Haos Blong Jeova i Fulap Moa Naoia Wetem Glori

“ ‘Bambae mi mi fulumap haos ya wetem glori.’ Hemia nao tok blong Jeova blong ol ami.”​—HAGAE 2:7.

1. ?Olsem wanem tabu speret i joen wetem bilif mo wok?

TAEM wan Wetnes blong Jeova i stap prij long ol haos wanwan, hem i mitim wan woman blong Pentekostal jyos, we i talem se, ‘Mifala i kasem tabu speret, be yufala nao i stap mekem wok.’ Long kaen fasin, Wetnes ya i eksplenem long hem se wan we i kasem tabu speret, hem i mas wantem blong mekem wok blong God. Jemes 2⁠:17 i talem se: “Fasin blong bilif blong yumi i olsem. Sipos hem i stap hem wan, i no gat ol gudfala fasin i stap wetem, hem i ded nomo.” Wetem help blong tabu speret blong Jeova, ol Wetnes blong hem oli wokem wan bilif we i strong. Mo, Jeova i ‘fulumap haos ya blong hem wetem glori,’ taem hem i putumap olgeta blong mekem ol gudfala wok​—antap moa, wok ya blong ‘talemaot gud nyus blong Kingdom long olgeta ples blong wol blong givim wetnes long olgeta nesen.’ Taem wok ya i kasem mak we Jeova i wantem, ale ‘en i save kam.’​—Matyu 24:14.

2. (a) ?Sipos yumi joen fulwan long wok blong Jeova bambae yumi kasem wanem blesing? (b) ?From wanem yumi mas glad sipos i luk olsem se en i stap “tektaem”?

² From ol tok ya blong Jisas, yumi luksave se bigfala wok blong yumi tede i blong prij long ol man long saed blong ‘nambawan gud nyus blong hapi God ya,’ we hem i putum long han blong yumi. (1 Timote 1:​11) Taem yumi joen moa long wok blong Jeova wetem glad, i olsem we en i stap kam moa kwik. Long Habakuk 2⁠:​2, 3, yumi ridim tok blong Jeova se: “Raetemdaon vison ya, mo makem hem i stap klia long ol ston, blong mekem se man we i stap ridim hem wetem bigfala voes i save ridimgud. Vison ya bambae i kamtru long stret taem blong hem long fyuja. Hem i stap hareap blong kasem en blong hem, mo hem i no save gyaman. Nating sipos hem i tektaem, be yu mas rere. From we hem i sua blong kamtru. Hem i no save let.” Yes, “vison ya” bambae i kamtru, “nating sipos hem i tektaem.” Naoia, long namba 83 yia blong rul blong Kingdom blong Jisas, maet samfala oli harem se hem i stap tektaem tumas. Be, ?i stret se yumi harem nogud from we en i no kam yet? Long ol yia biaen long 1990, samting olsem wan merikel nomo i bin kamaot, taem sam gavman oli karemaot tabu we oli bin putum long wok blong talemaot gud nyus. Samting ya i bin hapen long Is Yurop, samfala ples long Afrika, mo long sam narafala kantri bakegen. Maet i luk olsem se en i stap “tektaem” tumas, be samting ya i givim jans blong hivimap plante moa “sipsip” long ol kantri ya we oli jes open.​—Jon 10:16.

3. ?From wanem nyufala save we yumi kasem long saed blong “ol man blong naoia” i mas pusum yumi blong wok strong moa long wok blong God?

