Ol Papa Mama, Stap Glad Long Ol Pikinini Blong Yufala

“Papa mo mama blong yu bambae tufala i haremgud tumas.”​—PROVEB 23:25.

1. ?Wanem samting i save mekem ol papa mama oli stap glad long ol pikinini blong olgeta?

!I GUD tumas blong luk wan smol tri we i gru i kam wan bigfala tri, i naes tumas mo i givim gudfala sado! Yu yu glad moa sipos yu nao yu bin planem tri ya mo yu bin lukaotgud long hem. Long sem fasin, ol papa mama we oli keagud long ol pikinini blong olgeta gogo oli kam ol bigman long wok blong God, oli save glad tumas long olgeta. Olsem wan proveb blong Baebol i talem: “Tru ya, papa blong pikinini we i mekem stret fasin, bambae hem i glad. Mo papa blong pikinini we i waes, bambae hem tu i haremgud tumas long hem. Papa mo mama blong yu bambae tufala i haremgud tumas, mo mama blong yu we i bonem yu bambae hem i glad.”​—Proveb 23:24, 25.

2, 3. (a) ?Olsem wanem ol papa mama oli save blokem fasin blong harem nogud mo kros long ol pikinini blong olgeta? (b) ?Ol smol tri mo ol pikinini tu, oli nidim wanem blong bambae oli givim glad long ol papa mama blong olgeta?

² Be, wan pikinini i no kasem “stret fasin” mo “waes” olsem nomo. Ol papa mo mama oli mas hadwok tumas blong mekem se ol yangfala oli no kam samting we i mekem olgeta oli “harem nogud” mo “kros.” I sem mak olsem hadwok we wan man i mas mekem blong bambae wan smol tri i kam wan bigfala tri we i strong gud. (Proveb 17:21, 25) Eksampel, sipos yu putum wan wud kolosap long wan yangfala tri blong sapotem hem, samting ya i save givhan long hem blong gru stret mo kam strong. Yu mas givim wora oltaem long smol tri ya, mo maet yu nidim blong lukaot se bebet i no kakae hem tu. Mo, antap long olgeta samting ya, yu mas katemaot sam han blong tri ya blong bambae hem i kam naes.

³ Tok blong God i soemaot se ol pikinini oli nidim se papa mama i trenem olgeta olsem God i talem. Ol papa mama oli mas givim plante wora blong trutok blong Baebol long ol pikinini blong olgeta, oli mas lukaotgud se ol rabis tingting mo fasin oli no kasem olgeta, mo oli mas stretem olgeta wetem lav blong katemaot enikaen fasin we i nogud. Blong fulumap ol nid ya, Baebol i talem moa long ol papa, se oli mas gohed blong tijim ol pikinini blong olgeta, long fasin we oli ‘stretem mo trenem tingting blong olgeta olsem we Jeova i wantem.’ (Efesas 6:4) ?Samting ya i minim se oli mas mekem wanem?

Tingting Moa Long Ol Tok Blong Jeova

4. ?Wanem wok we ol papa mama oli mas mekem long ol pikinini blong olgeta, mo oli nidim wanem blong mekemgud wok ya?

⁴ Tok ya ‘trenem tingting olsem we Jeova i wantem’ i minim, jenisim tingting blong mekem i laenap wetem samting we Jeova i wantem. Taswe, ol papa mama oli mas putum tingting blong Jeova i stap insaed long tingting blong ol pikinini blong olgeta. Mo tu, ol papa mama oli mas folem eksampel blong God we hem i stretem yumi wetem sore, no hem i givim trening long yumi we i save stretem yumi. (Ol Sam 103:10, 11; Proveb 3:​11, 12) Be blong ol papa mo mama oli naf blong mekem samting ya, fastaem olgeta tu oli mas letem ol tok blong Jeova i go dip insaed long olgeta. Olsem advaes we profet blong God, Moses i givim long Isrel bifo, i se: “Ol tok ya [blong Jeova] we mi mi stap talem long yu tede, yu mas fasem olgeta long hat blong yu.”​—Dutronome 6:6.

5. ?Wetaem mo long wanem fasin ol papa mama blong Isrel bifo oli mas tijim pikinini blong olgeta, mo wanem mining blong tok ya “tijim”?

