Ridim Tok Blong God Mo Wosipim Hem Wetem Trutok
“Hae God, plis yu tijim mi long ol samting we yu wantem blong mi mi mekem, nao bambae mi obei long yu, mi holem ol trutok blong yu.”—OL SAM 86:11.
1. ?Faswan Wajtaoa i bin talem wanem long saed blong trutok?
JEOVA i sanemaot laet mo trutok. (Ol Sam 43:3) Mo tu, hem i mekem yumi naf blong ridim Tok blong hem, Baebol, mo blong lanem trutok. Faswan Wajtaoa we i kamaot long Julae 1879, i talem se: “Trutok i olsem wan naesfala smol flaoa we i stap gru long wan ples we i wael. Fulap gyaman tok, we oli olsem ol grasnil we oli gru raonabaot long hem, kolosap oli jokem hem. Sipos yu yu faenem trutok ya, yu mas lukaotgud long hem. Sipos yu luk we hem i naes tumas, yu mas sakemaot ol rabis gras mo ol grasnil we oli olsem ol prapa tingting blong yu. Sipos yu wantem kasem trutok ya, yu mas mekem tingting blong yu i stap daon blong yu save karem. Yu no mas glad wetem wan flaoa nomo blong trutok. Sipos wan nomo i naf, God i no save wokem plante. Gohed blong kasem, gohed blong traem faenem moa.” Taem yumi ridim mo stadi long Tok blong God, samting ya i givhan long yumi blong kasem stret save mo wokbaot long trutok blong hem.—Ol Sam 86:11.
2. ?Wanem samting i kamaot taem Esra mo ol narafala man bakegen oli ridim Loa blong God long ol man Jyu long Jerusalem bifo?
2 Afta we ol man Isrel oli bildim stonwol blong Jerusalem bakegen long yia 455 B.K.T., pris Esra mo sam narafala man, oli ridim Loa blong God long ol man Jyu. Ale biaen, i gat Lafet blong ol Wansaed Haos we i mekem bigfala glad i kamaot, mo ol man oli talemaot sin blong olgeta, mo oli mekem “wan plan we i stanap strong.” (Nehemaea 8:1 kasem 9:38) Yumi ridim se: “Olgeta oli gohed blong ridim Loa blong trufala God, long buk ya, long bigfala voes, oli eksplenem, mo oli putum ol mining i go insaed. Mo oli givim dip save long ol man taem oli stap rid.” (Nehemaea 8:8) Sam man blong stadi oli talem se ol man Jyu oli no kasem savegud Hibru lanwis, taswe, oli talemaot mining blong hem long lanwis Aramaik. Be, vas ya i no talem se oli givim mining blong ol wod nomo. Esra mo sam narafala man oli eksplenem Loa, blong bambae ol man oli kasem save long ol rul we oli stap insaed long hem, mo bambae oli folem olgeta. Tede, ol Kristin buk mo miting oli givhan tu blong ‘putum mining’ i go insaed long Tok blong God. Ol elda tu, we oli “savegud fasin blong tij,” oli mekem samting ya.—1 Timote 3:1, 2; 2 Timote 2:24.
Ol Blesing We Oli Stap Longtaem
3. ?Wanem sam blesing we yumi save kasem sipos yumi ridim Baebol?
3 Taem ol Kristin famle oli ridim Baebol tugeta, oli save kasem ol blesing we oli stap longtaem. Oli save moa long saed blong ol loa blong God, mo oli lanem trutok long saed blong ol defren tijing, profet tok, mo plante narafala samting bakegen. Afta we oli ridim wan haf blong Baebol tugeta, hed blong famle i save askem sam kwestin olsem se: ?Ol tok long haf ya i mas pusum yumi blong mekem wanem? ?Olsem wanem hem i joen wetem ol narafala tijing blong Baebol? ?Long wanem rod yumi save yusum ol poen ya taem yumi stap talemaot gud nyus? Wan famle i save kasem moa save taem oli ridim Baebol, sipos oli jekemap sam poen long Watch Tower Publications Index, mo long sam narafala buk olsem. Tufala buk ya blong Insight on the Scriptures, oli save givhan bigwan.
4. ?Olsem wanem Josua i mas folem oda we i stap long Josua 1:8?
