Mekem Lafet Blong Memoriol Long Fasin We i Stret

LONG naet blong Naesan 14, 33 K.T.,a Jisas i stanemap lafet blong Memoriol.b Hem i jes finis blong mekem lafet blong Pasova wetem ol 12 aposol blong hem, taswe yumi save stret dei blong lafet ya. Afta we Jisas i sanem gyaman fren ya, Judas, i goaot, hem i ‘tekem bred, i prea blong talem tangkyu long hem. Nao i brekem, i givim long ol man blong hem, i talem se: “Yufala i tekem. Hemia i minim bodi blong mi.” Mo i tekem wan kap, i talem tangkyu long God long hem, nao i pasem i go long olgeta, mo olgeta oli dring long hem. Nao i talem se: “Hemia i minim blad blong mi we i blong mekem promes blong God i stanap. Blad blong mi bambae i ron blong sevem plante man.” ’​—Mak 14:22-​24.

Jisas i givim oda long ol disaepol blong hem se oli mas stap tingbaot ded blong hem from we i impoten tumas. (Luk 22:19; 1 Korin 11:23-​26) Sakrifaes ya blong hem nomo, i naf blong tekemaot trabol blong sin mo ded we ol man oli bon wetem. (Rom 5:​12; 6:​23) Bred mo waen we hem i yusum, oli saen blong bodi mo blad blong hem we oli stretgud olgeta. From we yumi save stret dei blong lafet ya long taem bifo, yumi save mekem lafet ya evri yia long dei we i laenap wetem stret dei ya, olsem ol man Jyu oli bin mekem wetem lafet blong Pasova. Be yumi mas mekem olsem long fasin we i stret. ?From wanem?

Aposol Pol i talem se olgeta we oli kakae bred ya mo dring waen ya, oli “stap soemaot ded blong Masta ya blong yumi, gogo bambae hem i kambak bakegen.” (1 Korin 11:26) Taswe, bigfala risen blong lafet ya i blong tingbaot ded blong Jisas, mo mining blong hem long olgeta man. Lafet ya i wan taem we i impoten, we i blong tingbaot kaengud fasin blong God mo blong soemaot tangkyu long Jeova mo Pikinini blong hem. (Rom 5:8; Taetas 2:​14; 1 Jon 4:​9, 10) Taswe, Pol i givim woning se: “Nao from samting ya, olgeta man we oli stap kakae bred ya, mo oli stap dring long kap ya blong Masta blong yumi long fasin we i no stret, oli stap mekem i no stret long bodi mo blad blong Masta blong yumi.”​—1 Korin 11:27.

Long Fasin We i Stret​—?Olsem Wanem?

I klia se, bambae God i no glad sipos yumi sakem doti long lafet ya, from yumi joen long sam fasin we oli no stret no sam kastom blong ol hiten man. (Jemes 1:​27; 4:​3, 4) Samting ya i minim se yumi no mas joen long bigfala lafet blong Ista. Sipos yumi folem oda blong Jisas blong “mekem samting ya blong tingbaot [hem] bakegen,” bambae yumi wantem mekem Memoriol long fasin we hem i bin mekem. (Luk 22:19; 1 Korin 11:24, 25) Samting ya i minim se yumi mas sakemaot olkaen samting we ol jyos blong Krisendom oli ademap long lafet ya. Buk ya New Catholic Encyclopedia, i talem se: “Lames blong tede i defren bigwan long smol lafet we Kraes mo ol Aposol blong Hem oli bin mekem.” Mo from we Krisendom i mekem Lames ya oltaem, samtaem evri dei, lafet ya i kam olsem wan samting we i no impoten tumas, i no olsem lafet ya we Jisas i bin soemaot.

Pol i raet i go long ol Kristin long Korin blong tokbaot fasin we i stret blong mekem, from we wan problem i bin kamaot long kongregesen yac long saed blong Lodsapa. Samfala oli no gat respek long lafet ya se i tabu. Oli karem prapa kakae blong olgeta i kam mo oli stap kakae bifo no long taem blong miting ya. Plante taem oli kakae mo dring we i bitim mak. Samting ya i mekem se oli wantem slip mo tingting blong olgeta i no kliagud. From we oli no stap wekapgud long tingting blong olgeta mo long saed blong speret, oli no naf blong “save mining blong bodi ya.” From samting ya, oli “stap mekem i no stret long bodi mo blad blong Masta blong yumi.” Be i gat sam narafala man tu, we oli no bin kakae bifo we oli kam long lafet ya, ale, oli harem se oli hanggri mo oli no moa save lesingud. Kolosap olgeta evriwan oli no rere nating blong tekem bred mo waen ya wetem fasin tangkyu mo blong luksave se lafet ya i impoten tumas. Oli fogetem se lafet ya i blong tingbaot ded blong Masta. Samting ya i mekem se oli kasem jajmen, from we oli no soem respek, mo ona, long hem.​—1 Korin 11:27-​34.