⁵ Fasin blong stadi long Baebol oltaem, tingting dip long hem, mo prea, oli mekem ol papa mama oli naf blong folem nekiswan samting we Moses i givim oda blong mekem se: “Yu mas tijim [ol tok blong Jeova] long pikinini blong yu, mo yu mas tokbaot olgeta taem yu yu stap sidaon long haos blong yu mo taem yu yu wokbaot long rod, mo taem yu yu ledaon, mo taem yu yu girap.” Hibru tok we oli tanem i kam “tijim” i minim “talem plante taem,” “talem bakegen mo bakegen,” no “makem klia.” Traem ridim nekiswan tok blong Moses we i makem se oltaem yumi nidim blong tingbaot ol tok blong Jeova fastaem: “Yu mas fasem olgeta olsem wan saen long han blong yu, mo oli mas stap olsem wan mak bitwin long tufala ae blong yu; mo yu mas raetem olgeta long pos blong doa blong haos blong yu mo long get blong yu.” I klia se, Jeova i wantem we ol papa mama oli tekem taem blong soemaot lav mo toktok wetem ol pikinini blong olgeta evri dei.​—Dutronome 6:7-9.

6. ?Ol papa mama oli mas tijim wanem long pikinini blong olgeta, mo wanem blesing i save kamaot from?

⁶ ?Wanem ol “tok ya” blong Jeova we ol papa mama oli mas tijim ol pikinini long olgeta? Jes bifo long tok ya, Moses i talem bakegen olgeta loa we plante man oli kolem se ol Ten Komanmen. Sam long ol loa ya oli talem se yumi no mas kilim narafala man i ded, no mas karem woman blong narafala man, no mas stil, no mas givim gyaman wetnes, mo no mas wantem samting we i blong narafala man. Ol loa ya long saed blong ol gudfala fasin, wetem loa ya blong “laekem Jeova, God blong yu, wetem olgeta hat blong yu mo olgeta sol blong yu mo wetem olgeta paoa blong yu,” oli impoten tumas. Taswe, ol papa mama long Isrel bifo oli mas tijim ol pikinini blong olgeta long ol loa ya. (Dutronome 5:​6-​21; 6:​1-5) ?Yu yu agri se hemia nao tijing we ol pikinini oli nidim tede?

7. (a) ?Baebol i skelem ol pikinini wetem wanem samting? (b) ?Naoia bambae yumi luklukgud long wanem samting?

⁷ Tok ya i go long ol papa long nesen blong Isrel, se: “Insaed long haos blong yu, woman blong yu bambae i olsem wan rop we i gat plante frut blong hem. Mo ol pikinini blong yu bambae oli stap raon long tebel blong yu, olsem ol yang olif tri raonabaot long stampa blong hem.” (Ol Sam 128:3) Be, blong ol papa mama oli stap glad long ol “smol tri” blong olgeta i bitim we oli harem nogud, oli mas soem intres long wanwan long ol pikinini blong olgeta, evri dei. (Proveb 10:1; 13:24; 29:15, 17) I gud yumi luklukgud naoia olsem wanem ol papa mama oli save trenem ol pikinini blong olgeta, givim wora long olgeta long saed blong speret, protektem olgeta, mo stretem olgeta wetem lav, long fasin we i save karem trufala glad i kam long ol papa mama ya.

Trenem Olgeta Stat Long Taem We Oli Smol Nomo

8. (a) ?Hu i olsem ol wud blong sapotem mo trenem Timote? (b) ?Wetaem nao hem i stat blong kasem trening, mo wanem i kamaot from?

⁸ Tingbaot Timote we mama mo bubu woman blong hem oli sapotem gud hem, olsem tu strong wud we oli sapotem wan smol tri. Papa blong Timote hem i wan man Gris, mo i klia se hem i no bilif. Taswe, mama blong hem, Yunis, we hem i wan woman Jyu, mo bubu blong hem, Loes, tufala ya nao oli trenem boe ya Timote ‘taem hem i pikinini yet, blong i savegud ol tok blong Baebol.’ (2 Timote 1:5; 3:​15; Ol Wok 16:1) Fasin blong tufala ya blong wok strong oltaem blong tijim Timote long ol ‘bigfala wok we [Jeova] i bin mekem,’ stat long taem we hem i bebi nomo, i karem bigfala blesing. (Ol Sam 78:​1, 3, 4) Timote i kam wan misinari we i go long plante kantri farawe, ating taem hem i no gat 20 yia yet. Mo hem i bin mekem bigfala wok blong givhan long ol faswan Kristin kongregesena blong oli kam strong.​—Ol Wok 16:​2-5; 1 Korin 4:​17; Filipae 2:​19-​23.

