Inok Hem i No Fraet Nating Long Taem Blong Trabol

LONG tingting blong wan stret man, hem i wan taem we i nogud we i nogud tumas. Wol i fulap long ol man we oli no ona long God. Sloslou, gudfala fasin blong ol man i stap lus. Yes, i no longtaem biaen, i kamaot olsem: ‘Jeova i luk we rabis fasin blong man i fulap long wol, mo oltaem hat blong olgeta i stap tingbaot blong mekem ol rabis fasin nomo.’​—Jenesis 6:5.

Inok, man we i namba seven long laen blong Adam, i no fraet blong stap defren long ol narafala man. Hem i stanap strong long stret fasin nomata wanem samting i hapen long hem. Mesej we Inok i talemaot i mekem ol rabis man we oli no wantem obei long God, oli harem nogud tumas. Taswe, oli makem hem blong kilim hem i ded. Jeova nomo i save halpem hem.​—Jud 14, 15.

Inok Mo Hae Rul Blong Jeova

Longtaem bifo we Inok i bon, kwestin long saed blong hae rul blong Jeova antap long heven mo wol, i kamaot. ?God i gat raet blong rul long wol? I olsem we Setan i talem se no gat. Hem i talem se i moagud sipos ol man oli seraot long God, we God i no lidim olgeta. Blong traem pruvum tok blong hem agensem Jeova God, Setan i trikim ol man long fasin haed, blong pulum olgeta oli kam long saed blong hem. Olgeta oli savegud se Adam, waef blong hem Iv, mo faswan pikinini boe blong tufala, Ken, oli folem Setan from we oli no wantem se God i rul long olgeta. Oli jusum prapa rul blong olgeta nomo. Faswan man mo woman tufala i mekem olsem taem tufala i kakae frut we God i talem se i tabu blong kakae. Ken tu i mekem olsem taem hem i kilim i ded Ebel, brata blong hem we i mekem stret fasin.​—Jenesis 3:​4-6; 4:8.

Ebel i no fraet blong folem Jeova. From we Ebel i holemstrong long God, hem i leftemap trufala wosip. Taswe, Setan i glad tumas taem bigfala kros i pusum Ken blong kilim Ebel i ded. Stat long taem ya, Setan i yusum fasin blong “fraet long ded” olsem wan tul blong mekem man i fraet tumas. Hem i wantem mekem eniman we i laekem blong wosip long trufala God wetem hat blong hem, i fraet.​—Hibrus 2:​14, 15; Jon 8:​44; 1 Jon 3:​12.

Taem Inok i bon, i luk olsem we plante man oli folem tingting ya blong Setan se ol man bambae oli no sapotem hae rul blong God. Ebel i ded finis, mo ol man oli no stap folem eksampel blong hem blong holemstrong long God. Be, Inok i pruvum se hem i defren. Hem i gat strong risen blong bilif, from we hem i savegud ol samting we oli bin hapen long garen blong Iden.a !Ating hem i tinghae long profet tok blong Jeova we i soemaot se, Laen we God i promes bambae i finisim Setan mo ol trik blong hem!​—Jenesis 3:​15.

From we Inok i lukluk i go oltaem long hop ya long fyuja, plan we Setan i wokem blong kilim Ebel i ded i no mekem Inok i fraet. Hem i stap wokbaot wetem Jeova, mo ful laef blong hem i folem rod we i stret. Inok i no joen long wol, hem i ronwe long tingting blong wol blong rulum hem wan.​—Jenesis 5:​23, 24.

Mo tu, Inok i no fraet blong talemaot mo mekem i klia se ol rabis wok blong Setan bambae oli no win. Aninit long paoa blong tabu speret, no paoa blong God, Inok i talem wan profet tok long saed blong ol man nogud, i se: ‘!Yufala i luk! Jeova i kam wetem fulap fulap tabu enjel blong hem, blong mekem jajmen blong hem i kamtru long olgeta man, mo blong soemaot ol nogud wok blong ol man nogud we oli no ona long hem, mo blong soemaot ol rabis tok we ol sinman we oli no ona long hem oli talemaot agens long hem.’​—Jud 14, 15.