4 Ol rul we yumi faenem insaed long Baebol oli save lidim yumi long laef. Antap moa, fasin blong ridim mo stadi long ‘Baebol i save mekem yumi waes mo i save lidim yumi long rod ya we God i stap yusum blong sevem ol man.’ (2 Timote 3:15) Sipos yumi letem Tok blong God i lidim yumi, bambae yumi gohed blong wokbaot long trutok blong hem, mo bambae yumi kasem ol samting we yumi wantem sipos oli stret long tingting blong God. (Ol Sam 26:3; 119:130) Be, yumi mas traehad blong faenem dip save, olsem Josua we i kam biaen long Moses, i bin mekem. “Buk ya blong loa” i no mas lus long maot blong hem, mo hem i mas ridim buk ya long dei mo long naet. (Josua 1:8) No letem “buk ya blong loa” i lus long maot blong hem, i minim se Josua i no mas les blong talemaot ol gudfala save we i stap insaed long buk ya. Ridim Loa ya long dei mo long naet, i minim se Josua i mas tingting dip long hem, i mas stadi long hem. Long sem fasin, aposol Pol i talem long Timote se hem i mas ‘putum tingting blong hem i strong’—tingting dip long—ol fasin blong hem, minista wok blong hem, mo ol tok we hem i stap tijim ol man long hem. I impoten tumas se Timote, we i wan Kristin elda, i lukaotgud se hem i soemaot gudfala eksampel long laef blong hem, mo se hem i tijim trutok we i stanap long Baebol.—1 Timote 4:15.
5. ?Yumi nidim wanem sipos yumi wantem faenem trutok blong God?
5 Trutok blong God i wan samting we i sas bitim mak. Blong faenem trutok ya, i olsem we yumi mas digim insaed long Baebol, mo gohed oltaem blong stadi long Baebol. Blong yumi kam waes, mo blong yumi kasem save long fasin blong ona mo fraetgud long Jeova, yumi mas letem Bigfala Tija i tijim yumi, olsem we yumi ol pikinini studen blong hem. (Proveb 1:7; Aesea 30:20, 21) Yes, yumi mas yusum Baebol blong pruvum evri samting. (1 Pita 2:1, 2) Ol man Jyu long Berea “oli moa glad blong tingbaot ol tok blong [Pol], i winim ol man Tesalonaeka. Oli wantem tumas blong harem tok blong [Pol], mo evri dei, oli stap ridimgud ol tok blong Baebol, blong traem save ol tok [we Pol i talem], oli tru no oli no tru.” Hem i presem ol man Berea, i no daonem olgeta, from we oli mekem samting ya.—Ol Wok 17:10, 11.
6. ?From wanem Jisas i talem se sam man Jyu oli ridim Baebol blong nating nomo?
6 Jisas i talem long samfala man Jyu se: “Yufala i stap luklukgud long ol tok blong Baebol, mo yufala i bilif se long ol tok blong hem, yufala i gat laef we i no save finis. !Be yufala i luk! Ol tok blong Baebol ya oli stap talemaot mi, be yufala i no save kam long mi blong kasem laef ya long mi.” (Jon 5:39, 40) Oli stadi Baebol wetem tingting we i stret, hemia se, ol tok blong Baebol i save lidim olgeta blong kasem laef. Yes, Baebol i holem sam profet tok long saed blong Mesaea we oli soemaot se, tru long Jisas nao yumi save kasem laef. Be ol man Jyu oli sakemaot hem, taswe taem oli ridim Baebol, samting ya i no givhan long olgeta nating.
7. ?Yumi nidim wanem blong gru long save blong Baebol, mo from wanem?
7 Blong mekem se yumi kasem save moa long Baebol, yumi nidim speret blong God, no paoa blong hem, blong lidim yumi. ‘Speret ya blong God i save lukaot olgeta samting we i haed, ol tingting blong God we man i no save faenemaot,’ mo i save mekem mining blong olgeta i kam long klia ples. (1 Korin 2:10) Ol Kristin long Tesalonaeka oli mas ‘jekem olgeta samting’ long ol profet tok we oli harem. (1 Tesalonaeka 5:20, 21) Taem Pol i raet i go long ol man Tesalonaeka (raonabaot 50 K.T.), i gat Gospel blong Matyu nomo we oli raetem finis long Grik haf blong Baebol. Taswe, ol man Tesalonaeka mo Berea, oli save jekem olgeta samting, taem oli lukluk long Hibru haf blong Baebol we i stap long lanwis Grik long Septuagint Baebol. Oli nidim blong ridim mo blong stadi long Baebol, mo yumi nidim samting ya tu.
