?Olsem Wanem Ol Elda We Oli Visitim Ol Kongregesen Oli Mekem Wok Blong Ol Gudfala Bosman?
“Long gladhat blong God, hem i givim ol narnarafala paoa long yufala blong mekem ol wok blong hem olsem ol gudfala bosman. Yufala i mas yusum ol presen ya blong givgivhan long yufala.”—1 PITA 4:10, NW.
1, 2. (a) ?Olsem wanem bambae yu yu eksplenem mining blong tok ya “bosman”? (b) ?Hu olgeta we God i yusum olgeta olsem ol bosman?
JEOVA i stap yusum olgeta Kristin we oli holemstrong long hem, olsem ol bosman. Plante taem wan bosman i minim wan wokman we i lukaot long olgeta samting insaed long haos blong masta blong hem. Maet hem i lukaot long bisnes blong masta blong hem tu. (Luk 16:1-3; Galesia 4:1, 2) Jisas i tokbaot grup blong ol tabu man blong hem long wol ya, we oli fasgud long hem, se oli olsem wan ‘bosman we i holemstrong long wok blong masta blong hem.’ Hem i putum “olgeta samting blong hem” i go long han blong bosman ya, wetem wok blong talemaot Kingdom tu.—Luk 12:42-44; Matyu 24:14, 45.
2 Aposol Pita i talem se, tru long gladhat blong God, olgeta Kristin oli ol bosman we oli gat ol narnarafala paoa. Ol Kristin wanwan oli gat prapa wok blong olgeta olsem ol gudfala bosman. (1 Pita 4:10) Ol Kristin elda oli ol bosman, mo sam long olgeta oli ol elda we oli wokbaot blong visitim ol kongregesen. (Taetas 1:7) ?Yumi mas gat wanem tingting long saed blong ol elda ya we oli wokbaot blong visitim ol kongregesen? ?Wanem ol fasin we oli mas gat mo ol mak we oli mas traehad blong kasem? Mo, ?olsem wanem oli save givhan fulwan long ol kongregesen?
Yumi Glad Long Wok Blong Olgeta
3. ?From wanem yumi save talem se ol elda we oli wokbaot blong visitim ol kongregesen oli ol ‘gudfala bosman’?
3 Wan Kristin hasban mo waef tufala i raetem leta i go long wan elda we i stap wokbaot blong visitim ol kongregesen mo woman blong hem, i se: “Mifala i wantem talem tangkyu long yutufala from taem mo lav we yutufala i stap givim long mifala. Olgeta advaes blong yutufala mo tok blong leftemap tingting, oli rili givhan long mifala olsem wan famle. Mifala i save se mifala i mas gohed blong gru long saed blong speret, be ol problem we mifala i kasem taem mifala i stap gru, oli moa isi blong winim taem Jeova i halpem mifala, mo taem ol brata mo sista olsem yutufala oli givhan long mifala.” Plante taem, ol elda we oli wokbaot blong visitim ol kongregesen oli harem ol tok olsem, from we oli soem intres long ol brata blong olgeta wanwan, olsem wan gudfala bosman we i lukaot long nid blong olgeta evriwan long haos blong masta blong hem. Sam long ol elda ya, oli ol gudfala man blong toktokgud long fored blong ol narafala. Plante oli gat gudhan long wok blong prij, mo sam narafala oli soemaot bigfala kaengud fasin mo sore long ol man. Taem ol elda ya we oli wokbaot blong visitim ol kongregesen oli yusumgud ol presen ya blong givhan long ol narafala, i stret nomo we yumi talem se oli ol “gudfala bosman.”
4. ?Bambae yumi tokbaot wanem kwestin naoia?
