Mi Lanem Trutok Blong Baebol Long Romania

GOLDIE ROMOCEAN I TALEM STORE YA

Long 1970, hemia faswan taem we mi gobak long Romania blong visitim ol famle blong mi, afta long 50 yia we mi no luk olgeta. Ol man oli laef aninit long strongfala rul blong Komunis gavman, mo oltaem oli givim woning long mi se mi mas lukaotgud long samting we mi talem. Ale, mi stap stanap long ofis blong gavman long velej blong mi. Wan haeman i talem strong long mi se mi mas aot long kantri ya kwiktaem nomo. Be bifo we mi eksplenem risen blong samting ya, bambae mi talemaot long yufala olsem wanem mi lanem trutok blong Baebol long Romania.

MI MI bon long Maj 3, 1903, long velej blong Otelek long not wes blong Romania, kolosap long taon blong Salao. Ples blong mifala i naes tumas. Wora mo win i klingud. Mifala i gat garen blong mifala mo neva mifala i sot long wan samting. Taem mi mi yangfala, kantri i gat pis nomo long hem.

Ol man oli gat strong bilif long saed blong skul. Yes, famle blong mi i joen long tri defren skul. Mama blong papa blong mi i joen long Otodoks jyos, mo mama blong mama blong mi i stap long Adventis jyos. Mo papa mama blong mi tufala i joen long Baptis jyos. From we mi mi no agri long trifala skul ya evriwan, famle blong mi oli talem se mi mi no bilif long God. Mi mi tingting se, ‘Sipos i gat wan God nomo, i mas gat wan skul nomo​—i no stret se i gat tri defren skul long wan famle olsemia.’

Ol samting we mi mi luk insaed long ol skul, oli mekem tingting blong mi i trabol. Eksampel, pris i stap go long haos blong ol man blong karem mane we oli mas givim i go long jyos. Taem ol man ya oli no gat stret mane we oli mas givim, ale, pris ya i tekemaot beswan blangket blong olgeta we oli wokem long skin blong sipsip. Long Katolik jyos, mi luk bubu woman blong mi i stap nildaon blong prea long fored blong wan pija blong Meri. Long tingting blong mi, mi se, ‘?From wanem hem i stap prea long wan pija nomo?’

Taem Blong Trabol

Long 1912, Papa i go long Yunaeted Stet blong winim moa mane from we hem i gat wan kaon blong pembak. I no longtaem afta, faet i kamaot, mo ol man long velej blong mifala oli aot blong go long faet​—ol woman nomo oli stap wetem ol pikinini mo ol olfala man. Velej blong mifala i go long han blong ol man Hangari blong smoltaem, be taem ol soldia blong Romania oli kambak, oli karemaot velej long han blong olgeta ya bakegen. Oli givim oda long mifala blong aot kwiktaem. Be, from we ol man oli kwik tumas mo tingting i fasfas taem oli stap fulumap olting mo putum ol pikinini blong olgeta oli go long kat, oli fogetem se mi mi stap. Mi mi fasbon long faef pikinini.

Mi resis i go long haos blong wan olfala man we i stap kolosap, hem i no aot wetem ol narafala. Man ya i talem se: “Yu gobak long haos. Lokem doa, mo yu no letem wan man i kam insaed.” Mi obei long hem kwiktaem nomo. Afta we mi kakae haf sup blong faol mo kabis we famle i fogetem taem oli hareap blong aot, mi nildaon kolosap long bed blong mi mo mi prea. Smoltaem biaen, mi slip we mi no moa harem wan samting.

Taem mi openem ae blong mi, delaet i kamtru finis, mo mi talem se: “!O, tangkyu, God! !Mi laef i stap yet!” I gat fulap hol blong bolet long ol wol blong haos, from we long fulnaet ol man oli bin sutum masket olbaot. Taem Mama i luksave se mi mi no stap wetem olgeta long nekiswan velej, hem i sanem wan yangfala boe we nem blong hem George Romocean i kam blong faenem mi, mo hem i tekem mi mi go long famle blong mi. I no longtaem tumas, mifala i gobak long velej blong mifala mo gohed blong laef long ples ya.