³ Profet i talem se, “Hem i no save let.” Jisas i talem se ol rabis man we oli laef naoia bambae oli no save lus evriwan “gogo olgeta samting ya bambae oli kamtru.” (Matyu 24:34) ?Ol nyufala save we yumi kasem i no longtaem long saed blong ol tok ya blong hem, i minim se wok blong prij blong yumi i no moa impoten tumas?a !Ol pruf oli soemaot samting we i defren olgeta! Ol man we oli laef naoia oli stap folem ol rabis fasin mo olkaen kruked fasin we oli moa nogud i bitim olgeta narafala taem long histri. (Skelem wetem Ol Wok 2:40.) Yumi mas wok strong mo kwik. (2 Timote 4:2) Olgeta profet tok long saed blong taem blong bigfala trabol oli soemaot se bambae hem i kam wantaem nomo, kwiktaem, mo long wan taem we yumi no save​—olsem wan stilman. (1 Tesalonaeka 5:​1-4; Revelesen 3:3; 16:15) “From samting ya, yufala i mas stap rere. From we mi, mi Pikinini blong Man, bambae mi kamtru long taem we yufala i no tingbaot.” (Matyu 24:44) !I kolosap tumas long taem ya we olgeta man we oli laef naoia mo we oli no obei long God, bambae oli lus olgeta! !I nogud yumi sakemaot nambawan hop we yumi gat blong kasem laef we i no save finis, from we yumi letem ol samting blong wol ya oli pulum yumi, olsem we yumi “go slip bakegen long sofmad”!​—2 Pita 2:​22; 3:​10; Luk 21:32-​36.

4. ?Wanem samting i kamaot we i mekem se i nidim moa “kakae long stret taem blong hem,” mo olsem wanem Jeova i fulumap nid ya?

⁴ Folem profet tok blong Jisas, afta 1914, plante trabol i stat kamaot long wol, olsem wan “woman we i gat bel i jes harem fastaem we bak blong hem i soa blong i bonem pikinini.” Hemia i statem taem ya we Baebol i kolem ‘en blong rabis fasin blong wol.’ Fasin blong harem nogud, ol bigfala trabol, mo fasin blong brekem loa, oli gohed blong kam antap bigwan kam kasem tede. (Matyu 24:​3-8, 12) Long semtaem, Jeova i givim oda long grup ya, slef we i stret mo waes, blong ‘givim kakae long stret taem,’ long ol man we oli stap long haos blong Masta blong olgeta, Jisas Kraes. (Matyu 24:45-​47) Naoia, Mesaea King ya we i stap sidaon long jea blong king long heven, i stap lidim wan nambawan wok blong givimaot kakae long saed blong speret long olgeta ples blong wol.

Plante “Kakae”

5. ?Wanem wok i stap gohed long saed blong stampa “kakae” blong ol Kristin?

⁵ Tingbaot fasin blong mekemrere “kakae” ya. (Luk 12:42) Stampa kakae blong ol Kristin, hemia Tok blong God, Baebol. Blong tijimgud ol man long saed blong Baebol, i impoten blong gat wan Baebol we i isi blong ridim, mo we i no gat mastik long hem. Long ol yia we oli pas, sloslou yumi kasem samting ya, antap moa, stat long 1950 taem New World Translation of the Christian Greek Scriptures i kamaot long Engglis. Long 1961, oli wokem New World Translation blong fulwan Baebol, mo smoltaem biaen, oli stat prentem Baebol ya long ol narafala bigfala lanwis. Long 1996 sevis yia, Baebol ya i kamaot long 3 moa lanwis bakegen, mekem se naoia i stap long 27 lanwis evriwan, mo long olgeta ya, i gat 14 we oli fulwan Baebol. Blong tanem Baebol mo sam narafala buk we oli stanap long Baebol, oli go long ol narafala lanwis, samwe long 1,174 Kristin we oli givim laef blong olgeta long God, oli stap mekem wok ya fultaem long 77 kantri.

6. ?Olsem wanem Sosaeti i fulumap nid blong ol man blong kasem plante moa buk long saed blong Baebol?

⁶ Blong sapotem wok blong bigfala grup ya we oli tanem wan lanwis i go long narafala lanwis, ol 24 hedkwota blong Watch Tower Sosaeti we oli gat ol mesin blong prentem ol buk, oli wok strong moa blong prentem moa buk bitim bifo. Blong mekem wok ya, ol bigfala hedkwota oli kasem moa bigfala mesin we oli spid moa, blong prentem ol buk. Namba blong ol Wajtaoa mo Wekap! we oli prentem, i kam antap evri manis, gogo i kasem 943,892,500, hemia i 13.4-pesen antap long las yia. Fulnamba blong ol Baebol mo buk we oli prentem long Yunaeted Stet, Brasil, Finlan, Jemani, Itali, Japan, Koria, mo Meksiko, i go antap 40 pesen moa i bitim 1995, minim se oli prentem 76,760,098 long 1996. Ol narafala hedkwota tu oli givhan bigwan blong mekem namba blong ol buk we oli prentem i go antap olsemia.