4 Aposol Pol i raetem se: “Taem we masta i putum wok long han blong bosman blong hem, man ya i mas lukaotgud blong mekem ol samting we masta blong hem i talem long hem.” (1 Korin 4:2) Wok blong givhan long ol Kristin brata mo sista long ol defren kongregesen evri wik, hemia wan nambawan jans we i karem bigfala glad. Be, hem i wan hevi wok tu. Taswe, ?olsem wanem ol elda we oli wokbaot blong visitim ol kongregesen oli save mekemgud mo holemstrong long wok blong olgeta olsem ol bosman?
Mekemgud Wok Blong Olgeta Olsem Ol Bosman
5, 6. ?From wanem i impoten tumas se wan elda we i wokbaot blong visitim ol kongregesen i dipen oltaem long Jeova tru long prea?
5 I impoten tumas se ol elda we oli wokbaot blong visitim ol kongregesen oli mas dipen oltaem long Jeova tru long prea, nao bambae oli save mekemgud wok blong olgeta olsem ol bosman. From program blong olgeta mo fulap wok we oli mas mekem, maet samtaem oli harem se evri samting i hevi tumas long olgeta. (Skelem wetem 2 Korin 5:4.) Taswe, oli mas folem tok long singsing blong Deved, man we i raetem Sam ya, se: “Yufala i mas putum ol trabol blong yufala long Hae God, nao hem bambae i blokem yufala, i sevem yufala. Hem i no save letem stret man i lus.” (Ol Sam 55:22) Ol narafala tok ya blong Deved tu, oli save leftemap tingting blong olgeta, se: “Yumi presem Masta ya blong yumi, we evri dei, hem i stap karem ol hevi samting blong yumi.”—Ol Sam 68:19.
6 ?Olsem wanem Pol i kasem paoa blong mekem ol wok blong hem long saed blong speret? Hem i raetem se: “Mi save mekem evri samting, long paoa blong Kraes ya we i stap mekem mi mi strong.” (Filipae 4:13) Yes, Jeova God nao i Stampa blong paoa blong Pol. Long sem fasin, Pita i givim advaes ya se: “Sipos yufala i stap prij, yufala i mas talemaot ol tok we God i givim. Sipos yufala i stap givhan long ol man, yufala i mas mekem long paoa we God i givim long yufala. Nao long olgeta fasin ya, nem blong God bambae i save go antap moa, from Jisas Kraes ya, we olgeta paoa mo ol gudgudfala samting oli blong hem.” (1 Pita 4:11) Wan brata we i wok plante yia olsem wan elda we i wokbaot blong visitim ol kongregesen, i soemaot se i impoten tumas blong dipen oltaem long God, i se: “Dipen oltaem long Jeova taem yu mas stretem ol problem, mo lukluk i go long ogenaesesen blong hem blong givhan long yu.”
7. ?Olsem wanem fasin blong skelemgud ol samting i impoten long wok blong wan elda we i wokbaot blong visitim ol kongregesen?
7 Blong mekemgud wok blong hem, wan elda we i wokbaot blong visitim ol kongregesen i mas gat fasin blong skelemgud ol samting. Olsem ol narafala Kristin, hem i traehad blong ‘jusumaot ol samting we oli impoten moa.’ (Filipae 1:10)a Taem ol elda blong wan kongregesen oli gat sam kwestin long saed blong wan bisnes, oli waes sipos oli tokbaot bisnes ya wetem seket elda we i visitim olgeta. (Proveb 11:14; 15:22) Ating ol tok we hem i talem from we hem i skelemgud ol samting, wetem advaes blong hem we i stanap long Baebol, bambae oli givhan bigwan long ol elda we oli gohed blong stretem bisnes ya afta we hem i lego kongregesen. Pol i tokbaot samting ya, taem hem i talem long Timote se: “Yu yu harem finis ol toktok blong mi we mi stap talemaot long fes blong plante man. Nao yu mas putum ol toktok ya long han blong sam man we yu save trastem olgeta, se oli naf blong tijim ol narafala man bakegen long ol toktok ya.”—2 Timote 2:2.
