Oltaem Yu Mas Putum Ol Trabol Blong Yu Long Jeova
PLANTE man tede oli harem se ol trabol oli hevi tumas long olgeta. Oli trabol long saed blong mane, oli gat problem insaed long famle we i mekem se oli harem nogud, oli gat problem blong helt, oli harem soa mo oli safa from strong fasin we narafala i mekem long olgeta, mo plante narafala smosmol trabol we oli hevi long olgeta olsem we oli stap karem wan hevi ston. Antap long ol trabol ya, samfala oli harem nogud from filing ya se oli nating nomo, mo se oli no save mekem wan gudfala samting from we oli gat plante tumas slak fasin. Plante oli wantem lego faet ya nomo. ?Yu save mekem wanem taem ol trabol ya oli kam hevi bitim mak?
Wan taem, King Deved blong Isrel i harem se trabol we hem i kasem i hevi tumas long hem. Ol Sam 55 i talem se hem i harem nogud bitim mak from wari long saed blong ol enemi blong hem we oli stap mekem i strong tumas long hem mo oli agensem hem. Hem i harem nogud tumas long hat blong hem mo i fraet. Hem i save krae nomo from we hem i harem nogud tumas. (Ol Sam 55:2, 5, 17) Be, nating se hem i harem nogud olsem, hem i faenem wan rod blong winim samting ya. ?Olsem wanem? Hem i lukluk i go long God blong i givhan long hem. Hem i givim advaes long ol narafala we maet oli harem olsem hem, se: “Yufala i mas putum ol trabol blong yufala long Hae God.”—Ol Sam 55:22.
?Hem i minim wanem taem hem i talem se “putum ol trabol blong yufala long Hae God”? ?Hem i minim nomo se yumi prea long Jeova mo talemaot olgeta wari blong yumi? no ?yumi save mekem wan samting blong stretem ol trabol we yumi kasem? ?Olsem wanem sipos yumi harem se yumi no naf blong toktok wetem Jeova? Yumi save faenemaot mining blong tok blong Deved sipos yumi tokbaot sam samting we oli hapen long hem, we maet hem i stap tingbaot taem hem i raetemdaon ol tok ya.
Mekem Ol Samting Long Paoa Blong Jeova
?Yu rimemba olsem wanem bigfala man ya Golaeat i mekem ol man blong faet long Isrel oli fraet? Bigfala man ya, we hem i longfala olsem kolosap 3 mita, i mekem olgeta oli fraet bigwan. (1 Samuel 17:4-11, 24) Be Deved i no fraet. ?From wanem? From we hem i no traem winim Golaeat long prapa paoa blong hem nomo. Stat long taem we oli jusumaot hem blong kam king long Isrel, hem i letem speret blong God i lidim mo givim paoa long hem long olgeta samting we hem i mekem. (1 Samuel 16:13) Taswe, hem i talem long Golaeat se: “Mi kam long yu long nem blong Jeova blong ol ami, God ya blong faet long saed blong ol man Isrel, we yu yu stap jikim hem. Tede Jeova bambae i letem yu yu go long han blong mi.” (1 Samuel 17:45, 46) Deved i gat gudhan blong yusum rop blong sakem ston, be yumi save sua se tabu speret blong Jeova nao i lidim ston ya mo i mekem se hem i gat paoa blong kilim Golaeat i ded.—1 Samuel 17:48-51.
Deved i fesem bigfala faet ya mo i win, from we hem i trastem se bambae God i sapotem hem mo givim paoa long hem. Hem i wokem wan gudfala fasin fren wetem God mo i trastem hem. Ating tingting blong hem i kam strong olsem from we Jeova i bin sevem hem bifo. (1 Samuel 17:34-37) Olsem Deved, yu save holemtaet wan strongfala fasin fren wetem Jeova mo trastem fulwan se hem i naf mo i rere blong givim paoa long yu mo givhan long yu long olgeta haf long laef blong yu.—Ol Sam 34:7, 8.
