Akwila Mo Prisila—Tufala i Soem Nambawan Eksampel

“MI MI talem halo long Akwila, wetem woman blong hem Prisila, we tufala i kampani wetem mi finis long wok blong Jisas Kraes. Tufala i rere blong lusum laef blong tufala from mi. Mi mi wantem tumas blong talem tangkyu long tufala. Be i no mi nomo, ol [kongregesen]a long olgeta ples blong ol hiten man tu oli harem olsem.”​—Rom 16:​3, 4.

Ol tok ya blong aposol Pol we hem i talem long Kristin kongregesen long Rom, oli soem bigfala respek mo lav we hem i gat long hasban mo waef ya. Taem hem i raet long kongregesen ya, hem i mekem sua se hem i no fogetem tufala. ?Be hu ya ‘tufala ya we oli kampani wetem Pol long wok blong Jisas Kraes’? ?Mo from wanem Pol mo ol kongregesen oli laekem tufala tumas?​—2 Timote 4:​19.

Akwila i wan long ol man Jyu we oli stap wanwan olbaot afsaed long Palestaen. Hem i wan man Pontas, wan ples long not blong Esia Maena. Akwila mo waef blong hem Prisila (Priska), tufala i stap long Rom. I gat plante man Jyu long taon ya. Plante blong olgeta oli kam long Rom taem Pompi i winim Jerusalem long 63 B.K.T.,b nao hem i karem plante presina oli go long Rom blong wok olsem slef. Yes, ol olfala hanraet blong ol man Rom oli soem se i gat 12 no bitim 12 haos prea blong ol man Jyu long olfala taon ya blong Rom. Sam man Jyu we oli laef long Rom, oli stap long Jerusalem long taem blong Pentekos, 33 K.T.,c mo oli harem gud nyus. Maet olgeta nao, oli ol faswan man blong karem Kristin mesej i go long bigfala taon blong Rom.​—Ol Wok 2:​10.

Be, long yia 49 no long stat blong yia 50 K.T., hedgavman ya Klodias i givim oda se ol man Jyu oli mas aot long Rom. Taswe, Akwila mo Prisila, tufala i go long Korin, wan taon blong Gris, mo long ples ya nao aposol Pol i mitim tufala. Taem Pol i kasem Korin, Akwila mo Prisila, tufala i kaen tumas long hem. Tufala i tekem hem i go long haos blong tufala mo givim wok long hem, from we wok blong hem i sem mak long wok blong tufala​—hemia blong somap haos tapolen.​—Ol Wok 18:​2, 3.

Somap Ol Haos Tapolen

Hemia i no wan isi wok. Blong somap haos tapolen, man i mas katem mo somap ol kaliko no skin blong anamol we i hevi mo strong. Man ya blong raetem histri, Fernando Bea i talem se, man blong somap haos tapolen i “mas gat gudhan mo i mas lukaotgud,” taem hem i stap somap ol “kaliko we i strong mo i no benben isi. Ol man oli yusum ol haos tapolen ya blong slip long olgeta taem oli stap wokbaot, blong blokem san mo ren, mo blong kavremap olting insaed long sip.”

Samting ya i mekem wan kwestin i stanap. ?I no tru we Pol i talem se ‘hem i kasem tijing long fored blong leg blong Gameliel,’ blong bambae hem i save gat wan gudfala wok we i givim haenem long hem long ol yia biaen? (Ol Wok 22:3) Si i tru. Be, ol man Jyu long faswan handred yia oli tinghae long fasin ya blong tijim ol yangfala boe blong mekem wan wok wetem han blong olgeta, nating se oli kasem gudfala edukesen long haeskul tu. Taswe, ating Akwila mo Prisila, tufala i lanem blong somap haos tapolen taem tufala i yangfala nomo. Samting ya we tufala i lanem i givhan bigwan long tufala long ol yia biaen. Be olsem ol Kristin, tufala i no tingbaot wok blong tufala blong winim mane olsem bigfala samting long laef blong tufala. No gat. Pol i eksplenem se wok we hem i mekem long Korin wetem Akwila mo Prisila, i blong sapotem bigfala wok blong hem, hemia blong talemaot gud nyus, mo blong mekem se hem i “no gat kaon long sam man.”​—2 Tesalonaeka 3:8; 1 Korin 9:​18; 2 Korin 11:7.