Impoten Long Yumi Evriwan
8. ?From wanem ol elda oli mas gat nambawan save long saed blong Baebol?
8 Ol elda oli mas gat nambawan save long saed blong Baebol. Oli mas “savegud fasin blong tij” mo oli mas “holemstrong tok ya we i no save jenis.” Timote we hem i wan elda, i mas savegud olsem wanem blong ‘tijim ol man long trutok blong God, long stret fasin nomo.’ (1 Timote 3:2; Taetas 1:9; 2 Timote 2:15) Mama blong Timote, Yunis, mo bubu blong hem Loes, oli tijim olgeta tok blong tabu Baebol long hem stat long taem we hem i smol nomo, nating se papa blong hem i no wan man blong bilif. Long rod ya, oli mekem se Timote i no gat ‘fasin tu fes long bilif blong hem.’ (2 Timote 1:5; 3:15) Ol papa we oli gat bilif oli mas tijim ol pikinini blong olgeta mo “trenem tingting blong olgeta olsem we Jeova i wantem.” Antap moa, ol papa we oli elda, ‘ol pikinini blong olgeta we oli bilif oli no mas mekem stronghed, mo oli no mas mekem nogud.’ (Efesas 6:4, NW; Taetas 1:6) Taswe, nomata wanem kaen laef we yumi gat, yumi mas tinghevi long nid blong ridim Tok blong God, stadi long hem, mo mekem ol tok ya i wok long laef blong yumi.
9. ?From wanem i gud blong stadi Baebol long kampani blong ol narafala Kristin?
9 Mo tu, yumi mas joen wetem ol narafala man blong bilif blong stadi Baebol. Pol i wantem se ol Kristin long Tesalonaeka oli storeyan tugeta long ol advaes we hem i givim long olgeta. (1 Tesalonaeka 4:18) Blong mekem save blong yumi long saed blong trutok i kam moagud, i no gat wan narafala rod we i nambawan moa i bitim fasin blong joen tugeta wetem ol narafala studen blong stadi Baebol. Tok blong proveb ya i tru, se: “Aean i sapenem aean. Long sem fasin, wan man i sapenem fes blong narawan.” (Proveb 27:17) Wan tul we oli wokem long aean, i save rosta sipos yumi no yusum oltaem mo sipos yumi no sapenem oltaem. Long sem fasin, yumi nidim blong joen tugeta oltaem blong sapenem narafala mo narafala i sapenem yumi. Yumi mekem olsem, taem yumi serem ol save we yumi kasem tru long fasin blong rid, stadi, mo tingting dip long trutok blong Baebol. (Hibrus 10:24, 25) Mo tu, hemia wan rod blong meksua se ol laet we oli saenaot long saed blong speret, oli givhan long yumi.—Ol Sam 97:11; Proveb 4:18.
10. ?I minim wanem blong wokbaot long trutok?
10 Long saed blong stadi blong yumi long Baebol, i stret we yumi prea long God olsem man blong raetem Sam i mekem se: “Plis yu sanem laet blong yu mo trutok blong yu i kam. Mi wantem blong tufala i lidim mi.” (Ol Sam 43:3) Sipos yumi wantem se God i agri long yumi, yumi mas wokbaot long trutok blong hem. (3 Jon 3, 4) Samting ya i minim se yumi mas obei long olgeta samting we hem i talem long yumi, mo mekem wok blong hem wetem olgeta hat blong yumi mo wetem strong bilif. (Ol Sam 25:4, 5; Jon 4:23, 24) Yumi mas wosipim Jeova wetem trutok, olsem we Tok blong hem i soemaot mo olsem ol buk blong “slef we i stret mo waes” oli mekem i klia. (Matyu 24:45-47, NW) Samting ya i minim se yumi mas kasem stret save long saed blong Baebol. Oraet, ?yumi mas folem wanem plan blong ridim mo stadi long Tok blong God? ?Yumi mas stat long Jenesis japta 1, vas 1, mo ridim gogo yumi flatem olgeta 66 buk blong hem? Yes, evri Kristin we i gat fulwan Baebol long prapa lanwis blong hem, i mas ridim stat long Jenesis go kasem Revelesen. Mo tingting we yumi mas gat taem yumi ridim Baebol mo ol narafala Kristin buk, hemia se yumi wantem mekem save blong yumi i kam bigwan moa long saed blong olgeta trutok blong Baebol we God i rerem tru long ‘slef we i stret.’
