Famle Blong Jeova i Gat Nambawan Fasin Ya Blong Joengud

“!Yufala i luk! !I gud tumas mo i naes tumas blong ol brata oli stap wanples, oli joengud long wan tingting nomo!”​—OL SAM 133:1, NW.

1. ?Wanem i stap hapen long plante famle tede?

OL WANWAN famle long wol tede, oli stap kasem bigfala trabol. Long plante famle, hasban mo waef tufala i rere blong seraot. Namba blong ol divos i kam antap bigwan, mo plante pikinini blong ol man mo woman we oli divos, oli harem nogud tumas. Plante milyan famle oli no glad mo oli no joengud. Be, i gat wan famle we i gat trufala glad mo fasin joengud. Hemia famle blong Jeova God we i stap long heven. Long famle ya, ol milyan milyan enjel we yumi no save luk olgeta, oli mekem wok blong olgeta olsem God i wantem. (Ol Sam 103:20, 21) ?Be, i gat wan famle long wol ya we i haremgud long fasin joengud olsemia?

2, 3. (a) ?Naoia, hu olgeta we oli haf blong famle blong God long heven mo long wol, mo yumi save talem se tede ol Wetnes blong Jeova oli olsem wanem samting? (b) ?Wanem ol kwestin we bambae yumi tokbaot?

² Aposol Pol i raetem se: “Mi bodaon, mi prea long Papa blong yumi ya, we hem nomo i stampa blong fasin blong papa, nao olgeta famle long heven mo long wol oli stap tekem fasin ya long hem.” (Efesas 3:​14, 15) Olgeta wanwan laen long wol oli mas luksave se fasin ya blong famle i kamaot long God from we Hem i Man ya we i Wokem Olgeta Samting. I no gat wan famle blong ol man blong mit mo blad long heven. Be i olsem we God i mared long ogenaesesen blong hem long heven. Mo Jisas tu, bambae waef blong hem long saed blong speret i joen wetem hem long heven. (Aesea 54:5; Luk 20:34, 35; 1 Korin 15:50; 2 Korin 11:2) Ol man blong bilif long wol ya, we tabu speret i makemaot olgeta, naoia oli stap olsem haf blong bigfala famle blong God long heven mo long wol. Mo ol “narafala sipsip” blong Jisas, we hop blong olgeta i blong laef long wol nomo, olgeta tu bambae oli save kam haf blong bigfala famle ya. (Jon 10:16; Rom 8:​14-​17; Wajtaoa, Janewari 15, 1996, pej 31) Be, yumi save talem tu se olgeta Wetnes blong Jeova tede, oli olsem wan bigfala famle we oli joengud long olgeta ples blong wol.

³ ?Yu yu wan memba blong nambawan famle ya blong ol man blong God long olgeta ples blong wol? Sipos yes, yu stap haremgud long wan blesing we i bigfala moa bitim plante narafala blesing. Plante milyan man oli save agri se famle blong Jeova long olgeta ples long wol​—hemia ogenaesesen blong hem we yumi save luk wetem ae blong yumi​—hem i wan ples blong pis mo fasin joengud long medel blong nogud wol ya we i fulap long faet mo fasin seraot. Famle ya i olsem wan ples we i gringud long medel blong draeples. ?Yumi save yusum wanem tok blong eksplenem fasin joengud blong famle ya blong Jeova long olgeta ples blong wol? ?Mo wanem ol samting we oli mekem famle ya i joengud?

!I Gud Tumas Mo i Naes Tumas!

4. Long prapa tok blong yu, eksplenem Ol Sam 133 long saed blong fasin blong ol brata blong joengud.

⁴ Deved, man ya blong raetem Sam, i rili gat tangkyu from fasin blong joengud olsem ol brata nomo. !Yes, samting ya i pusum hem blong singsing long saed ya! Tingbaot we Deved i stap plei long gita blong hem mo i stap singsing se: “!Yufala i luk! !I gud tumas mo i naes tumas blong ol brata oli stap wanples, oli joengud long wan tingting! Hemia i olsem gudfala oel we oli kafsaedem i go long hed, nao i ron i godaon long mustas, mustas blong Eron, mo i ron i godaon kasem nek blong klos blong hem. Hemia i olsem wora blong naet we i kamaot long hil ya Hemon mo i foldaon long hil blong Saeon. Jeova i talem finis se blesing i mas stap long ples ya, wetem laef ya we i no save finis.”​—Ol Sam 133:​1-3, NW.