Mi Wantem Tumas Ol Trutok Blong Baebol

Mama blong mi i wantem se mi mi tekem baptaes long Baptis jyos. Be mi mi no wantem, from we mi no bilif se God we i gat lav i save bonem man blong olwe long helfaea. Mama i traem eksplenem samting ya, i se: “Be i olsem, from we ol man ya oli nogud.” Be, mi mi ansa se: “Sipos oli nogud, i moagud blong kilim olgeta oli ded wantaem nomo, be i no stret blong mekem olgeta oli harem i soa blong olwe. Mi no save mekem wan dog no wan puskat i harem soa olsemia.”

Mi rimemba se long wan gudfala dei taem ol tri oli stap putum flaoa, hemia taem we mi gat 14 yia blong mi, Mama i talem long mi blong lidim ol buluk oli go longwe lelebet blong kakae gras. Taem mi stap slip long gras kolosap long reva, wetem bigfala bus biaen long mi, mi lukluk i go antap long skae mo mi talem se: “God, mi mi save se yu yu stap. Be mi no laekem olgeta skul ya. Mi sua se i mas gat wan gudwan i stap we i blong yu.”

Mi mi rili bilif se God i harem prea ya blong mi from we long hot taem blong yia ya nomo, 1917, tu Baebol Studen (hemia nem blong ol Wetnes blong Jeova bifo) oli kam long velej blong mifala. Tufala i kolpota, hemia ol man blong prij fultaem, mo tufala i kam insaed long Baptis jyos taem sevis i stap gohed.

Trutok Blong Baebol i Kasem Plante Ples Long Romania

Sam yia bifo, long 1911, Carol Szabo mo Josif Kiss, we tufala i joen wetem ol Baebol Studen long Yunaeted Stet, tufala i kambak long Romania blong statem wok blong seremaot trutok blong Baebol long ples ya. Tufala i go stap long Tirgu-Murs, samwe long 160 kilomita saot is long velej blong mifala. Afta we sam yia nomo i pas, i gat plante handred man we oli bilif finis long mesej blong Kingdom, mo oli joen long Kristin wok blong prij.​—Matyu 24:14.

Ale, tufala yangfala Baebol Studen oli kam long Baptis jyos long velej blong mifala long Otelek. George Romocean, nating se hem i gat 18 yia nomo, i stap mekem sevis long jyos long taem ya. Hem i stap traehad blong eksplenem mining blong Rom 12:1. Nao, wan long tufala yangfala kolpota ya i stanap, mo i talem se: “Ol brata mo fren, ?aposol Pol i stap traehad blong talem wanem long yumi long ples ya?”

!Taem mi harem samting ya, mi mi glad tumas! Tingting blong mi se, ‘Ating tufala man ya oli save eksplenem Baebol.’ Be bighaf blong ol man we oli stap long taem ya oli singaot se: “!Ol gyaman profet! !Mifala i save se yufala i hu!” Ale, ol man oli stat singaot bigwan. Nao papa blong George i stanap mo i talem se: “!Yufala evriwan i satem maot blong yufala! !Wanem kaen fasin ya we yufala i stap mekem! !Hemia i olsem fasin blong man we i drong nomo! Sipos tufala man ya i gat wan samting blong talem long yumi mo yufala i no wantem lesin, bambae mi mi singaot tufala i kam long haos blong mi. Eniman we i wantem kam lesin, i save kam.”

Mi mi glad tumas, nao mi ron i gobak long haos mo mi talemaot samting ya long Mama. Mi mi wan long olgeta ya we i go long haos blong famle Romocean. !Mi hapi blong faenemaot long naet ya, se Baebol i no tokbaot wan helfaea! !Mo tu, mi glad blong luk long prapa Baebol blong mi long lanwis Romania, se God i gat wan nem hemia, Jeova! Tufala kolpota ya oli mekem plan se, wan Baebol Studen bambae i kam long haos blong famle Romocean evri Sande blong tijim mifala. Nekis yia, long hot taem, taem mi gat 15 yia blong mi, mi tekem baptaes blong soemaot se mi givim laef blong mi finis i go long Jeova.