Ridim Tok Blong God Wetem Bigfala Voes
11, 12. ?From wanem i gud we oli ridim Baebol wetem bigfala voes long ol miting?
11 Maet yumi rid, be i no wetem voes blong yumi, taem yumi stap yumi wan nomo. Be, long taem bifo, taem ol man wanwan oli rid, oli mekem wetem bigfala voes. Olsem man Itiopia ya, taem hem i stap ron long kat blong hem we hos i pulum, man blong prij we nem blong hem Filip, i harem hem i stap ridim profet tok blong Aesea. (Ol Wok 8:27-30) Hibru tok we oli tanem i kam “ridim” i minim fastaem se “singaot.” Taswe, olgeta we maet fastaem oli no kasem save taem oli rid wetem tingting blong olgeta nomo, oli mas talemaot ol wanwan tok wetem bigfala voes. Stampa samting we yumi mas mekem, hemia i blong lanem trutok tru long fasin blong ridim Tok blong God.
12 Hem i wan blesing long yumi taem wan brata i ridim Baebol wetem bigfala voes long miting. Aposol Pol i talem long Timote, we i wok wetem hem, se: “Yu mas mekem we wok ya blong ridim Baebol long ol man, mo blong prij, mo blong tijim olgeta long ol trutok i nambawan wok blong yu.” (1 Timote 4:13) Pol i talem long ol man Kolosi, se: “Taem yufala i ridim leta ya blong mi finis, plis yufala i sanem i go long ol man Laodisia, blong oli ridim long ol memba blong jyos long ples ya. Mo long sem fasin, bambae yufala tu i mas ridim leta blong olgeta long Laodisia, long ol memba blong jyos long ples blong yufala.” (Kolosi 4:16) Mo Revelesen 1:3 i talem se: “Man we i ridim tok ya we God i givim, hem i save harem gud. Mo olgeta we oli harem, nao oli holem tok ya long tingting blong olgeta, olgeta ya tu oli save harem gud. From we taem blong ol samting ya i kam kolosap.” Taswe, wan brata i mas ridim ol vas long Baebol blong sapotem ol tok we hem i talem long fored blong kongregesen.
Stadi Long Ol Wanwan Poen
13. ?Wanem nambawan rod blong gohed oltaem blong lanem ol trutok blong Baebol, mo wanem samting i save halpem yumi blong faenem ol vas?
13 Fasin blong stadi long ol wanwan poen, hem i rod we i moa gud blong halpem yumi blong gohed oltaem blong lanem ol trutok blong Baebol. Ol konkodens we oli gat ol wod blong Baebol long stret oda, mo we oli mekem lis blong ol buk, japta, mo vas we wod ya i stap insaed long olgeta, oli mekem i isi blong faenem ol vas long wan poen. Mo yumi save luksave olsem wanem blong joenem ol vas olsem, from we Man ya we i Stampa blong Baebol, i neva talem wan tok we i agensem ol narafala tok blong hem. Tru long tabu speret, hem i pusum samwe long 40 man blong raetem Baebol long bitim 1600 yia. Long olgeta yia we oli pas, ol man oli pruvum se fasin blong stadi long ol wanwan poen long Baebol, hem i nambawan rod blong lanem trutok.
14. ?From wanem i gud blong stadi long tufala haf blong Baebol, Hibru haf mo Kristin Grik haf?