Mekem Evri Samting We Yu Save Mekem Blong Winim Ol Problem
Be, samting ya i no minim se bambae yumi neva harem i soa, wari, mo fraet, olsem Ol Sam 55 i soemaot klia. Sam yia afta long taem ya we Deved i soemaot fasin no fraet from tras we hem i gat long Jeova, hem i stat fraet bigwan long fored blong ol enemi blong hem. King Sol i no moa laekem hem, nao Deved i mas ronwe blong sevem laef blong hem. Traem tingbaot olsem wanem ol filing blong Deved oli trabol, ol kwestin we maet hem i stap tingbaot long saed blong rod we stampa tingting blong Jeova bambae i kamtru long hem. God i jusumaot hem finis blong bambae i kam king long Isrel, be hem i stap laef olsem wan man we i stap haed long draeples, we ol man oli stap ronem hem olsem wan wael anamol. Taem hem i traem haed long taon blong Gat, hemia taon we Golaeat i stap long hem, ol man oli luksave hem. ?Wanem i kamaot from? Store blong Baebol i talem se “hem i fraet tumas.”—1 Samuel 21:10-12.
Be hem i no letem fraet mo wari oli blokem hem blong lukluk i go long Jeova blong i halpem hem. Long Ol Sam 34 (we Deved i raetem from trabol ya we hem i kasem), hem i talem se: “Mi mi prea long Hae God, nao hem i ansa long mi, i tekemaot olgeta fraet long mi. Taem ol man oli stap spolem mi, mi singaot i go long Hae God, nao hem i harem mi, i tekemaot mi long olgeta trabol blong mi.”—Ol Sam 34:4, 6.
Yes, Jeova i givhan long hem. Be, yumi makem se Deved i no jes sidaon mo wet se bambae Jeova i sevem hem. Hem i luksave se hem i mas traehad long evri rod blong winim hadtaem ya we hem i stap long hem. Hem i luksave se Jeova nao i sevem hem, be hem tu i mas tekem aksin. Hem i gyaman se hem i krangke ale, king blong Gat i no kilim hem i ded. (1 Samuel 21:14 kasem 22:1) Yumi tu, yumi mas mekem evri samting we yumi naf blong mekem, blong winim ol traem, i bitim we yumi jes wet long Jeova blong i sevem yumi.—Jemes 1:5, 6; 2:26.
No Mekem Baden Blong Yu i Kam Hevi Moa
Samtaem biaen, Deved i lanem wan lesen we i mekem hem i harem soa. ?Wanem lesen ya? Hemia se samtaem yumi nomo yumi mekem ol baden blong yumi oli hevi moa. Afta we Deved i winim faet agensem ol man Filistia, hem i kasem trabol taem hem i mekem disisen blong muvum bokis blong kontrak i go long Jerusalem. Store i talem long yumi se: “Ale, Deved mo olgeta man we oli stap wetem hem, oli girap, oli go long Bal-juda blong karem bokis blong trufala God . . . Be, oli putum bokis blong trufala God i go long wan nyufala kat we buluk i pulum, . . . nao Usa mo Ahio, tufala pikinini blong Abinadab, oli lidim nyufala kat ya.”—2 Samuel 6:2, 3.
Taem oli yusum wan kat blong muvum Bokis ya, oli brekem olgeta rul we Jeova i givim long saed ya. Hem i bin mekem i klia long olgeta se ol man Livae long laen blong Kohat nomo oli gat raet blong karem bokis ya. Mo, oli mas karem long solda blong olgeta, we oli yusum ol longfala pos we oli pusum i gotru long ol ring we oli mekem long tufala saed blong Bokis ya. (Eksodas 25:13, 14; Namba 4:15, 19; 7:7-9) From we oli no folem ol rul ya, oli kasem trabol. Ol buluk we oli stap pulum kat ya, kolosap oli kafsaedem bokis ya, nao Usa, we maet hem i wan Livaet be i no wan pris, i kwik blong holem Bokis ya. Be wantaem nomo Jeova i kilim hem i ded, from we hem i no soemaot respek mo ona.—2 Samuel 6:6, 7.
Deved we hem i king, i gat sam fol from samting ya we i bin hapen. Fasin blong Deved i soemaot se nating we wan man i gat wan gudfala fasin fren wetem Jeova, be hem i save mekem sam fasin we oli no stret taem hem i fesem ol traem. Fastaem Deved i kam kros. Mo biaen, hem i fraet. (2 Samuel 6:8, 9) Fasin blong hem blong trastem mo fren wetem Jeova i kasem bigfala traem. From we hem i no folem ol oda blong Jeova long taem ya, i luk olsem se hem i no putum ol trabol blong hem long han blong Jeova. ?Ating samting ya i sem mak long yumi samtaem? ?Olsem wanem? ?Yumi stap talem se i fol blong Jeova taem yumi kasem ol trabol from we yumi no folem ol rul blong hem?—Proveb 19:3.
