!Wan Tokhaed We Ol Kristin Oli No Mas Haedem!
“Mi mi stap talem tok blong mi long fes blong olgeta man. Mi mi no talem tok blong mi long bak blong ol man.”—JON 18:20.
1, 2. ?Wanem mining blong Grik tok ya my·steʹri·on olsem we Baebol i yusum?
Long New World Translation of the Holy Scriptures, 25 taem oli tanem Grik tok ya my·steʹri·on i kam “tabu tokhaed,” mo 3 taem oli tanem i kam “samting we man i no save long hem.” !Wan tokhaed we i tabu, ating hem i impoten tumas! Eniman we i gat jans blong save wan tokhaed olsem, i mas harem se hem i kasem wan spesel ona. Yes, i olsem we man ya i naf, blong Haefala God ya blong heven mo wol i talemaot wan tokhaed long hem.
2 Buk ya, Expository Dictionary of Old and New Testament Words, we Masta Vine i raetem, i soemaot klia se plante taem i moa stret blong tanem Grik tok ya i kam “tabu tokhaed,” i bitim we yumi tanem i kam “samting we man i no save long hem.” Buk ya i talem long saed blong tok ya my·steʹri·on se: “Long [Kristin Grik haf blong Baebol] tok ya i no minim samting we man i no save long hem, (olsem mining blong Eng[glis] tok ya mystery). Be hem i minim samting we tingting blong man i no naf blong kasem save long hem sipos i no kasem help, mo we i save kam klia nomo sipos God i talemaot. Hem i save kam klia long wan fasin mo taem we God nomo i jusum. Mo, olgeta we Speret blong Hem nomo i givim save long olgeta, bambae oli kasem save long hem. Kolosap oltaem, ‘samting we man i no save long hem,’ i minim se wan man i gat save long samting ya be hem i no wantem talemaot long ol narafala. Taem Baebol i yusum tok ya, hem i minim trutok we i kam long klia ples. Taswe, ol tok we plante taem yumi joenem wetem ‘samting we man i no save long hem,’ hemia ‘mekem man i save,’ ‘kam klia,’ ‘soemaot,’ ‘talemaot,’ ‘kasem save,’ mo ‘givimaot.’ ”
3. ?Olsem wanem Kristin kongregesen blong faswan handred yia i defren long sam narafala grup blong skul we oli wok haed?
3 Buk ya i soemaot olsem wanem ol narakaen grup blong skul we oli kam antap bigwan long faswan handred yia mo we oli wok haed, oli defren olgeta long nyufala Kristin kongregesen we i jes stanap long taem ya. Plante taem, ol man we oli joen long ol skul ya we oli wok haed, oli mas mekem wan promes se bambae oli no tokbaot ol tijing blong skul blong olgeta. Ol Kristin oli neva gat wan rul we i blokem olgeta olsem. I tru se aposol Pol i tokbaot ‘waes blong God long wan tabu tokhaed.’ Hem i kolem samting ya se ‘waes we i haed.’ Waes ya i haed long ol “haeman blong wol ya,” be i no long ol Kristin. God i talemaot tokhaed ya long olgeta tru long speret blong hem, blong bambae oli save talemaot long olgeta man.—1 Korin 2:7-12; skelem wetem Proveb 1:20.
‘Tabu Tokhaed’ i Kam Klia
4. ?‘Tabu tokhaed ya’ i stanap long hu, mo olsem wanem?
4 “Tabu tokhaed” blong Jeova i stanap long Jisas Kraes. Pol i raetem se: ‘Jeova i haremgud blong soemaot long yumi, tabu tokhaed blong hem long saed blong samting we hem i wantem mekem. Folem tingting blong hem, hem i wantem putumap wan rod blong lukaot long ol samting, long en blong stret taem we hem i makemaot. Hem i wantem se olgeta samting oli kam joen wanples long Kraes, olgeta samting long heven mo olgeta samting long wol. Yes long Kraes nomo.’ (Efesas 1:9, 10) Pol i eksplenem ‘tabu tokhaed ya’ long fasin we i klia moa, taem hem i talem se man i nidim ‘stret save long saed blong tabu tokhaed blong God, hemia Kraes nomo.’—Kolosi 2:2.
5. ?Wanem samting i joen wetem ‘tabu tokhaed ya’?