9. ?Olsem wanem ol yangfala oli save lanem blong stap longwe long trap ya blong wantem plante tumas sas samting?

⁹ Ol papa mama, ?yufala i wanem kaen wud blong sapotem ol pikinini blong yufala? Eksampel, ?yu yu wantem se ol pikinini blong yu oli gat stret tingting long saed blong ol sas samting? Ale, yu yu mas soem gudfala eksampel taem yu no ronem ol nyufala samting we oli kamaot no enikaen narafala sas samting we yu no rili nidim. Sipos yu jusum blong ronem ol sas samting, yu no mas sapraes taem pikinini blong yu i mekem sem mak olsem yu. (Matyu 6:​24; 1 Timote 6:​9, 10) Yes, sipos wud blong sapotem wan smol tri i no stanap stret, ?olsem wanem nao tri ya i save gru i go stret antap?

10. ?Ol papa mama oli mas askem hu blong lidim olgeta oltaem, mo oli mas gat wanem fasin?

¹⁰ Ol papa mama we oli stap glad long ol pikinini blong olgeta, bambae oli lukaot help blong God oltaem blong trenem ol pikinini ya. Oltaem bambae oli tingbaot wanem samting i save givhan moa long ol pikinini blong olgeta long saed blong speret. Wan mama we i gat fo pikinini, i talem se: “Bifo we ol pikinini blong mitufala oli bon, oltaem mitufala i prea long Jeova blong i halpem mitufala blong kam wan gudfala papa mo mama. Mitufala i askem hem blong lidim mitufala wetem Tok blong hem, mo blong givhan long mitufala blong folem olgeta tok ya long laef blong mitufala.” Hem i talem tu se: “Tok ya se ‘Putum Jeova i stap long fasples,’ hem i no jes wan toktok we mifala i savegud, be hem i wan fasin we i stap long laef blong mifala evri dei.”​—Jajes 13:8.

Givim “Wora” Oltaem

11. ?Ol smol tri mo ol pikinini oli nidim wanem blong gru gud?

¹¹ Ol smol tri oli nidim wora oltaem. Yumi luksave samting ya, taem yumi luk olsem wanem we ol tri oli stap gru gud kolosap long wan reva. (Skelem wetem Revelesen 22:​1, 2.) Ol smol pikinini tu, bambae oli gru gud long saed blong speret, sipos oli kasem wora blong trutok blong Baebol oltaem. Be ol papa mama oli nidim blong tingbaot ol wanwan pikinini blong olgeta, se oli naf blong stap kwaet mo lesingud blong hamas taem. Maet i gud moa sipos ol papa mama oli tekem smol taem nomo blong tijim pikinini be oli mekem samting ya plante taem, i bitim we oli spenem wan longfala taem be oli jes mekem samting ya sam samtaem nomo. Yu no mas ting se ol sotfala taem olsem oli blong nating nomo. I impoten blong spenem taem tugeta. Samting ya i save givhan blong wokem wan strongfala fasin joen bitwin papa mama mo pikinini. Plante taem Baebol i leftemap fasin ya blong joengud tugeta.​—Dutronome 6:​6-9; 11:18-​21; Proveb 22:6.

12. ?From wanem i impoten we papa mama i prea wetem ol smol pikinini blong olgeta?

¹² Maet papa mama i save tekem smoltaem blong tijim ol pikinini blong olgeta long en blong dei. Wan yangfala i rimemba se: “Papa mama blong mi tufala i sidaon long bed blong mifala evri naet mo lesin long ol prea we mifala i talem.” Wan narafala yangfala i soemaot olsem wanem samting ya i impoten, i se: “From samting ya, mi mi lanem blong prea long Jeova evri naet bifo we mi go slip.” Taem ol pikinini oli harem papa mama blong olgeta oli tokbaot Jeova mo prea long hem evri dei, ale, oli stat blong tingbaot Jeova olsem wan trufala man we i laef. Wan yangfala man i talem se: “Taem mi satem ae blong mi blong prea long Jeova, long tingting blong mi i olsem we mi save luk wan naesfala olfala bubu man. Papa mama blong mi tufala i halpem mi blong luksave se Jeova i joen wetem olgeta samting we yumi mekem mo talem.”

13. ?Ol papa mama oli save mekem wanem long taem ya we oli makemaot blong tijim pikinini?