Taem i pas, nao kolosap fulwan famle Prodan wetem famle Romocean, oli bilif long trutok blong Baebol mo givim laef blong olgeta i go long Jeova. Plante narafala man long velej blong mifala tu oli mekem sem mak. Yangfala man mo woman blong hem we fastaem Baptis jyos i yusum haos blong tufala blong mekem miting long hem, tufala ya tu oli joen wetem mifala. Biaen, oli mekem haos ya i kam olsem ples we ol Baebol Studen oli joen blong stadi. !Kwiktaem nomo, trutok blong Baebol i kasem ol velej kolosap, mo long yia 1920, i gat raonabaot 1,800 man blong talemaot Kingdom long Romania!

Go Long Yunaeted Stet

Mifala i wantem tumas blong serem samting we mifala i lanem finis wetem papa blong mifala, Peter Prodan. Be, mifala i sapraes tumas from we, bifo we mifala i gat taem blong raetem leta i go long hem, hem nao i sanem wan leta i kam long mifala. Hem i talem se hem i jes baptaes blong kam wan man blong Jeova. Hem i bin stadi wetem ol Baebol Studen long Akron, Ohaeo, mo hem i wantem se mifala evriwan i go joen wetem hem long Yunaeted Stet. Be, Mama i no wantem aot long Romania. Taswe, long 1921, mi yusum mane we Papa i sanem i kam long mi, ale mi go joen wetem hem long Akron. George Romocean mo brata blong hem tufala i go finis long Yunaeted Stet wan yia bifo.

Taem sip we mi stap long hem i kasem Elis Aelan, Nyu Yok, man blong imigresen i no save olsem wanem blong tanem nem blong mi, Aurelia, i go long Engglis lanwis. Taswe hem i talem se: “Yu yu Goldie.” Hemia nao nem we mi karem kam kasem tede. Smoltaem afta long samting ya, long Mei 1, 1921, mi maredem George Romocean. Raonabaot wan yia biaen, Papa i gobak long Romania. Long 1925, hem i karem smol sista blong mi, Mary, i kam long Akron. Nao Papa i gobak long Romania blong stap wetem Mama mo ol narafala pikinini long famle blong mifala.

Mifala i Stat Blong Prij Long Yunaeted Stet

George i wan man we i stap tru mo fasgud oltaem long Jeova. Stat long 1922 kasem 1932, mitufala i kasem blesing blong gat fo naesfala gel​—Esther, Anne, Goldie Elizabeth, mo Irene. Wan kongregesena long lanwis Romania i stat long Akron, mo fastaem oli mekem miting long haos blong mifala. Taem i pas, nao evri sikis manis wan memba blong hedkwota blong ol Baebol Studen long wol, hemia long Bruklin, Nyu Yok, i visitim kongregesen blong mifala mo i stap wetem mifala.

Plante taem, mifala i yusum ful dei long Sande blong prij. Mifala i fulumap ol buk mo kakae blong mifala i go long basket, mo putum ol gel blong mitufala i go long trak blong mifala, nao mifala i prij blong fuldei long ol ples afsaed long taon. Long naet, mifala i joen blong stadi Wajtaoa. Ol gel blong mitufala oli kam we oli laekem tumas wok blong prij. Long 1931, mi stap long Kolambas, Ohaio, taem ol Baebol Studen oli karem nem ya we i makemaot olgeta, ol Wetnes blong Jeova.

Fasin Stretem We Mi Nidim

Sam yia biaen, mi kam kros long Joseph F. Rutherford, we long taem ya hem i presiden blong Watch Tower Bible and Tract Society. Wan Wetnes we i jes baptaes, i gat tingting se Brata Rutherford i mekem fasin we i no stret long hem, from we hem i no wantem lesingud long problem blong hem. Long tingting blong mi, Brata Rutherford i mekem i rong. Ale, wan Sande, sista blong mi Mary mo hasban blong hem, Dan Pestrui, tufala i kam luk mifala. Afta we mifala i kakae finis, Dan i talem se: “Ale, yumi rere nao blong go long miting.”

Mi talem se: “Mifala i no moa go long ol miting. Mifala i kros long Brata Rutherford.”

Dan i taetem tufala han blong hem biaen long baksaed blong hem, i wokbaot i go i kam, nao i talem se: “?Yu yu save Brata Rutherford taem yu tekem baptaes?”

