?From Wanem Yumi Evriwan i Mas Presem God?

!HALELUIA! Tok ya, bighaf blong ol man blong Krisendoma we oli stap go long jyos, oli savegud. Sam long olgeta oli singaot bigwan, oli talem tok ya, taem oli stap prea long Sande. ?Be, hamas man oli rili save stret mining blong tok ya? Yes, hemia wan tok long lanwis Hibru we i minim “!Presem Ja!” Hem i wan fasin blong singaot bigwan wetem glad, blong presem Man we i wokem olgeta samting, nem blong hem Jeova.b

Plante taem, Baebol i yusum tok ya “Haleluia.” ?From wanem? From we i gat plante risen blong presem God. Ja (Jeova) hem i Man ya we i wokem olgeta samting long heven mo wol, mo we i stap givim paoa long ol samting ya blong oli gohed. (Ol Sam 147:​4, 5; 148:​3-6) Hem i stampa blong ol plan we oli mekem se i save gat laef long wol ya. (Ol Sam 147:​8, 9; 148:​7-​10) Mo hem i gat spesel intres long ol man. Sipos yumi mekem ol samting we hem i wantem, bambae hem i blesem mo givhan long yumi naoia, mo i givim hop we i sua se, bambae yumi save gat wan laef we i moagud long fyuja. (Ol Sam 148:11-​14) Ja (Jeova) nao i pusum wan man blong raetemdaon tok ya, se: “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.”​—Ol Sam 37:29.

Taswe, tok ya, “!Haleluia!” “!Yufala i presem Ja!” i go long yumi evriwan. (Ol Sam 104:35; futnot, NW) Be sore tumas, i no evriman we oli harem se oli wantem presem Jeova. Tede, ol man oli stap kasem tumas trabol. Plante oli hanggri, oli sik, mo oli harem nogud aninit long han blong narafala. Plante man oli kasem bigfala trabol mo soasore from we oli yusum drag no oli dring tumas alkol, no from we oli bin mekem nogud long saed blong seks no oli rebel. ?Olsem wanem long ol man olsem? ?I gat risen blong olgeta ya oli mas presem God?

‘Jeova Nomo i Save Givim Hop Long Mi’

Yes, i gat risen. Jeova i singaot yumi evriwan blong kasem save long hem, lanem blong mekem samting we hem i wantem, mo haremgud long ol blesing we oli pulum ol man blong wantem presem hem. Mo plante oli mekem olsem. Wan eksampel, hemia Adriana long Gwatemala. Taem Adriana i gat seven yia, mama blong hem i ded. Smoltaem biaen, papa blong hem i ronwe long hem. Taem hem i gat ten yia, hem i stat wok blong sapotem laef blong hem. Mama blong hem i bin talem long hem se hem i mas mekem wok blong God mo jyos. Taswe, Adriana i joen wetem ol defren grup blong Katolik. Be taem hem i kasem 12 yia, hem i no glad long fasin blong ol grup blong Katolik, nao hem i joenem wan grup blong ol yangfala we oli stap mekem tumas trabol long taon. Hem i stat smok, i tekem drag, mo i stil. ?Olsem wanem wan yangfala gel olsem i kasem tingting we i wantem presem God?

Sista blong Adriana i stat blong stadi Baebol wetem ol Wetnes blong Jeova, be Adriana i laf long hem. Biaen, anti blong tufala i ded. Taem oli go blong berem anti blong hem, Adriana i harem nogud from sam kwestin we oli mekem tingting blong hem i trabol. ?Anti blong hem i go wea? ?Hem i go long heven? ?Hem i go long wan faea long hel? Ol kwestin ya oli mekem tingting blong hem i fasfas. Nao, Adriana i girap, i go long smol haos wosip we i stap long medel blong beregraon, ale i prea blong askem God blong givhan long hem. Hem i yusum nem blong God, Jeova, olsem sista blong hem i bin tijim long hem.

Smoltaem biaen, hem i stadi Baebol wetem ol Wetnes blong Jeova mo i go long ol Kristin miting blong olgeta. Samting ya i mekem se hem i gat nyufala tingting long saed blong laef. Ale, wetem strong tingting, hem i lego ol grup blong ol yangfala we oli stap mekem tumas trabol long taon. Adriana, we naoia i gat samwe 25 yia, i talem se: “Lav we mi gat long Jeova, hemia nomo i mekem se mi lego fasin blong laef ya we i rabis. Jeova nomo, from bigfala sore blong hem, i save givim long yumi, hop blong laef we i no save finis.” Adriana, nating se hem i kasem hadtaem long stat blong laef blong hem, i gat plante nambawan risen blong presem God.