¹³ Blong halpem ol smol pikinini blong oli kasem gud wora blong trutok blong Baebol, taem ol papa mama oli tekem smoltaem blong tijim ol pikinini ya, oli save mekem sam samting wetem olgeta tu. Papa mama blong tufala pikinini we oli no gat 13 yia yet, oli talem se: “Sam wik nomo afta we tufala pikinini ya blong mitufala oli bon, mitufala i stat blong trenem tufala ya long haos blong oli stap kwaet long Haos Kingdom.” Wan papa i tokbaot samting we famle blong hem i mekem: “Mifala i raetem nem blong olgeta buk blong Baebol long sam pis pepa, nao mifala wanwan i traem putum ol pepa ya long stret oda, olsem we oli stap long Baebol. Ol pikinini oli glad oltaem blong mekem samting ya.” Plante famle oli tekem smoltaem bifo no afta kakae, blong tijim ol pikinini blong olgeta. Wan papa i talem se: “Mifala i faenem se kakae long sapa hem i wan gudfala taem blong tokbaot vas blong Baebol tugeta.”

14. (a) ?Ol papa mama oli save mekem wanem gudfala wok long saed blong speret wetem ol smol pikinini blong olgeta? (b) ?Ol pikinini oli naf blong lanem hamas samting?

¹⁴ Ol smol pikinini oli glad blong lesin long ol klia store blong Baebol we oli stap long buk ya My Book of Bible Stories.b Wan man mo woman blong hem oli talem se: “Taem ol pikinini blong mitufala oli smol yet, mitufala i stadi long wanwan store blong buk ya Bible Stories. Ale biaen, ol pikinini oli putum klos mo mekem aksin we i sem mak olsem store ya, olsem wan pleplei we i sot nomo. Oli laekem tumas blong mekem olsem, mo plante taem oli wantem mekem bitim wan store long ol wanwan stadi.” !Yu no mas ting se pikinini blong yu i no naf blong lanem plante samting! !Sam pikinini we oli gat fo yia nomo oli naf blong rimemba fulwan, sam japta blong buk ya Bible Stories, mo oli lanem finis blong ridim Baebol tu! Wan yangfala i rimemba se taem hem i gat raonabaot tri yia haf, oltaem hem i no naf blong talem tok ya “ol loa mo disisen.” Be papa blong hem i leftemap tingting blong hem evri taem blong i gohed blong traem talemgud.

15. ?Taem papa mama i storeyan wetem pikinini oli save tokbaot wanem samting, mo wanem i pruvum se olkaen storeyan olsem oli impoten?

¹⁵ Yu save yusum taem ya we yu spenem wetem ol smol pikinini blong yu, blong rerem olgeta blong serem wora blong trutok wetem ol narafala, olsem givim ansa long ol miting. (Hibrus 10:24, 25) Wan yangfala i tingbaot se: “Long taem we mifala i kam wanples wetem papa mama blong talem bakegen ansa we bambae mifala i givim long miting, mi mas talemaot ansa blong mi long prapa toktok blong mi nomo. Tufala i no letem mi blong ridim ansa ya nomo we mi no kasem save long mining blong hem.” Mo tu, papa mama i save trenem ol pikinini blong oli joen long wok blong prij long fasin we i gat mining. Wan woman we i kasem trening long wan papa mo mama we tufala i fraetgud long God, i eksplenem se: “Mifala i neva go wetem papa mama blong folem tufala nomo long wok blong olgeta. Mifala i save se mifala tu i gat wan wok blong mekem, nating se mifala i kilkilim doa nomo no jes givim wan smol pepa long ol man blong haos. From we mifala i reregud bifo we mifala i goaot long wok blong prij long wiken, ale, mifala i savegud samting we mifala i mas talem. Neva mifala i wekap long Sarede moning mo askem papa mama sipos bambae mifala i go long wok blong prij no no gat. Mifala i save finis se bambae mifala i go.”

16. ?From wanem i impoten blong mekem famle stadi wetem ol pikinini oltaem?

¹⁶ I no gat tok blong makem olsem wanem i impoten blong givim wora blong trutok blong Baebol long ol pikinini oltaem. Taswe, yumi nidim blong mekem wan famle Baebol stadi evri wik. Wan papa we i gat tu pikinini i talem se, “wan bigfala samting we i save mekem ol pikinini oli kros, hemia fasin olbaot we i no folem oda.” (Efesas 6:4) Hem i se: “Mi mo waef blong mi, mitufala i jusum wan stret dei mo wan stret taem, nao oltaem mifala i gohed blong mekem stadi wetem famle folem program ya. I no longtaem, ol pikinini oli save se hemia nao stret taem blong stadi.” Olgeta fasin ya blong trenem pikinini taem oli smol yet oli impoten. Olsem waes tok ya i talem se, ‘Fasin blong tri blong gru, i dipen long fasin we man i yusum blong benem tri ya taem i smol yet.’