Mi ansa se: “No gat. Yu save finis se mi mi baptaes long Romania.”

Hem i askem se: “?From wanem yu yu baptaes?”

Mi ansa se: “From we mi kasem save se Jeova hem i trufala God, mo mi wantem givim laef blong mi long hem blong mekem wok blong hem.”

Hem i ansa se: “!Neva fogetem samting ya! ?Olsem wanem sipos Brata Rutherford i lego trutok? ?Bambae yu tu yu lego?”

Mi talem se: “!No gat, bambae mi neva mekem olsem!” Samting ya i mekem mi mi tingting, nao mi talem se: “Ale, yumi rere, bambae yumi evriwan i go long miting.” Mo mifala i no lego ol miting kam kasem tede. !Mi tangkyu tumas long Jeova from fasin stretem we hasban blong sista blong mi i givim long mi wetem lav!

Stanap Strong Long Depresen

Long taem blong Depresenb long ol yia biaen long 1930, laef i had. Wan dei, George i kambak long wok we i harem nogud tumas. Hem i talem long mi se hem i lusum wok blong hem long wan faktri blong wokem kaojuk. Mi talem se: “Yu no wari, yumi gat wan Papa long heven we i rij tumas, mo hem bambae i no save lego yumi.”

Long sem dei ya, George i mitim wan fren. Fren ya i stap karem wan bigfala basket we i fulap long ol masrum. Taem George i faenemaot weples nao fren blong hem i pikimap ol masrum ya, hem i kambak long haos wetem wan bigfala bokis we i fulap long ol masrum. Afta, hem i spenem laswan mane blong mifala, hemia tri dola, blong pem sam smol basket. Mi askem se, “?Olsem wanem yu save mekem olsem? Yu yu save se ol smol gel blong yumitu oli nidim melek.”

Hem i ansa se: “Yu no wari, yu jes mekem samting we mi talem.” Long ol wik we oli kam biaen, haos blong mifala i kam olsem wan smol faktri. Mifala i stap klinim ol masrum mo putum olgeta long ol smol basket ya. Mifala i salem olgeta long ol restoron we oli flas lelebet. Ale, evri dei, mifala i karem 30 kasem 40 dola i kambak long haos. Long taem ya, hemia bigfala mane tumas. Man we i givim raet long mifala blong go pikimap ol masrum long graon blong hem, i talem se hem i laef long ples ya 25 yia finis, be hem i neva luk plante masrum olsemia. I no longtaem biaen, faktri blong wokem kaojuk i singaotem George i gobak blong wok long ples ya.

Holemtaet Bilif Blong Mifala

Long 1943, mifala i muf i go long Los Enjeles, Kalifonia. Fo yia biaen, mifala i go stap long Elsino. Mifala i openem wan smol stoa long ples ya, mo ol wanwan memba blong famle oli gat stret taem blong olgeta blong wok long stoa ya. Long taem ya, Elsino i jes wan smol taon wetem samwe long 2,000 man, mo mifala i mas wokbaot 30 kilomita go kasem wan narafala taon, blong go long ol Kristin miting. !Mi mi glad tumas blong luk se long 1950 wan smol kongregesen i stat long Elsino! Naoia i gat 13 kongregesen long ples ya.

Long 1950, gel blong mifala, Goldie Elizabeth (we plante man oli singaotem hem se Beth) i finisim kos blong hem long Wajtaoa Baebol Skul blong Gilead long Saot Lansing, Nyu Yok, mo oli sanem hem i go long Veneswela olsem wan misinari. Long 1955, laswan gel blong mitufala, Irene, i glad tumas, from we Sosaeti i singaot hasban blong hem blong mekem wok blong seket elda. Ale, long 1961, afta we tufala i go long Kingdom Ministri Skul long Saot Lansing, Nyu Yok, tufala i go long Taelan. Sam samtaem mi sore long ol gel blong mi tumas, mekem se mi krae. Be afta, mi tingting se, ‘Hemia nao samting we mi mi wantem olgeta blong mekem.’ Ale, mi karem basket blong mi, mo mi go prij. Oltaem, mi glad tumas taem mi kambak long haos.