5. Folem tok blong Ol Sam 133:​1, 2, ?olsem wanem ol man Isrel bifo mo ol man blong God tede, oli sem mak?

⁵ Ol tok ya oli tokbaot fasin joengud we ol man blong God, Isrel, oli bin haremgud long hem bifo. Taem oli kam long Jerusalem blong mekem trifala bigfala lafet we oli stap mekem evri yia, oli joengud tugeta. Nating se oli kamaot long ol defren laen, be oli olsem wan famle nomo. Taem oli joen tugeta olsem, samting ya i mekem olgeta oli haremgud, i olsem wan naesfala oel we smel blong hem i gud tumas. Taem oli kafsaedem kaen oel olsem long hed blong Eron, oel ya i ron i godaon long mustas blong hem mo i go kasem nek blong klos blong hem. Long saed blong ol man Isrel, fasin ya blong joen tugeta i mekem olgeta oli haremgud, mo filing ya i kasem ful grup blong olgeta we oli joen wanples long taem ya. Oli stretem ol smosmol trabol bitwin long olgeta, mo oli mekem evri samting blong traehad blong joengud. Semkaen fasin joengud i stap tede, insaed long famle blong Jeova long olgeta ples blong wol. Taem ol memba blong famle ya oli joengud tugeta oltaem, samting ya i halpem olgeta blong haremgud moa long saed blong speret. Oli folem advaes long Tok blong God, nao oli stretem ol smosmol trabol mo problem bitwin long olgeta. (Matyu 5:​23, 24; 18:15-​17) Ol man blong Jeova oli gat bigfala tangkyu from fasin joengud wetem ol brata blong olgeta we i leftemap tingting blong olgeta evriwan.

6, 7. ?Olsem wanem fasin joengud blong Isrel i sem mak olsem wora blong naet we i kamaot long Hil ya Hemon, mo blesing blong God i stap wea tede?

⁶ ?Olsem wanem fasin blong ol man Isrel blong joengud tugeta i olsem wora blong naet long hil ya Hemon? Bigfala hil ya i hae olsem 2,800 mita antap long solwora, mo i gat sno i stap antap long hem kolosap olgeta manis blong yia. Sno ya antap long Hemon, i mekem smok i go antap long naet, mo from samting ya, wora i foldaon long moning blong mekem gras mo ol tri oli grugud long wan longfala taem we i no gat ren. Kolkol win we i blou i kam long hil blong Hemon i save karem smok ya i go long saot go kasem Jerusalem, nao smok ya i foldaon olsem wora blong naet long ples ya. Taswe, man blong raetem Sam i talem stret, taem hem i tokbaot ‘wora blong naet we i kamaot long hil ya Hemon mo i foldaon long hil blong Saeon.’ !Hemia i rili ol nambawan tok blong mekem yumi tingbaot olsem wanem fasin blong haremgud i mekem famle blong ol man we oli wosip long Jeova, i joengud!

⁷ Bifo we Kristin kongregesena i stanap, Saeon, no Jerusalem, i stap olsem stampa ples blong trufala wosip. Taswe, ples ya nao we God i talem se ol blesing oli mas kamaot long hem. I olsem we Stampa blong ol blesing ya i stap long haos prea long Jerusalem, taswe, ol blesing oli mas kamaot long ples ya. Be tede, trufala wosip i no moa stap long wan ples nomo, taswe ol blesing, lav, mo fasin joengud blong ol man blong God i stap long olgeta ples blong wol. (Jon 13:34, 35) ?Wanem sam samting we oli mekem ol man blong God oli joengud?

Sam Samting We Oli Stampa Blong Fasin Joengud

8. ?Jon 17⁠:​20, 21 i tijim wanem long yumi long saed blong fasin joengud?

