yu agri se wan narafala i kam “waef” no “hasban” blong yu. Hemia i defren olgeta long ol narafala fasin fren. Ale, sam fasin blong yumi we oli no save spolem ol fren no famle blong yumi, maet oli save spolemgud hasban no waef blong yumi.

Wan eksampel: Tingbaot advaes we i stap long Efesas 4:​26. Long ples ya, Baebol i talem se: “Sipos yufala i kros, yufala i no letem we kros ya i lidim yufala, blong yufala i mekem ol sin. Yufala i mas no stap kros, gogo kasem san i godaon.” Maet bifo, yu no bin stretem kwiktaem ol problem we yu gat wetem ol famle no fren blong yu, olsem yu mas. Be hasban no waef blong yu, hem i kolosap moa long yu i bitim ol famle mo fren blong yu. Sipos yu no stretem ol trabol kwiktaem wetem hasban no waef blong yu, samting ya i save spolem spesel fasin fren we yutufala i gat.

?Yu yu letem wan smosmol rao blong yutufala i gohed gogo i mekem yutufala i harem nogud mo trabol long tingting? ?Ol smosmol samting we yutufala i no agri long olgeta mo i mekem smol kros i kamaot, oli stap gohed blong plante dei? Blong holem promes we yu bin mekem, taem ol trabol olsem oli kamaot, yu no mas letem wan dei i pas we yu no mekem pis bakegen wetem hasban no waef blong yu. Samting ya i minim se yu mas fogivim mo fogetem ol mastik blong hem, mo tu, yu mas luksave ol mastik mo rong blong yu wan.​—Ol Sam 51:5; Luk 17:​3, 4.

“Bambae mi laekem yu”: Taem man i mared, hem i promes “blong laekem mo lukaotgud long” woman blong hem. Lav ya i minim, filing blong lav bitwin man mo woman we i bin pulum tufala blong laeklaekem tufala fastaem. Be lav ya nomo i no naf. Lav we wan Kristin i promes blong givim long man no woman blong hem, i dip moa mo i bigwan moa.

Efesas 5:​25 i talem se: ‘Yufala man we i mared, yufala i mas laekem woman blong yufala tumas, olsem we Kraes i laekem kongregesenb tumas.’ Lav we Jisas i gat long kongregesen, hem i defren olgeta long filing blong lav long saed blong bodi, we i stap bitwin man mo woman. Tok ya ‘laekem tumas’ we oli yusum insaed long vas ya i kamaot long tok ya a·gaʹpe, we i minim lav we i stanap long ol rul. Long ples ya, Baebol i stap givim oda long hasban blong soemaot lav oltaem long waef blong hem, wan lav we i pulum hem blong stap tru long waef blong hem, mo we i gohed olwe.

Hem i no wan filing olsem se, “Mi mi laekem yu from we yu yu laekem mi,” no gat. Hasban i mas lukaot rod blong mekem i gud long waef blong hem bifo we hem i mekem i gud long hem wan. Mo waef i mas laekem hasban blong hem long sem fasin. (Filipae 2:4) Fasin blong gat wan dip lav long hasban no waef blong yu, bambae i givhan long yu blong holem promes we yu mekem taem yu mared.

“Blong lukaotgud”: Folem tok blong wan diksonari, “blong lukaotgud” i minim ‘blong tinghae long hem, blong gat mo soemaot filing long hem.’ !Yu mas soemaot lav blong yu tru long ol tok mo fasin blong yu! Waef i nidim moa we man blong hem i soemaot lav long hem oltaem. Maet hasban blong hem i lukaotgud long hem long saed blong bodi, be samting ya i no naf. Sam waef oli gat plante kakae mo wan gudfala haos, be oli harem nogud tumas, from we hasban blong olgeta i no toktok mo spenem taem wetem olgeta.

Be, wan waef we i save se hasban blong hem i laekem hem tumas mo i stap lukaotgud long hem, i gat gudfala risen blong stap glad. Mo yumi save talem sem tok long saed blong hasban tu. Trufala lav i save kamaot moa taem tufala i talem ol trufala tok blong lav. Long Sing blong Solomon, boe blong lukaot long sipsip i talem long gelfren blong hem se: “!Sista blong mi, waef blong mi, ol tok blong lav we yu talem oli naes tumas! !Ol tok ya blong lav oli moa gud bitim waen, mo smel blong oel we yu putum i moa naes bitim olgeta kaen senta!”​—Sing blong Solomon 4:​10.

“Soem dip respek”: Long ol handred yia we oli pas, sam man oli spolem mo daonem ol woman. Buk ya World Health i talem se tede tu, “raf fasin agensem ol woman i kamaot long olgeta kantri, long ol haeman mo ol man nating, ol rijman mo ol puaman. Long plante kantri, oli ting se man i gat raet blong kilim waef blong hem.” Maet bighaf blong ol man oli no mekem fasin olsem. Be nating, i luk olsem we plante man oli no soemaot trufala intres long ol samting we woman i wari from. Taswe, plante woman oli gat nogud tingting long saed blong ol man. Sam waef oli talem se: “!Mi mi laekem man blong mi, be mi no save respektem hem!”