5 Be, i gat sam samting moa long ‘tabu tokhaed ya,’ from we hem i wan tokhaed we i gat plante haf blong hem. Hem i no jes minim se Jisas nao hem i Laen no Mesaea we God i promes blong sanem. Hem i minim tu, wok we Jisas i mas mekem folem stampa tingting blong God. Mo tu, hem i joen wetem wan gavman long heven, hemia Kingdom blong God mo Mesaea blong hem. Jisas i eksplenem samting ya i klia nomo, taem hem i talem long ol disaepol blong hem se: “Yufala ya, God i openem rod long yufala blong yufala i save ol tok haed blong fasin ya we hem i stap kam king blong ol man blong hem. Be olgeta ya, hem i no openem rod long olgeta olsem.”—Matyu 13:11.
6. (a) ?From wanem i stret nomo blong talem se ‘tabu tokhaed ya’ hem i “stap haed longtaem finis”? (b) ?Olsem wanem sloslou, God i talemaot tokhaed ya?
6 Wan longfala taem i mas pas, stat long faswan taem we God i tokbaot stampa tingting blong hem blong stanemap wan faondesen blong Kingdom blong Mesaea, go kasem taem we ‘tabu tokhaed ya i kamtru fulwan.’ (Revelesen 10:7; Jenesis 3:15) Taem yumi skelem Revelesen 10:7 wetem Revelesen 11:15, ol vas ya oli soem se tokhaed ya bambae i kamtru fulwan taem Kingdom i stanap. Yes, samwe long 4,000 yia oli pas, stat long taem we faswan promes blong Kingdom i kamaot long Iden, go kasem 29 K.T., yia we Man ya we God i makemaot hem blong kam King, i kamtru. Ale, 1,885 moa yia oli pas bifo we Kingdom i stanap long heven long 1914. Taswe, i tekem kolosap 6,000 yia blong God i talemaot sloslou, “tabu tokhaed” ya. (Lukluk pej 16.) Yes, Pol i talem i stret nomo taem hem i tokbaot ‘tabu tok haed ya we i stap haed longtaem finis, mo we naoia God i soemaot, mo i kamtru long klia ples.’—Rom 16:25-27; Efesas 3:4-11.
7. ?From wanem yumi save trastem fulwan grup ya blong slef we i stret mo waes?
7 Jeova i defren olgeta long ol man we laef blong olgeta i sot nomo. Jeova i neva harem se taem i sot tumas nao hem i mas spid blong soemaot olgeta tokhaed blong hem bifo long stret taem blong olgeta. No gat. Samting ya i mas pusum yumi tu blong gat longfala tingting, taem yumi no kasem ansa long sam kwestin blong Baebol kwiktaem, olsem yumi wantem. Slef we i stret mo waes, we i kasem wok ya blong givim kakae long Kristin kongregesen long stret taem, i gat tingtingdaon. From samting ya, hem i no traem eksplenem fastaem ol samting we oli no klia yet, folem prapa tingting blong hem. Grup we i olsem slef ya, i lukaotgud blong no traem mekem olsem we hem i save evri samting finis. Hem i no gat flas tingting. Hem i talemaot stret se hem i no gat ansa blong evri kwestin yet. Hem i no fogetem tok blong Proveb 4:18. !Be yumi glad tumas blong save se, long stret taem blong Jeova mo long rod we hem i wantem yusum, bambae hem i gohed blong soemaot ol tokhaed long saed blong ol stampa tingting blong hem! Yumi mas gat longfala tingting mo wet long olgeta we Jeova i stap yusum blong soemaot ol samting ya. Yumi neva mas traem go fastaem long Bigfala Man ya blong talemaot ol tokhaed. !Yumi haremgud blong save se grup we Jeova i stap yusum tede, oli no gat fasin ya! Yes, grup ya i stret mo i waes.—Matyu 24:45; 1 Korin 4:6.
!Yumi Mas Talemaot Tokhaed Ya We God i Soemaot!
8. ?Olsem wanem yumi save se ‘tabu tokhaed ya’ i mas kam klia long olgeta man?
8 Jeova i no soemaot ‘tabu tokhaed ya’ long ol Kristin blong bambae oli haedem bakegen. Oli mas mekem ol man oli save long hem. Hemia i laenap wetem rul we Jisas i stanemap, we olgeta man blong hem oli mas folem—i no jes samfala lida blong skul nomo: “Yufala i olsem laet long ol man long wol. Taem ol man oli wokem velej blong olgeta antap long wan hil, oli no save haedem velej ya. Mo i no gat man we i laetem laet, nao i kavremap long wan baket. Taem man i laetem laet, i mas putum i stap antap, long ples blong laet, nao olgeta long haos i gat laet. Nao long sem fasin, yufala i mas letem laet blong yufala i saenaot i kasem ol man, blong oli save luk ol gudgudfala wok we yufala i stap mekem. Nao bambae ol man ya oli save leftemap nem blong Papa blong yufala, we i stap long heven.”—Matyu 5:14-16; 28:19, 20.