I gat wan narafala store blong wan man long Yukren, we i luk olsem se fyuja blong hem i moa nogud. Hem i stap long kalabus, i stap wet blong oli kilim hem i ded. ?Hem i sore long hem wan? ?Hem i harem nogud? No gat. I no longtaem i pas, ol Wetnes blong Jeova oli bin storeyan wetem hem mo hem i kasem sam save long saed blong Jeova. Nao, hem i askem olgeta blong visitim mama blong hem. Biaen, hem i raet long olgeta from we hem i harem se oli mekem samting ya we hem i askem. Hem i talem se: “Tangkyu tumas, from we yufala i visitim mama blong mi. Nyus ya i mekem mi mi glad moa bitim ol narafala nyus we mi kasem long yia we i pas.”

Man ya i raet blong tokbaot hem wan mo ol narafala presina we hem i prij long olgeta, i se: “Naoia, mifala i bilif long God mo mifala i traehad blong mekem ol fasin we oli laenap wetem bilif blong mifala.” Hem i finisim leta blong hem olsem: “Tangkyu tumas we yufala i halpem mifala blong kasem save long fasin lav, mo blong gat bilif. Sipos mi mi no ded, bambae mi givhan long yufala long wok we yufala i stap mekem. Mi talem tangkyu long God from we yufala i stap, mo from we yufala i givhan long ol narafala blong laekem God mo bilif long hem.” Man ya i askem kot blong skelem bakegen disisen ya blong kilim hem i ded. Be, nating se hem i ded no hem i stap plante yia long kalabus, i klia se hem i gat risen blong presem God.

‘Nating Se Mi Mi Blaen, Mi Save Lukluk’

Naoia, tingbaot wan strong yangfala gel we kwiktaem nomo hem i kam blaen. Hemia nao samting we i hapen long Gloria, we i stap long Ajentina. Taem Gloria i gat 19 yia, wantaem nomo hem i kam blaen, mo ae blong hem i neva kamgud bakegen. Taem hem i gat 29 yia, hem i stap wetem wan man mo smoltaem biaen, hem i gat bel. Long taem ya, hem i harem se laef blong hem i gat mining. Be taem pikinini blong hem i ded, hem i stat blong askem sam kwestin. Hem i stap tingting se, ‘?From wanem samting ya i hapen long mi? ?Mi mi mekem wanem samting we i nogud? ?God i rili stap?’

Long taem ya, tu Wetnes blong Jeova oli kam long haos blong hem. Tufala i stat blong stadi Baebol wetem hem, mo hem i lanem promes ya se long nyufala wol, bambae ol blaen man oli lukluk bakegen. (Aesea 35:5) !Hemia wan nambawan hop blong Gloria! Hem i glad tumas, antap moa, taem hasban blong hem i agri blong stretem mared blong tufala folem loa. Biaen, hasban blong hem i kasem kil long wan akseden, mekem se hem i no moa save wokbaot, hem i stap sidaon nomo long wiljea. Tede, woman ya we i blaen i mas wok had blong kasem ol samting we hem i nidim blong laef. Antap long samting ya, hem i mas mekem olgeta wok long haos, mo tu, i mas kea long ol prapa nid blong hasban blong hem. !Nating se i olsem, Gloria i stap presem Jeova! Ol Kristin brata mo sista oli givhan long hem, nao hem i stadi long Baebol ya we oli raetem long fasin we blaen man i save ridim. Mo ol miting long Haos Kingdom oli leftemap tingting blong hem bigwan. Hem i talem se: “I hadwok blong eksplenem, be nating se mi mi blaen, i olsem we mi save lukluk.”

Samtaem, taem yumi presem God, ol narafala oli ronem yumi, oli mekem i nogud long yumi. Wan woman long Kroasia i glad tumas taem hem i kasem save long saed blong God. Be hasban blong hem i agensem nyufala bilif ya blong hem nao i sakemaot hem, mo i holem smol gel blong tufala we i gat wan yia, i stap wetem hem. Fastaem, woman ya i harem nogud tumas. Hem i stap laef long rod nomo, hasban mo famle blong hem i lego hem, hem i no gat haos, i no gat wok, mo pikinini blong hem tu i no stap. Be lav we hem i gat long God i givim paoa long hem blong gohed, nating se hem i save visitim gel blong hem wanwan taem nomo, go kasem we smol gel ya i kam bigwan. Woman ya i faenem “perel we i nambawan” mo i no wantem lego perel ya. (Matyu 13:45, 46) ?Olsem wanem hem i stap glad tru long ol hadtaem ya? Hem i talem se: “Glad i wan frut blong tabu speret blong God. Yumi save wokem fasin ya, nomata wanem samting i hapen long yumi. I sem mak olsem we ol flaoa oli save gru insaed long wan haos we oli wokem long glas, nating se weta afsaed i nogud.”