Long 1966, gudfala hasban blong mi, George, i kasem sik ya we wan saed bodi i ded. Beth, we i kambak finis long Veneswela from we hem i sik, i halpem mi blong lukaot long hem. George i ded wan yia biaen. Samting we i leftemap tingting blong mi hemia se, hem i stap tru long Jeova, mo naoia hem i kasem praes blong hem long heven. Afta long samting ya, Beth i go long Spen blong wok long ples we i nidim moa man blong talemaot Kingdom. Fasbon gel blong mi, Esther, hem i sik from kansa mo i ded long 1977. Long 1984, Anne i ded from sik ya lukimia. Tufala tugeta i bin holemstrong long wok blong Jeova long ful laef blong tufala.

Taem we Anne i ded, Beth mo Irene tufala i kambak finis long ol narafala kantri we tufala i stap prij long olgeta. Tufala i givhan blong lukaot long tufala sista blong tufala, mo mifala evriwan i harem nogud tumas taem tufala ya i ded. Afta we smoltaem i pas, mi talem long tufala gel blong mi se: “!Ale, i naf nao! Yumi leftemap tingting blong ol narafala wetem ol nambawan promes blong Baebol. Naoia, yumi mas letem ol promes ya oli leftemap tingting blong yumi. Setan i wantem nomo blong karemaot glad we yumi gat long wok blong Jeova, be yumi no mas letem hem i mekem olsem.”

Famle Blong Mifala Long Romania We i Holem Strong Bilif

Long 1970, mi mo sista blong mi, Mary, mitufala i mekem wan trep i gobak long Romania blong visitim ol famle blong mifala. Wan long ol sista blong mitufala i ded finis. Be mitufala i gat jans blong visitim brata blong mitufala, John, mo sista blong mitufala Lodovica, we oli laef yet long velej blong Otolek. Long taem we mitufala i go longwe, Papa mo Mama tufala i ded finis. Tufala i bin holemstrong long Jeova kam kasem we tufala i ded. Plante man oli talem long mitufala se Papa i rili wan strongfala ston we i sapotemgud kongregesen. Sam long ol smol bubu blong hem long Romania tu, oli Wetnes naoia. Mo tu, mifala i visitim sam famle blong hasban blong mi we oli bin stanap strong long saed blong trutok blong Baebol.

Long 1970, Romania i kam aninit long rabis rul blong Nicolae Ceauşescu we hem i wan Komunis, mo oli mekem nogud tumas long ol Wetnes blong Jeova. Pikinini boe blong brata blong mi John, we nem blong hem Flore, wetem sam narafala famle blong mi tu, oli spenem plante yia long ol rabis kalabus from Kristin bilif blong olgeta. Samting ya i sem mak long kasen brata blong man blong mi, Gabor Romocean. !From samting ya, mitufala i luksave klia from wanem ol Wetnes long Romania oli wari, taem mitufala i karem sam leta we ol brata oli givim long mitufala oli goaot long Romania, blong go long hedkwota blong ol Wetnes blong Jeova long Nyu Yok. !Oli talem se, bambae oli wari gogo oli harem nyus se mitufala i aot long kantri finis we mitufala i no kasem trabol!

Taem mitufala i luksave se namba blong ol dei we i stap long visa blong mitufala i finis finis, mitufala i go long gavman ofis long Otelek. Hemia Fraede aftenun, mo i gat wan man nomo i stap wok. Taem hem i harem nem blong famle we mitufala i kam blong visitim olgeta, mo se boe blong brata blong mitufala i bin stap long rabis kalabus, hem i talem se: “!Misis, yutufala i mas aot long ples ya kwiktaem nomo!”

Sista blong mi i ansa se: “Be i no gat wan tren we i aot tede.”

Hem i talem kwik se: “Hemia i nating ya. Karem bas. Karem taksi. Wokbaot long leg. !Eni samting, be yutufala i mas aot long ples ya kwiktaem!”