⁸ Ol man blong Jeova oli joengud from we oli kasem stret mining blong Tok blong God mo oli obei long hem. Oli obei long ol tijing blong Jisas Kraes tu. Jeova i sanem Pikinini blong hem i kam long wol ya blong givim wetnes long saed blong trutok, mo blong givim laef blong hem olsem wan sakrifaes. From samting ya, rod i open blong statem wan Kristin kongregesen we i joengud. (Jon 3:​16; 18:37) Taem Jisas i prea, hem i soemaot klia se i mas gat trufala fasin joengud bitwin ol memba blong Kristin kongregesen ya. Hem i talem se: “Mi mi no prea from olgeta ya nomo. Mi stap prea tu from ol man ya we bambae oli save bilif long mi from tok blong olgeta. Mi mi prea blong olgeta evriwan oli save stap wan nomo. Papa, laef blong yu i joen long laef blong mi, mo laef blong mi i joen long laef blong yu. Mo long sem fasin, mi mi prea blong laef blong olgeta ya i save joen long laef blong yumi, blong oli stap wan nomo nao ol man blong wol oli save bilif we yu yu sanem mi mi kam.” (Jon 17:20, 21) Ol man blong Jisas oli kasem fasin joengud ya we i kolosap sem mak long fasin joengud we God i gat wetem Pikinini blong hem. Samting ya i hapen from we oli obei long Tok blong God mo ol tijing blong Jisas. Sem fasin ya i bigfala samting we i mekem famle blong Jeova long ful wol, i joengud tede.

9. ?Tabu speret i mekem wanem wok blong givhan long ol man blong Jeova blong joengud?

⁹ Wan narafala samting we i joenem ol man blong Jeova, hemia se yumi gat tabu speret blong God, no paoa blong hem we i stap wok. Samting ya i halpem yumi blong kasem save long ol trutok blong Baebol we oli stap kam long klia ples, mo from samting ya, yumi save joengud long wok blong hem. (Jon 16:12, 13) Speret ya i halpem yumi blong stap longwe long ol tingting long saed blong bodi we oli spolem fasin joengud, olsem ol rao, jelas, fasin kros, mo ol faet. Yes, speret blong God i mekem se yumi wokem ol gudfala fasin we oli mekem yumi joengud, olsem lav, glad, pis, longfala tingting, kaen fasin, gud fasin, bilif, kwaet fasin, mo fasin blong bos long tingting.​—Galesia 5:​19-​23.

10. (a) ?Olsem wanem lav we i stap insaed long wan famle we i joengud i sem mak long lav we i stap long medel blong ol man we oli givim laef blong olgeta long Jeova? (b) ?Wanem tok blong wan memba blong Hed Kampani we i soem filing blong hem long ol miting wetem ol brata blong hem long saed blong speret?

¹⁰ Ol memba blong wan famle we i joengud, oli laeklaekem olgeta mo oli glad blong stap wanples. Long sem fasin, olgeta we oli stap long famle blong ol man blong Jeova we i joengud, oli laekem hem, Pikinini blong hem, mo ol narafala man we oli gat sem bilif olsem olgeta. (Mak 12:30; Jon 21:15-​17; 1 Jon 4:​21) Wan prapa famle we i fulap long lav, i glad blong kakae wanples. Long sem fasin, olgeta we oli onagud long God, oli glad tumas blong kam long ol Kristin miting mo asembli, blong haremgud long gudfala kampani blong ol brata mo sista, mo blong haremgud long nambawan kakae long saed blong speret. (Matyu 24:45-​47; Hibrus 10:24, 25) Wan memba blong Hed Kampani blong ol Wetnes blong Jeova i bin talem olsem se: “Long tingting blong mi, blong kam wanples wetem ol brata mo sista, i wan samting we i karem bigfala glad bitim ol narafala samting, mo i leftemap tingting blong mi. Taem mi gat jans, mi laekem blong kam eli long Haos Kingdom, mo blong stap kasem taem we ol laswan man oli aot. Mi harem mi glad tumas taem mi toktok wetem ol man blong God. Taem mi joen wetem olgeta, mi haremgud, olsem we mi stap wetem stret famle blong mi.” ?Hemia filing blong yu tu?​—Ol Sam 27:4.

11. ?Ol Wetnes blong Jeova oli faenem spesel glad long wanem wok, mo wanem i kamaot taem yumi mekem wok blong God i kam stampa samting long laef blong yumi?