7. ?Olsem wanem Aesea 54:2 i impoten moa tede?

⁷ Samting we i givhan tu blong mekem ol namba oli go antap bigwan long ol yia biaen long 1990, hemia from we gavman blong sam kantri long Is Yurop mo Afrika oli karemaot tabu we oli bin putum long wok blong ol Wetnes blong Jeova. Long ol ples ya, ol man oli hanggri tumas long saed blong speret. Taswe, ol tok blong Aesea oli impoten moa bitim bifo se: “Mekem ples blong haos tapolen blong yu i kam bigfala moa. Mo mekem nambawan haos tapolen blong yu i kam bigfala moa. Yu no mas wet. Mekem ol rop blong haos tapolen blong yu oli kam longfala moa, mo mekem ol aean blong holem ol rop ya oli kam strong.”​—Aesea 54:2.

8. ?Wanem nambawan fasin blong yumi blong givim presen we i stap givhan long ogenaesesen blong God long saed blong mane?

⁸ Taswe, i bin gat nid blong mekem bighaf blong ol 104 hedkwota blong Sosaeti oli kam bigwan moa. From we i gat hadtaem blong kasem mane long plante kantri we oli jes open, bighaf blong mane we oli nidim blong mekem wok i kam bigwan moa, i kamaot from presen mane we ol rij kantri oli givim blong sapotem wok we i gohed raonabaot long wol. Yumi glad blong luk se ol kongregesen mo olgeta man wanwan oli givhan wetem fulhat blong olgeta, long sem fasin we Eksodas 35⁠:21 (NW) i stap tokbaot se: “Ale oli kam, olgeta evriwan we hat blong olgeta i pusum olgeta, mo oli karem ol samting blong wok ya i kam blong givim long Jeova, olgeta evriwan we tingting blong olgeta i pulum olgeta.” Mifala i tekem jans ya blong talem tangkyu long olgeta we oli bin soem gladhat blong givim presen.​—2 Korin 9:11.

9. ?Olsem wanem Rom 10:13, 18 i stap kamtru tede?

⁹ Long 1996, olgeta buk blong Watch Tower Sosaeti oli rili givim ona long nem blong Jeova mo ol stampa tingting blong hem, go kasem ol laswan ples blong wol. Hemia samting we aposol Pol i bin talemaot. Hem i talem bakegen profet tok blong Joel mo Ol Sam 19, taem hem i raetem se: “ ‘Olgeta we oli singaot long Hae God, oli talem nem blong hem, hem bambae i sevem olgeta.’ Be i gat wan kwestin blong mi i stap yet. ?I tru se ol man Isrel oli no harem gud nyus ya, no oli harem? Si, oli harem. Hemia i olsem we Baebol i talem, i se “Tok blong olgeta i goaot finis, i go long olgeta ples long wol. Tok ya we oli talemaot, i kasem ol las ples blong wol finis.’ ” (Rom 10:13, 18) Taem ol man blong Jeova oli presem tabu nem ya Jeova, oli givhan bigwan blong fulumap haos wosip blong hem wetem glori. Be, ?olsem wanem wok blong talemaot nem ya i kam antap moa long yia 1996? Plis luklukgud long ripot long pej 18 kasem 21.

Hivimap Kakae Long Olgeta Ples Blong Wol

10. ?Wanem sam nambawan samting we yu makem long wok blong ol man blong Jeova, olsem ripot long pej 18 kasem 21 i soem?

¹⁰ Ol tok blong Jisas long Luk 10:2 oli gat moa paoa naoia i bitim bifo: “Tru, i gat plante kakae tumas i stap long garen, be smol man nomo oli stap blong karem i kam. Yufala i mas askem strong long masta blong garen ya, blong hem i sanem sam moa man oli go karem kakae blong hem i kam.” ?Yu yu stap obei long tok ya we i singaotem yu? Plante milyan man long wol oli stap mekem olsem. Yumi luksave samting ya from nyufala namba blong 5,413,769 man blong talemaot Kingdom, we oli givim ripot long wok blong prij long yia 1996. Mo tu, 366,579 nyufala brata mo sista oli baptaes. !Yumi laekem tumas olgeta ya we oli olsem ol “gudgudfala samting blong olgeta nesen”! !Naoia, oli stap givhan blong ‘fulumap haos wosip blong Jeova wetem glori’!​—Hagae 2:7.