9. ?Wanem i pruvum se Jisas i no wan man we i girap agensem gavman, olsem we samfala oli talem?
9 Jisas i no wan rebel we i girap agensem gavman, wetem strong tingting blong putumap wan grup blong man blong folem hem, we oli wok long fasin haed mo oli traem kasem ol mak we oli no wantem talemaot. Long buk ya, Early Christianity and Society, Robert M. Grant i tokbaot Justin Martyr we i laef long ol yia 100 kasem 200, mo ol tok we hem i talem blong sapotem ol faswan Kristin. Hem i se: “Sipos i tru se ol Kristin oli ol man we oli girap agensem gavman, ale, i klia se bambae oli haed blong kasem mak blong olgeta.” Be ?olsem wanem ol Kristin oli save “haed,” mo long semtaem, stap olsem wan “velej . . . antap long wan hil”? !Olgeta ya oli no gat tingting nating blong haedem laet blong olgeta aninit long wan baket! Taswe, gavman i no gat risen blong fraet long wok blong olgeta. Man we i raetem buk ya i gohed blong tokbaot olgeta se: “Oli ol beswan wokman blong hed gavman from we oli sapotem pis mo oda.”
10. ?From wanem ol Kristin oli no mas haedem nem mo wok blong olgeta?
10 Jisas i no wantem ol disaepol blong hem blong haedem nem blong olgeta olsem se oli memba blong wan krangke skul we i wok haed. (Ol Wok 24:14; 28:22) Sipos yumi no mekem laet blong yumi i saenaot tede, bambae yumi mekem Kraes mo Papa blong hem, we i Man blong talemaot ol tokhaed, oli harem nogud long yumi, mo bambae yumi harem nogud tu.
11, 12. (a) ?From wanem Jeova i wantem se olgeta man oli mas save long Kristin fasin mo bilif? (b) ?Olsem wanem Jisas i soemaot gudfala eksampel long saed ya?
11 Jeova ‘i no wantem blong ol man oli lus, be hem i wantem blong olgeta man bambae oli tanem tingting blong olgeta from ol sin blong olgeta.’ (2 Pita 3:9; Esikel 18:23; 33:11; Ol Wok 17:30) Stampa samting we i mekem se wan man i save kasem fogif afta we i tanem tingting blong hem from ol sin, hemia bilif long sakrifaes blong Jisas Kraes. Hem i givim laef blong hem blong pemaot olgeta man—i no jes sam man nomo—blong ‘olgeta man we oli bilif long hem bambae oli no save lus, oli gat laef we i no save finis.’ (Jon 3:16) I impoten tumas blong halpem ol man blong mekem ol samting we oli mas mekem naoia, blong oli kam naf blong stap wetem ol sipsip, i no wetem ol nani, long taem blong jajmen we i stap kam.—Matyu 25:31-46.
12 Trufala Kristin skul i no mas stap haed. Yumi mas yusum olgeta rod we oli stret, blong mekem hem i kam klia long fored blong olgeta man. Jisas hem wan i soemaot gudfala eksampel. Taem ol jif pris oli askem kwestin long hem long saed blong ol disaepol blong hem mo tijing blong hem, hem i talem se: “Mi mi stap talem tok blong mi long fes blong olgeta man. Oltaem mi stap tijim ol man insaed long ol haos blong prea mo insaed long haos blong God, we olgeta man Isrel oli stap kam oltaem. Mi mi no talem tok blong mi long bak blong ol man.” (Jon 18:19, 20) Taem yumi tingbaot eksampel ya, ?yu ting se wan man we i fraetgud long God i save haedem ol tok we God i talem se yumi mas talemaot long ol man? ?Hu man we bambae i no fraet blong haedem ‘ki blong doa blong haos we save i stap insaed long hem,’ save ya blong lidim man blong kasem laef blong olwe? Sipos wan man i mekem olsem, hem i sem mak nomo long ol man blong skul long faswan handred yia, we oli gat tu fes.—Luk 11:52; Jon 17:3.
13. ?From wanem yumi mas prij long evri jans we yumi gat?