¹¹ Wan famle we i joengud i glad blong mekem ol samting tugeta. Long sem fasin, olgeta we oli stap long famle blong ol man we oli wosipim Jeova, oli glad blong joen tugeta blong mekem wok blong talemaot Kingdom mo blong mekem disaepol. (Matyu 24:14; 28:19, 20) Taem yumi joen oltaem long wok ya, yumi laekem moa ol narafala Wetnes blong Jeova. Sipos yumi mekem wok blong God i kam olsem stampa samting long laef blong yumi, mo yumi sapotem wok blong ol man blong hem, bambae samting ya tu i mekem yumi joengud olsem wan famle.

Tiokratik Oda i Impoten Tumas

12. ?Wanem fasin i stap insaed long wan famle we i glad mo i joengud, mo wanem plan i mekem ol Kristin kongregesen long faswan handred yia oli joengud?

¹² Sipos wan man i lidim famle blong hem long fasin we i strong be i gat lav, mo sipos famle i folem oda, ating bambae famle ya i joengud mo i glad. (Efesas 5:​22, 33; 6:1) Jeova God i stampa blong pis mo oda, mo olgeta we oli stap long famle blong hem oli ona long hem olsem “Hemia we i Hae Olgeta.” (Daniel 7:​18, 22, 25, 27; 1 Korin 14:33) Mo tu, oli luksave se God i jusum Pikinini blong hem, Jisas Kraes, blong kam king blong olgeta samting, mo i givim olgeta paoa long hem long heven mo long wol. (Matyu 28:18; Hibrus 1:​1, 2) From we Kraes i Hed blong Kristin kongregesen, hem i wan ogenaesesen we i folem oda mo i joengud. (Efesas 5:​23) Blong lukaot long ol wok blong ol kongregesen long faswan handred yia, i gat wan hed kampani, hemia ol aposol mo sam narafala “elda” we oli bigman long saed blong speret. Ol wanwan kongregesen oli gat ol elda no ol man we oli lukaot long olgeta, mo oli gat ol man blong givhan tu. (Ol Wok 15:6; Filipae 1:1) Taem yumi obei long olgeta we oli lidim kongregesen, samting ya i mekem yumi joengud.​—Hibrus 13:17.

13. ?Olsem wanem Jeova i pulum ol man oli kam long hem, mo wanem i kamaot from?

¹³ Be long saed blong oda ya we ol man blong Jeova oli gat, ?samting ya i min se oli joengud from we ol man we oli lidim olgeta oli strong tumas long olgeta mo oli no kea long filing blong ol wanwan man? !No gat! I no gat wan samting we God mo ogenaesesen blong hem i mekem, we i no soemaot lav. From lav nao we Jeova i soem, hem i pulum ol man oli kam long hem. Mo evri yia, plante handred taosen man oli wantem mo oli glad blong joen wetem ogenaesesen blong Jeova. Taswe, oli tekem baptaes blong soemaot se oli givim laef blong olgeta long God wetem fulhat blong olgeta. Tingting blong olgeta i olsem hemia blong Josua, we i talem long ol narafala man Isrel se: “Yufala i mas jusum tede, se bambae yufala i mekem wok blong hu . . . Long saed blong mi mo famle blong mi, bambae mifala i mekem wok blong Jeova.”​—Josua 24:15.

14. ?From wanem yumi save talem se ogenaesesen blong Jeova i tiokratik?

¹⁴ I no jes givim glad long yumi nomo blong stap olsem wan memba blong famle blong Jeova, be tu, yumi harem se yumi stap sefgud. Hemia from we ogenaesesen blong hem i tiokratik. Kingdom blong God hem i tiokratik tu (tok ya i kamaot long Grik tok ya the·osʹ, we i minim god, mo kraʹtos, we i minim rul). Hem i rul blong God, rul we hem i stanemap mo i sapotem. ‘Tabu nesen’ ya we Jeova i jusumaot, i stap aninit long rul blong hem, mo from samting ya, nesen ya tu i tiokratik. (1 Pita 2:9) From we Bigfala Man blong stanemap Tiokratik oda, Jeova, i stap olsem Jaj, Man blong givim Loa, mo King blong yumi, ale yumi gat gudfala risen blong harem se yumi stap sefgud. (Aesea 33:22) Be, ?olsem wanem sipos wan rao i kamaot we i save spolem glad, fasin sefgud, mo fasin joengud we yumi gat?

Hed Kampani i Tekem Aksin

15, 16. ?Wanem rao i kamaot long faswan handred yia, mo from wanem?

