Go Antap Wetem Wing Olsem Ol Igel
?WANEM filing blong wan man afta we i spenem faef yia long rabis kalabus blong ol Nasi? ?Tingting blong hem i foldaon? ?Hem i tok agens? ?Hem i wantem givimbak?
Maet yu ting se i narakaen we wan man olsem i raetem se: “Mi kasem plante blesing long laef blong mi bitim ol blesing we mi bin tingbaot.” ?From wanem man ya i gat filing olsem? Hem i eksplenem se: “Mi mi haed aninit long wing blong Hemia we i Hae Olgeta. Mo profet tok blong Aesea i kamtru long mi, se: ‘Olgeta we oli putum tingting blong olgeta i stap strong long Jeova, bambae oli kasem paoa bakegen. Bambae i olsem we oli gat wing, olsem ol igel, blong go antap. Bambae oli . . . wokbaot, be oli no taed.’ ”—Aesea 40:31.
Kristin man ya, oli kilim hem nogud long wan raf fasin we i bitim mak. Be, i olsem we hem i gat wan paoa, nao paoa ya i leftemap hem i go antap. Hem i wan paoa we raf fasin blong ol Nasi i no save daonem. Olsem Deved, hem i haed aninit long sado blong “wing” blong God. (Ol Sam 57:1) Kristin ya i yusum pijatok ya we profet Aesea i bin yusum. Hem i talem se paoa blong hem long saed blong speret i olsem igel we i stap flae i go antap we i antap olgeta long skae.
?Yu yu harem samtaem se ol problem oli hevi tumas long yu? Sipos yes, i sua se yu tu, yu wantem haed aninit long wing blong Hemia we i Hae Olgeta, yu wantem “gat wing, olsem ol igel.” Blong halpem yumi blong save olsem wanem man i save gat wing olsem igel, i gud blong save sam samting long saed blong igel, wan pijin we Baebol i yusum plante taem olsem pijatok.
Aninit Long Flag Blong Igel
Long olgeta pijin we ol man bifo oli stap lukluk, ating oli laekem moa igel, from paoa blong hem mo from nambawan fasin blong hem blong flae. Plante ami long taem bifo, olsem ol ami blong Babilon, Pesia, mo Rom, oli maj aninit long flag blong igel. Ami blong Bigfala Saeras tu i mekem olsem. Profet tok blong Baebol i talem se king ya blong Pesia i olsem wan pijin we i stap kakae mit. Bambae hem i aot long is saed, i kam kakae paoa blong Babilon we i stap rul. (Aesea 45:1; 46:11) Tu handred yia afta we oli raetem profet tok ya, ol ami blong Saeras, we i gat pija blong igel long flag blong olgeta, oli smasem taon blong Babilon, olsem wan igel we i kamdaon kwiktaem blong kasem kakae blong hem.
Afta long samting ya, ol man blong faet olsem Charlemagne mo Napoleon, mo ol kantri olsem Yunaeted Stet mo Jemani, oli jusum igel olsem saen blong kantri blong olgeta. God i talem long ol man Isrel se oli no mas wosip long pija blong igel mo ol narafala anamol. (Eksodas 20:4, 5) Be, sam man blong raetem Baebol oli yusum fasin blong igel olsem pijatok, blong eksplenem samting we oli stap talem. Olsem nao, oli yusum igel, pijin we Baebol i tokbaot moa bitim ol narafala pijin, olsem saen blong waes, fasin blong God blong lukaotgud long man, mo spid.
Ae Blong Igel
Stat long taem bifo i kam, ol man oli savegud se igel i save luklukgud ol samting. Kolosap oltaem, hevi blong golden igel i no save bitim 5 kilo. Be, ae blong hem i bigwan bitim ae blong man, mo hem i save lukluk i go longwe moa, i bitim man. Taem Jeova i stap toktok long Job, hem i tokbaot olsem wanem igel i lukaot kakae blong hem. Hem i talem se: “Ae blong hem i stap lukluk i go farawe.” (Job 39:27, 29) Long buk blong Alice Parmelee, All the Birds of the Bible, hem i talem se, “wan taem, i gat wan igel i stap flae antap. Ale, igel ya i lukluk daon, nao i luk wan ded fis i stap flot long wan lugun we i stap faef kilomita longwe long hem. Nao, hem i lego hem i kamdaon, stret long ples we fis ya i stap flot long hem. Igel ya i save luk smosmol samting ya we i stap farawe, we man i no save luk. Antap long hemia, hem i stap wajemgud fis ya oltaem we i stap flae i go long faef kilomita ya.”