From we Inok i no fraet blong toktok, aposol Pol i raetem long leta blong hem long ol Hibru Kristin, se Inok i wan long ‘ol wetnes we kampani blong olgeta i bigfala tumas.’ Olgeta ya oli soem wan nambawan eksampel long saed blong bilif we i laef.b (Hibrus 11:5; 12:1) Inok i wan man blong bilif, taswe hem i stanap strong blong bitim 300 yia. (Jenesis 5:​22) !Ol enemi blong God long heven mo long wol oli mas kros tumas taem oli luk we Inok i stap tru long God! Profet tok blong Inok i stikim Setan mo i mekem fasin agens blong hem i kamaot strong, be Jeova i lukaotgud long Inok.

?God i Tekemaot Inok​—Olsem Wanem?

Jeova i no letem Setan mo ol man blong hem long wol oli kilim Inok i ded. Store blong Baebol i talem se: “God i tekemaot hem.” (Jenesis 5:​24) Aposol Pol i eksplenem samting ya olsem: ‘From we Inok i stap bilif long God, taswe God i karem hem i go blong mekem se hem i no luk ded. I no gat wan man i faenem hem from we God i karem hem finis. Hemia from we, bifo God i karem hem, God i soemaot long hem se hem i mekem God i haremgud.’​—Hibrus 11:5.

?Olsem wanem ‘God i karem Inok blong mekem se hem i no luk ded’? No, ?olsem wanem “God i tekemaot Inok blong mekem hem i no haremsave ded,” folem rod we R. A. Knox i yusum blong tanem vas ya? Long pis, God i finisim laef blong Inok, mekem se hem i no filim ol soa we i joen wetem ded, from sik no raf fasin blong ol enemi blong hem. Yes, Jeova i katem laef blong Inok taem Inok i gat 365 yia​—hem i no olfala tumas taem yumi skelem wetem ol narafala man long taem blong hem.

?Olsem wanem ‘God i soemaot se Inok i mekem Hem i haremgud’? ?Hem i kasem wanem pruf? Ating God i mekem Inok i luk samting olsem wan drim, olsem aposol Pol, taem ‘God i tekem hem i go.’ Pol i kasem wan vison we i soemaot paradaes long saed blong speret, long Kristin kongregesenc afta long taem blong hem. (2 Korin 12:​3, 4) Pruf, no samting we i soem se Inok i mekem God i haremgud, maet i minim wan vison we i soemaot paradaes long wol long fyuja. Long taem ya, olgeta we oli laef bambae oli sapotem hae rul blong God. Ating taem Inok i stap luk nambawan vison ya, God i tekemaot hem blong i slip long ded we i no harem i soa nating, go kasem dei we hem i laef bakegen. I luk olsem se, Jeova i haedem bodi blong Inok, olsem we hem i mekem long Moses. Taswe, ‘i no gat wan man i faenem hem.’​—Hibrus 11:5; Dutronome 34:​5, 6; Jud 9.

Profet Tok i Kamtru

Tede, ol Wetnes blong Jeova oli talemaot semfala tingting we i stap long profet tok blong Inok. Oli yusum Baebol blong soemaot olsem wanem profet tok ya bambae i kamtru, taem God i spolem ol man we oli no obei long hem, long fyuja we i kolosap nomo. (2 Tesalonaeka 1:​6-​10) Ol man oli no laekem mesej blong olgeta, from we mesej ya i defren tumas long tingting blong ol man blong wol ya, mo ol mak we oli wantem kasem. Ol Wetnes oli no sapraes taem oli kasem hadtaem, from we Jisas i givim woning long ol man blong hem se: “Bambae olgeta man oli no laekem yufala, oli agens long yufala, from we nem blong mi i stap long yufala.”​—Matyu 10:22; Jon 17:14.

Be nating, olsem Inok, ol Kristin tede oli sua se bambae oli kam fri long ol enemi blong olgeta. Aposol Pita i raetem se: “Jeova i save olsem wanem blong sevem ol man we oli fasgud long hem, oli aot long ol samting blong traem olgeta. Be ol man we oli no stret, hem i save olsem wanem blong holem olgeta oli stap gogo bambae hem i mekem olgeta oli lus long dei blong jajmen.” (2 Pita 2:​9, NW) Maet God i luk se i gud blong tekemaot wan problem no wan hadtaem we i stap traem yumi. Maet ol trabol we ol man oli mekem long yumi i finis. Be, sipos i no finis, God i save olsem wanem blong ‘mekem rod’ blong ol man blong hem oli save stanap strong tru long ol traem ya. Mo tu, Jeova i givim ‘paoa we i bigfala tumas i blong God, i no blong olgeta,’ taem oli nidim.​—1 Korin 10:13; 2 Korin 4:7.