11. ?From wanem yumi evriwan i gat risen blong glad tumas?

¹¹ Ol ripot we yumi kasem long ol kantri we oli jes open oli nambawan tumas. ?I gat sam long yumi we i harem nogud long bigfala namba blong ol man we oli stap joen wetem olgeta long ol kantri ya? No gat, yumi glad wetem olgeta. Evri kantri i bin stat wetem wan smol namba fastaem. Wan narafala profet long taem blong Hagae, hemia Sekaraea, i raetem se: “?Hu ya i ting nating long dei blong ol smol samting?” (Sekaraea 4:​10) Yumi glad tumas se long ol kantri we wok blong givim wetnes i gohed longtaem finis, naoia i gat plante milyan man blong talemaot Kingdom, mo oli wokem teritori blong olgeta oltaem. Long ol bigfala taon, samtaem oli mekem semfala teritori evri wik. ?I gat risen blong yumi kam slak long taem ya we Jeova i stap givim jans blong kasem laef, long ol man we bifo wok i tabu long ples blong olgeta? !No gat! Jisas i talem se, “Garen ya, hemia wol ya.” (Matyu 13:38) Yumi mas gohed blong givim wetnes long olgeta ples, olsem ol faswan disaepol we oli gohed blong givim wetnes long olgeta ples, jes bifo we fasin blong laef blong ol man Jyu bifo i kasem en blong hem.​—Ol Wok 2:​40; 10:42; 20:24; 28:23.

Gohed Nomo

12. ?Wanem samting i pusum yumi blong wokbaot i go “stret long fored”? (Lukluk bokis tu, “Hivimap Kakae ‘Long Ol Laswan Ples Blong Wol.’ ”)

¹² Yes, yumi mas gohed strong, yumi mas wokbaot i go “stret long fored,” wetem bigfala kat blong Jeova long heven mo ol enjel blong hem. (Esikel 1:​12) Yumi mas tingbaot ol tok blong Pita se: “Sam man oli ting se Masta blong yumi i stap tektaem tumas, i no mekem promes blong hem i kamtru kwik, be i no olsem. Hem i stap mekem tingting blong hem i longfala blong wet long yufala, from we hem i no wantem blong ol man oli lus. Hem i wantem blong olgeta man bambae oli tanem tingting blong olgeta from ol sin blong olgeta.” (2 Pita 3:9) Eksampel blong ol brata we oli wok strong long ol kantri ya we oli pua, i mas pusum yumi blong wok strong moa. Nating sipos i luk olsem we Amageden i stap tektaem tumas, be samting ya i givim jans blong hivimap plante handred taosen man long ol pua kantri ya, mo plante moa man tu long ol teritori we yumi wok long olgeta plante taem finis. Yu no mas mastik long samting ya: “Bigfala dei blong Jeova i kolosap. Hem i kolosap, mo hem i stap hareap tumas.” (Sefanaea 1:​14) !Yumi tu, yumi mas hareap blong givim wan gudfala laswan wetnes long olgeta ples!

13, 14. (a) ?Yumi save talem wanem long saed blong ol buk we yumi seremaot long 1996? (b) ?Plante kongregesen oli mekem wanem spesel plan evri yia, mo wanem plan we yu yu mekem blong joen long wok ya?

¹³ I tru se oli no raetem evri samting long ripot long saed blong wok blong prij, be namba blong ol Baebol, buk, mo magasin we yumi seremaot long yia we i jes pas, i go antap bigwan. Eksampel, namba blong ol magasin we yumi seremaot long olgeta ples blong wol, oli go antap 19-pesen, hemia i minim se yumi seremaot 543,667,923 magasin. Ol magasin blong yumi oli mekem i isi blong prij long eni ples​—long rod, long ples blong spel, long bas stop, long ol bisnes ofis. Ol ripot oli soemaot se long samfala ples we yumi stap talemaot Kingdom plante taem finis, sam bisnesman oli sapraes bigwan long ol magasin blong yumi. Oli talem se ol magasin ya oli nambawan, mo oli wantem stadi Baebol.

