Lego Plante Samting Blong Kasem Samting We i Gud Moa

JULIUS OWO BELLO I TALEM STORE YA

Blong 32 yia, mi mi wan Aladura.a Mi bilif se merikel mo prea bambae i stretem olgeta problem blong mi mo mekem olgeta sik oli kamgud. Mi neva pem meresin, mo tu, mi no pem enikaen meresin blong kilim soa long bodi. Long ol yia ya, i no gat wan long famle blong mi we i go slip long hospital. Taem wan pikinini blong mi i sik, mi prea from hem long dei mo long naet, kasem taem we hem i kamgud bakegen. Mi bilif se God i stap ansa long ol prea blong mi mo i stap blesem mi.

Mi mi wan memba blong Egbe Jolly, wan grup we i hae moa long ol narafala grup blong man we oli stap joen tugeta long Akure, wan taon long wes Naejeria. Ol fren blong mi oli rij mo oli gat paoa bitim ol narafala man long taon ya. Plante taem, Deji, king blong Akure, i kam luk mi long haos blong mi.

Mi mi stap wetem plante woman, sikis waef mo plante narafala woman bakegen. Bisnes blong mi i rongud. Evri samting long laef blong mi i stap gohedgud. Be, olsem bisnesman ya long parabol blong Jisas, we i stap lukaot wan gudfala perel, mi faenem wan samting we i sas tumas. Ale, blong kasem sas samting ya, mi lego faef long ol waef blong mi wetem ol narafala woman, mi lego jyos blong mi, grup blong man we mi joen long hem, mo haeples long wol.​—Matyu 13:​45, 46.

?Olsem Wanem Mi Kam Wan Aladura?

Faswan taem we mi harem nyus blong ol Aladura, hemia long 1936, taem mi gat 13 yia. Wan fren, nem blong hem Gabriel, i talem long mi se: “Sipos yu go long Kraes Apostolik Jyos, bambae yu harem God i toktok.”

Mi askem long hem se: “?Olsem wanem God i toktok?”

Hem i talem se: “Yu kam, bambae yu luk.”

Mi wantem tumas blong lesin long God. Ale, long naet ya, mi folem Gabriel i go long jyos. Smol jyos ya i fulap long ol man blong wosip. Ol man oli stat blong singsing, se: “!Yufala i kam, yufala olgeta man! !Hemia ples we Jisas i stap!”

Taem oli stap singsing yet, wan man i singaot bigwan, i se: “!Tabu speret, kamdaon!” Wan narafala man i mekem bel i krae, nao biaen, evri man i stap kwaet, i no gat noes nating. Nao, wan woman i girap, i stat toktok kwik long wan lanwis we i narakaen olgeta. Wantaem nomo, hem i singaot bigfala, i se: “!Yufala olgeta man, yufala i lesin long mesej blong God! Hemia samting we God i talem: ‘!Yufala i prea from ol man we oli stap ronem narafala, blong oli no kilim man i ded!’ ” Wan strong filing i kasem evriwan.

Mi bilif se God i bin toktok tru long woman ya. Ale, long yia we i kam biaen, mi tekem baptaes olsem wan memba blong Kraes Apostolik Jyos.

Faswan Taem We Mi Toktok Wetem Ol Wetnes Blong Jeova

Long 1951, mi karem wan Wajtaoa long wan Wetnes, nem blong hem Adedeji Boboye. Mi intres tumas long Wajtaoa ya, ale mi mekem sabskripsen mo mi ridim ol Wajtaoa oltaem. Long 1952, mi go long wan distrik asembli blong ol Wetnes blong Jeova blong fo dei, long Ado Ekiti.

Samting we mi luk long asembli ya i mekem mi mi sapraes tumas. Mi gat strong tingting blong kam wan Wetnes blong Jeova, be biaen tingting ya i lus. Problem blong mi se long taem ya, mi gat tri waef mo wan narafala woman we i no stret waef blong mi. Mi stap tingting se i no gat rod blong mi stap wetem wan waef nomo.

Taem mi gobak long Akure, mi talem long Adedeji blong i no moa kam luk mi, mo mi no moa fulumap pepa blong mekem sabskripsen blong Wajtaoa bakegen. Mi kam strong moa long jyos blong mi. Mi stap tingting se, God i blesem mi afta we mi joen long Kraes Apostolik Jyos. Mi maredem tri waef mo mi gat plante pikinini. Mi wokem prapa haos blong mi. Mi neva go slip long hospital. I luk olsem se God i stap ansarem ol prea blong mi, taswe ?from wanem mi mas jenisim skul blong mi?