8. ?From wanem i impoten blong stadi dip mo tingtingdip long Baebol?
8 Dip stadi long Baebol mo fasin blong tingting dip oli impoten tumas blong givim advaes we i stret. (Proveb 15:28) Wan distrik elda i talem se: “Taem mifala i mekem miting wetem ol elda, mifala i no mas fraet blong talemaot stret se mifala i no save ansa long wan kwestin.” Sipos oli traehad blong “kasem tingting blong Kraes” long wan bisnes, bambae oli givim advaes blong Baebol we i save halpem narafala blong folem samting we God i wantem. (1 Korin 2:16) Sam samtaem, elda we i wokbaot blong visitim ol kongregesen i mas raetem leta i go long Watch Tower Sosaeti blong askem advaes long wan samting. Nating se i olsem, bilif long Jeova mo lav blong trutok, oli moa impoten bigwan bitim we oli traem mekem narafala i tinghae long olgeta, no oli gat nambawan fasin blong toktok. Taem Pol i statem wok blong prij long Korin, hem i no yusum ‘ol flas tok mo waes tok blong man,’ no gat. Hem i ‘no gat paoa nating, i stap fraet mo i stap seksek.’ ?Samting ya i mekem se wok blong hem i no karem frut? Defren olgeta, hem i halpem ol man Korin blong bilif, ‘i no long waes tok blong man, be long paoa blong God nomo.’—1 Korin 2:1-5.
Sam Narafala Impoten Fasin
9. ?From wanem ol elda we oli visitim ol kongregesen oli nidim fasin ya blong kasem save long filing mo trabol blong ol narafala?
9 Ol elda we oli wokbaot blong visitim ol kongregesen oli mas traehad blong putum olgeta long ples blong narafala, olsem we oli kasem save long trabol blong hem, nao oli save karem gudfala frut long wok blong olgeta. Pita i talem long ol Kristin blong soemaot ‘filing long ol narafala brata,’ mo blong gat “sore.” (1 Pita 3:8, NW, futnot) Wan seket elda i talem se, hem i harem we hem i mas ‘intres long olgeta evriwan insaed long kongregesen mo rili lesingud long olgeta.’ Pol, we i gat sem tingting ya, i raetem se: “Taem ol man oli stap harem i gud tumas, yufala tu i mas harem gud wetem olgeta. Mo taem ol man oli stap harem nogud, oli stap krae, be yufala tu i mas krae wetem olgeta.” (Rom 12:15) Tingting olsemia i save pulum ol elda we oli wokbaot blong visitim ol kongregesen, blong traehad blong kasem save long ol problem mo laef blong ol Kristin brata mo sista blong olgeta. Nao oli save givim ol gudfala advaes blong Baebol, we i save mekem i gud long ol narafala sipos oli folem advaes ya. Wan seket elda we i gat nambawan fasin ya blong kasem save long filing blong ol narafala, i kasem wan leta long wan kongregesen kolosap long Turin, long Itali. Leta ya i talem se: “Sipos yu wantem se ol narafala oli intres long yu, yu mas intres long olgeta. Sipos yu wantem mekem narafala i glad, yu mas glad. Sipos yu wantem se narafala i laekem yu, yu mas laekem ol narafala. Sipos yu wantem se narafala i halpem yu, yu mas rere blong halpem ol narafala. !Hemia nao samting we yu yu lanem mifala blong mekem!”
10. ?Sam seket mo distrik elda oli talem wanem long saed blong tingting daon, mo Jisas i givim wanem eksampel long saed ya?