17. ?Wanem samting i impoten tumas olsem trutok blong Baebol we papa mama i mas givim long ol pikinini blong olgeta?

¹⁷ I impoten blong givim ol trutok blong Baebol long ol smol pikinini, be eksampel blong ol papa mama hem i impoten tu. ?Ol pikinini blong yu oli luk we yu yu stadi, go oltaem long ol miting, mo joen long wok blong prij? ?Oli luk we yu yu glad tumas blong mekem wok blong Jeova? (Ol Sam 40:8) I impoten we oli luksave samting ya. Wan gel i tokbaot mama blong hem, we i kasem hadtaem long hasban blong hem, mo we i tijim sikis pikinini blong hem blong oli kam ol strong Wetnes. I gud blong makem tok blong hem, se: “Samting we i gat paoa long mifala moa, hemia eksampel blong Mama. Fasin blong hem i gat moa paoa long mifala i bitim ol tok we hem i talem.”

Protektem Ol Pikinini

18. (a) ?Olsem wanem ol papa mama oli save protektem ol pikinini blong olgeta olsem oli nidim? (b) ?Ol pikinini long Isrel bifo, oli kasem wanem advaes long saed blong ol haf blong bodi blong man mo woman we i blong karem pikinini?

¹⁸ Plante taem, wan man i mas lukaot se ol rabis bebet oli no kam spolem smol tri we hem i planem. Sem mak nao, long rabis wol ya, ol papa mama oli mas lukaot se “ol man nogud” oli no spolem ol pikinini blong olgeta. (2 Timote 3:​1-5, 13) ?Olsem wanem ol papa mama oli save lukaotgud long ol pikinini long fasin olsem? !Oli save givhan long olgeta blong kasem waes blong God! (Eklesiastis 7:​12) Jeova i givim oda long ol man Isrel​—wetem ol “smol pikinini” tu​—blong lesin taem ol olfala oli ridimaot Loa, we i talemaot klia ol fasin we oli stret mo oli no stret long saed blong seks. (Dutronome 31:12; Levitikas 18:​6-​24) Plante taem long loa ya, oli tokbaot ol haf blong bodi blong man mo woman we i joen wetem fasin blong karem pikinini, olsem “samting blong man” no “seks blong man.” (Levitikas 15:​1-3, 16; 21:20; 22:24; Namba 25:8; Dutronome 23:10) From we wol blong tede i fulap tumas long ol rabis fasin, ol smol pikinini oli nidim blong save wanem rod i stret mo wanem rod i no stret, blong yusum ol tabu haf ya blong bodi blong man mo woman. Ol defren haf ya blong bodi oli ol samting we God i wokem, mo we hem i bin talem se oli “gud tumas.”​—Jenesis 1:​31; 1 Korin 12:21-​24.

19. ?Wanem kaen tijing i stret blong givim long ol smol pikinini long saed blong ol tabu haf blong bodi blong olgeta?

¹⁹ I stret we ol papa mo mama, no man we i karemaot pikinini blong narafala man, oli mas tijim pikinini blong savegud ol tabu haf ya blong bodi blong hem. Afta, oli mas eksplenem long pikinini se ol narafala man oli no gat raet blong tajem ol haf ya blong bodi blong hem. Plante taem, ol man we oli mekem nogud long saed blong seks wetem ol pikinini, fastaem oli yusum ol fasin we oli haed lelebet, blong traem luk wanem tingting blong pikinini long ol rabis fasin ya. Taswe, papa mama i mas tijim pikinini blong agensem strong ol man olsemia, mo blong talem klia se, “!Bambae mi mi ripotem yu!” Tijim ol smol pikinini blong yu se oli mas talemaot long yu oltaem sipos i gat wan man we i traem tajem olgeta long wan fasin we oli harem se i no stret. Tijim olgeta blong talemaot samting ya, nating se man we i tajem olgeta i traem blong mekem olgeta oli fraet, no i talem se bambae hem i kilim olgeta sipos oli ripotem hem.

Stretem Pikinini Wetem Lav

20. (a) ?Olsem wanem fasin blong stretem pikinini i sem mak long fasin blong katemaot sam han blong tri? (b) ?Fastaem pikinini i save harem olsem wanem taem papa mama i stretem hem, be wanem risal blong fasin ya biaen?