¹⁴ Evri yia long manis Epril, ol kongregesen oli mekem wan spesel plan blong seremaot ol magasin. Long taem ya, i gat wan spesel dei we i blong seremaot ol magasin long ol haos wanwan mo long ol pablik ples, blong ful dei. ?Kongregesen blong yu bambae i joen long wok ya long Epril 1997? Mifala i mekemrere finis ol nambawan Wajtaoa mo Wekap! blong Epril, mo from we sem store i stap long olgeta magasin long olgeta ples blong wol, bambae oli mas rili gat paoa long ol man. Long aelan blong Saepras, ol kongregesen oli gat wan spesel tok blong olgeta se, “kasem olgeta man we yu naf blong kasem wetem mesej blong Kingdom.” Blong traem folem tok ya, oli gohed evri manis blong mekem spesel plan blong seremaot ol magasin. From samting ya, oli kasem wan nyufala namba blong 275,359 magasin we oli seremaot long ful yia, hemia i 54-pesen antap long namba bifo.

Ol Laswan Mesej Blong Hagae

15. (a) ?From wanem Jeova i sanem Hagae blong talemaot sam moa mesej? (b) ?Namba tri mesej blong Hagae i mas mekem yumi tingbaot wanem samting?

¹⁵ Sikiste tri dei afta we Hagae i talemaot namba tu mesej blong hem, Jeova i sanem hem blong talemaot namba tri mesej. I gud sipos yumi tingting dip long mesej ya tede. Hagae i toktok olsem we ol man Jyu oli stap putum faondesen blong haos prea yet, be oli bin mekem samting ya 17 yia bifo finis. Bakegen, Jeova i luk se i gud blong klinim ol man blong hem. Ol pris mo ol man oli bin kam slak blong mekemgud ol wok blong olgeta. Taswe, oli kam doti long ae blong Jeova. ?Maet sam long ol man blong Jeova tede, oli kam slak? Mo tu, ?maet oli stap folem sam fasin blong wol ya we oli olbaot nomo mo fasin blong ronem ol sas samting? I impoten tumas se, “stat tede nomo i go,” yumi evriwan i mas putum hat blong yumi i stap strong long wok blong givim ona long nem blong Jeova. Taem yumi mekem olsem, yumi save trastem promes ya se: “Stat tede, bambae mi givim ol blesing.”​—Hagae 2:​10-​19; Hibrus 6:​11, 12.

16. ?Wanem wok blong ‘seksekem’ i stap kolosap nao, mo wanem samting bambae i kamaot from?

¹⁶ Long sem dei, “Jeova blong ol ami” i givim namba fo mo laswan mesej long Hagae blong talemaot. Hem i soemaot klia wanem samting bambae i hapen, taem hem i ‘seksekem heven mo wol,’ se: “Bambae mi kafsaedem olgeta jea blong ol kingdom mo bambae mi spolemgud paoa blong ol kingdom blong ol nesen. Mo bambae mi kafsaedem ol kat wetem ol man we oli sidaon long olgeta, mo ol hos wetem ol man we oli sidaon long olgeta bambae oli foldaon, wanwan blong olgeta oli mas foldaon from naef blong faet blong brata blong hem nomo.” (Hagae 2:​6, 21, 22) Taswe, fasin ya blong ‘seksekem’ wol, bambae i kasem bigfala mak blong hem taem Jeova i klinim wol fulwan long Amageden. Long taem ya, ol “gudgudfala samting blong olgeta nesen” oli kam insaed finis, blong mekem wan bigfala grup blong man we bambae oli ol faswan man blong laef long nyufala wol. !Hemia sam nambawan risen blong glad mo blong presem Jeova!​—Hagae 2:7; Revelesen 19:​6, 7; 21:​1-4.

17. ?Olsem wanem Jisas i stap olsem wan ‘ring blong putum mak long ol samting’?