Long Finlan, oli faenemaot se Markus we i gat sikis yia, i kasem wan sik long masel. Sik ya, i no gat meresin blong hem. Smoltaem biaen, hem i mas yusum wiljea. Sam yia biaen, mama blong hem i tekem hem i go long wan man blong Pentekostal Jyos. Man ya, nyus blong hem i go olbaot se hem i save mekem ol sikman oli kamgud bakegen. Be hem i no mekem Markus i gud bakegen tru long merikel. From samting ya, Markus i no moa intres long God. Hem i gohed blong stadi long saed blong sayens mo sam narafala stadi bakegen. Ale, samwe long faef yia i pas, i gat wan woman we i stap sidaon long wiljea mo wan yangfala man, tufala i kam long haos we Markus i stap long hem. Tufala i Wetnes blong Jeova. Long taem ya, Markus i no moa bilif long God, be hem i no agensem ol storeyan long saed blong skul. Ale, hem i singaot tufala blong kam insaed long haos.

Biaen, wan man mo waef blong hem tufala i kam visitim hem, mo tufala i statem wan Baebol stadi wetem hem. Nao, sloslou, paoa blong trutok blong Baebol i jenisim tingting blong Markus. Ale, hem i luksave se hem i gat plante risen blong presem God, nating se hem i no save wokbaot. Hem i talem se: “Mi mi glad tumas from we mi faenem trutok mo ogenaesesen ya we Jeova i stap yusum. Naoia, laef blong mi i gat plan mo mining. !Oli faenem wan narafala sipsip we i lus, mo naoia sipsip ya i no wantem livim ol sipsip blong Jeova!”​—Skelem wetem Matyu 10:6.

Yumi Evriwan i Mas “Presem Ja”

Hemia sam nomo long plante store we yumi save talem blong soem se ol man tede, oli gat risen blong presem God, nomata wanem samting i hapen long olgeta. Aposol Pol i eksplenem samting ya olsem: “Sipos yu stap traehad oltaem blong mekem ol fasin we God i wantem, hemia i gud tumas long evri rod. Man we i mekem olsem, hem i gat promes blong hem long laef ya long wol, mo bakegen long laef ya tu we bambae i kamtru biaen.” (1 Timote 4:8) Sipos yumi mekem samting we God i wantem, bambae yumi ‘gat promes blong laef ya long wol.’ I tru, long wol blong naoia, God i no mekem ol puaman oli rij mo ol sikman oli kamgud bakegen. No gat. Be, hem i givim tabu speret long olgeta we oli stap mekem wok blong hem, nao oli save faenem glad mo haremgud, nomata wanem samting i hapen long laef blong olgeta. Yes, long “laef ya long wol” tu, ol sikman, olgeta we narafala i mekem oli harem nogud, mo ol puaman, oli save gat risen blong presem God.

?Be olsem wanem long ‘laef ya we bambae i kamtru biaen’? !Yes, taem yumi tingbaot laef ya, samting ya i mas pusum yumi blong presem God wetem bigfala glad! Yumi haremgud tumas blong tingting long wan taem we bambae i no moa gat fasin pua. Bambae “i no gat wan man ples we i save talem se: ‘Mi mi sik.’ ” Mo bambae Jeova God i “ravemaot wora blong ae blong olgeta. Nao bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem. Ol samting ya blong bifo oli lus olgeta.” (Aesea 33:24; Revelesen 21:​3, 4; Ol Sam 72:16) ?Wanem tingting blong yu long ol promes ya blong God?

Long El Salvado, wan yangfala man i glad blong karem wan smol pepa we i tokbaot sam long ol promes ya blong Baebol. Hem i talem long Wetnes we i givim pepa ya long hem, i se: “Woman, samting we pepa ya i talem i gud bitim mak, mekem se i hadwok blong bilivim.” Plante man oli tingting olsem. Be, hemia ol promes blong Man we i wokem heven mo wol, Man we i mekem ol plan blong sapotem laef long wol, Man we i stap givhan long ol puaman mo ol sikman blong oli faenem glad. Yumi save bilivim ol samting we hem i talem. Yangfala man we yumi jes tokbaot antap, i stadi Baebol wetem ol Wetnes blong Jeova, mo i faenem se samting ya i tru. Sipos yu no stadi Baebol yet, mifala i leftemap tingting blong yu blong mekem olsem. Olsem nao, bambae yu stap long nyufala wol, taem ol rabis fasin blong wol ya oli lus. Long taem ya, olgeta samting we God i wokem bambae oli singaot bigwan, oli talem se: “!Haleluia!” “!Yufala i presem Ja!”​—Ol Sam 112:1; 135:​1, NW.

[Ol futnot]

[Tok blong pija long pej 5]

Yu save stap, taem olgeta samting we God i wokem oli singaot bigfala, oli se: “!Haleluia!”