Winim Filing Blong Gat Poen Long Fes Blong God
Biaen, Deved i mekem wan bigfala sin agensem ol stretfala rul blong Jeova. Trabol ya i hevi tumas long hem from hem i harem se hem i gat bigfala poen long fes blong God. Long taem ya, Deved i no mekem wok blong hem blong lidim ol man blong hem long faet. Hem i stap long Jerusalem, taem ol man blong hem oli go faet. Samting ya i mekem bigfala trabol i kamaot.—2 Samuel 11:1.
King Deved i luk naesfala woman ya Batsiba we i stap swim. Nao i slip wetem hem, mo woman ya i gat bel. (2 Samuel 11:2-5) Blong traem haedem rabis fasin ya, hem i mekem plan blong bambae hasban blong woman ya, Uraea, i livim faet mo i kambak long Jerusalem. Be, Uraea i no wantem slip wetem woman blong hem long taem ya we ol man Isrel oli stap joen long faet. (2 Samuel 11:6-11) Nao Deved i mekem wan gyaman mo rabis fasin blong traem haedem sin blong hem. Hem i mekem plan se ol soldia we oli faet kolosap long Uraea, oli mas livim Uraea i stap long ples we faet i strong moa, blong bambae hem i kasem kil mo i ded. !Hemia wan bigfala sin, we i rabis olgeta!—2 Samuel 11:12-17.
Be biaen, sin blong Deved i kam long klia ples mo hem i mas talemaot. (2 Samuel 12:7-12) Traem tingbaot bigfala soa we Deved i kasem mo tingting we i stikim hem, taem hem i luksave se sin we hem i mekem wetem Batsiba i bigwan tumas. Maet filing ya se hem i nogud i mekem tingting blong hem i foldaon bitim mak, antap moa, from we hem i wan man we i gat bigfala filing mo i sofsof nomo. !Maet hem i harem se hem i nogud olgeta!
Be, kwiktaem Deved i luksave se hem i mekem rong, ale hem i talem long profet Natan se: “Mi mi sin agensem Jeova.” (2 Samuel 12:13) Ol Sam 51 i talemaot filing blong hem mo prea blong hem long Jeova God blong i klinim mo fogivim hem. Hem i prea olsem: “Yu wasemaot ol samting nogud long laef blong mi, yu tekemaot olgeta samting nogud yu mekem mi mi klin. Mi mi luksave ol rabis fasin blong mi, oltaem mi mi savegud ol sin blong mi.” (Ol Sam 51:2, 3) Hem i rili tanem tingting blong hem from sin, taswe hem i gat jans blong kam kolosap long Jeova mo gat wan fasin fren wetem hem we i strong bakegen. Deved i no holemtaet ol filing blong harem nogud mo tingting se hem i olsem nating nomo. Hem i sakem olgeta trabol blong hem long Jeova, taem hem i gat tingting daon mo i luksave rong blong hem. Hem i soemaot trufala fasin blong tanem tingting from ol sin, mo hem i prea oltaem blong Jeova i fogivim hem. God i glad long hem bakegen.—Ol Sam 51:7-12, 15-19.
Fasin Blong Stanap Strong Taem Ol Man Blong Hem Oli Lego Hem
Naoia yumi tokbaot samting we i pusum Deved blong raetem Ol Sam 55. Hem i harem nogud tumas long filing blong hem. Hem i raetem se: ‘Hat blong mi i harem nogud tumas insaed long mi. Mo tingting blong mi i foldaon gud from we mi fraet long ded.’ (Ol Sam 55:4) ?Wanem samting i mekem hem i harem soa olsem? Absalom, pikinini boe blong Deved, i mekem plan blong stilim ples blong Deved olsem king. (2 Samuel 15:1-6) Fasin ya we prapa pikinini blong hem i mekem wan plan agensem hem long fasin haed, i mekem hem i harem nogud tumas. Be samting we i nogud moa se, man blong givim advaes long Deved we Deved i trastem gud hem, nem blong hem Ahitofel, i joen long plan ya agensem Deved. Long Ol Sam 55:12-14, Deved i stap tokbaot Ahitofel ya nao. From rabis plan ya mo gyaman fasin we oli mekem, Deved i mas aot long Jerusalem. (2 Samuel 15:13, 14) !Ating samting ya i mekem hem i harem nogud tumas!