¹⁷ Blong finisim profet tok blong hem, Hagae i raetem se: “ ‘Long dei ya,’ hemia tok blong Jeova blong ol ami, ‘bambae mi tekem yu, O Serubabel . . . , mo bambae mi yusum yu olsem wan ring long fingga blong mi blong putum mak blong mi long ol samting, from yu nao yu man we mi mi jusum,’ hemia tok blong Jeova blong ol ami.” (Hagae 2:​23) Naoia, Jisas Kraes hem i Mesaea King mo Hae Pris we Jeova i putumap. Hem i stap mekem tufala wok blong King mo Hae Pris long heven, long sem fasin we Rula ya Serubabel mo Hae Pris Josua tufala i bin mekem long Jerusalem long wol ya. Olsem wan ring long raethan blong Jeova, Jisas hem i man ya we Jeova i yusum blong mekem se “olgeta promes we God i talem finis” oli olsem “Yes.” (2 Korin 1:​20; Efesas 3:​10, 11; Revelesen 19:10) Olgeta profet tok long Baebol oli poen i go long Jisas Kraes olsem man we Jeova i yusum olsem King mo pris we i Pemaot sin blong yumi.​—Jon 18:37; 1 Pita 1:​18, 19.

18. ?Olsem wanem las “tok blong Jeova blong ol ami” bambae i kamtru long nambawan fasin?

¹⁸ !Tru tumas, long taem blong yumi, glori we i bigwan olgeta i stap insaed long haos prea blong Jeova long saed blong speret we i fulap long laet! Mo i no longtaem, jes afta we Jeova i spolemgud ful wol blong Setan, tok blong Hagae 2⁠:9 bambae i kamtru moa long nambawan fasin, se: “ ‘Long ples ya, bambae mi putum pis,’ hemia tok blong Jeova blong ol ami.” !Yes, long taem ya, bambae pis i stap! Pis ya bambae i stap oltaem, mo bambae i kavremap heven mo wol. Yumi save sua long samting ya from we Jisas Kraes, “Prins blong Pis,” i olsem ‘ring long fingga blong Jeova blong putum mak blong Hem long ol samting.’ Baebol i tokbaot Jisas se: “Bigfala rul blong hem olsem prins, mo pis, oli no save finis, . . . Strong tingting blong Jeova blong ol ami, bambae i mekem samting ya i kamtru.” (Aesea 9:​6, 7) Hae rul blong Jeova antap long heven mo wol we i karem fulap pis, bambae i soemaot glori blong haos wosip blong Jeova, gogo i no save finis. !I gud yumi stap oltaem long haos ya!​—Ol Sam 27:4; 65:4; 84:10.

[Futnot]

?Yu Yu Save Eksplenem?

◻ ?Olsem wanem haos blong Jeova i stap ‘kam fulap wetem glori’ tede?

◻ ?From wanem i impoten moa naoia bitim olgeta taem bifo blong talemaot gud nyus?

◻ ?Olsem wanem Ripot blong 1996 Sevis Yia i pusum yumi blong wok strong mo kwik moa long wok blong prij?

◻ ?Olsem wanem Kraes Jisas i olsem ‘ring long fingga blong Jeova blong putum mak blong Hem long ol samting’?

[Bokis blong pija long pej 15]

Hivimap Kakae “Long Ol Laswan Ples Blong Wol”

LONG Aesea 43:6, yumi ridim oda blong Jeova se: “Yu no stap, yu kam. Tekem ol boe blong mi we oli stap longwe tumas oli kam, mo ol gel blong mi we oli stap long ol laswan ples blong wol oli kam.” Vas ya i stap kamtru bigwan tede long Is Yurop. Eksampel, tingbaot kantri ya Moldova we bifo hem i gat wan Komunis gavman. Long sam velej, kolosap stret haf blong ol man oli kam Wetnes blong Jeova. !Nating se olgeta ya oli mas wokbaot longwe blong faenem teritori blong prij long hem, be oli stap traehad bigwan! Plante pablisa long ol kongregesen ya oli ol man we papa mama blong olgeta oli bin stap kalabus long Saebiria jes biaen long yia 1950. Naoia, ol famle blong ol man ya, oli stap lidim wok ya blong hivimap kakae long garen. Long ol 12,565 pablisa long ples ya, 1,917 oli baptaes long yia we i jes pas. I gat 43 kongregesen we wanwan blong olgeta oli gat samwe 150 pablisa, mo ol fo seket we oli stap bifo, oli seraot long eit seket long nyufala sevis yia.

