Wan Kwestin

?I stret blong talem se ol man blong God tede we oli gat hop blong laef long wol, oli stap kasem tabu speret blong God sem mak olsem ol Kristin we tabu speret i makemaot olgeta, oli kasem?

Hemia i no wan nyufala kwestin. Semfala kwestin i kamaot long “Wan Kwestin” long Wajtaoa blong Epril 15, 1952 (Engglis). Plante man oli kam Wetnes afta long taem ya, taswe yumi save tingbaot kwestin ya bakegen, mo long semtaem, luklukbak long sam save we i bin kamaot long magasin ya bifo.

Ansa long kwestin ya, hemia se, yes, ol brata mo sista we oli blong ol narafala sipsip, oli save kasem tabu speret blong God sem mak olsem ol tabu Kristin oli kasem.​—Jon 10:16.

Be, samting ya i no min se speret i mekem semfala wok long olgeta man. Tingtingbak long ol man blong bilif we oli laef bifo Kristin taem, we oli bin kasem speret blong God. Speret ya i givim paoa long samfala blong oli kilim i ded wael anamol, oli mekem sikman i kamgud bakegen, mo oli mekem dedman i laef bakegen. Mo tu, oli nidim speret ya blong givhan long olgeta blong raetem Baebol. (Jajes 13:24, 25; 14:​5, 6; 1 King 17:17-​24; 2 King 4:​17-​37; 5:​1-​14) Wajtaoa i talem se: “Nating se oli no blong grup ya we tabu speret i makemaot, be tabu speret i kam fulap long olgeta.”

Nao, tingbaot ol man mo woman long faswan handred yia we tabu speret i bin makemaot olgeta. Olgeta oli kam ol pikinini blong God long saed blong speret, mo oli gat hop blong go long heven. Tabu speret i makemaot olgeta evriwan, be samting ya i no minim se afta long taem ya, tabu speret i givhan long olgeta evriwan long sem rod. Samting ya i klia long 1 Korin japta 12. Long ples ya, aposol Pol i tokbaot ol presen we speret i givim long olgeta. Yumi ridim long vas 8, 9, mo 11, se: “Long sam man, speret ya i save givim tok blong waes. Mo long sam narafala man, sem speret ya nomo i save givim tok blong save. Sem speret ya i save givim strong bilif long sam narafala man. Mo long sam narafala man, sem speret ya i save givim olkaen paoa, blong oli mekem ol sik man oli gud bakegen. . . . Be hemia sem speret ya we i wan nomo, we i stap mekem ol wok ya. Hem i stap givim ol defrenkaen paoa ya long evri man, stret olsem we hem nomo i wantem.”

I impoten blong save se, speret i no givim ol spesel presen ya long olgeta man evriwan we tabu speret i makemaot olgeta long taem bifo. Long 1 Korin japta 14, Pol i tokbaot wan man we i toktok long narafala lanwis long wan miting blong kongregesen.a Be i no gat wan long miting ya we hem i naf blong talem mining blong ol tok we man ya i stap talemaot. Nating se i olsem, bifo long taem ya, olgeta evriwan oli bin kasem tabu speret. ?I stret blong talem se brata ya we i toktok long narafala lanwis i bin kasem moa tabu speret bitim ol narafala? No gat. Ol narafala tabu Kristin ya oli no daon moa long hem, olsem we hem i kasem save moa long Baebol bitim olgeta, no hem i strong moa long olgeta blong winim ol traem. Speret i pusum brata ya long wan spesel rod, mekem se hem i save toktok long narafala lanwis. Be, brata ya mo ol narafala tu, oli nidim blong stap kolosap long Jeova mo blong ‘letem tabu speret i kam fulap long olgeta,’ olsem Pol i bin raetem.​—Efesas 5:​18.

Ol tabu Kristin tede, oli kasem tabu speret blong God tu. Speret ya i bin wok long olgeta long wan spesel fasin​—long taem ya we tabu speret i makemaot olgeta mo oli kam ol speret pikinini blong God. Afta long taem ya, oli gohed blong ‘letem tabu speret i kam fulap long olgeta.’ Speret ya i stap halpem olgeta taem oli traem kasem save long Baebol long wan fasin we i klia moa, taem oli lidim wok blong prij, mo taem oli fesem ol traem, nating sipos olgeta wanwan oli kasem ol samting ya no ogenaesesen i kasem.

Ol “narafala sipsip” oli kasem tabu speret long sam narafala rod, nating se tabu speret i no makemaot olgeta blong oli kam ol tabu man. Wajtaoa blong Epril 15, 1952, i talem se:

“Ol ‘narafala sipsip’ tede oli mekem semkaen wok blong prij olsem ol tabu brata, oli fesem semkaen hadtaem olsem olgeta, mo oli gat semkaen strong bilif mo fasin blong fasgud long God. Oli kakae long sem tebel long saed blong speret, oli kakae ol semkaen kakae, oli kasem ol semkaen trutok. Olgeta ya oli blong laef long wol, wetem hop blong stap long wol ya nomo. Taswe, ating oli intres moa long ol vas we oli tokbaot wanem samting bambae i kamaot long nyufala wol. Be, samting ya i defren long grup blong ol tabu brata. Olgeta oli gat hop blong laef long heven, mo oli intres moa long ol samting long saed blong speret. Taswe, maet oli stadi moa long ol samting olsem insaed long Tok blong God. . . . Be, ol semkaen trutok mo semkaen save i stap rere blong olgeta man ya evriwan oli kasem. Save we oli kasem long saed blong ol samting long heven mo ol samting long wol, i dipen long stadi we olgeta wanwan oli mekem. Speret blong Masta i stap blong tufala grup ya oli save kasem long sem fasin nomo, mo tufala grup ya tugeta oli save kasem sem save mo waes. Mo tu, tufala tugeta oli gat sem jans blong kasem speret ya.”

[Futnot]