Kasem Haenem Be Tingting i Trabol

Mi stat blong givim plante mane i go long jyos. Smoltaem biaen, oli putumap mi olsem wan elda blong jyos, wan haeples we i mekem mi mi luk klia ol samting we i stap hapen insaed long jyos. Samting we mi luk i mekem tingting blong mi i trabol tumas. Pasta mo “ol profet” oli laekem mane tumas. Mi mi harem nogud tumas long griri fasin blong olgeta.

Eksampel, long Maj 1967, wanwan long trifala waef blong mi i bonem pikinini. Kastom blong jyos se oli mas mekem seremoni blong putum nem long ol pikinini. Ale, mi karem sam presen i go, olsem fis, limonad, mo jus. Mi givim olgeta long pasta blong givhan long hem blong mekemrere seremoni ya.

Long stret dei blong seremoni ya, pasta i stanap long fored blong evriwan long jyos, nao i talem se: “Ol rijman long jyos ya oli mekem mi mi sapraes tumas. Oli wantem mekem seremoni blong putum nem blong pikinini, be oli karem jus mo fis nomo i kam. !Oli no givim mit! !Oli no givim nani! !Traem tingbaot! Ken i tekem wan bigfala yam, blong givim long God olsem presen, be God i no agri long presen ya from we i no gat blad insaed long hem. God i wantem ol samting we i gat blad insaed long olgeta. Ebel i givim wan anamol, mo God i agri long presen ya blong hem.”

Nao, mi girap, mi go afsaed we mi kros tumas. Be, mi stap go yet long jyos. Mi stap spenem moa taem blong storeyan wetem ol man, mo mi stap joen moa wetem grup blong man we mifala i stap joen wanples oltaem. Sam samtaem, mi go long miting long Haos Kingdom, mo mi mekem sabskripsen blong Wajtaoa bakegen. Nating se i olsem, mi no rere yet blong kam wan Wetnes blong Jeova.

Disisen Blong Mekem Wok Blong Jeova

Bigfala jenis i kamaot long 1968. Wan dei, mi ridim wan store long Wajtaoa we i tokbaot ol Wetnes blong Jeova long Malawi. Hem i talem se, ol man oli stap mekem i nogud tumas long olgeta. Wajtaoa ya i talem store blong wan gel blong 15 yia, we oli fasem hem long wan tri mo oli mekem nogud long hem sikis taem from we hem i no wantem lego bilif blong hem. Mi harem nogud tumas long samting ya. Mi lego magasin ya i stap, be mi stap tingting long hem. Mi luksave se long jyos blong mi, i no gat wan gel we i save soem strong bilif olsem. Biaen, long sem naet ya, mi tekem Wajtaoa ya mo mi ridim store ya bakegen.

Mi stat blong stadi Baebol mo tinghevi long ol save long hem. Taem mi stap kasem moa save, mi stat blong luk olsem wanem jyos i bin gyaman long mifala. Olsem long taem bifo, ol pris blong mifala oli ‘stap mekem ol krangke fasin nomo.’ (Hosea 6:⁠9) !Ol man olsem, oli sam long ol gyaman profet we Jisas i givim woning se yumi mas lukaot long olgeta! (Matyu 24:24) Mi no moa bilif long ol vison mo ol merikel blong olgeta. Mi mekem disisen blong kamaot long gyaman skul ya mo blong givhan long ol narafala blong mekem olsem.

Oli Traehad Blong Holem Mi i Stap Long Jyos Ya

Taem ol elda blong jyos oli luksave se mi gat strong tingting blong lego jyos, oli sanem sam man i kam blong toktok wetem mi. Oli no wantem lusum wan man we i stap givim plante mane long jyos. Oli talem se bambae oli putumap mi olsem Baba Egbe, hed blong wan long ol Kraes Apostolik jyos long Akure.