14 Sipos yumi laekem tumas olgeta trutok blong Baebol, samting ya i mas pusum yumi blong ridim mo stadi long Kristin Grik haf mo Hibru haf blong Baebol. Samting ya bambae i soemaot olsem wanem Grik haf blong Baebol i joen wetem stampa tingting blong God. Mo tu, bambae hem i givim moa save long ol profet tok blong Hibru haf blong Baebol. (Rom 16:25-27; Efesas 3:4-6; Kolosi 1:26) Samting we i givhan bigwan long saed ya, hemia New World Translation of the Holy Scriptures. Ol man blong wok blong God we oli rerem Baebol ya, oli yusum ol nyufala save long saed blong ol faswan hanraet blong Baebol, taem mo ples we ol samting oli kamaot, mo mining blong ol wod tu. Ol buk we Jeova i givim tru long “slef we i stret mo waes,” olgeta tu oli impoten blong givhan long yumi blong stadi long Baebol.
15. ?Olsem wanem yu yu save pruvum se i stret blong yusum ol vas we oli kamaot long plante defren haf blong Baebol?
15 Maet samfala man oli talem se: ‘Long ol buk blong yufala oli raetem plante taosen vas blong Baebol, be ?from wanem yufala i karem ol vas ya long ol defren haf blong Baebol?’ Taem ol buk oli talem ol vas we oli kamaot long ol defren ples long ol 66 buk blong Baebol, hemia i olsem plante wetnes we oli pruvum se wan tijing i tru. Jisas hem wan i bin yusum sem kaen fasin ya blong tijim ol man. Taem hem i givim Bigfala Tok blong hem antap long Hil, hem i yusum 21 vas long Hibru haf blong Baebol. Insaed long Tok ya, hem i yusum tri vas blong Eksodas, tu blong Levitikas, wan blong Namba, sikis blong Dutronome, wan blong Seken King, fo blong Ol Sam, tri blong Aesea, mo wan blong Jeremaea. Taem Jisas i mekem olsem, ?hem i ‘traem pruvum ol samting olbaot nomo’? No gat. “Tok blong hem i gat paoa, i no olsem tok blong ol tija blong Loa.” Hemia i from we Jisas i yusum Tok blong God blong sapotem olgeta tijing blong hem. (Matyu 7:29) Aposol Pol i mekem i sem mak.
16. ?Wanem ol vas we Pol i yusum long Rom 15:7-13?
16 Long Rom 15:7-13, Pol i yusum tok we i kamaot long tri defren haf blong Hibru Baebol: Loa, ol Profet, mo Ol Sam. Hem i soem se ol man Jyu mo ol Hiten man bambae oli presem God, taswe, ol Kristin oli mas glad blong tekem ol man blong olgeta nesen oli kam long kampani blong olgeta. Pol i talem se: “Yufala i mas glad blong tekem yufala, blong yufala i joen gud long wan kampani, olsem we Kraes i glad blong tekem yufala blong yufala i joen gud long hem. Fasin ya i stap leftemap nem blong God. Mi mi talem long yufala we Kraes, hem i kam finis olsem wan man blong wok nomo blong givhan long ol man Isrel. Hem i mekem olsem, blong soemaot we God i tru nomo, mo blong mekem ol promes blong God long ol bubu blong mifala bifo i kamtru. Mo bakegen, Kraes i mekem olsem blong mekem rod blong ol hiten man bambae oli leftemap nem blong God, from we hem i gat sore long olgeta. Hemia i olsem we Baebol i talem, [long Ol Sam 18:49] i se ‘From samting ya, bambae mi mi talem tangkyu long yu long fes blong ol hiten man. Bambae mi sing, mi leftemap nem blong yu.’ Mo bakegen, Baebol [long Dutronome 32:43] i talem se ‘Ol hiten man, yufala i go joen long ol man we God i jusumaot olgeta finis, nao yufala i stap glad wetem olgeta.’ Mo bakegen, [long Ol Sam 117:1] i talem se ‘Ol hiten man, yufala evriwan i leftemap nem blong Hae God. Ol man blong olgeta ples, yufala evriwan i leftemap nem blong hem i go antap.’ Mo bakegen, profet Aesea [11:1, 10] i talem se ‘Wan laen blong Jese bambae i kamtru, we bambae God i putumap hem blong i jif blong ol hiten man. Mo olgeta ya bambae oli putum tingting blong olgeta i stap strong long hem.’ God, hem i stampa blong fasin ya we yumi save mekem tingting blong yumi i strong. Mo hemia prea blong mi, we hem bambae i mekem yufala i glad tumas, nao yufala i gat pis long tingting blong yufala oltaem, from we yufala i bilif long hem. Nao bambae yufala i save putum tingting blong yufala i stap strong moa long hem oltaem, from we Tabu Speret i stap givim paoa long yufala.” Long fasin ya we Pol i tokbaot ol poen wanwan, hem i soem olsem wanem blong yusum ol vas blong pruvum ol trutok blong Baebol.