I klia se Akwila mo Prisila, tufala i glad blong mekem evri samting we oli naf blong mekem, blong givhan long Pol long misinari wok blong hem. !Yumi no save hamas taem trifala ya we oli frengud tugeta oli spel smoltaem long wok blong olgeta, blong tekem jans blong prij long ol man we oli kam pem olting blong trifala mo ol man we oli stap pas! Mo nating se wok blong trifala i no wan wok we i karem haenem, mo i save mekem man i taed, trifala i glad blong mekem wok ya. Trifala i stap “wok long dei mo long naet” blong mekem wok blong God i gohed moa. Plante Kristin tede oli mekem olsem tu. Oli wok haftaem no sam samtaem nomo, mekem se oli save spenem bighaf blong taem blong olgeta blong talemaot gud nyus long ol man.​—1 Tesalonaeka 2:9; Matyu 24:14; 1 Timote 6:6.

Eksampel Long Fasin Blong Tekem Narafala i Kam Long Haos

Long 18 manis we Pol i stap long Korin, maet haos blong Akwila nao we hem i yusum olsem stampa ples blong misinari wok blong hem. (Ol Wok 18:​3, 11) Biaen, taem Saelas (Silvanas) mo Timote, tufala i aot long Masedonia, tufala i kam, maet Akwila mo Prisila i glad blong tekem tufala tu i kam long haos blong tufala. (Ol Wok 18:5) Tufala leta blong Pol long ol man Tesalonaeka, we biaen tufala i kam haf blong Baebol, ating Pol i raetem tufala taem hem i stap wetem Akwila mo Prisila.

I klia se long taem ya, haos blong Akwila mo Prisila i bisi oltaem from ol wok blong God. Ating oltaem ol gudfala fren oli stap kam long haos blong tufala​—⁠olsem faswan Kristin long Akaea, Stefanas, mo famle blong hem, we Pol nao i baptaesem olgeta; Taetas Jastas, we i letem haos blong hem long Pol blong givim ol pablik tok; mo Krispas, lida blong haos prea, we hem wetem ful famle blong hem oli bilif long trutok. (Ol Wok 18:​7, 8; 1 Korin 1:​16) Mo tu, i gat Fotunatas mo Akaekas; Gaeas, we kongregesen i stap mekem miting long haos blong hem; Erastas, man we i lukaot long mane blong gavman long taon ya; Tosias, man we i raetemdaon leta we Pol i sanem i go long ol man Rom; mo Fibi, wan gudfala sista long kongregesen blong Kengkria, we ating hem nao i aot long Korin wetem leta ya, ale i karem i go long Rom.​—Rom 16:​1, 22, 23; 1 Korin 16:17.

Plante man blong Jeova tede we oli gat jans blong tekem ol elda we oli goraon blong visitim ol kongregesen oli kam long haos blong olgeta, oli save se samting ya i leftemap tingting blong olgeta bigwan mo oli no save fogetem. Ol gudfala store mo toktok long taem ya, oli save mekem evriwan oli haremgud tumas long saed blong speret. (Rom 1:​11, 12) Mo, olsem Akwila mo Prisila, olgeta we oli letem haos blong olgeta blong mekem miting, maet Buk Stadi, oli glad mo oli haremgud from we oli save givhan blong sapotem trufala wosip long rod ya.

Akwila mo Prisila, tufala i laekem Pol tumas. Taswe, tufala i biaen long Pol taem hem i aot i go long Korin, long taem ya we ol tri oli stap putum flaoa long yia 52 K.T. Tufala i folem hem i go kasem Efesas. (Ol Wok 18:18-​21) Tufala i stap long Efesas mo tufala i putum faondesen blong wok blong prij, we aposol Pol i save gohed long hem nekis taem hem i kam long ples ya. Hem i long Efesas nao, we Akwila mo Prisila, tufala we oli gat gudhan blong talemaot gud nyus, tufala i tekem Apolos, wan gudfala man blong toktok, “i go long haos blong tufala.” Mo tufala i glad blong “talemaot Rod blong God i klia moa long hem.” (Ol Wok 18:24-​26) Taem Pol i kambak long Efesas long namba tri misinari trep blong hem, samwe long koltaem blong yia 52 no 53 K.T., hadwok we man mo woman ya i bin mekem, i rere blong karem frut. Blong kolosap tri yia, Pol i prij mo i tijim ol man long ples ya blong folem “Rod blong Masta.” Long semtaem, kongregesen blong Efesas i stap mekem ol miting long haos blong Akwila.​—Ol Wok 19:​1-​20, 26; 20:31; 1 Korin 16:8, 19.