Taem mitufala i tanraon blong go, hem i singaotem mitufala blong talem se i gat wan tren blong ol soldia bambae i pastru long ples ya raonabaot 6 klok long naet. !Hemia i wok blong God nomo ya! Long ol narafala tren, bambae oli jekem ol pepa blong mitufala plante taem. Be from we tren ya i blong ol soldia mo mitufala tu nomo i stap long hem we mitufala i no joen long ami, i no gat wan man we i askem blong luk paspot blong mitufala. Maet oli ting se mitufala i olfala bubu blong sam soldia long tren ya.

Long nekis moning, mifala i kasem Timisora, mo wan fren blong famle blong mitufala i halpem mitufala blong stretem visa blong mitufala. Long nekis dei, mitufala i aot long kantri. Mitufala i karem i kambak wetem mitufala plante gudfala memori blong ol Kristin brata mo sista long Romania we oli stap tru oltaem long God.

Long ol yia afta long trep ya blong mitufala long Romania, mifala i no kasem plante nyus long saed blong wok blong prij we i stap gohed biaen long bigfala Wol blong aean we i blokem kantri ya. Nating se i olsem, mifala i gat strong tingting se ol Kristin brata mo sista blong mifala bambae oli stap tru long God blong yumi​—nomata wanem samting i kasem olgeta. !Mo hemia nao samting we i hapen! !Mifala i glad tumas blong harem se gavman blong Romania i luksave ol Wetnes blong Jeova olsem wan skul long Epril 1990! Long hot taem we i kam biaen, mifala i glad tumas blong kasem nyus long saed blong ol asembli we ol Wetnes oli mekem long Romania. !Yes, i gat bitim 34,000 man oli kam long eit defren taon, mo 2,260 man oli baptaes! Naoia i gat bitim 35,000 man we oli mekem wok blong prij long Romania, mo las yia 86,034 oli kam long Memoriol blong ded blong Kraes.

Trutok i Sas Yet Long Mi

Blong sam yia, mi no moa dring waen mo kakae bred we i joen wetem Memoriol. Mi luk se ol brata we oli gat gudhan long wok blong Jeova, oli no stap tekem bred mo waen ya, taswe tingting blong mi se: ‘?From wanem nao Jeova bambae i givim jans long mi blong joen wetem Pikinini blong hem long heven, taem ol man ya oli stap we oli save toktok moa gud bitim mi?’ Be, taem mi no tekem bred mo waen, tingting blong mi i trabol. I olsem se mi stap tanem baksaed long wan samting. Afta we mi stadi plante mo prea, mi stat blong tekem bred mo waen bakegen. Ale, pis mo glad blong mi i kambak bakegen, mo i gohed kam kasem naoia.

Nating se naoia mi no moa save luklukgud blong rid, evri dei mi lesin long ol kaset long saed blong Baebol mo ol Wajtaoa mo Wekap! Mo tu, mi stap joen long wok blong prij yet. Kolosap evri manis, mi seremaot samwe long 60 kasem 100 Wajtaoa mo Wekap! Taem mifala i mekem spesel wok blong seremaot Wekap! long Epril las yia, mi seremaot 323. Wetem help blong tufala gel blong mi, mi mi naf yet blong mekem tok long Tiokratik Skul tu. Mi mi glad se mi save gohed blong leftemap tingting blong ol narafala. Kolosap olgeta man long Haos Kingdom oli singaot mi se Abu.

Taem mi luklukbak long ol 79 yia we mi givim i go long Jeova blong mekem wok blong hem, mi mi tangkyu long hem evri dei we hem i givim jans long mi blong save ol nambawan trutok blong hem, mo blong yusum laef blong mi long wok blong hem. Mi mi tangkyu tumas we mi laef kam kasem tede, mo mi save luk ol nambawan profet tok blong Baebol oli kamtru, we oli talemaot bigfala wok blong hivimap olgeta man we oli olsem sipsip blong God, long ol las dei ya.​—Aesea 60:22; Sekaraea 8:​23.

[Ol futnot]

[Tok blong pija long pej 23]

Mi, George, mo tufala gel blong mitufala, Esther mo Anne, wetem sista blong mi Mary, mo Papa, we tufala i stap stanap

[Tok blong pija long pej 24]

Mi wetem tufala gel blong mi Beth mo Irene, mo hasban blong Irene wetem tufala smol boe blong tufala, we olgeta evriwan oli gohed strong yet long wok blong Jeova