10 Ol elda we oli wokbaot blong visitim ol kongregesen oli save givhan bigwan sipos oli gat tingting daon mo oli mekem se ol man oli no fraet blong toktok wetem olgeta. Wan seket elda i luksave se: “I impoten tumas blong gat tingting we i stap daon oltaem.” Hem i givim advaes long olgeta we oli jes statem wok ya blong wokbaot i go long ol kongregesen, se: “Yufala i no mas letem ol brata we oli rij oli gat moa paoa long yufala from we oli save mekem plante samting blong givhan long yufala, mo yufala i no mas frengud wetem olgeta ya nomo. Be yufala i mas traehad oltaem blong mekem i sem mak nomo long olgeta man.” (2 Kronikel 19:6, 7) Sipos wan elda we i wokbaot blong visitim ol kongregesen i rili gat tingting daon, hem i no save ting se hem i impoten tumas from we hem i stap mekem wok blong Sosaeti. Tok blong wan distrik elda i stret nomo se: “Yu mas gat tingting daon mo rere blong lesin long ol brata. Oltaem yu mas mekem se oli no fraet blong kam toktok wetem yu.” Jisas Kraes we i hae moa long olgeta man we oli laef long wol ya, hem i naf blong daonem ol narafala man sipos hem i wantem. Be tingting blong hem i stap daon, mekem se ol man oli no fraet blong kam toktok wetem hem, mo ol pikinini tu oli haremgud taem oli stap kolosap long hem. (Matyu 18:5; Mak 10:13-16) Ol elda we oli wokbaot i go long ol kongregesen, oli wantem se, ol pikinini, ol yangfala, ol olfala—yes, eni man mo evri man insaed long kongregesen—oli no fraet blong kam luk olgeta.
11. ?Wanem samting i save kamaot from fasin blong talem sore taem i stret blong mekem olsem?
11 I tru se, “plante taem yumi evriwan i mekem i no stret,” mo ol elda we oli wokbaot blong visitim ol kongregesen oli stap mestem samtaem tu. (Jemes 3:2) Taem oli mekem mastik, sipos oli talem sore we i rili kamaot long hat blong olgeta, bambae oli soemaot long ol narafala elda, wan gudfala eksampel blong tingting daon. Proveb 22:4 i talem se, “man we tingting blong hem i stap daon mo i fraetgud [onagud] long Jeova, bambae hem i kam rij, mo bambae i kasem haenem mo laef.” Yes, olgeta man blong God oli mas ‘gat tingting daon taem oli wokbaot wetem God blong olgeta.’ (Maeka 6:8, Baebol we i kamaot long 1960) Taem oli askem long wan seket elda se wanem advaes bambae hem i givim long ol elda we oli jes stat blong visitim ol kongregesen, hem i talem se: “Soem bigfala respek mo kea long ol brata mo sista, mo tingbaot olgeta olsem we oli moagud long yu. Bambae yu lanem plante samting from olgeta ya. Holem tingting daon oltaem. Soemaot trufala fasin blong yu. No mekem flas.”—Filipae 2:3.
12. ?From wanem fasin blong wok strong long Kristin wok blong prij i impoten?
12 Fasin blong wok strong long Kristin wok blong prij, i mekem se tok blong elda we i wokbaot blong visitim ol kongregesen i gat moa paoa. Yes, taem hem mo waef blong hem tufala i soem eksampel blong wok strong long wok blong prij, samting ya i save leftemap tingting blong ol narafala elda wetem waef blong olgeta, mo fulwan kongregesen, blong olgeta tu oli soemaot strong tingting long wok blong prij. Wan seket elda i talem se: “Soemaot se yu glad blong wok strong long wok blong prij.” Mo hem i gohed blong talem se: “Oltaem mi faenem se, ol kongregesen we oli strong moa long wok blong prij, oli no gat plante problem.” Wan narafala seket elda i talem se: “Mi bilif se sipos ol elda oli go prij wetem ol brata mo sista mo halpem olgeta blong faenem glad long wok ya, samting ya bambae i mekem se oli gat pis long tingting blong olgeta mo oli haremgud tumas long wok blong Jeova.” Aposol Pol i ‘mekem tingting blong hem i strong blong go talemaot gud nyus blong God long ol man Tesalonaeka, long fes blong plante man we oli agens long hem.’ !Yumi luksave from wanem oli rimemba wetem glad, taem ya we hem i visitim olgeta, mo wok blong prij we hem i mekem! !Taswe oli wantem tumas blong luk hem bakegen!—1 Tesalonaeka 2:1, 2; 3:6.