13 !I neva mas gat wan man we i save talem se yumi ol Wetnes blong Jeova yumi bin haedem mesej blong Kingdom blong God! Nating sipos ol man oli lesin no oli no lesin, be evri man i mas save se yumi talemaot mesej ya finis. (Skelem wetem Esikel 2:5; 33:33.) Taswe, i gud we yumi yusumgud olgeta jans we yumi kasem blong tokbaot mesej blong trutok long olgeta man, nomata weples yumi mitim olgeta.
Putum Huk Long Maot Blong Setan
14. ?From wanem yumi no mas fraet blong soemaot wosip blong yumi long klia ples?
14 Long plante ples naoia, ol nyuspepa, radyo mo televisen, oli stap tokbaot ol Wetnes blong Jeova moa. Olsem ol man oli bin mekem long ol faswan Kristin bifo, plante man tede tu oli daonem mo tok nogud long saed blong ol Wetnes, se oli sem mak nomo long ol smosmol krangke grup blong skul, mo ol grup we oli wok haed. (Ol Wok 28:22) ?Ating fasin blong yumi blong prij long open ples i mekem se i moa isi long ol man blong girap agensem yumi? I tru se yumi no mas mekem wan rao i kamaot blong nating nomo. Hemia i no waes mo i no folem advaes blong Jisas tu. (Proveb 26:17; Matyu 10:16) Be, yumi no mas haedem gudfala wok ya blong talemaot Kingdom, mo blong halpem ol man blong mekem laef blong olgeta i kamgud moa. Wok ya i givim ona long Jeova, i leftemap nem blong hem i go antap olgeta, mo i pulum ol man blong lukluk i go long hem mo long Kingdom blong hem we i stanap finis. Ol gudfala frut i stap kamaot long Is Yurop mo sam ples blong Afrika naoia. Plante man oli stap lesin long trutok blong Baebol. Wan risen blong samting ya, se naoia oli letem yumi i fri moa long ol ples ya, blong talemaot trutok i klia nomo.
15, 16. (a) ?Wanem samting i save kamaot from fasin blong yumi blong wok long open ples mo from we yumi rij long saed blong speret? ?Yumi mas wari from? (b) ?From wanem Jeova i putum huk long maot blong Setan?
15 Yes, olgeta man oli luksave wok blong prij, we ol Wetnes blong Jeova oli mekem long klia ples. Oli luksave tu, paradaes long saed blong speret we ol Wetnes oli haremgud long hem, mo olgeta rij samting we oli gat—hemia bigfala hif man we oli joen wetem olgeta, mo ol sas samting we oli gat. Ol samting ya oli save pulum ol man we hat blong olgeta i gud, be maet oli mekem ol man blong agens oli kros moa. (2 Korin 2:14-17) Yes, long fyuja, maet ol samting ya i pulum ol man blong Setan blong girap agensem ol man blong God.
16 ?Hemia i mas mekem yumi wari? No gat. Profet tok blong Jeova long Esikel japta 38 i soemaot se yumi no nid blong wari. Hem i tokbaot Gog blong Magog, hemia Setan, afta we oli sakemaot hem long heven i kamdaon long wol, taem Kingdom i stanap long 1914. Hem bambae i lidim ol man blong faet agensem ol man blong God. (Revelesen 12:7-9) Jeova i talem long Gog se: “Yu mas talem se: ‘Bambae mi mi girap agensem kantri ya we i olsem wan open ples long bus nomo. Bambae mi kam agensem olgeta we i no gat trabol i stap spolem olgeta, we oli stap sefgud. I no gat wan stonwol i stap raon long olgeta, mo i no gat ol aean mo doa tu.’ Bambae yu traem blong kasem plante sas samting blong olgeta mo stilim olting blong olgeta. Bambae yu pusum han blong yu i gobak agensem ol ples we yu spolem olgeta fastaem finis, we naoia ol man oli stap long olgeta bakegen. Bambae yu girap agensem ol man we oli kamaot long ol nesen finis, oli hivap wanples. Hemia olgeta we oli stap hivimap ol rij samting mo graon, olgeta we oli stap long medel blong wol.” (Esikel 38:11, 12) Be, vas 4 i soem se ol man blong God oli no nidim blong fraet long faet ya, from we Jeova nao i stap mekem samting ya i kamaot. ?From wanem God bambae i letem—yes, i pusum—ol enemi ya blong faet agensem ol man blong hem fulwan? Long vas 23, yumi ridim ansa blong Jeova se: “Tru ya, bambae mi mi mekem we nem blong mi i kam hae we i hae, i tabu. Bambae mi soemaot wok blong mi long fored blong plante nesen. Mo bambae oli savegud se mi mi Jeova.”—Esikel 38:4.