Be, Jeova God i tinghae long woman we i traehad blong respektem hasban blong hem​—nating se samtaem man ya i mekem hem i harem nogud. Wan woman we i gat respek i luksave se God nao i givim wan wok, no wan ples long famle, long man blong hem. (1 Korin 11:3; Efesas 5:​23) Taswe, dip respek long hasban i haf long wosip mo fasin obei we waef i mas givim i go long Jeova. God i no ting nating long fasin obei we ol woman oli soemaot.​—Efesas 5:​33; 1 Pita 3:​1-6; skelem wetem Hibrus 6:​10.

Hasban mo waef, tufala tugeta i mas soem respek insaed long mared, mo tufala i mas wokhad blong kasem respek blong narafala, i bitim we oli talem long narafala se hem i mas soem respek. Wan eksampel, ol tok we oli save stikim narafala mo mekem hem i harem nogud, i no mas stap insaed long mared. Sipos yu tokbaot hasban no waef blong yu long fasin we i daonem hem, samting ya i soemaot se yu no gat lav mo respek long hem. Sipos yu soemaot ol rong blong hasban no waef blong yu long ol narafala, no sipos yu tokbaot ol mastik ya long fored blong plante man, yu no save mekem wan gudfala samting i kamaot. Nating se yu yusum ol tok plei nomo blong talem ol samting ya, yu save soem se yu no gat respek nating. Ol tok blong Efesas 4:​29, 32 oli stret long hasban mo waef tugeta. Long ples ya, Baebol i talem se: ‘Long ol toktok blong yufala, yufala i mas no talem ol rabis tok we i save spolem man. Yufala i mas talem ol gudfala tok, we i save mekem ol man we oli slak oli kam strong moa. Yufala i mas wokem i gud long yufala, yufala i mas gat sore long yufala.’

“Folem loa blong God long Baebol”: God i wantem se yumi fri blong jusum wanem we yumi wantem mo wanem we yumi mekem. Hem i no mekem i hevi tumas long yumi from plante rul we yumi mas folem insaed long mared. Be, blong givhan long yumi, hem i givim sam advaes.

Tede, i gat plante buk we oli tokbaot mared, mo plante man oli gat prapa waes blong olgeta long saed ya. !Be lukaot! Bighaf blong ol advaes we i stap kamaot long saed blong mared i agensem Baebol.

Yu mas luksave tu se laef blong ol man mo woman we oli mared oli defdefren. Long wan fasin, ol man mo woman we oli mared, oli olsem sno we i stap folfoldaon. Taem yu lukluk sno longwe, i luk sem mak nomo, be taem yu luklukgud ol smosmol pis blong sno, olgeta wanwan oli defdefren. I no gat wan narafala hasban mo waef long wol, we oli gat sem fasin olsem yu mo hasban no waef blong yu i gat. Taswe, yu no mas kwik blong folem advaes blong ol narafala man. !I no gat wan advaes we man i stampa blong hem we i stretgud long evri mared!

Be, ol loa blong Baebol oli tru mo oli save wok long laef blong ol man. Aposol Pol i raetem se: “Olgeta tok ya blong Baebol oli kamaot long God fastaem. Hem i putum long tingting blong ol man ya bifo blong oli raetem long buk. Nao ol tok ya i stret gud blong tijim ol man long ol trutok, mo blong blokem ol krangke tok. Mo i stret gud blong stretem ol krangke fasin.” (2 Timote 3:​16; Ol Sam 119:151) Sipos yu ridim Baebol mo letem ol tijing blong hem oli lidim yu evri dei, bambae yu save holem promes we yu bin mekem taem yu mared.​—Ol Sam 119:105.

“Long olgeta yia we yumitu stap laef tugeta long wol ya”: Hemia i stap talem se bambae tufala i stap tugeta blong olwe. God i givim oda se “man i mas aot long papa mo mama blong hem, i go joen wetem woman blong hem.” (Jenesis 2:​24) Jeova i wantem se yutufala i stap tugeta. Mekem wok blong God tugeta. Stadi long Tok blong hem tugeta. Tekem taem blong wokbaot tugeta, sidaon tugeta, kakae tugeta. !Haremgud long laef blong yutufala tugeta!

Samfala hasban mo waef oli traehad blong putum smol taem evri dei jes blong storeyan tugeta. Nating se man mo woman i mared blong plante yia finis, fasin ya blong mekem ol samting tugeta i impoten blong stap glad insaed long mared.

“Aninit long plan we God i putumap long saed blong mared”: Mared i wan presen we Jeova God i givim. Hem nao i bin stanemap plan ya long saed blong mared fastaem. (Proveb 19:14) Sipos yu no folemgud plan ya blong hem, bambae yu spolem glad insaed long mared, be antap moa, bambae yu spolem fasin fren blong yu wetem Man ya we i Wokem olgeta samting. Taem hasban mo waef i gat gudfala fasin fren wetem Jeova, we oli soemaot taem oli obei long ol rod blong hem, bambae oli gat pis wetem ol narafala man mo pis bitwin long tufala.​—Proveb 16:7.

Yu mas neva fogetem se Jeova nao i faswan Wetnes long promes we yu mekem taem yu mared. !Gohed blong holem promes ya, mo mared blong yu bambae i presem mo givim ona long Jeova God!

[Ol futnot]

[Tok Makem Poen Pija Long Pej 22]

Long wan fasin, ol man mo woman we oli mared, oli olsem sno we i stap folfoldaon. Taem yu lukluk longwe, maet olgeta hasban mo waef oli luk sem mak nomo, be rili, oli defdefren

[Credit Line]

Snow Crystals/Dover