¹⁵ Blong holemtaet fasin joengud insaed long wan famle, sam samtaem i nidim blong stretem wan rao we i kamaot. Oraet nao, tingbaot sipos ol Kristin long faswan handred yia K.T.b oli mas stretem wan problem blong holemtaet fasin joengud insaed long famle blong ol man we oli wosipim God. ?Oli mekem wanem? Hed kampani i tekem aksin, hem i mekem disisen long saed blong speret. I gat wan store long Baebol long saed blong aksin we hem i tekem.

¹⁶ Raonabaot long yia 49 K.T., hed kampani i kam wanples long Jerusalem blong stretem wan bigfala trabol. Samting ya i blong holemtaet fasin joengud insaed long ‘haos blong God.’ (Efesas 2:​19) Samwe long 13 yia bifo, aposol Pita i bin prij long Konilyas, mo hem i kam faswan hiten man, no man blong narafala kantri, blong bilif mo tekem baptaes. (Ol Wok, japta 10) Long faswan misinari trep blong Pol, plante hiten man oli joen long Kristin skul. (Ol Wok 13:1 kasem 14:28) Yes, wan kongregesen blong ol hiten man we oli kam Kristin, i stanap long Antiok, Siria. Sam Kristin Jyu oli ting se ol hiten man ya we oli kam Kristin, oli mas sakomsaes mo folem Loa blong Moses, be sam narafala oli no agri long samting ya. (Ol Wok 15:​1-5) Rao ya i save spolem fasin joengud blong ol Kristin fulwan, mo maet hem i naf blong mekem kongregesen i seraot long tu grup, ol man Jyu mo ol hiten man. Taswe, hed kampani i tekem aksin kwiktaem blong holemtaet Kristin fasin joengud.

17. ?Ol Wok japta 15 i tokbaot wanem tiokratik rod we i leftemap fasin joengud?

¹⁷ Ol Wok 15:​6-​22 i talem se, ‘ol aposol mo ol elda oli mekem miting blong tokbaot bisnes ya.’ I gat sam narafala man tu long miting ya, wetem wan grup we oli kam long Antiok. Fastaem, Pita i eksplenem se ‘God i bin jusumaot hem blong talemaot gud nyus blong Kraes long ol hiten man, blong oli bilif.’ Nao “olgeta long kampani ya” oli lesingud, taem Banabas mo Pol tufala i tokbaot “ol saen blong paoa blong God, mo ol samting blong sapraes we God i yusum tufala finis blong mekem long fes blong ol hiten man,” no ol man blong ol narafala kantri. Nao, Jemes i talem olsem wanem blong stretem problem ya long saed blong sakomsaes. Baebol i talem se: Afta we hed kampani i mekem disisen, ‘ol aposol mo elda wetem ol memba blong kongregesen oli agri blong jusumaot sam man long kampani blong olgeta, blong sanem olgeta oli biaen long Pol mo Banabas, oli go long Antiok.’ Tufala man ya we oli “jusumaot”​—Judas mo Saelas​—oli karem wan leta i go long ol narafala man blong bilif, mo leta ya i leftemap tingting blong olgeta.

18. ?Hed kampani i mekem wanem disisen long saed blong Loa blong Moses, mo samting ya i mekem wanem long ol man Jyu mo ol hiten man we oli kam Kristin?

¹⁸ Leta we i talemaot disisen blong hed kampani, i stat wetem ol tok ya: “Mifala ol aposol mo elda, we mifala i brata blong yufala, mifala i talem halo long yufala long Antiok mo Siria mo Silisia, we yufala i bon long hiten, be naoia yufala i brata blong mifala.” Sam narafala brata tu oli bin stap long miting ya, be i luk olsem we “ol aposol mo elda” nomo oli mekemap hed kampani ya. Speret blong God i lidim olgeta, from we leta ya i talem se: ‘I tok blong tabu speret, mo i tok blong mifala tu, se bambae mifala i no putum sam narafala loa long yufala, we bambae i olsem wan hevi samting long yufala, antap long ol rul ya we i mas gat. Hemia ol rul ya. Bambae yufala i no kakae ol kakae ya we man i yusum finis blong mekem wosip long ol narafala god. Bambae yufala i no kakae blad. Bambae yufala i no kakae anamol we man i jokem nek blong hem nomo, we blad i stap yet long mit blong hem. Mo bambae yufala i no mekem nogud wetem woman.” (Ol Wok 15:23-​29) Ol Kristin oli no nidim blong sakomsaes mo gohed blong folem Loa blong Moses. Disisen ya i halpem ol Kristin man Jyu mo ol hiten man we oli kam Kristin, blong joengud long saed blong fasin mo toktok blong olgeta. Ol kongregesen oli glad mo oli gohed blong holemtaet fasin joengud we i sas tumas. Samting ya i sem mak long famle blong God tede long olgeta ples blong wol, we oli letem Hed Kampani blong ol Wetnes blong Jeova oli lidim olgeta.​—Ol Wok 15:30-​35.