Mi no wantem samting ya, mo mi eksplenem long olgeta from wanem. Mi talem se: “Jyos i stap gyaman long yumi. Oli talem se ol gudfala man bambae oli go long heven. Be mi bin ridim Baebol, mo mi bilif se 144,000 man nomo bambae oli go long heven. Ol narafala stret man bambae oli laef long paradaes long wol ya.”​—Matyu 5:⁠5; Revelesen 14:​1, 3.

Pasta blong jyos i traem pusum ol waef blong mi blong oli agensem mi. Hem i talem long olgeta blong blokem ol Wetnes blong Jeova, blong oli no kam long haos blong mifala. Wan long ol waef blong mi i putum posen long kakae blong mi. Tu narafala i givim woning long mi long saed blong wan vison we tufala i luk long jyos. Vison ya i soem se, bambae mi ded sipos mi lego jyos. Nating se ol waef blong mi oli gohed blong mekem olsem long mi, mi gohed blong givim wetnes long olgeta. Mi askem olgeta blong kam wetem mi long ol miting. Mi talem se: “Bambae yufala i faenem ol narafala hasban long ples ya.” Be, i no gat wan long olgeta we i soem intres, mo oli gohed blong traem blokem mi.

Biaen, long Febuwari 2, 1970, taem mi kamhom afta we mi mekem trep i go long wan taon we i stap kolosap, mi faenem se i no gat wan i stap long haos. Olgeta waef blong mi oli ronwe wetem olgeta pikinini tu.

Mi Stap Wetem Wan Waef

Mi stap tingting se, ‘Naoia mi save stretem mared blong mi.’ Mi askem faswan waef blong mi, Janet, blong kambak long haos. Hem i agri. Be, famle blong hem i agensem plan ya fulwan. Taem ol narafala waef blong mi oli harem se mi askem Janet blong kambak, oli go long haos blong papa blong hem, from oli wantem kilim Janet. Ale, famle blong Janet i singaot mi blong kam long wan miting.

Samwe long 80 man oli kam long miting ya. Angkel blong Janet, we i hed blong famle, i talem se: “Sipos yu wantem maredem gel blong mifala bakegen, yu mas tekem ol narafala woman ya tu. Be sipos yu wantem folem nyufala skul blong yu mo stap wetem wan waef nomo, bambae yu lukaot wan narafala woman. Sipos yu tekem Janet bakegen, ol narafala waef blong yu bambae oli kilim hem i ded, mo mifala i no wantem we gel blong mifala i ded.”

Afta long plante toktok, famle ya i luksave se mi gat strong tingting blong stap wetem wan waef nomo. Biaen, oli jenisim tingting blong olgeta. Angkel ya i talem se: “Bambae mifala i no tekemaot waef blong yu. Yu save tekem hem i go wetem yu.”

Long Mei 21, 1970, mi mo Janet i mared folem loa. Naen dei biaen, mi mi baptaes olsem wan Wetnes blong Jeova. Long Desemba long sem yia ya, Janet tu i baptaes.

Haremgud Long Blesing Blong Jeova

Ol memba blong olfala jyos blong mitufala, oli bin talem se sipos mitufala i kam Wetnes, bambae mitufala i ded. Oli bin talem tok ya kolosap 30 yia finis. Be sipos mi ded naoia, ?hemia i from we mi kam wan Wetnes blong Jeova? Sipos waef blong mi i ded naoia, ?wan man i save talem se, hemia i from we hem i kam wan Wetnes blong Jeova?

Mi bin traehad blong soem rod blong trutok long ol 17 pikinini blong mi. Plante blong olgeta oli bigwan finis taem mi kam wan Wetnes. Nating se i olsem, mi leftemap tingting blong olgeta blong stadi long Baebol mo mi tekem olgeta oli go long ol miting mo ol asembli. Mi glad tumas we faef long olgeta oli joen wetem mi long wok blong Jeova. Wan i stap wok wetem mi olsem wan elda long kongregesen.b Wan bakegen i wan man blong givhan long wan kongregesen kolosap. Tu narafala pikinini blong mi, tufala i fultaem paenia.

Taem mi tingtingbak, mi sapraes mo haremgud tumas long kaengud fasin blong Jeova, blong givhan long mi blong kam wan man blong hem. !Ol tok blong Jisas oli tru nomo, se: “I no gat man i save kam long mi, sipos Papa blong mi we i sanem mi, hem i no pulum hem i kam”!​—Jon 6:⁠44.

[Ol futnot]