13. ?Wan elda we i stap visitim ol kongregesen i tingbaot wanem samting taem hem i stap prij wetem ol Kristin brata mo sista?
13 Taem wan elda we i visitim ol kongregesen i wok wetem ol Kristin brata mo sista long wok blong prij, hem i mas tingbaot laef blong olgeta wanwan mo ol samting we maet oli no naf blong mekem. Maet ol advaes blong hem i save halpem olgeta, be hem i mas tingbaot se, samfala oli save seksek taem oli prij wetem wan elda we i mekem wok ya blong plante yia finis. Taswe, long saed blong sam brata mo sista, i moagud we hem i leftemap tingting blong olgeta i bitim we hem i givim advaes long olgeta. Taem hem i folem ol pablisa mo paenia i go long ol Baebol stadi, maet oli glad moa sipos hem i lidim stadi. Long rod ya, oli save lanem sam samting we bambae i givhan long olgeta blong kamgud moa long fasin blong tij.
14. ?From wanem yumi save talem se, taem ol elda we oli wokbaot blong visitim ol kongregesen oli wok strong, bambae oli pulum ol narafala tu blong wok strong?
14 Taem ol elda we oli visitim ol kongregesen oli wok strong, oli pulum ol narafala tu blong wok strong. Wan seket elda long Uganda i wokbaot wetem wan brata blong wan haoa, tru long dak bus, blong mekem wan Baebol stadi we i no stap gohed gud. Taem tufala i stap wokbaot, ren i foldaon bigwan, mekem se tufala i wetwet evriwan taem tufala i kasem haos blong famle ya we i stadi Baebol. Taem ol sikis memba blong famle ya oli faenemaot se man ya i wan elda we i stap visitim ol kongregesen, oli sapraes bigwan. Oli save se ol pasta blong jyos blong olgeta oli neva soem intres olsemia long ol sipsip blong olgeta. Long Sande biaen, oli kam long miting blong fastaem, mo oli talem se oli wantem tumas blong kam ol Wetnes blong Jeova.
15. ?Wanem gudfala samting i kamaot long wan seket elda we i wok strong long Meksiko?
15 Long ples ya Oksaka long Meksiko, wan seket elda i mekem wan samting we ol man oli sapraes long hem. Hem i mekem plan blong slip blong fo naet long wan rum blong kalabus, from we hem i wantem visitim wan grup blong seven presina we oli jes kam ol pablisa blong Kingdom. Long olgeta dei ya, hem i folem ol presina ya taem oli stap prij long ol wanwan rum blong kalabus ya mo taem oli mekem ol Baebol stadi. From we plante man oli intres tumas, sam long ol stadi ya oli gohed go kasem let long naet. Seket elda ya we i gat strong tingting blong wok, i raetem se: “Taem visit blong mi i finis, mi mo ol presina ya, mifala i fulap long glad from we mifala evriwan i leftemap tingting blong mifala.”
16. ?From wanem i gud tumas taem ol elda we oli wokbaot blong visitim ol kongregesen mo ol waef blong olgeta oli leftemap tingting blong ol narafala?