17. ?Ol Kristin oli folem hu taem oli yusum ol vas long plante defren ples long Baebol?
17 Long faswan leta we tabu speret i pusum aposol Pita blong raetem, i gat 34 smol haf we oli kamaot long ol ten buk blong Loa, ol Profet, mo ol Sam. Long seken leta blong Pita, hem i yusum sikis smol haf we oli kamaot long tri buk long Hibru haf blong Baebol. Gospel blong Matyu i gat 122 smol haf we oli kamaot long ol buk stat long Jenesis go kasem Malakae. Long ol 27 buk blong Grik haf blong Baebol, i gat 320 haf we oli kamaot stret long ol buk stat long Jenesis go kasem Malakae, mo plante handred narafala tok we oli kamaot long Hibru haf blong Baebol. Ol Kristin tede oli mekem sem mak olsem Jisas mo ol aposol blong hem, taem oli stadi long ol wanwan poen blong Baebol. Oli tekem sam vas long ol defren ples blong Baebol. I stret moa blong mekem samting ya long ol “lasdei” ya, from we naoia bighaf blong ol tok long Hibru mo Grik haf blong Baebol oli stap kamtru. (2 Timote 3:1) ‘Slef we i stret’ i yusum Baebol oltaem long ol buk we hem i wokem, be hem i neva ademap no karemaot wan haf long Tok blong God.—Proveb 30:5, 6; Revelesen 22:18, 19.
Wokbaot Oltaem Long Trutok
18. ?From wanem yumi mas ‘wokbaot long trutok’?
18 Yumi no mas karemaot wan samting long Baebol, from we olgeta Kristin tijing we oli stap long Tok blong God, oli “trutok” no “trutok blong gud nyus ya.” Fasin blong fasgud long trutok ya—‘wokbaot’ long hem—i impoten tumas blong kasem laef. (Galesia 2:5; 2 Jon 4; 1 Timote 2:3, 4) From we trufala Kristin skul i “Rod blong Trutok,” yumi save joen long ‘wok blong talemaot trutok’ sipos yumi halpem ol narafala we oli stap pulum ol man blong intres long hem.—2 Pita 2:2; 3 Jon 8.
19. ?Olsem wanem yumi save “folem trutok oltaem”?
19 Sipos yumi wantem “stap folem trutok oltaem,” yumi mas ridim Baebol mo yusumgud olgeta samting long saed blong speret we God i givim tru long ‘slef we i stret.’ (3 Jon 4) I gud yumi mekem olsem from we bambae hem i givhangud long yumi, nao bambae yumi naf blong tijim ol narafala long saed blong Jeova God, Jisas Kraes, mo ol stampa tingting blong God. Mo yumi mas gat tangkyu from we speret blong Jeova i stap halpem yumi blong kasem save long Tok blong hem, mo blong wosipim hem wetem trutok.
?Wanem Ol Ansa Blong Yu?
◻ ?Wanem sam blesing we oli save stap longtaem from fasin blong ridim Baebol?
◻ ?From wanem i gud blong stadi Baebol long kampani blong ol narafala man blong bilif?
◻ ?From wanem i gud blong yusum plante defren vas blong Baebol?
◻ ?I minim wanem blong ‘wokbaot long trutok,’ mo olsem yumi save mekem olsem?
[Tok Blong Pija Long Pej 17]
Ol papa mama, tijim ol pikinini blong yufala long saed blong Baebol
[Tok Blong Pija Long Pej 18]
Long Bigfala Tok blong Jisas antap long hil, hem i yusum plante defren tok blong Hibru haf blong Baebol