17. ?Yumi mas gat wanem tingting long saed blong faet we bambae Gog i mekem long yumi i no longtaem?
17 Taswe, ol man blong Jeova oli no fraet long faet we Gog bambae i mekem long olgeta. Defren nao, oli lukluk i go long taem ya long fyuja wetem glad, from we wan narafala profet tok blong Baebol bambae i kamtru. !Yumi glad tumas blong save se taem Jeova i givim plante samting long ol man blong hem long wol mo i blesem olgeta, i olsem we hem i stap putum huk long maot blong Setan, blong pulum hem mo ol ami blong hem oli go blong lus long faet!
!Moa Naoia i Bitim Bifo!
18. (a) ?Plante man oli stat luksave wanem samting naoia, mo from wanem? (b) ?Olsem wanem fasin we ol man oli soemaot taem yumi talemaot Kingdom long olgeta, i save pusum yumi bigwan?
18 Long taem blong yumi, ol Wetnes blong Jeova oli talemaot klia nomo ol bilif blong olgeta we oli stanap long Baebol, nating se maet plante man oli no agri long olgeta. Plante yia finis, oli bin givim woning long saed blong ol trabol we i save kamaot from fasin blong smok mo yusum drag, fasin blong letem pikinini i mekem enikaen samting nomo we hem i wantem, ol nogud frut blong ol pleplei mo sinema we oli fulap long doti fasin blong seks mo raf fasin, mo denja blong tekem blad blong narafala man i kam long bodi blong yumi. Mo tu, oli bin soemaot klia se plante tingting long saed blong evolusena oli no laenapgud. Plante moa man naoia oli stap talem se: “Ol Wetnes blong Jeova oli stap talem i tru nomo.” Sipos yumi no bin talemaot ol tingting blong yumi klia nomo long olgeta man ya, oli no save talem tok olsem. Mo yumi mas luksave tu se, taem ol man ya oli talem tok olsem, oli stat blong kam kolosap moa long mak ya we bambae oli talem se: “Setan, yu yu wan man blong gyaman. Jeova nomo i tru.” !Hemia i mas pusum yumi bigwan, blong gohed blong folem eksampel blong Jisas, mo talemaot trutok long fored blong olgeta man!—Proveb 27:11.
19, 20. (a) ?Wanem strong tingting we ol man blong Jeova oli soemaot long 1922, mo ol tok ya oli stret yet long taem blong yumi? (b) ?Yumi mas gat wanem tingting long saed blong ‘tabu tokhaed ya’ blong Jeova?
19 Ol man blong Jeova oli kasem save longtaem finis se oli mas mekem impoten wok ya. Long wan bigfala asembli long 1922, J. F. Rutherford, we hem i presiden blong Watch Tower Sosaeti long taem ya, i mekem olgeta man we oli lesin long hem oli glad tumas, taem hem i talem se: “Yufala i mas tinghevi long wok blong God, yufala i mas stap wekap, yufala i mas wok strong, yufala i no mas fraet. Yufala i mas stap olsem ol trufala wetnes blong Masta, we yufala i gat strong bilif. Gohed blong faet gogo olgeta haf blong Babilon evriwan oli kam olsem ples nating nomo. Talemaot mesej ya long ol ples farawe. Olgeta man long wol oli mas save se Jeova hem i God, mo se Jisas Kraes hem i King blong ol king mo Masta blong ol masta. Naoia yumi stap long taem we i impoten moa bitim ol narafala taem. !Yufala i luk, King i stap rul finis! Yufala nao i man we hem i yusum blong talemaot hem long olgeta man. Taswe talemaot, talemaot, talemaot, King ya mo kingdom blong hem.”
20 Ol tok ya oli impoten tumas long 1922. Be 75 moa yia oli pas finis kam kasem taem ya blong yumi. !Taswe, ol tok ya oli impoten moa naoia, from we taem ya we Kraes bambae i kam olsem Jaj mo Man blong Givimbak, i moa kolosap! Mesej long saed blong Kingdom blong Jeova we i stanap finis, mo paradaes long saed blong speret we ol man blong God oli stap haremgud long hem naoia, hem i wan ‘tabu tokhaed’ we i nambawan tumas. Yumi no save haedem. Jisas hem wan i talemaot klia se, wetem help blong tabu speret, ol man blong hem oli mas wetnes ‘gogo oli finisim olgeta ples long wol.’ Bambae oli talemaot bigfala wok we hem i mekem folem stampa tingting blong Jeova, we i no save finis samtaem. (Ol Wok 1:8; Efesas 3:8-12) !Yes, yumi ya, we yumi ol man blong wok blong Jeova, God ya we i stap talemaot ol tokhaed, yumi no mas haedem tok ya!
