Wan Kwestin

Ol ripot we oli kamaot long sam yia we i pas, oli soemaot se namba blong ol man we oli stap kakae bred mo dring waen long Memoriol i go antap lelebet. ?Samting ya i minim se tabu speret i stap makemaot plante nyuwan?

I stret blong bilif se namba blong ol 144,000 Kristin we tabu speret i makemaot olgeta, hem i fulwan finis plante yia bifo.

Ol Wok 2:​1-4 i tokbaot ol faswan man long smol grup ya se: “Long dei blong Pentekos, we hemia wan lafet blong ol man Isrel, olgeta ya we oli bilif long Jisas oli stap wan ples. Nao wantaem nomo, i gat wan noes i kamaot long skae, we i olsem wan bigfala win i blu, nao noes ya i kavremap olgeta ples long haos ya we oli stap sidaon insaed long hem. Nao olgeta ya oli luk wan samting we i olsem faea i laet. Faea ya i seraot, nao laet blong hem i kam kasem evri man. Mo olgeta evriwan, Tabu Speret i kam fulap long olgeta, nao oli stat toktok long ol lanwis blong ol narafala man, olsem we Speret ya i givim paoa long olgeta blong oli save toktok olsem.”

Afta long taem ya, Jeova i jusum sam narafala man bakegen, mo hem i makemaot olgeta wetem tabu speret blong hem. Plante taosen oli joen long grup ya long ol faswan yia blong Kristin skul. Long lafet blong Memoriol long taem blong yumi, plante taem brata we i givim tok i yusum ol tok blong aposol Pol long Rom 8⁠:​15-17, we i talem se olgeta we tabu speret i makemaot olgeta oli kam olsem ol “pikinini blong God.” Pol i talem tu se tabu speret we oli kasem, hem i ‘kam joen wetem speret blong olgeta, blong talemaot se oli pikinini blong God, mo bambae oli save kasem ol samting wetem Kraes.’ Olgeta we tabu speret i rili makemaot olgeta oli savegud se oli gat mak ya. Hem i no jes wan samting we olgeta nomo oli wantem. Mo hem i no wan samting we i kamaot from we oli letem filing blong olgeta i bos long olgeta, mo oli stap gyaman long olgeta bakegen.

Yumi kasem save se long ol handred yia we oli pas, tabu speret i gohed blong makemaot moa man blong go long heven. Maet long Medel Ejes,a taem ya we man i stap yet long tudak, ating namba blong olgeta we tabu speret i makemaot i smol nomo.b Mo taem trufala Kristin skul i stanap bakegen long en blong ol yia 1800, God i singaotem mo i makemaot sam moa man bakegen. Be, i luk olsem se samwe long 1935, grup blong ol 144,000 i kasem fulnamba blong hem. Taswe, long taem ya wan narafala grup blong ol trufala Kristin i stat, we hop blong olgeta i blong laef long wol ya. Jisas i kolem olgeta se ol “narafala sipsip,” we oli joen blong wosip wetem olgeta we tabu speret i makemaot olgeta, olsem wan kampani nomo we God i agri long olgeta.​—Jon 10:14-​16.

Ol pruf we oli kamaot long ol yia we oli pas, i soemaot se God i no moa gohed blong singaotem sam moa man blong makemaot olgeta wetem tabu speret. Mo yumi luk blesing blong Jeova long “bigfala kampani” we i stap gru, mo we oli gat hop blong laef tru long “bigfala trabol.” (Revelesen 7:​9, 14) Eksampel, long lafet blong Memoriol long 1935, i gat 63,146 man oli kam, mo olgeta we oli kakae bred mo dring waen blong soemaot se tabu speret i makemaot olgeta, namba blong olgeta i kasem 52,465. Tate yia biaen, long 1965, 1,933,089 man oli kam long Memoriol, mo olgeta we oli kakae mo dring i godaon long 11,550. Tate yia biaen bakegen, long 1995, namba blong ol man we oli kam long lafet ya i kasem 13,147,201, be i gat 8,645 nomo we oli kakae bred mo dring waen. (1 Korin 11:23-​26) I klia se, taem ol yia oli stap pas, namba blong ol man we oli talem se tabu speret i makemaot olgeta, i godaon bigwan​—samwe long 52,400 long 1935; 11,500 long 1965; 8,600 long 1995. Be, olgeta we oli gat hop blong laef long wol oli kasem blesing, mo namba blong olgeta i kam antap bigwan.

Laswan ripot blong Memoriol we yumi save namba blong hem, hemia long yia 1995. Hem i soemaot se i gat 28 moa man i bitim 1994, we oli kakae mo dring long lafet ya. Be taem yumi tingbaot bigfala namba we oli kam long Memoriol, namba blong ol man we oli dring mo kakae i stap godaon yet. Taem yumi skelem olgeta samting, sipos i gat sam man we oli mekem disisen blong kakae bred mo dring waen, samting ya i no mas mekem yumi wari tumas. Long ol yia we oli pas, samfala we oli jes baptaes, oli stat, wantaem nomo, blong kakae bred mo dring waen. Be, plante taem, olgeta ya oli luksave biaen, se oli bin mekem wan mastik. Samfala oli luksave se oli mekem olsem from we oli lesin long filing blong olgeta we i trabol taem oli stap harem nogud long bodi no tingting. Be, smoltaem biaen oli luksave se God i no rili bin singaot olgeta blong go laef long heven. Oli askem God blong i sore long olgeta from rong tingting ya we oli bin gat, mo blong i fogivim olgeta. Nao, oli gohed blong mekem wok blong hem olsem ol gudfala Kristin we oli stap tru long hem, wetem hop blong laef olwe long wol ya.

Yumi no nidim blong wari sipos wan man i stat tekem bred mo waen, no sipos hem i stop blong mekem olsem. I no bisnes blong yumi sipos wan man i kasem tabu speret blong go laef long heven, no no gat. Tingbaot strong promes ya blong Jisas se: “Gudfala man blong lukaot long sipsip, mi ya. . . . mi mi save ol sipsip blong mi.” Long sem fasin, Jeova i savegud hu olgeta we hem i bin jusum olsem ol speret pikinini blong hem. I stret nomo blong bilif se namba blong olgeta we tabu speret i makemaot, bambae i gohed blong godaon. Plante long olgeta ya oli ded from we oli kam olfala no from sam narafala samting i kamaot nao i finisim laef blong olgeta long wol ya. Olgeta ya we oli rili trufala man we tabu speret i makemaot olgeta, mo oli stanap strong gogo kasem ded, oli gat hop blong kasem praes ya blong laef. Mo ol narafala sipsip tu, we oli wasem klos blong olgeta long blad blong Smol Sipsip, oli stap wet long taem we bambae oli laef tru long bigfala trabol we i kam kolosap nao.​—2 Timote 4:​6-8; Revelesen 2:​10.

[Ol futnot]