From we igel i save luklukgud, hem i wan gudfala saen blong waes, wan long ol bigfala fasin blong Jeova. (Skelem wetem Esikel 1:10; Revelesen 4:7) ?From wanem i stret blong talem se igel i saen blong waes? Waes i minim se, yumi naf blong luksave fastaem, wanem frut i save kamaot from samting we yumi mekem. (Proveb 22:3) From we igel i naf blong lukluk i go longwe, hem i save luk denja we i stap farawe mo i save lukaotgud. Hemia i olsem waes man long parabol blong Jisas, we i luksave fastaem se i save gat hariken, nao i wokem haos blong hem antap long wan bigfala ston. (Matyu 7:24, 25) I gud blong save se long lanwis blong Spen, sipos oli talem se wan man i olsem igel, oli minim se man ya i gat waes no fasin luksave.
Sipos yu gat jans blong go kolosap long wan igel, makemgud olsem wanem hem i stap lukluk yu. Hem i no jes lukluk yu kwiktaem nomo. Be, hem i luklukgud evri haf blong bodi blong yu. I sem mak, man we i waes i luklukgud olgeta haf blong wan bisnes fastaem, bifo we hem i mekem disisen. Hem i no jes trastem tingting mo filing blong hem. (Proveb 28:26) Fasin blong igel blong luklukgud, i mekem se hem i wan gudfala saen blong waes blong God. Be nambawan fasin blong igel blong flae tu, ol man blong raetem Baebol oli yusum olsem pijatok.
“Fasin Blong Igel Long Skae”
“Fasin blong igel long skae” i wan samting blong sapraes. Hem i save spid, mo i olsem se hem i no nidim blong wokhad nating blong flae. Hem i no folem wan spesel rod mo i no livim wan trak biaen long hem. (Proveb 30:19) Lamentesin 4:19 i tokbaot spid blong igel. Vas ya i tokbaot ol soldia blong Babilon, i se: “Ol man blong ronem mifala oli spid moa, i winim ol igel long skae. Oli traehad blong kasem mifala antap long ol hil.” Taem wan igel we i stap flae raon antap, i luk wan kakae, hem i benem tufala wing blong hem, mo i lego hem i kamdaon long wan spid we, sam ripot oli talem se, i save kasem 130 kilomita long wan haoa. Taswe, yumi no sapraes we Baebol i yusum igel olsem saen blong spid, antap moa long saed blong ol ami.—2 Samuel 1:23; Jeremaea 4:13; 49:22.
Aesea i tokbaot narafala fasin blong igel: taem hem i flae, i olsem se i no hadwok nating. “Olgeta we oli putum tingting blong olgeta i strong long Jeova, bambae oli kasem paoa bakegen. Bambae i olsem we oli gat wing, olsem ol igel, blong go antap. Bambae oli resis, be bodi blong olgeta i no slak. Bambae oli wokbaot, be oli no taed.” (Aesea 40:31) ?Wanem spesel samting we i mekem se igel i save stap antap long skae we hem i no mufmuvum wing blong hem? I no hadwok long igel blong go antap, from we hem i yusum hot win. Hem i no save luk hot win ya. Be hem i savegud olsem wanem blong faenem. Taem hem i faenem wan hot win, hem i stretem tufala wing mo tel blong hem, nao i tanem bodi blong hem insaed long hot win ya. Nao hot win ya i tekem hem i go antap we antap. Taem hem i go antap kasem mak we hem i wantem, hem i lego bodi blong hem i flot nomo i go long wan narafala hot win, mo i mekem sem samting bakegen. Long fasin ya, igel i save stap plante haoa antap long skae, we i yusum smol paoa nomo blong flae.