Wok Tugeta Long Tiokratik Fasin Blong Joengud

19. ?From wanem fasin joengud i kam bigwan moa long famle blong ol man we oli wosip long Jeova?

¹⁹ Wan famle i joengud taem olgeta memba blong hem oli wokgud tugeta. Samting ya i tru tu long famle blong ol man we oli wosipim Jeova. Ol elda mo ol narafala long kongregesen long faswan handred yia, oli folem tiokratik fasin. Taswe, oli wokgud wetem hed kampani mo oli agri long ol disisen we hem i mekem. From help we Hed kampani i givim, ol elda oli ‘talemaot tok blong God,’ mo olgeta man insaed long kongregesen oli gat ‘wan tingting nomo.’ (2 Timote 4:​1, 2; 1 Korin 1:​10) Taswe, oli talemaot ol semkaen trutok blong Baebol long wok blong prij mo long ol Kristin miting, nating se oli stap long Jerusalem, Antiok, Rom, Korin, no wan narafala ples. Tiokratik fasin ya blong joengud tugeta i stap tede tu.

20. ?Blong holemtaet Kristin fasin joengud we yumi gat, yumi mas mekem wanem?

²⁰ Blong holemtaet fasin joengud blong yumi, yumi evriwan we yumi blong famle blong Jeova long ful wol, i mas traehad blong soemaot tiokratik lav. (1 Jon 4:​16) Yumi mas mekem ol samting we God i wantem, mo soem bigfala respek long ‘slef we i stret,’ mo long Hed kampani. Fasin obei blong yumi i mas sem mak olsem taem we yumi bin givim laef blong yumi i go long God. Hem i mas wan samting we yumi wantem mekem mo we yumi glad blong mekem. (1 Jon 5:3) !Long ol gudfala tok, man blong raetem Sam i joenem glad wetem fasin obei! Hem i singsing se: “!Yumi presem Hae God! Man we i stap ona long Hae God, mo we i glad blong obei long ol tok blong hem, man ya i save harem gud.”​—Ol Sam 112:1.

21. ?Olsem wanem yumi save pruvum se yumi folem tiokratik fasin?

²¹ Jisas, Hed blong kongregesen, hem i folem tiokratik oda fulwan, mo oltaem hem i mekem samting we Papa blong hem i wantem. (Jon 5:​30) Taswe, yumi mas folem nambawan Eksampel ya blong yumi, mo mekem wok blong Jeova long tiokratik fasin mo wetem fasin joengud, mo yumi mas wokgud mo agri fulwan wetem ogenaesesen blong Hem. Ale, wetem wan hat we i fulap long glad mo tangkyu, bambae yumi talem sem tok we i stap long singsing blong man blong raetem Sam, se: “!Yufala i luk! !I gud tumas mo i naes tumas blong ol brata oli stap wanples, oli joengud long wan tingting!”

[Ol futnot]

?Bambae Yu Ansa Olsem Wanem?

◻ ?Olsem wanem Ol Sam 133 i stret long fasin joengud blong yumi ol Kristin?

◻ ?Wanem sam samting we oli mekem ol man oli joengud?

◻ ?From wanem tiokratik oda i impoten tumas blong mekem se ol man blong God oli joengud?

◻ ?Hed kampani blong faswan handred yia i tekem wanem aksin blong holemtaet fasin joengud?

◻ ?Long tingting blong yu, yumi mas mekem wanem blong wok long tiokratik fasin blong joengud?

[Tok blong pija long pej 13]

Hed kampani i tekem aksin blong holemtaet fasin joengud