I Nidim Fasin Luksave

Sam man oli bin kakae bred mo dring waen long taem blong Memoriol, be biaen, oli luksave se oli no mas mekem olsem. God nao i jusum olgeta we oli gat raet blong kakae bred mo dring waen long Memoriol. Mo tabu speret blong God i givim wetnes blong samting ya long ol man ya. (Rom 8:​15-​17; 2 Korin 1:​21, 22) I no from we oli mekem prapa disisen blong olgeta no from we oli gat strong tingting long saed ya, we i mekem se oli naf. God i makem stret namba blong ol man we bambae oli rul wetem Kraes long heven. Namba blong olgeta ya hem i 144,000, wan namba we i smol nomo taem yumi skelem wetem olgeta man we oli stap kasem blesing from ransom sakrifaes blong Jisas Kraes. (Revelesen 14:​1, 3) God i stat jusum ol man ya long taem blong Jisas, taswe tede, smol man nomo oli stap kakae bred mo dring waen long Memoriol. Mo taem olgeta ya oli stat kam olfala mo oli ded, namba ya i mas godaon.

?From wanem sam man oli kakae bred mo dring waen blong Memoriol we oli no gat raet blong mekem olsem? Maet hemia from ol tingting blong skul we wan man i gat bifo​—se olgeta gudfala man oli go long heven. No maet man ya i wantem tumas blong leftemap hem wan no i tingbaot hem wan nomo​—wan filing se hem i gat raet blong kasem haenem i bitim ol narafala​—mo hem i wantem tumas blong kasem hae ples antap long ol narafala. Maet man ya i gat sam strong filing from wan bigfala problem no akseden we i bin kamaot long hem, mekem se hem i no moa wantem laef long wol ya. Maet samting ya i save kamaot tu from we man ya i frengud wetem wan narafala we i gat hop blong go long heven. Be, yumi evriwan i mas rimemba se disisen ya i blong God nomo, i no stap long yumi. (Rom 9:​16) Taswe, sipos wan man “i luklukgud long laef blong hem,” nao hem i luksave se hem i bin mekem i no stret taem hem i stap kakae bred mo waen, hem i mas stopem fasin ya naoia.​—1 Korin 11:28.

Fyuja we God i wantem givim long bighaf blong ol man, hemia laef we i no save finis long wan paradaes long wol. Hemia wan nambawan blesing blong tingbaot, mo hem i wan hop we i pulum yumi. (Jenesis 1:​28; Ol Sam 37:​9, 11) Hem i long wol ya nomo we ol man we oli stap tru long God bambae oli joen bakegen wetem famle blong olgeta we oli laef bakegen long ded. Bambae i gat ol stret man we oli bin laef bifo, olsem Ebraham, Sera, Moses, Rehab, Deved, mo Jon Baptaes​—olgeta evriwan ya oli ded bifo we Jisas i openem rod blong kasem laef long heven.​—Matyu 11:11; skelem wetem 1 Korin 15:20-​23.

Blong mekem Lodsapa long stret fasin, olgeta we oli gat hop blong laef long wol ya oli joen wetem ol narafala long lafet ya, mo oli lesin wetem respek, nating se oli no kakae bred mo dring waen. Olgeta tu, oli kasem blesing blong sakrifaes blong Jisas Kraes, we i mekem se God i agri long olgeta. (Revelesen 7:​14, 15) Taem oli stap lesin long tok we brata i givim long Memoriol, fasin tangkyu blong olgeta from ol tabu samting i kam strong moa, mo strong filing we oli gat blong stap joengud wetem ol man blong God long olgeta ples i gru moa.

Long yia ya, afta we san i godaon long Tusde, Epril 2, Memoriol bambae i gohed long bitim 78,000 kongregesen blong ol Wetnes blong Jeova long olgeta ples long wol. ?Bambae yu yu stap long taem ya?

[Ol futnot]

[Tok Blong Pija Long Pej 8]

Ol Wetnes blong Jeova oli mekem Memoriol wan taem evri yia