Biaen, taem tufala fren ya blong Pol i gobak long Rom, tufala i gohed blong “tekem ol narafala Kristin man oli kam insaed long haos blong tufala.” Tufala i letem haos blong tufala tu, blong oli save mekem ol Kristin miting long hem.​—Rom 12:13; 16:​3-5.

Tufala i Rere Blong “Lusum Laef Blong Tufala” From Pol

Mo tu, maet Pol i bin slip long haos blong Akwila mo Prisila taem hem i stap long Efesas. ?Hem i stap slip long haos blong tufala taem kampani blong man ya we oli wokem ol samting long selva oli mekem tumas trabol? Ol Wok 19:23-​31 i talem se, taem man ya we i stap wokem ol smosmol haos blong prea long selva i agensem wok blong talemaot gud nyus, ol brata oli mas blokem Pol blong i no kasem kil, taem hem i wantem fesem bigfala hif blong ol man. Sam man blong eksplenem Baebol oli bilif se maet long taem ya nao we Pol i stap long bigfala denja, we ‘hem i no tingbaot laef blong hem.’ Be maet Akwila mo Prisila, tufala i mekem sam samting blong givhan long hem, we “tufala i rere blong lusum laef blong tufala” from hem.​—2 Korin 1:8; Rom 16:​3, 4.

Taem “trabol ya i finis,” Pol i folem waes fasin, nao i aot long taon ya. (Ol Wok 20:1) I klia se ol man oli agensem mo jikim Akwila mo Prisila tu. ?Samting ya i mekem tingting blong tufala i foldaon? No gat, tufala i no fraet nating, tufala i gohed nomo long Kristin wok blong tufala.

Tufala i Rili Joengud

Afta we rul blong Klodias i finis, Akwila mo Prisila tufala i gobak long Rom. (Rom 16:​3-​15) Be, laswan taem we Baebol i tokbaot tufala, tufala i stap long Efesas bakegen. (2 Timote 4:​19) Long taem ya, Baebol i tokbaot tufala tugeta, olsem oltaem. !Tufala i rili frengud mo joengud! Evritaem we Pol i tingbaot gudfala brata ya Akwila, hem i tingbaot gudfala waef blong hem tu, we i stap wokgud wetem man blong hem oltaem. Hemia wan nambawan eksampel long ol Kristin hasban mo waef tede. Help blong wan gudfala Kristin hasban mo waef i save mekem se tufala i mekem plante samting “long ol wok ya blong Masta blong yumi.” Mo samtaem, maet wanwan long tufala i save mekem moa wok i bitim we tufala i save mekem sipos tufala i no mared.​—1 Korin 15:58.

Akwila mo Prisila, tufala i givhan long plante defren kongregesen. Plante Kristin tede tu we oli stap wok strong, oli folem eksampel blong tufala. Oli stretem olting long laef blong olgeta, blong oli save go long ples we i gat bigfala nid blong talemaot gud nyus. Mo tu, oli kasem glad mo oli haremgud, taem oli luk se plante moa man oli lesin long gud nyus blong Kingdom, mo taem oli save faenem ol nambawan Kristin fren.

Akwila mo Prisila, tufala i nambawan eksampel long saed blong lav we ol Kristin oli mas soem. Taswe, Pol mo plante narafala Kristin oli laekem tufala tumas. Be samting we i moa impoten se, tufala i mekem wan gudfala nem wetem Jeova hem wan. Baebol i promes long yumi se: “Oltaem God i stap mekem i stret nomo. Mo hem i no save fogetem ol wok ya we yufala i mekem. Hem bambae i stap tingbaot we yufala i laekem hem tumas, mo we yufala i givhan finis long ol narafala Kristin man, mo we yufala i stap givhan long olgeta yet.”​—Hibrus 6:​10.

Maet yumi no gat jans blong yusum taem mo paoa blong yumi long sem rod olsem Akwila mo Prisila. Be, yumi save folem nambawan eksampel blong tufala. Bambae yumi haremgud tumas sipos yumi yusum paoa mo laef blong yumi blong mekem ol tabu wok. Yumi no mas foget ‘blong mekem ol gudfala fasin, mo blong serem olting blong yumi wetem ol narafala. From we ol fasin ya tu oli olsem we man i stap kilim anamol blong givim i go long God, we hem i glad tumas long olgeta.’​—Hibrus 13:15, 16.

[Ol futnot]