Mo tu, Jeova we ‘i givim gudfala pei long ol man we oli stap traehad blong faenem hem,’ bambae i blesem ol man blong hem wetem laef we i no save finis. (Hibrus 11:6) Bighaf blong olgeta bambae oli kasem laef blong olwe long paradaes long wol ya. Taswe, olsem Inok, yumi no mas fraet blong talemaot mesej blong God. Wetem bilif, yumi mas mekem olsem nating se yumi kasem trabol.

[Ol futnot]

[Bokis blong pija long pej 30]

Oli Yusum Nem Blong God Long Nogud Fasin

Fo handred yia bifo long Inok, smol bubu blong Adam, Enos, i bon. Jenesis 4:​26 (NW) i talem se: “Nao long taem ya, ol man oli stat blong yusum nem blong Jeova.” Samfala man blong mekem dip stadi long Hibru lanwis, oli bilif se vas ya i mas talem olsem se, “stat blong yusum nem blong God long nogud fasin,” no, “long taem ya, fasin blong daonem nem blong God i stat.” Jerusalem Targum i tokbaot taem ya bifo, i se: “Ol man we oli laef long taem ya, oli stat blong mekem sin, ona long olgeta wanwan bakegen olsem we oli aedol, mo givim nem ya Tok blong Masta i go long ol aedol blong olgeta.”

Long taem blong Enos, fulap man oli yusum nem blong Jeova long nogud fasin. Maet ol man oli bin putum nem blong God long olgeta bakegen. Maet oli putum nem ya long sam narafala man, nao oli gyaman se oli yusum ol man ya olsem rod blong wosip long Jeova God. Maet oli putum nem blong God long ol aedol. Nating se oli mekem olsem wanem, Setan i holemtaet ol man ya long trap blong wosipim ol aedol. Taem Inok i bon, i gat smol man nomo oli folem trufala wosip. Ol man oli no laekem mo oli agensem eniman olsem Inok, we i folem trutok long laef blong hem, mo i talemaot trutok ya.​—Skelem wetem Matyu 5:​11, 12.

[Bokis blong pija long pej 31]

?Inok i Go Antap Long Heven?

“From we Inok i stap bilif long God, taswe God i karem hem i go blong mekem se hem i no luk ded.” Samfala Baebol oli tanem tok ya long Hibrus 11⁠:5 blong minim se Inok i no rili ded. Eksampel, A New Translation of the Bible, James Moffatt, i talem se: “From we Inok i stap bilif long God, taswe God i tekem hem i go antap long heven blong mekem se hem i no ded.”

Be samwe 3,000 yia afta long taem blong Inok, Jisas Kraes i talem se: “I no gat man we i go antap long heven samtaem. Mi, mi Pikinini blong Man, mi nomo mi kamaot long heven, mi kamdaon.” (Jon 3:​13) The New English Bible i talem se: “I no gat wan man we i bin go long heven samtaem, be hemia nomo we i kamdaon long heven, Pikinini blong man.” Taem Jisas i talem tok ya, hem i no go antap long heven yet.​—Skelem wetem Luk 7:​28.

Aposol Pol i talem se Inok mo ol narafala man we oli mekemap bigfala kampani blong ol wetnes bifo Kristin taem, “oli ded” mo “oli no kasem ol samting ya yet we God i promes blong givim long olgeta.” (Hibrus 11:13, 39) ?From wanem? From we ol man, mo Inok tu, oli kasem sin blong Adam. (Ol Sam 51:5; Rom 5:​12) I gat wan rod nomo we i save sevem ol man, hemia tru long ransom sakrifaes blong Jisas Kraes. (Ol Wok 4:​12; 1 Jon 2:​1, 2) Long taem blong Inok, Jisas i no pem ransom ya yet. Taswe, Inok i no go antap long heven, be hem i stap slip long ded mo i stap wet blong laef bakegen long wol ya.​—Jon 5:​28, 29.

[Foto Credit Line pej 29]

Reproduced from Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s