I nambawan blong luk olsem wanem wok i stap kam antap long Albania tu. Blong 50 yia, smol grup blong ol Wetnes we oli holemstrong long God long ples ya, oli stanap strong aninit long rul blong gavman we i mekem i strong tumas long olgeta. Plante blong olgeta oli ded long taem ya. Samting ya i mekem yumi tingbaot promes ya blong Jisas, se: “I nogud yufala i stap fraet long ol samting we bambae oli kam long yufala. Setan bambae i putum sam long kampani blong yufala i go long kalabus blong traem yufala . . . Yufala i mas stanap strong gogo yufala i ded, nao bambae mi givim laef long yufala blong flasem yufala, olsem we oli putum hat long man we i win long resis blong flasem hem.” (Revelesen 2:​10; lukluk tu long Jon 5⁠:​28, 29; 11⁠:​24, 25.) ?Yumi luk wanem samting naoia long Albania? !Promes blong Jeova long Aesea 60⁠:22 i kamtru long nambawan fasin, se: “Smolwan hem wan bambae i kam wan taosen”! Long 1990, wan pablisa nomo i givim ripot long Albania. Be, sam “wokman” blong Itali mo ol narafala kantri oli obei long tok blong Jisas, se: “Yufala i mas go long ol man long olgeta ples long wol, blong pulum olgeta oli kam man blong mi. . . . , baptaesem olgeta.” (Matyu 28:19; Luk 10:2) Ale, long taem blong Memoriol blong ded blong Jisas long 1996, i gat 773 pablisa oli joen long wok blong prij. Olgeta ya oli pulum 6,523 man oli kam long Memoriol. !Namba ya i eit taem antap long namba blong ol pablisa! Nambawan ripot i kam long sam ples we oli stap longwe long bus. Long tufala taon blong Kukis mo Divyaki we i no gat pablisa, i gat 192 mo 230 man oli kam long Memoriol. Long Kruyi, we i gat wan pablisa nomo, 212 man oli kam long Memoriol. Ol 30 pablisa long Korji, oli rentem wan haos we i naf blong kolosap 300 man. Afta we namba ya i fulumap haos ya, 200 narafala man oli mas gobak from we i no moa gat ples blong olgeta. !Tru ya, kakae long garen i reregud blong karem!

Mifala i kasem ripot ya long Romania: “Taem mifala i stap prij long ol haos wanwan, mifala i mitim wan man we i talem se hem i wan Wetnes blong Jeova. Hem i stap long wan taon we mifala i save se i no gat wan Wetnes long hem. Hem i talem se, blong plante yia finis, hem wetem 15 narafala man, oli stap mekem ol miting long Tasde mo Sande, mo se oli stat prij long ol haos wanwan. Long nekis dei, mifala i go long taon ya. Long tu rum, i gat 15 man, woman, mo pikinini we oli stap wet long mifala. Oli karem 20 buk mo 20 blong ol laswan magasin. Mifala i soemaot long olgeta olsem wanem blong mekem ol Baebol stadi. Mifala i singsing tugeta mo ansarem sam long ol kwestin blong olgeta we oli wantem tumas blong save. Man we i stap lidim grup ya i talemaot se: ‘Sam dei bifo, mi prea wetem wora long ae blong mi, blong askem Jeova blong sanem wan man blong lukaot long sipsip, mo hem i ansarem prea blong mi.’ Mifala i glad tumas, mo taem mifala i aot, hem i talem long mifala, olsem wan pikinini we i no gat papa be i jes faenem wan nyufala papa blong hem, se: ‘Plis yufala i no fogetem mifala. !Yufala i mas kam luk mifala bakegen!’ Mifala i mekem olsem, mo naoia i gat seven Baebol stadi oli gohed long taon ya. Ol buk we oli tokbaot Baebol, mo we ol man oli laekem olgeta tumas, oli givhan long nambawan fasin blong statem wok long plante nyufala teritori. Samting ya i soemaot klia se God nomo i stampa blong wok ya.”

[Tok blong pija long pej 16 mo 17]

“Ol gudgudfala samting blong olgeta nesen” oli stap hivap long ol Aelan blong Solwora (1), Saot Amerika (2), Afrika (3), Esia (4), Not Amerika (5), mo Yurop (6)