Be, nating se i olsem, hem i no letem ol strong filing blong sore mo harem nogud oli mekem hem i kam slak long fasin blong hem blong trastem Jeova. Hem i prea blong askem Jeova blong spolem plan blong ol man we oli stap agensem hem. (2 Samuel 15:30, 31) Bakegen, yumi luk se Deved i no jes wet se bambae Jeova nomo i mekem olgeta wok. Taem we hem i gat jans, hem i kwik blong mekem wanem we hem i naf blong mekem, blong faet agensem ol enemi ya blong hem. Hem i sanem wan narafala man blong givim advaes, Usae, i gobak long Jerusalem blong i gyaman se hem i wantem joen long plan ya agensem Deved. Be trufala samting se, hem i wantem spolem plan ya. (2 Samuel 15:32-34) Wetem help blong Jeova, samting we hem i mekem i gat gud risal. Usae i pulum taem gogo Deved i gat naf taem blong mekemrere ol man blong hem blong faet—2 Samuel 17:14.
!Ating long ful laef blong hem, Deved i gat tangkyu long Jeova from we hem i stap lukaotgud long hem mo i gat longfala tingting we i rere blong fogif oltaem! (Ol Sam 34:18, 19; 51:17) From samting ya, Deved i save leftemap tingting blong yumi tede, we laef blong yumi i had, blong lukluk i go long Jeova blong kasem help, yes, blong ‘sakem olgeta trabol blong yumi i go long Jeova.’—Skelem 1 Pita 5:6, 7.
Bildim Mo Holemtaet Wan Strongfala Fasin Fren Wetem Jeova Mo Trastem Hem
?Olsem wanem yumi save kasem wan fasin fren wetem Jeova olsem Deved i gat, wan fasin fren we i givhan long hem taem hem i kasem ol bigfala traem mo trabol? Yumi wokem wan fasin fren olsem taem yumi stadi oltaem long Tok blong God, Baebol. Yumi letem hem i tijim yumi long olgeta loa, rul, mo fasin blong hem. (Ol Sam 19:7-11) Taem yumi tingting dip long Tok blong God, yumi kam kolosap moa long hem, mo yumi kasem save olsem wanem blong trastem hem fulwan. (Ol Sam 143:1-5) Yumi mekem fasin fren ya i kam dip mo i strong moa, taem yumi joen wetem ol narafala man blong wosip, blong kasem moa tijing long Jeova. (Ol Sam 122:1-4) Yumi mekem fasin fren blong yumi wetem Jeova i kam strong moa tru long ol prea we oli kamaot long hat blong yumi.—Ol Sam 55:1.
I tru se, plante taem, Deved, we i olsem yumi, i harem nogud taem fasin fren blong hem wetem Jeova i no strong gud. Ol trabol oli save mekem se yumi “mekem ol krangke samting.” (Eklesiastis 7:7) Be Jeova i luk ol samting we oli stap kamaot, mo hem i save wanem i stap long hat blong yumi. (Eklesiastis 4:1; 5:8) Yumi mas wokhad blong holem fasin fren blong yumi wetem Jeova i stap strong. Ale, nomata wanem trabol i hevi long tingting blong yumi, yumi save dipen long Jeova blong i mekem se ol trabol ya oli no hevi tumas, no blong i givim paoa long yumi blong stanap strong tru long ol traem we yumi kasem. (Filipae 4:6, 7, 13) Samting ya i minim se yumi mas stap kolosap long Jeova oltaem. Taem Deved i mekem olsem, hem i harem se hem i rili stap sef.
Taswe, Deved i talem se wanem trabol we yu kasem, be oltaem yu mas putum ol trabol ya long Jeova. Nao bambae yumi luksave trutok blong promes ya se: “Hem bambae i blokem yufala, i sevem yufala. Hem i no save letem stret man i lus.”—Ol Sam 55:22.