16 Ol elda we oli wokbaot blong visitim ol kongregesen oli traem talem ol tok we i leftemap tingting blong ol narafala. Taem Pol i visitim ol kongregesen long Masedonia, hem i ‘talem plante tok blong mekem tingting blong olgeta ya i strong.’ (Ol Wok 20:1, 2) Ol tok blong leftemap tingting, oli save givhan bigwan blong lidim ol yangfala mo ol olfala tu, blong kasem ol mak long saed blong speret. Long wan bigfala hedkwota blong Watch Tower Sosaeti, oli kaontem kolosap 20 pesen blong olgeta we oli wok long ples ya, se oli joen long fultaem wok blong prij fastaem from we ol seket elda nao oli bin leftemap tingting blong olgeta blong mekem olsem. Waef blong elda we i wokbaot blong visitim ol kongregesen, hem tu i save leftemap tingting blong ol narafala bigwan, taem hem i soem gudfala eksampel long fultaem wok blong talemaot Kingdom.
17. ?Wan olfala seket elda i gat wanem tingting long saed blong jans we hem i gat blong givhan long ol narafala?
17 Ol olfala mo olgeta we tingting blong olgeta i foldaon, oli rili nidim we narafala i talem ol gudfala toktok long olgeta. Wan seket elda we i olfala nao, i raetem se: “Wan haf blong wok blong mi we i mekem mi mi glad bitim mak, hemia jans we mi gat blong givhan long ol sipsip blong God we oli kam slak, no we oli no moa strong long bodi blong olgeta. Ol tok blong Rom 1:11, 12 i gat spesel mining long mi, from we taem ‘God i yusum mi blong givhan long olgeta ya long saed blong speret, blong oli kasem paoa blong kam strong,’ samting ya i rili leftemap tingting blong mi tu, mo i givim paoa long mi.”
Ol Blesing From Wok We Oli Glad Blong Mekem
18. ?Ol elda we oli wokbaot blong visitim ol kongregesen oli wantem mekem wanem samting we i stanap long Baebol?
18 Ol elda we oli wokbaot blong visitim ol kongregesen oli rili wantem givhan long ol Kristin brata mo sista blong olgeta. Oli wantem mekem ol kongregesen oli kam strong moa long saed blong speret. (Ol Wok 15:41) Wan elda we i stap wokbaot blong visitim ol kongregesen, i stap wokhad “blong leftemap tingting, mekem narafala i haremgud, mo pulum narafala blong wantem mekem wok blong prij mo gohed blong folem trutok long laef blong hem.” (3 Jon 3) Wan narafala elda we i visitim ol kongregesen i stap traehad blong mekem ol Kristin brata blong hem oli strong long saed blong bilif. (Kolosi 2:6, 7) Rimemba se elda ya we i visitim ol kongregesen i wan ‘man blong wok wetem yumi,’ hem i no masta blong bilif blong yumi. (Filipae 4:3; 2 Korin 1:24) Visit blong hem i blong leftemap tingting blong yumi mo blong givim jans long yumi blong mekem moa wok. Mo tu, hem i wan jans long ol elda blong lukluk olsem wanem kongregesen i stap gohed, mo blong mekem sam plan blong fyuja. From tok mo eksampel blong elda ya, ol pablisa, ol paenia, ol man blong givhan, mo ol elda long kongregesen, oli sua blong kam strong moa mo blong kasem paoa blong mekem wok we i stap yet. (Skelem wetem 1 Tesalonaeka 5:11.) Taswe, sapotem visit blong seket elda wetem fulhat blong yu, mo kasem plante gudfala samting from wok blong distrik elda.
19, 20. ?Ol elda we oli visitim ol kongregesen mo waef blong olgeta oli kasem wanem blesing from wok we oli holemstrong long hem?
19 Ol elda we oli wokbaot blong visitim ol kongregesen wetem waef blong olgeta, oli kasem bigfala blesing from wok we oli holemstrong long hem. Mo oli save sua se bambae Jeova i blesem olgeta from gudfala wok ya we oli mekem. (Proveb 19:17; Efesas 6:8) Georg mo Magdalena, hemia tu olfala we tufala i wok blong plante yia blong visitim ol kongregesen. Long wan asembli long Laksembog, wan woman i kam talem halo long Magdalena, mo hem i talem se Magdalena i bin prij long hem bitim 20 yia bifo. Woman Jyu ya i stat intres long trutok taem Magdalena i livim sam buk we oli tokbaot Baebol wetem hem, mo biaen, woman ya i tekem baptaes. Wan Kristin sista i kam luk Georg, from we hem i rimemba se brata ya i bin kam long haos blong hem kolosap 40 yia i pas finis. Fasin blong hem blong toktok wetem glad long saed blong gud nyus, i pulum woman ya mo hasban blong hem blong bilif long trutok. Tru ya, Georg mo Magdalena tufala tugeta oli glad tumas.