Long Isrel, yu save luk igel evri dei. Samting ya i tru moa long Bigfala Rif Vali, we i stat long Esiongeba kolosap long Red Si, go kasem Dan long not. Oli kam moa plante long taem we ol tri oli stat putum flaoa mo long taem we ol lif blong tri oli folfoldaon. Long taem ya, plante oli flae i kam long ol narafala ples. Long sam yia, ol man oli kaontem kolosap 100,000 igel long ples ya. Taem san i girap long moning, mo win i kam hot lelebet, ol man oli save luk plante handred igel we oli stap flae antap long ol klif long saed blong Rif Vali.
Fasin blong igel blong flae isi nomo, i wan nambawan pijatok. Hem i soem olsem wanem paoa blong Jeova i save leftemap yumi long saed blong speret mo filing, blong yumi naf blong gohed long wok blong yumi. Sipos wan igel i yusum prapa paoa blong hem, hem i no save flae i go antap we antap. I sem mak, yumi no save gohedgud sipos yumi dipen long prapa save blong yumi. Aposol Pol i eksplenem se: “Mi save mekem evri samting, long paoa blong Kraes ya we i stap mekem mi mi strong.” (Filipae 4:13) Olsem wan igel we oltaem i stap lukaot hot win we hem i no save luk, yumi ‘gohed blong askem’ Jeova oltaem, tru long prea we i kamaot long hat, blong i givim tabu speret long yumi.—Luk 11:9, 13.
Plante taem, ol igel we oli stap flae i go long narafala ples, oli wajem ol narafala pijin blong oli save faenem ol hot win. D. R. Mackintosh, wan man blong stadi long ol anamol, i givim ripot se, wan taem, i gat 250 igel mo ol narafala pijin we oli kakae mit oli stap flae raon antap, long wan hot win nomo. Long sem fasin, ol Kristin tede oli save lanem blong dipen long paoa blong Jeova, taem oli folem gudfala eksampel blong ol narafala man we oli obeigud long God.—Skelem wetem 1 Korin 11:1.
Aninit Long Sado Blong Ol Wing Blong Igel
Wan taem we i denja tumas long laef blong wan igel, hemia taem we hem i stap lanem blong flae. Plante oli ded taem oli stap traem blong flae. Nesen blong Isrel we i olsem wan pijin we i jes bon, hem tu i stap long denja taem hem i aot long Ijip. Taswe, ol tok we Jeova i talem long olgeta, i stret nomo se: “Yufala i luk finis ol samting ya we mi mi mekem long ol man Ijip. Mo yufala i luk fasin ya we mi mi karem yufala olsem we bigfala pijin ya igel i stap karem ol pikinini blong hem long wing blong hem, nao mi tekem yufala i kam long mi long ples ya.” (Eksodas 19:4) Samfala oli bin talem se oli luk sam igel we oli stap karem smol pikinini blong olgeta long baksaed blong olgeta blong smoltaem. Hemia blong mekem se pikinini igel ya i no bangem wan samting taem hem i jes stat blong flae. G. R. Driver i tokbaot samting ya long buk ya Palestine Exploration Quarterly, hem i talem se: “Pijatok ya we [Baebol] i yusum i no wan samting we i kamaot long tingting blong man nomo. No gat. Hem i stanap long trufala samting.”
Ol igel oli gudfala papa mama long sam narafala rod tu. Oltaem, oli faenem kakae blong givim long pikinini blong olgeta. Mo tu, mama igel i brebrekem mit long ol smosmol pis, mo papa igel i karem i kam long bed blong smolwan. Nao pikinini igel i solemdaon. Plante taem, oli wokem bed blong olgeta antap long ol klif no ol bigfala tri. Taswe, ol pikinini igel oli stap afsaed long ol defren kaen weta. (Job 39:27, 28) Big san, olsem long plante kantri we Baebol i tokbaot, i save kilim i ded pikinini igel sipos papa mama tufala i no lukaotgud long hem. Bigfala igel i openem tufala wing blong hem, samtaem blong plante haoa, blong blokem san long smol pikinini blong hem we i no strong.