[Futnot]
a Bilif ya se laef i stat long wan smol samting mo i stap jenis gogo i mekem olgeta laef samting.
?Bambae Yu Yu Ansa Olsem Wanem?
◻ ?Wanem ya ‘tabu tokhaed’?
◻ ?Olsem wanem yumi save se yumi mas talemaot tokhaed ya long olgeta man?
◻ ?Wanem bambae i pulum Gog blong kam agensem ol man blong Jeova, mo yumi mas gat wanem tingting long saed ya?
◻ ?Yumi wanwan i mas gat strong tingting blong mekem wanem?
[Bokis blong pija long pej 16]
Wan ‘Tabu Tokhaed’ We Sloslou i Kam Klia
◻ Afta 4026 B.K.T.: God i promes blong stanemap wan Laen we bambae i spolem Setan.—Jenesis 3:15
◻ 1943 B.K.T.: Kontrak wetem Ebraham i stanap, se Laen ya bambae i kamaot long hem.—Jenesis 12:1-7
◻ 1918 B.K.T.: Aesak i bon mo kontrak i pas i go long hem.—Jenesis 17:19; 21:1-5
◻ Raonabaot 1761 B.K.T.: Jeova i talem klia se Laen ya bambae i kamaot long pikinini blong Aesak, hemia Jekob.—Jenesis 28:10-15
◻ 1711 B.K.T.: Jekob i talem se Laen ya bambae i kamaot long pikinini blong hem, Juda.—Jenesis 49:10
◻ 1070-1038 B.K.T.: King Deved i faenemaot se wan smol bubu blong hem nao bambae hem i Laen ya, mo bambae hem i rul blong olwe olsem King.—2 Samuel 7:13-16; Ol Sam 89:35, 36
◻ 29-33 K.T.: I kam klia se Jisas nao hem i Laen ya, hem i Mesaea, Man we bambae i jajem ol man long fyuja, mo King we God i jusumaot.—Jon 1:17; 4:25, 26; Ol Wok 10:42, 43; 2 Korin 1:20; 1 Timote 3:16
◻ Jisas i talemaot se bambae i gat sam narafala man oli rul mo jaj wetem hem, se bambae i gat ol man long wol we oli obei long Kingdom blong hem long heven, mo se olgeta man blong hem oli mas talemaot Kingdom ya.—Matyu 5:3-5; 6:10; 28:19, 20; Luk 10:1-9; 12:32; 22:29, 30; Jon 10:16; 14:2, 3
◻ Jisas i soemaot se Kingdom ya bambae i stanap long wan stret taem, mo ol samting we oli hapen long wol bambae oli olsem saen blong samting ya.—Matyu 24:3-22; Luk 21:24
◻ 36 K.T.: Pita i kasem save se sam man we oli no man Jyu, olgeta tu bambae oli rul long Kingdom.—Ol Wok 10:30-48
◻ 55 K.T.: Pol i eksplenem se afta we Kraes i kam King, ol man we bambae oli rul wetem hem long Kingdom oli mas laef bakegen long heven, mo oli no save ded bakegen samtaem.—1 Korin 15:51-54
◻ 96 K.T.: Jisas, we long taem ya i stap rul finis antap long ol man blong hem we tabu speret i makemaot olgeta, i talemaot se fulnamba blong olgeta ya we oli rul wetem hem, hemia 144,000.—Efesas 5:32; Kolosi 1:13-20; Revelesen 1:1; 14:1-3
◻ 1879 K.T.: Zion’s Watch Tower i poen i go long 1914 olsem yia we bambae i impoten tumas blong mekem ‘tabu tokhaed’ blong God i kamtru
◻ 1925 K.T.: Wajtaoa i eksplenem se Kingdom i stanap long 1914, mo se olgeta man oli mas save ‘tabu tokhaed’ ya long saed blong Kingdom.—Revelesen 12:1-5, 10, 17
[Tok blong pija long pej 15]
Ol Wetnes blong Jeova oli talemaot Kingdom blong Jeova long olgeta man, olsem Lida blong olgeta, Jisas, i bin mekem