²⁰ Fasin blong stretem pikinini wetem lav bambae i givhan long hem, olsem we fasin blong katemaot sam han blong tri i save givhan long hem blong grugud. (Proveb 1:​8, 9; 4:​13; 13:1) Taem wan man i katemaot sam rabis han blong tri, samting ya i givim jans long sam moa gudfala han blong gru. Taswe, sipos pikinini blong yu i stap tingting tumas long ol sas samting blong wol ya, no i stap joen tumas wetem ol rabis fren no samkaen nogud pleplei, hemia sam nogud samting we oli olsem ol han blong tri we man i mas katemaot. Sipos yu karemaot ol samting ya, bambae yu halpem pikinini blong yu blong gruap wetem fasin blong ronem ol samting long saed blong speret. Ating fastaem, fasin blong stretem pikinini olsem ya bambae i no mekem hem i glad, olsem wan tri we maet fastaem i trabol lelebet taem man i katemaot sam han blong hem. Be gudfala risal blong fasin stretem ya, hemia se bambae pikinini blong yu i stat blong gru bakegen long wan rod we yu yu wantem hem blong folem.​—Hibrus 12:​5-​11.

21, 22. (a) ?Wanem i soemaot se fasin stretem samtaem i save mekem hemia we i givim no hemia we i kasem i harem nogud? (b) ?From wanem ol papa mama oli no mas holembak fasin stretem long ol pikinini blong olgeta?

²¹ I tru se, i no isi taem yumi mas stretem pikinini, mo i no isi tu long pikinini blong kasem fasin stretem. Wan papa i talem se: “Boe blong mi i stap spenem plante taem lelebet wetem wan yangfala we ol elda oli givim woning long mi finis se hem i no wan gudfala fren. Ating i moagud sipos mi bin tekem aksin kwiktaem moa. Nomata se pikinini boe blong mi i no joen long enikaen rabis fasin, be i tekem longtaem lelebet blong stretem tingting blong hem bakegen.” Boe ya i talem se: “Taem papa mama blong mi tufala i blokem mi blong no moa joen wetem beswan fren blong mi, mi harem nogud tumas.” Be hem i gohed i se: “Be hemia wan gudfala disisen, from we smoltaem biaen, oli sakemaot hem long kongregesen.”

²² Tok blong God i talem se: “Olgeta tok we oli stretem yu, oli rod blong laef.” Taswe, nating se i had long yu blong stretem pikinini blong yu, yu no mas holembak fasin ya long hem. (Proveb 6:​23; 23:13; 29:17) Biaen, bambae hem i talem tangkyu long yu from we yu bin stretem gud hem. Wan yangfala i tingtingbak se: “Mi rimemba se mi stap kros tumas long papa mama blong mi taem tufala i stretem mi. Be, sipos tufala i no bin stretem mi, ating naoia bambae mi kros moa.”

Fasin Traehad i Karem Frut

23. ?From wanem lav mo fasin kea we ol papa mama oli givim long ol pikinini blong olgeta i no blong nating nomo?

²³ I tru tumas se, ol pikinini we papa mama, mo ol narafala oli save glad long olgeta, hemia ol pikinini we papa mama i tekem taem blong givim lav mo fasin kea long olgeta evri dei. Be, olgeta hadwok we ol papa mama oli mekem long ol pikinini ya​—nating se oli stret pikinini blong olgeta no ol pikinini long saed blong speret—​i no blong nating nomo, from we i save karem frut we oli haremgud from. Olfala aposol Jon i soemaot samting ya taem hem i raetem se: “Taem mi harem we ol pikinini blong mi oli stap folem trutok oltaem long laef blong olgeta, hemia i mekem mi mi harem i gud moa, i winim ol narafala samting.”​—3 Jon 4.

[Ol futnot]

?Yu Yu Rimemba?

◻ ?Ol smol tri mo ol smol pikinini tu, oli nidim wanem blong mekem se ol narafala oli save glad long olgeta?

◻ ?Olsem wanem ol papa mama oli save kam olsem ol wud we oli sapotem mo trenem ol smosmol tri?

◻ ?Long ol taem blong tijim pikinini ol papa mama oli save mekem wanem, mo oli mas tijim pikinini blong stap longwe long wanem samting?

◻ ?Olsem wanem fasin blong stretem pikinini i save givhan long hem, olsem we fasin blong katemaot sam han blong tri i save givhan long hem?

[Foto Credit Line blong pija long pej 10]

Courtesy of Green Chimney’s Farm