Taswe, i stret nomo we Baebol i yusum wing blong igel olsem saen blong soem se God i stap lukaotgud long ol man blong hem. Dutronome 32:9-12 i tokbaot olsem wanem Jeova i lukaotgud long ol man Isrel, taem oli stap wokbaot long draeples, i se: “Samting we i blong Jeova, hemia ol man blong hem. Jekob i olsem graon we hem i tekem, i blong hem. Hem i faenem hem long wan draeples nomo, wan ples we i gat strong win, mo i no gat samting long hem. Hem i raonem Jekob, i lukaotgud long hem, mo i blokemgud hem olsem we Jekob i prapa ae blong hem. Jeova nomo i gohed blong lidim hem, olsem wan igel we i muvmufum bed blong hem, i flae raon long ol pikinini blong hem, i openem ol wing blong hem, i tekem olgeta, mo i karem olgeta long ol wing blong hem.” Long sem fasin, bambae Jeova i lukaotgud long yumi wetem lav, sipos yumi trastem hem.
Rod Blong Ronwe
Taem yumi fesem problem, maet yumi stap tingting se, i gud sipos yumi gat wing, nao yumi save flae i go long narafala ples blong ronwe long ol hadtaem blong yumi. Deved tu i bin gat filing olsem. (Skelem wetem Ol Sam 55:6, 7.) Jeova i promes se bambae hem i givhan long yumi taem yumi fesem ol hadtaem mo yumi harem nogud long wol ya, be hem i no tekemaot yumi fulwan long ol trabol. Baebol i mekem promes long yumi se: “Ol samting ya we oli stap traem yufala, oli sem mak nomo long olgeta samting we oli stap traem olgeta man. Be God i stap holem promes blong hem. Mo hem i no save letem wan samting bambae i traem yufala, we i strong tumas long yufala. Be long stret taem ya we samting olsem i traem yufala, God bambae i mekem rod blong yufala, blong yufala i winim samting ya.”—1 Korin 10:13.
‘Rod blong winim’ no “rod blong ronwe” (King James Version) i minim se yumi mas lanem blong trastem Jeova. Max Liebster, we tok blong hem i stap long stat blong store ya, i faenemaot samting ya. Long olgeta yia we hem i stap long ol rabis kalabus, hem i kasem savegud long Jeova mo i lanem blong dipen long Hem. Max i faenemaot se Jeova i stap yusum Baebol, tabu speret, mo ogenaesesen blong hem blong givim paoa long yumi. Taem ol Wetnes ya oli bin stap long ol rabis kalabus, oli traem faenem ol narafala brata sista blong olgeta mo halpem olgeta long saed blong speret. Oli tokbaot sam poen we oli kamaot long Baebol mo ol buk long saed blong Baebol we oli gat. Mo, olsem olgeta we oli pastru long ol hadtaem ya oli talem bakegen mo bakegen, Jeova i mekem oli strong. Max i eksplenem se: “Oltaem mi askem Jeova blong givhan long mi. Mo speret blong hem i mekem mi mi stanap strong.”
Nating se yumi kasem wanem traem, yumi tu yumi save dipen long tabu speret blong God, sipos yumi gohed blong askem long God blong i givim. (Matyu 7:7-11) ‘Paoa ya we i bigfala tumas i blong God, i no blong yumi,’ bambae i mekem yumi strong, nao bambae i leftemap yumi i go antap, blong ol problem blong yumi oli no hevi tumas long yumi. Bambae yumi gohed blong wokbaot long rod blong Jeova, mo bambae yumi no kam taed. Bambae yumi gat wing olsem ol igel.—2 Korin 4:7; Aesea 40:31.
[Tok makem poen pija long pej 10]
Hem i no jes lukluk yu kwiktaem nomo
[Foto Credit Line blong pija long pej 9]
Foto: Cortesía de GREFA
[Foto Credit Line blong pija long pej 10]
Foto: Cortesía de Zoo de Madrid