20 Ol gudfala frut we Pol i kasem long wok blong prij long Efesas i mekem hem i glad, mo maet samting ya nao i bin pusum hem blong talem bakegen ol tok blong Jisas se: “Man we i stap givim presen i go, hem i save harem gud moa, i winim man we i stap kasem presen blong hem.” (Ol Wok 20:35) Long wok ya blong visitim ol kongregesen, ol elda ya oli mas soem oltaem fasin ya blong givim samting i go long narafala. Taswe, olgeta we oli joen long wok ya oli kasem glad, antap moa, taem oli luk gudfala frut i kamaot from wok ya. Wan elda we tingting blong hem i foldaon, i raetem wan leta i go long seket elda we i bin givhan long hem, se: “Yu yu no save, olsem wanem we yu rili bin givhan long mi ‘blong haremgud tumas’ long saed blong speret, long laef blong mi. . . . Bambae yu neva save fulwan olsem wanem we yu yu halpem mi bigwan, mi ya we mi olsem Asaf, we ‘kolosap tingting blong hem i no moa stap long hem.’ ”—Kolosi 4:11; Ol Sam 73:2.
21. ?From wanem yu save talem se 1 Korin 15:58 i stret long wok blong ol elda we oli wokbaot blong visitim ol kongregesen?
21 Wan olfala Kristin man we i mekem wok blong seket elda blong plante yia, i laekem blong tingbaot 1 Korin 15:58. Long ples ya, Pol i talem se: “Yufala i mas stanap strong. Yufala i mas no slak bakegen. Oltaem yufala i mas wok strong long ol wok ya blong Masta blong yumi. Yufala i save finis se taem yufala i wok blong Masta ya blong yumi, be wok ya bambae i gat frut blong hem.” Yes, i tru se ol elda we oli wokbaot blong visitim ol kongregesen oli gat plante samting blong mekem long wok blong Masta. !Mo yumi gat tangkyu from we, tru long gladhat blong Jeova, olgeta ya oli haremgud tumas blong mekem wok ya olsem ol gudfala bosman!
[Futnot]
a Lukluk haf ya “?Yu Yu Save Glad Taem Yu Gat Plante Samting Blong Mekem?” long Wajtaoa blong Mei 15, 1991, pej 28-31.
?Bambae Yu Yu Ansa Olsem Wanem?
◻ ?From wanem yumi save talem se ol elda we oli wokbaot blong visitim ol kongregesen oli olsem ol “gudfala bosman”?
◻ ?Wanem sam fasin we oli save halpem ol seket mo distrik elda blong mekem plante gudfala wok?
◻ ?From wanem tingting daon mo fasin blong wok strong oli impoten long ol elda we oli wokbaot blong visitim ol kongregesen?
◻ ?Ol elda we oli visitim ol kongregesen oli wantem mekem wanem long ol kongregesen?
[Tok blong pija long pej 16]
Ol elda we oli visitim kongregesen oli traehad blong leftemap tingting blong ol Kristin brata mo sista
[Tok blong pija long pej 17]
Fasin blong kampani wetem ol elda blong visitim kongregesen mo waef blong olgeta, i givhan long ol yangfala mo ol olfala
[Tok blong pija long pej 18]
Elda blong visitim kongregesen we i wok strong blong prij, i save pulum ol narafala blong wok strong tu