Wan Kwestin

Samtaem yumi harem ol brata oli talem no oli prea se Kingdom blong God bambae i kam long wol. ?I stret blong talem olsem?

Blong talem stret, i no laenap wetem Baebol blong yusum tok olsem. Kingdom blong God i blong heven. Taswe, aposol Pol i raetem se: “Masta blong yumi, hem bambae i tekemaot mi long han blong olgeta rabis wok blong ol man ya we oli wantem spolem mi, mo bambae hem i sevem mi blong go long kingdom blong hem long heven. Yumi mas presem hem oltaem gogo i no save finis. Amen.”​—2 Timote 4:​18, NW; Matyu 13:44; 1 Korin 15:⁠50.

Kingdom i stanap long heven long 1914, mo hem i no save jenisim ples blong hem i kam stap long wol we i kam Paradaes, no long wan narafala ples bakegen. Jisas Kraes i King long Kingdom ya. From we Jisas i King, hem i gat paoa antap long ol enjel. Taswe, stret ples blong hem blong rul, hemia long raetsaed blong God long heven. Olgeta Kristin we tabu speret i makemaot olgeta, bambae oli joen wetem hem blong kam ol king mo pris long heven.​—Efesas 1:​19-​21; Revelesen 5:​9, 10; 20:⁠6.

Ale, ?samting ya i minim se yumi no moa save prea long God mo talem tok ya we i stap long Prea blong Masta se: “Letem kingdom blong yu i kam. Letem wil blong yu i kamaot long wol olsem we i kamaot finis long heven”? (Matyu 6:​10, NW) Si, yumi save prea olsem, from we prea ya i stret mo i gat bigfala mining yet.

Kingdom blong God bambae i mekem plante bigfala samting oli kamaot yet long wol ya. Mo, yumi mas tingbaot samting ya, taem yumi prea mo yusum ol tok we oli sem mak olsem ol tok long Prea blong Masta. Wan eksampel, Daniel 2:​44 i talemaot se bambae Kingdom i “kam” blong spolem olgeta nesen, mo bambae hem i rul antap long wol ya. Revelesen 21:2 i tokbaot Nyufala Jerusalem se bambae i aot long heven i kamdaon. Nyufala Jerusalem, hemia ol 144,000 Kristin we tabu speret i makemaot olgeta, we bambae oli kam woman blong Kraes. Olgeta ya bambae oli rul tu wetem Jisas long Kingdom ya. Taswe, Revelesen 21:2 i stap tokbaot we bambae oli lukluk i kam long wol ya blong mekem wan samting long hem, we bambae i mekem plante blesing oli kamaot long ol man we oli stanap strong long bilif.​—Revelesen 21:​3, 4.

Go kasem taem we ol tok ya mo plante narafala nambawan profet tok oli kamtru, i stret we yumi gohed blong prea long Jeova God folem ol tok ya blong Jisas se, “Letem kingdom blong yu i kam.” Be yumi mas tingbaot oltaem se prapa Kingdom ya bambae i no kamaot long heven blong kamdaon long wol ya. Kingdom gavman ya i stap long heven, hem i no blong wol ya.

[Foto Credit Line blong pija long pej 31]

Earth: Based on NASA photo